ഇടമറുകിൽ ഉരുൾപൊട്ടൽ; ഏഴ് വീടുകൾ തകർന്നു
Tuesday, May 28, 2024 4:17 PM IST
കോട്ടയം: ജില്ലയിൽ കനത്ത മഴയെ തുടർന്നുള്ള നാശനഷ്ടം തുടരുന്നു. ഭരണങ്ങാനം വില്ലേജിൽ ഇടമറുക് ചൊക്കല്ല് ഭാഗത്ത് ഉരുൾപൊട്ടലുണ്ടായി. ഇവിടെ ഏഴ് വീടുകൾ ഉരുൾപൊട്ടലിൽ തകർന്നു. ആളപായമില്ല. മേഖലയിൽ വ്യാപക നാശനഷ്ടമുണ്ടായെന്നാണ് റിപ്പോർട്ട്.
അതേസമയം, ശക്തമായ മഴയെത്തുടര്ന്ന് ഈരാറ്റുപേട്ട- വാഗമണ് റോഡില് മണ്ണിടിഞ്ഞു. തീക്കോയി പഞ്ചായത്തിലെ കല്ലം ഭാഗത്താണ് മണ്ണിടിഞ്ഞത്. മുകളിലെ പുരയിടത്തില് നിന്നും കല്ലും മണ്ണും റോഡിലേക്ക് പതിക്കുകയായിരുന്നു. തുടര്ന്ന് ഇതുവഴിയുള്ള ഗതാഗതം തടസപ്പെട്ടു.
ഗതാതഗാതം പുനഃസ്ഥാപിക്കാനുള്ള ശ്രമം അധികൃതര് ആരംഭിച്ചു. പുലര്ച്ചെ മുതല് ജില്ലയുടെ കിഴക്കന് മേഖലയില് മഴ ശക്തമാണ്. മീനച്ചിലാറ്റില് വെള്ളം ഉയര്ന്നതിനെ തുടര്ന്ന് പാലാ പനയ്ക്കല് പാലത്ത് റോഡില് വെള്ളം കയറി.
കനത്ത മഴ തുടര്ന്നാല് ജില്ലയുടെ വിവിധയിടങ്ങളില് വെള്ളപ്പൊക്കവും മണ്ണിടിച്ചിലും ഉണ്ടായേക്കമെന്ന ആശങ്ക നിലനില്ക്കുന്നു. നിലവിൽ കോട്ടയം ജില്ലയിൽ റെഡ് അലര്ട്ടാണുള്ളത്.