മരട് അനീഷിനു നേരെ ജയിലിൽ വധശ്രമം; ബ്ലേഡ് കൊണ്ട് ആക്രമണം
Monday, November 20, 2023 2:45 PM IST
തൃശൂര്: വിയ്യൂര് സെന്ട്രല് ജയിലിൽ കുപ്രസിദ്ധ ഗുണ്ടാത്തലവന് മരട് അനീഷിന് നേരെ വധശ്രമം. സഹതടവുകാരനായ അമ്പായത്തോട് സ്വദേശിയായ അഷ്റഫ് ഹുസൈനാണ് ഷേവിംഗ് ബ്ലേഡ് കൊണ്ട് അനീഷിനെ ആക്രമിച്ചത്. തലയിലും മുഖത്തും ശരീരത്തിലും മുറിവേറ്റ അനീഷിനെ മെഡിക്കല് കോളജ് ആശുപത്രിയിലേക്ക് മാറ്റി.
വിയ്യൂർ സെൻട്രൽ ജയിലിലെ ആശുപത്രി ബ്ലോക്കിലായിരുന്നു മരട് അനീഷിനെ പാര്പ്പിച്ചിരുന്നത്. രാവിലെ ഭക്ഷണം കഴിക്കാനായി എത്തിയപ്പോഴാണ് സംഭവം. അക്രമണം തടയാന് ശ്രമിക്കുന്നതിനിടെ ജയില് ഉദ്യോഗസ്ഥനായ ബിനോയിക്കും പരിക്കേറ്റു. അനീഷിന്റെ പരിക്ക് ഗുരുതരമല്ലെന്നാണ് റിപ്പോര്ട്ടുകള്.
പത്തുദിവസം മുന്പാണ് മരട് അനീഷിനെ കാപ്പ ചുമത്തി വിയ്യൂര് സെന്ട്രല് ജയിലിലടച്ചത്. കൊലപാതകം, തട്ടിക്കൊണ്ടുപോകൽ, വധശ്രമം അടക്കം 45 കേസുകളിൽ പ്രതിയാണ് ഇയാൾ.