എൻഡിഎയുടെ കീഴിൽ ട്രെയിൻ അപകടങ്ങൾ ഗണ്യമായി കുറഞ്ഞു: അശ്വിനി വൈഷ്ണവ്
Thursday, July 25, 2024 10:22 AM IST
ന്യൂഡൽഹി: എൻഡിഎയുടെ കീഴിൽ കഴിഞ്ഞ 10 വർഷത്തിനിടെ ട്രെയിൻ അപകടങ്ങൾ ഗണ്യമായി കുറഞ്ഞുവെന്ന് റെയിൽവേ മന്ത്രി അശ്വിനി വൈഷ്ണവ്. 2014-24ൽ രാജ്യത്തെ ട്രെയിൻ അപകടങ്ങളുടെ എണ്ണം 678 ആയി കുറഞ്ഞുവെന്നും അദ്ദേഹം പറഞ്ഞു.
കോണ്ഗ്രസ് നേതൃത്വത്തിലുള്ള യുപിഎ രാജ്യം ഭരിച്ച 2004 നും 2014 നും ഇടയിൽ രേഖപ്പെടുത്തിയ പ്രതിവർഷ ശരാശരി 171 ആയിരുന്നു. ഇതിനേക്കാൾ വളരെ താഴെയാണ് ഇത്. ഇപ്പോൾ പ്രതിവർഷം ശരാശരി 68 ആണെന്നും മന്ത്രി ലോക്സഭയിൽ പറഞ്ഞു.
എൻഡിഎ സർക്കാർ സ്വീകരിച്ച സുരക്ഷ നടപടികളുടെ ഭാഗമായാണ് അപകടങ്ങളുടെ എണ്ണത്തിൽ കുറവുണ്ടായത്. യുപിഎ സർക്കാരിന്റെ കാലത്ത് പ്രതിവർഷം 58 കിലോമീറ്റർ മാത്രമാണ് റെയിൽവേ ലൈൻ നിർമിച്ചിരുന്നത്. എൻഡിഎ സർക്കാർ കഴിഞ്ഞ പത്ത് വർഷങ്ങളിൽ ഇത് പ്രതിവർഷം 183 കിലോമീറ്ററായി ഉയർത്തിയെന്നും അദ്ദേഹം പറഞ്ഞു.
റെയിൽവേയുടെ വികസനത്തിന് വൻ തുക അനുവദിച്ചതിന് പ്രധാനമന്ത്രി നരേന്ദ്ര മോദിക്കും ധനമന്ത്രി നിർമല സീതാരാമനും വൈഷ്ണവ് നന്ദി പറഞ്ഞു.