സ്മൃതി ഇറാനിയ്ക്കെതിരെ അപകീർത്തികരമായ പരാമർശങ്ങൾ വേണ്ടെന്ന് രാഹുൽ ഗാന്ധി
Friday, July 12, 2024 8:06 PM IST
ന്യൂഡൽഹി: സ്മൃതി ഇറാനിയ്ക്കെതിരായ അപകീർത്തികരമായ പരാമർശങ്ങൾ ഒഴിവാക്കണമെന്ന് പ്രതിപക്ഷ നേതാവ് രാഹുൽ ഗാന്ധി. ആളുകളെ അപമാനിക്കുന്നതും അവഹേളിക്കുന്നതും ബലഹീനതയാണെന്നും ശക്തിയല്ലെന്നും രാഹുൽ ഗാന്ധി എക്സിൽ കുറിച്ചു.
ജീവിതത്തിൽ ജയവും തോൽവിയുമുണ്ടാകാം. സ്മൃതി ഇറാനിയ്ക്കെതിരെ എന്നല്ല ഒരു നേതാക്കൾക്കെതിരെയും അപകീർത്തികരമായ പരാമർശങ്ങൾ പാടില്ലെന്നും രാഹുൽ അഭ്യർഥിച്ചു.
ലോക്സഭാ തെരഞ്ഞെടുപ്പിൽ അമേഠിയിലെ തോൽവിയ്ക്ക് പിന്നാലെ വീടുവിട്ടിറങ്ങുന്ന സ്മൃതി ഇറാനിയുടെ നിരവധി ചിത്രങ്ങൾ കഴിഞ്ഞ ദിവസം സോഷ്യൽ മീഡിയയിൽ പ്രചരിച്ചിരുന്നു. ഇതിൽ ചിലവയിൽ അപകീർത്തികരമായ പരാമർശങ്ങൾ ഉൾപ്പെട്ട പശ്ചാത്തലത്തിലാണ് രാഹുൽ ഗാന്ധിയുടെ നിർദേശങ്ങൾ.