അമ്മ കൈവിടില്ല... മലയാറ്റൂരിൽ കിണറ്റിൽ വീണ കുട്ടിയാനയെ അമ്മയാന രക്ഷപെടുത്തി
Wednesday, July 10, 2024 7:24 AM IST
തൃശൂർ: മലയാറ്റൂർ ഇല്ലിത്തോട്ടിൽ സ്വകാര്യ വ്യക്തിയുടെ പുരയിടത്തിലെ കിണറ്റിൽ വീണ കുട്ടിയാനയെ അമ്മയാന രക്ഷപെടുത്തി. അമ്മയാന കുട്ടിയാനയെ വലിച്ചു കയറ്റുകയായിരുന്നു. തുടർന്ന് പ്രദേശത്ത് നിലയുറപ്പിച്ചിരുന്ന കാട്ടാനക്കൂട്ടം കുഞ്ഞിനെയും കൊണ്ട് കാടു കയറി.
ഇന്ന് പുലർച്ചെയാണ് സംഭവം. സാജു എന്നയാളുടെ വീട്ടിലെ കിണറ്റിലാണ് കുട്ടിയാന വീണത്. വിവരമറിഞ്ഞ് വനംവകുപ്പ് ഉദ്യോഗസ്ഥർ സ്ഥലത്ത് എത്തിയിരുന്നു. എന്നാൽ സമീപത്ത് കാട്ടാനക്കൂട്ടം നിലയുറപ്പിച്ചിരുന്നതിനാൽ ഉദ്യോഗസ്ഥർക്ക് കിണറിനടുത്തേക്ക് എത്താൻ സാധിച്ചിരുന്നില്ല.
ഇതിനിടെ കുട്ടിയാനയെ അമ്മയാന തന്നെ രക്ഷപെടുത്തുകയായിരുന്നു. സമീപ പ്രദേശത്ത് മൂന്ന് മാസം മുൻപും കുട്ടിയാന കിണറ്റിൽ വീണിരുന്നു.