രക്തപുഷ്പങ്ങൾ കലാകായിക സാംസ്കാരിക വേദി ഇറ്റലി ഫുട്ബോൾ ടൂർണമെന്‍റ് സംഘടിപ്പിച്ചു : Deepika.com Nri News Europe

റോം: രക്തപുഷ്പങ്ങൾ കലാകായിക സാംസ്കാരിക വേദി ഇറ്റലി സംഘടിപ്പിച്ച അഞ്ചാമത് യൂറോപ്പ് സെവൻസ് ഫുട്ബോൾ ടൂർണമെന്‍റ് റോമിൽ നടന്നു. യൂറോപ്പിലെ മലയാളി സമൂഹത്തിലെ ഏറ്റവും വലിയ ഫുട്ബോൾ ടൂർണമെന്‍റുകളിലൊന്നായിരുന്നു രക്തപുഷ്പങ്ങൾ കലാകായിക സാംസ്കാരിക വേദി ഇറ്റലി സംഘടിപ്പിച്ചത്.

14 ടീമുകളാണ് ടൂർണമെന്‍റിൽ പങ്കെടുത്തത്. കൊമ്പൻസ് എഫ്സി ജർമനിയും ഫാൽക്കൺ എഫ്സി ഇറ്റലിയും തമ്മിൽ നടന്ന ഫൈനൽ മത്സരത്തിൽ ഒന്നിനെതിരേ രണ്ട് ഗോളുകൾക്ക് കൊമ്പൻസ് എഫ്സി ജർമനി വിജയിച്ചു.

ഒന്നാം സ്ഥാനം നേടിയ കൊമ്പൻസ് എഫ്സി ടീമിന് രക്തപുഷ്പങ്ങൾ എവറോളിംഗ് ട്രോഫി സംഘടനയുടെ ജനറൽ സെക്രട്ടറി സി.ഐ. നിയാസ് സമ്മാനിച്ചു. 2000 യൂറോ കാഷ് പ്രൈസ് ലിറ്റിൽ ഫ്ലവർ ഇംഗ്ലീഷ് മീഡിയം സ്കൂൾ ചെയർമാൻ പ്രകാശ് ജോസഫ് നൽകി.

ഫാൽക്കൺ എഫ്സിക്ക് സംഘടനയുടെ കോഓർഡിനേറ്റർ കലേഷ് കുമ്മുള്ളി ട്രോഫി നൽകി. കാഷ് പ്രൈസ് 1,000 യൂറോ അക്ബർ ട്രാവൽസ് ഓഫ് ഇന്ത്യയുടെ പ്രതിനിധി സെജി ജോസ്മോൻ നൽകി. ടൂർണമെന്‍റിലെ ബെസ്റ്റ് പ്ലെയറായി സഞ്ജയിനെ (ജർമനി) തെരഞ്ഞെടുത്തു. ബെസ്റ്റ് ബാക്ക്: ജിതിൻ (ജർമനി), ബെസ്റ്റ് ഗോൾകീപ്പർ: അനന്തൻ (ഇറ്റലി), ടോപ് സ്കോറർ: രാഹുൽ (ഇറ്റലി).

സമാപന ചടങ്ങിൽ ആശംസകൾ അർപ്പിച്ചുകൊണ്ട് അലിക്ക് ഇറ്റലിയുടെ പ്രസിഡന്‍റ് ഷൈൻ റോബർട്ട് ലോപ്പസ്, ലയൺസ് ക്ലബ് സെക്രട്ടറി ഗോപകുമാർ, പ്രവാസി കേരള കോൺഗ്രസ് മാണി വിഭാഗം പ്രസിഡന്‍റ് ജോസ് മോൻ കമ്മട്ടിൽ, ലയൺസ് ക്ലബ് വൈസ് പ്രസിഡന്‍റ് സിജു മാത്യു, മാധ്യമ പ്രവർത്തകൻ ജെജി മാന്നാർ, ബാബു കൊല്ലം ബ്രദേഴ്സ് എന്നിവർ സംസാരിച്ചു.

ടൂർണമെന്‍റിന്‍റെ പ്രോഗ്രാം ചെയർമാൻ ജോസ് പൂന്തറ സ്വാഗതം പറയുകയും കൺവീനറും സംഘടനയുടെ ഖജാൻജിയുമായ ശരത് ഇരിഞ്ഞാലക്കുട ചടങ്ങിന് നന്ദി പറയുകയും ചെയ്തു. ബിന്ദു വയനാട്, ടി.പി. സുരേഷ്, അനിത ബോണി, നൈനാൻ, സുനിൽ വയനാട്, എന്നിവർ നേതൃത്വം നൽകി.