ഇന്ത്യയിലെ ആദ്യ രാജ്യാന്തര ജെന് എഐ കോണ്ക്ലേവിന് ഇന്ന് തുടക്കം
Thursday, July 11, 2024 8:23 AM IST
കൊച്ചി: ഇന്ത്യയിലെ ആദ്യത്തെ രാജ്യാന്തര ജെന് എഐ കോണ്ക്ലേവിന് വ്യാഴാഴ്ച തുടക്കം കുറിക്കും. കൊച്ചി ബോള്ഗാട്ടി ലുലു ഗ്രാന്റ് ഹയാത്ത് ഇന്റര്നാഷണല് കണ്വെന്ഷന് സെന്ററിലാണ് കോണ്ക്ലേവ്. കോണ്ക്ലേവ് രാവിലെ 10ന് മുഖ്യമന്ത്രി പിണറായി വിജയന് ഉദ്ഘാടനം ചെയ്യും. വ്യവസായ വകുപ്പ് മന്ത്രി പി.രാജീവ് അധ്യക്ഷനാകും. ചീഫ് സെക്രട്ടറി ഡോ. വി.വേണു, ലുലു ഗ്രൂപ്പ് എംഡിയും ചെയര്മാനുമായ എം.എ. യൂസഫലി തുടങ്ങിയവര് പങ്കെടുക്കും.
കേരള സ്റ്റേറ്റ് ഇന്ഡസ്ട്രിയല് ഡെവലപ്മെന്റ് കോര്പ്പറേഷന് ഐബിഎമ്മുമായി ചേര്ന്നാണ് കോണ്ക്ലേവ് സംഘടിപ്പിക്കുന്നത്. പരിവര്ത്തന സാധ്യതകളും സമൂഹത്തിലും സമ്പദ് വ്യവസ്ഥയിലും അതുണ്ടാക്കുന്ന സ്വാധീനവും കോണ്ക്ലേവില് ചര്ച്ചയാകും.
രണ്ടു ദിവസങ്ങളിലായി 17 സെഷനുകളാണ് സമ്മേളനത്തിലുള്ളത്. രണ്ടായിരത്തോളം പ്രതിനിധികള് പങ്കെടുക്കുന്ന സമ്മേളനത്തില് പ്രഭാഷണങ്ങള്, പാനല് ചര്ച്ചകള്, സംവേദനാത്മക സെഷനുകള് എന്നിവയാണ് പ്രധാന അജണ്ട.