ഹരിയാന അതിര്ത്തിയിലെ പോലീസ് നടപടി; ഒരാള്ക്കൂടി കൊല്ലപ്പെട്ടെന്ന് കര്ഷക നേതാക്കള്
Friday, February 23, 2024 1:37 PM IST
ചണ്ഡീഗഡ്: പഞ്ചാബ് -ഹരിയാന അതിര്ത്തിയായ ഖനൗരിയില് കര്ഷകസമരത്തിന് നേരേയുണ്ടായ പോലീസ് നടപടിയില് ഒരാള്ക്കൂടി കൊല്ലപ്പെട്ടെന്ന് കര്ഷക നേതാക്കള്. ബട്ടിന്ഡ സ്വദേശി ദര്ശന് സിംഗ്(62) ആണ് മരിച്ചത്.
ബുധനാഴ്ച ഖനൗരിയിലുണ്ടായ ഗ്രനേഡ് ആക്രമണത്തില് പരിക്കേറ്റ് ചികിത്സയില് കഴിയവേ മരിച്ചെന്നാണ് ആരോപണം. ഖനൗരിയില് പോലീസുമായുള്ള ഏറ്റുമുട്ടലില് യുവകര്ഷകന് മരിച്ച സംഭവത്തില് പ്രതിഷേധം ശക്തമായിരുന്നു.
ബാരിക്കേഡുകള് മാറ്റാന് ശ്രമിച്ച കര്ഷകരെ പിരിച്ചുവിടാന് പോലീസ് കണ്ണീർവാതക ഷെല്ലുകള് പ്രയോഗിച്ചതിനെ തുടര്ന്നാണ് കഴിഞ്ഞ ദിവസം രാവിലെ ശംഭു, ഖനൗരി അതിര്ത്തികളില് സ്ഥിതി സംഘര്ഷഭരിതമായത്.
രാവിലെ ശംഭു അതിര്ത്തിയില് കണ്ണീര്വാതകം പ്രയോഗിച്ചതോടെയാണു സംഘര്ഷം തുടങ്ങിയത്. കല്ലും കുപ്പികളുമായി കര്ഷകരും എതിര്ത്തതോടെ സ്ഥിതി വഷളാവുകയായിരുന്നു.
കാര്ഷിക ഉല്പന്നങ്ങളുടെ താങ്ങുവില വര്ധന ഉള്പ്പെടെ 12 ആവശ്യങ്ങളുമായി സംയുക്ത കിസാന് മോര്ച്ച , കിസാന് മസ്ദൂര് മോര്ച്ച (കെഎംഎം) എന്നീ സംഘടനകളാണു 13ന് ദില്ലി ചലോ മാര്ച്ച് ആരംഭിച്ചത്. സമരക്കാരെ തടയാന് ബാരിക്കേഡുകളും മുള്ളുവേലികളും മറ്റുമായി വന് സന്നാഹമാണു പൊലീസ് തീര്ത്തിരിക്കുന്നത്.