തിരച്ചിൽ നിർണായക ഘട്ടത്തിൽ; സൈന്യം ഷിരൂരിലെത്തി
Sunday, July 21, 2024 2:20 PM IST
ബംഗുളൂരു: ഷിരൂരിൽ മണ്ണിടിച്ചിലിൽ കാണാതായ അർജുനെ കണ്ടെത്താനുള്ള രക്ഷാദൗത്യങ്ങൾക്കായി സൈന്യം എത്തി. ബെലഗാവിയിൽ നിന്നും 40 അംഗ സൈനിക സംഘമാണ് ഷിരൂരിൽ എത്തിയത്.
എൻഡിആർഎഫുമായി സൈന്യം ചർച്ച നടത്തും. കേരള-കർണാടക ഏരിയ കമാൻഡറുടെ നേതൃത്വത്തിലായിരിക്കും രക്ഷാപ്രവർത്തനം ഏകോപിപ്പിക്കുക. മണ്ണിന്റെ ഘടന, കാലാവസ്ഥ, മണ്ണിടിച്ചിൽ സാധ്യത എന്നിവയും സൈന്യം പരിശോധിക്കും.
എഐസിസി ജനറൽ സെക്രട്ടറി കെ.സി. വേണുഗോപാലിന്റെ ഇടപെടലിനെ തുടർന്ന് കർണാടക ഉപമുഖ്യമന്ത്രി ഡി.കെ. ശിവകുമാറാണ് സൈന്യവുമായി ബന്ധപ്പെട്ടത്.
അതേസമയം കർണാടക മുഖ്യമന്ത്രി സിദ്ധരാമയ്യ ഇന്ന് അപകടസ്ഥലം സന്ദർശിക്കും. ഉച്ചകഴിഞ്ഞ് 2.30ഓടെ സിദ്ധരാമയ്യ അപകസ്ഥലത്ത് എത്തുമെന്ന് അങ്കോല എംഎൽഎ അറിയിച്ചു.