ഓൺലൈൻ ചാനൽവഴി പെൺകുട്ടിക്കെതിരേ മോശം പ്രചാരണം; ചാനൽ നടത്തിപ്പുകാരൻ പിടിയിൽ
Sunday, May 26, 2024 5:53 AM IST
കൊച്ചി: പെൺകുട്ടിയെ അപകീർത്തിപ്പെടുത്തിയ കേസിൽ ഓൺലൈൻ ചാനൽ ഉടമ അറസ്റ്റിൽ. മലപ്പുറം അമരമ്പലം സൗത്ത് മാമ്പൊയിൽ ഭാഗത്ത് വേണാനിക്കോട് വീട്ടിൽ ബൈജു (45) ആണ് പിടിയിലായത്.
പെൺകുട്ടിയെയും അവരുടെ മാതാവിനെയും കുറിച്ച് മോശമായ രീതിയിലും ലൈംഗിക ചുവയോടെയും പ്രതിപാദിച്ച് വീഡിയോ ചെയ്തതായാണ് പരാതി. ഇവരുടെ ആറുവയസുള്ള കുഞ്ഞിനെപ്പറ്റിയും പ്രതി മോശമായി പ്രചാരണം നടത്തി.
മറ്റൊരു ഓൺലൈൻ ചാനലിലെ ജീവനക്കാരിയാണ് പരാതിക്കാരി. പ്രതി പ്രചരിപ്പിച്ച വീഡിയോ സഹിതമാണ് ഇവർ പരാതി നൽകിയിട്ടുള്ളത്. പ്രതി കുറ്റകൃത്യത്തിന് ഉപയോഗിച്ച ഇലക്ട്രോണിക്ക് ഉപകരണങ്ങളും പോലീസ് പിടിച്ചെടുത്തിട്ടുണ്ട്.