ഹിന്ദു ആത്മീയ നേതാവിനെ ജയിലില‌ടച്ചു; ആശങ്കയറിയിച്ച് ഇന്ത്യ
Wednesday, November 27, 2024 3:19 AM IST
ധാക്ക: ഹിന്ദു ആത്മീയ നേതാവ് ചിന്മയ് കൃഷ്ണദാസ് ബ്രഹ്മചാരിക്ക് ജാമ്യം നിഷേധിച്ച് ബംഗ്ലാദേശ് കോടതി. ബംഗ്ലാദേശിലെ പ്രതിഷേധങ്ങൾക്ക് നേതൃത്വം നൽകിയെന്നാരോപിച്ച് രാജ്യദ്രോഹക്കുറ്റം ചുമത്തിയാണ് ചിന്മയ് കൃഷ്ണദാസിനെ അറസ്റ്റ് ചെയ്തത്.
അറസ്റ്റിൽപ്രതിഷേധിച്ച് ധാക്കയിലും ചിറ്റഗോങ്ങിലും ചിന്മയ് കൃഷ്ണദാസിന്‍റെ അനുയായികൾ പ്രതിഷേധിച്ചു. സമ്മിളിത സനാതനി ജോതെ നേതാവിനെ തിങ്കളാഴ്ച ധാക്കയിലെ വിമാനത്താവളത്തിൽനിന്നാണ് പോലീസ് അറസ്റ്റ് ചെയ്തത്.
ദേശീയ പതാകയോട‌് അനാദരവ് കാട്ടിയെന്നാരോപിച്ച് കഴിഞ്ഞ ഒക്‌ടോബർ 30ന് രജിസ്റ്റർ ചെയ്ത കേസിലാണ് അറസ്റ്റ്. ജാമ്യം നിഷേധിച്ച ചിറ്റഗോങ്ങ് മെട്രോപോളിറ്റൻ മജിസ്ട്രേറ്റ് കോടതി ചിന്മയ് കൃഷ്ണദാസിനെ 24 മണിക്കൂർ ജുഡീഷൽ കസ്റ്റഡിയിൽവിട്ടു. ജയിൽ ചട്ടങ്ങൾപ്രകാരം മതപരമായ ആചാരങ്ങൾ അനുഷ്ഠിക്കാൻ അദ്ദേഹത്തെ അനുവദിക്കണമെന്ന് ജയിൽ അധികൃതർക്ക് കോടതി നിർദേശം നൽകിയിട്ടുണ്ട്. അനുയായികളുടെ പ്രതിഷേധങ്ങൾക്കിടെ കനത്ത സുരക്ഷയിലാണു മതനേതാവിനെ കോടതിയിൽ എത്തിച്ചത്. അറസ്റ്റിൽ ധാക്കയിലും ചിറ്റഗോങ്ങിലും ശക്തമായ പ്രതിഷേധമാണ് അരങ്ങേറിയത്.
സമ്മിലിത സനാതനി ജോതെ നേതാവിനെ ഉടനെ വിട്ടയക്കണമെന്നാവശ്യപ്പെട്ട് നൂറുകണക്കിനാളുകൾ തെരിവിലിറങ്ങി. ബംഗ്ലാദേശ് ഹിന്ദു ബുദ്ധിസ്റ്റ് ക്രിസ്ത്യൻ യൂണിറ്റി കൗൺസിലും ചിന്മയ് കൃഷ്ണദാസിന്‍റെ അറസ്റ്റിൽ പ്രതിഷേധിക്കുകയും അദ്ദേഹത്തെ ഉടൻ മോചിപ്പിക്കണമെന്ന് ആവശ്യപ്പെടുകയും ചെയ്തു.