എഴുത്തുകാരൻ കെ.കെ. ഹിരണ്യൻ അന്തരിച്ചു
Wednesday, July 17, 2024 12:02 PM IST
തൃശൂർ: അന്തരിച്ച എഴുത്തുകാരി ഗീത ഹിരണ്യന്റെ ഭർത്താവും കവിയും നിരൂപകനും അധ്യാപകനുമായ കെ.കെ. ഹിരണ്യൻ (70) അന്തരിച്ചു. തൃശൂരിലെ സ്വകാര്യ ആശുപത്രിയിൽ ഇന്നു പുലർച്ചെ മൂന്നു മണിയോടെയായിരുന്നു അന്ത്യം.
മൃതദേഹം പതിനൊന്നര മുതൽ തൃശൂർ സാഹിത്യ അക്കാദമി ഹാളിൽ പൊതുദർശനത്തിനു വയ്ക്കും. സംസ്കാരം ഉച്ചയ്ക്ക് മൂന്നു മണിക്ക് അമ്മാടത്തെ തറവാട്ടു വളപ്പിൽ. പാറളം പാർപ്പക്കടവ് റോഡിൽ കടവത്ത് ഉള്ളന്നൂർ മന പരേതനായ കുഞ്ഞുണ്ണി നന്പൂതിരിയുടെ മകനാണ്.
തൃശൂർ ഗവ.കോളജിൽ പ്രിൻസിപ്പലായിരിക്കെയാണ് സർവീസിൽനിന്ന് വിരമിച്ചത്. അമ്മാടം സെന്റ് ആന്റണീസ് സ്കൂളിലും തൃശൂർ കേരളവർമയിലും കാലിക്കറ്റ് യൂണിവേഴ്സിറ്റി കാന്പസിലും മറ്റുമായാണ് വിദ്യാഭ്യാസം പൂർത്തിയാക്കിയത്. കേരളത്തിലെ വിവിധ കോളേജുകളിൽ മലയാളം അധ്യാപകനായിരുന്നു. മക്കൾ: ഉമ, അനന്തകൃഷ്ണൻ.