ആശുപത്രിയിൽ യുവതിക്ക് പാമ്പുകടിയേറ്റ സംഭവത്തിൽ ട്വിസ്റ്റ്; നിഷേധിച്ച് ആരോഗ്യവകുപ്പ്
Wednesday, July 17, 2024 7:15 PM IST
പാലക്കാട്: ചിറ്റൂർ താലൂക്ക് ആശുപത്രിയിൽ യുവതിക്ക് പാമ്പുകടിയേറ്റിട്ടില്ലെന്ന് ആരോഗ്യവകുപ്പ് ഡയറക്ടർ ഡോ. കെ.ജെ.റീന. വിശദമായ പരിശോധനയിൽ പാമ്പുകടി ഏറ്റില്ലെന്നു ബോധ്യമായതായും യുവതിയെ പാലക്കാട് ജില്ലാ ആശുപത്രിയിലേക്ക് റഫർ ചെയ്ത നടപടി ഉചിതമായില്ലെന്നും ആരോഗ്യവകുപ്പ് ഡയറക്ടർ പറഞ്ഞു.
ഡോക്ടർ പരിശോധിച്ചു കഴിഞ്ഞപ്പോൾ കടിയുടെ പാടൊന്നും കണ്ടില്ല. പിടികൂടിയ പാന്പിന് വിഷമില്ലെന്ന് സ്ഥിരീകരിക്കുകയും ചെയ്തു. ചിറ്റൂർ ആശുപത്രിയിൽ ആന്റി സ്നേക് വെനം ഉണ്ടായിരുന്നു. ആ സാഹചര്യത്തിൽ അവരെ പുറത്തേക്ക് വിടണ്ട സാഹചര്യമില്ലായിരുന്നുവെന്നും ഡോ. കെ.ജെ.റീന പറഞ്ഞു.
ബുധനാഴ്ച രാവിലെയാണ് പാലക്കാട് പുതുനഗരം കരിപ്പോട് സ്വദേശിനി ഗായത്രിയെ ചിറ്റൂര് താലൂക്ക് ആശുപത്രിയില് വച്ച് പാമ്പുകടിച്ചതായി പരാതി ഉയര്ന്നത്. യുവതിയെ പാലക്കാട് ജില്ലാ ആശുപത്രിയിൽ പ്രവേശിപ്പിച്ചിരിക്കുകയാണ്.