മമത ഇന്നു മുംബൈയിൽ; ഇന്ത്യാ മുന്നണി നേതാക്കളുമായി കൂടിക്കാഴ്ച നടത്തും
Friday, July 12, 2024 10:06 AM IST
കോൽക്കത്ത: ശിവസേന അധ്യക്ഷൻ ഉദ്ധവ് താക്കറെ, എൻസിപി നേതാവ് ശരദ് പവാർ, സമാജ്വാദി പാർട്ടി അധ്യക്ഷൻ അഖിലേഷ് യാദവ് എന്നിവരുമായി ബംഗാൾ മുഖ്യമന്ത്രി മമത ബാനർജി ഇന്നു മുംബൈയിൽ കൂടിക്കാഴ്ച നടത്തും.
രാജ്യത്തെ രാഷ്ട്രീയ സ്ഥിതിഗതികളാണ് ചർച്ചാവിഷയം. വ്യവസായി മുകേഷ് അംബാനിയുടെ മകന്റെ വിവാഹത്തിൽ പങ്കെടുക്കാനാണ് മമത മുംബൈയിലെത്തിയത്.
ലോക്സഭാ തെരഞ്ഞെടുപ്പിന് ശേഷം ഇതാദ്യമായാണ് മമത ഇന്ത്യാ മുന്നണി നേതാക്കളുമായി കൂടിക്കാഴ്ച നടത്തുന്നത്. മുംബൈയിലേക്ക് പുറപ്പെടുന്നതിന് മുമ്പ് മമത കോൽക്കത്തയിൽ മാധ്യമങ്ങളെ കണ്ടിരുന്നു. അനന്ത്-രാധിക വിവാഹത്തില് പങ്കെടുക്കാനായി മുകേഷ് അംബാനിയും ഭാര്യ നിതയും പലതവണ ക്ഷണിച്ചിരുന്നു. അതുകൊണ്ടാണിപ്പോള് വിവാഹത്തിനു പുറപ്പെടുന്നതെന്ന് മമത പറഞ്ഞു.
ലോക്സഭാ തെരഞ്ഞെടുപ്പിന് ശേഷം ആദ്യമായാണ് താൻ ഉദ്ധവ് താക്കറെയെ കാണുന്നതെന്നും രാഷ്ട്രീയം ചർച്ച ചെയ്യുമെന്നും മമത പറഞ്ഞു. ശരദ് പവാറിനെ വസതിയിൽപോയി കാണും. അഖിലേഷ് യാദവിനെയും കാണുമെന്നും ചർച്ചനടത്തുമെന്നും അവർ പറഞ്ഞു.