അപകീർത്തിക്കേസിൽ രാഹുല് ഗാന്ധിക്ക് ഹൈക്കോടതിയിൽ ആശ്വാസം; മജിസ്ട്രേറ്റ് കോടതി നടപടി റദ്ദാക്കി
Friday, July 12, 2024 3:22 PM IST
മുംബൈ: ആർഎസ്എസിന്റെ അപകീര്ത്തി കേസില് രാഹുല് ഗാന്ധിക്ക് ബോംബെ ഹൈക്കോടതിയില് നിന്ന് ആശ്വാസം. മജിസ്ട്രേറ്റ് കോടതി നടപടി ബോംബെ ഹൈക്കോടതി റദ്ദാക്കി. പരാതിക്കാരന് കൂടുതലായി നല്കിയ രേഖകള് സ്വീകരിച്ച ഭീവാന്ഡി മജിസ്ട്രേറ്റ് കോടതി നടപടിയാണ് ഹൈക്കോടതി റദ്ദാക്കിയത്.
ആർഎസ്എസ് ആണ് മഹാത്മാ ഗാന്ധിജിയെ വധിച്ചത് എന്ന പരാമർശത്തിലാണ് 2014ൽ രാഹുലിനെതിരേ ആർഎസ്എസ് പ്രവർത്തകൻ കൂടിയായ രാജേഷ് കുൻതെ ഹർജി നല്കിയത്. രാ ഹുലിന്റെ പരാമർശം സംഘടനയുടെ പ്രതിച്ഛായ തകർക്കുന്നതാണെന്നായിരുന്നു പരാതി. 2015ൽ കേസ് റദ്ദാക്കണമെന്നാവശ്യപ്പെട്ട് രാഹുൽ ബോംബെ ഹൈക്കോടതിയെ സമീപിച്ചിരുന്നെങ്കിലും അനുകൂല വിധി ഉണ്ടായിരുന്നില്ല. ഇതോടെ, മാപ്പ് പറയില്ലെന്നും കേസ് നേരിടാമെന്ന തീരുമാനത്തിലേക്കും രാഹുൽ എത്തുകയായിരുന്നു.
2023ൽ പരാതിക്കാരൻ കൂടുതൽ രേഖകൾ ഹാജരാക്കിയത് എതിർത്ത രാഹുൽ ഇതിനെതിരെ ഹൈക്കോടതിയെ സമീപിച്ചിരുന്നു. ഈ ഹർജിയിലാണ് ഇപ്പോൾ അനുകൂല വിധി വന്നിരിക്കുന്നത്.