ഐസിസി വാറന്‍റ് നടപ്പാക്കുമെന്ന് കാനഡ
Saturday, November 23, 2024 11:30 PM IST
ഒട്ടാവ: ഇസ്രേലി പ്രധാനമന്ത്രി ബെഞ്ചമിൻ നെതന്യാഹുവിനെതിരേ അന്താരാഷ്‌ട്ര ക്രിമിനൽ കോടതി (ഐസിസി) പുറപ്പെടുവിച്ച അറസ്റ്റ് വാറന്‍റ് നടപ്പാക്കാൻ സന്നദ്ധമാണെന്നു കാനഡ.
അന്താരാഷ്‌ട്ര നിയമങ്ങളും അന്താരാഷ്‌ട്ര കോടതികളുടെ ഉത്തരവുകളും പാലിക്കുമെന്നു പ്രധാനമന്ത്രി ജസ്റ്റിൻ ട്രൂഡോ വ്യക്തമാക്കി.
നേരത്തേ ബ്രിട്ടീഷ് സർക്കാരും, നെതന്യാഹു ബ്രിട്ടനിലെത്തിയാൽ അറസ്റ്റ് ചെയ്യേണ്ടിവരുമെന്ന സൂചന നല്കിയിരുന്നു. യൂറോപ്യൻ യൂണിയനും ഫ്രാൻസ്, അയർലൻഡ് മുതലായ രാജ്യങ്ങളും അറസ്റ്റ് നടപ്പാക്കേണ്ടിവരുമെന്നു വ്യക്തമാക്കിയിരുന്നു.
ഇസ്രയേലിലെ മുൻ പ്രതിരോധ മന്ത്രി യൊവാവ് ഗാലന്‍റ്, ഹമാസ് കമാൻഡർ മുഹമ്മദ് ദെയിഫ് എന്നിവർക്കെതിരേയും ഐസിസി വാറന്‍റ് പുറപ്പെടുവിച്ചിട്ടുണ്ട്. ഇസ്രേലി നേതൃത്വത്തിനെതിരായ ഐസിസിയുടെ നടപടി അന്യായമാണെന്നാണു യുഎസ് പ്രസിഡന്‍റ് ജോ ബൈഡൻ വ്യക്തമാക്കിയത്.