കടുത്തുരുത്തി -പെരുവ റോഡിൽ പൈപ്പ് സ്ഥാപിക്കല്‍ ആരംഭിച്ചു : Deepika.com Nattu Visesham

KOTTAYAM

കടുത്തുരുത്തി -പെരുവ റോഡിൽ പൈപ്പ് സ്ഥാപിക്കല്‍ ആരംഭിച്ചു

Sunday, June 16, 2024 7:17 AM IST

കടുത്തുരുത്തി: കടുത്തുരുത്തി - പെരുവ റോഡില്‍ മുടങ്ങികിടന്ന 400 എംഎം പൈപ്പ് സ്ഥാപിക്കല്‍ ജോലികള്‍ ആരംഭിച്ചു. അറുനൂറ്റിമംഗലത്തുനിന്ന് അലരി വരെയുള്ള മെയിന്‍ റോഡില്‍ 800 മീറ്റര്‍ ദൂരത്തിലാണ് പൈപ്പ്സ്ഥാപിക്കുന്നത്. യഥാസമയം പൈപ്പ് ലഭിക്കാതിരുന്നതാണ് പൈപ്പ് സ്ഥാപിക്കുന്ന ജോലികള്‍ മുടങ്ങാനിടയായതെന്നാണ് അധികൃതര്‍ പറയുന്നത്.

ആവശ്യമായ മുഴുവന്‍ പൈപ്പും പ്രവര്‍ത്തി ഏറ്റെടുത്ത കരാറുകാരന്‍ ബുക്ക് ചെയ്തപ്രകാരം കൊല്‍ക്കത്തയില്‍നിന്ന് കടുത്തുരുത്തിയിലെത്തിയിട്ടുണ്ട്. ഇപ്പോള്‍ നടക്കുന്ന പൈപ്പ് സ്ഥാപിക്കല്‍ പ്രവര്‍ത്തികള്‍ ഒരുമിച്ചു പൂര്‍ത്തിയാക്കാനണ് ഉദേശിക്കുന്നത്. പൈപ്പ് സ്ഥാപിക്കുന്നതിന് ഒരു മാസത്തോളം സമയപരിധിയാണ് വാട്ടര്‍ അഥോറിറ്റി ആവശ്യപെട്ടിരിക്കുന്നത്. ഇതിനുള്ളില്‍ കൃത്യമായ പ്രവര്‍ത്തി പൂര്‍ത്തീകരിക്കാനാണ് തീരുമാനം.

വാട്ടര്‍ അഥോറിറ്റി പൈപ്പ് ഇടുന്ന ജോലി പൂര്‍ത്തിയാക്കി പൊതുമരാമത്ത് വകുപ്പിന് കടുത്തുരുത്തി - പെരുവ റോഡ് കൈമാറിയതിനു ശേഷമേ റോഡിന്‍റെ റീടാറിംഗ് നടപടികള്‍ ആരംഭിക്കാന്‍ കഴിയുവെന്ന് റോഡ് വിഭാഗം ഉദ്യോഗസ്ഥര്‍ അറിയിച്ചിട്ടുണ്ട്. റോഡ് സംരക്ഷണ പുനരുദ്ധാരണത്തിനായി ആവശ്യമായ ഫണ്ട് വാട്ടര്‍ അഥോറിറ്റി പൊതുമരാമത്ത് വകുപ്പിലേക്ക് അടച്ചിട്ടുണ്ട്. ഇത് ആദ്യം ടെന്‍ഡര്‍ ചെയ്തു നടപ്പാക്കും. തുടര്‍ന്ന് ബിഎം ആന്‍ഡ് ബിസി ടാറിംഗ് ജോലികളും ടെന്‍ഡര്‍ ചെയ്തു നടപ്പാക്കാനുള്ള നടപടിയാണ് സ്വീകരിച്ചിട്ടുള്ളത്.

കടുത്തുരുത്തി - പെരുവ റോഡില്‍ ടാറിംഗ് ജോലിയില്‍ ഉള്‍പെടാതെ കിടന്നിരുന്ന അറുനൂറ്റിമംഗലം ജംഗ്ഷന്‍ ഭാഗം റീടാറിംഗ് നടത്തുന്നതിനുള്ള ക്രമീകരണവും പൊതുമരാമത്ത് വകുപ്പ് റോഡ് വിഭാഗം ചീഫ് എന്‍ജിനീയറുമായി ചര്‍ച്ച ചെയ്ത് ധാരണയുണ്ടാക്കിയിട്ടുണ്ടെന്ന് എംഎല്‍എ പറഞ്ഞു.

ഇനി നടപ്പാക്കുന്ന റീ ടാറിംഗ് പ്രവര്‍ത്തിയില്‍ അറുനൂറ്റിമംഗലം ജംഗ്ഷന്‍ മുതല്‍ കടുത്തുരുത്തി മാര്‍ക്കറ്റ് ജംഗ്ഷന്‍ വരെ ഒറ്റഘട്ടമായി ബിഎം ആന്‍ഡ് ബിസി നവീകരണ പ്രവര്‍ത്തനങ്ങള്‍ നടപ്പാക്കും. പൈപ്പ് ലൈന്‍ സ്ഥാപിച്ച ശേഷം പൊതുരാമത്ത് വകുപ്പ് റീ ടാറിംഗിന് വേണ്ടി ടെന്‍ഡര്‍ ചെയ്ത കീഴൂര്‍ - അറുനൂറ്റിമംഗലം - ഞീഴൂര്‍ റോഡിന്‍റെ നിര്‍മാണപ്രവര്‍ത്തനങ്ങള്‍ ആരും ഏറ്റെടുക്കാതെ വന്ന സാഹചര്യത്തില്‍ പ്രവര്‍ത്തി റീ ടെന്‍ഡര്‍ ചെയ്തു നടപ്പാക്കുമെന്നും എംഎല്‍എ അറിയിച്ചു.