എസ്ഐയുടെ വീട്ടിൽനിന്നും ബൈക്ക് മോഷ്ടിച്ച കള്ളൻ പിടിയിൽ
Friday, July 26, 2024 9:58 AM IST
കൊല്ലം: എസ്ഐയുടെ വീട്ടിൽനിന്നും ബൈക്ക് മോഷ്ടിച്ച കള്ളൻ പിടിയിൽ. കിളിമാനൂർ സ്വദേശി തട്ടത്തുമല സുജിൻ(27) ആണ് പിടിയിലായത്. കടയ്ക്കൽ പോലീസ് സ്റ്റേഷനിലെ എസ്ഐ ജഹാംഗീറിന്റെ കലയപുരത്തെ വീട്ടിൽ നിന്നാണ് ബൈക്ക് മോഷണം പോയത്.
ജൂലൈ 19ന് രാത്രി പത്തോടെയായിരുന്നു സംഭവം. എസ്ഐ ജഹാംഗീർ തന്റെ അമ്മയുമായി അഞ്ചലിലെ ആശുപത്രിയിൽ പോയിരുന്ന സമയത്തായിരുന്നു മോഷണം നടന്നത്. വീട്ടിൽ തിരികെ എത്തിയപ്പോഴാണ് ബൈക്ക് നഷ്ടപ്പെട്ടെന്ന് മനസിലാക്കിയത്.
പിന്നാലെ ചിതറ പോലീസിൽ പരാതി നൽകി. സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിൽ ഓട്ടോറിക്ഷയിൽ എത്തിയ രണ്ട് പേരാണ് ബൈക്ക് മോഷ്ടിച്ചതെന്ന് വ്യക്തമായി. പിന്നീട് നടത്തിയ അന്വേഷണത്തിലാണ് സുജിൻ പിടിയിലായത്.