ബാര് കോഴ ആരോപണം ഗൗരവമുള്ളത്, അന്വേഷണം വേണം: കെ.കെ.ശിവരാമന്
Friday, May 24, 2024 1:12 PM IST
ഇടുക്കി: ബാര് കോഴ ആരോപണം ഗൗരവമുള്ളതെന്ന് ഇടത് മുന്നണിയുടെ ഇടുക്കി ജില്ലാ കണ്വീനര് കെ.കെ.ശിവരാമന്. മദ്യനയത്തിലെ ഇളവിന് പകരമായി പണപ്പിരിവ് നടത്താനുളള ഫെഡറേഷന് ഓഫ് കേരള ബാര് ഹോട്ടല്സ് ഇടുക്കി ജില്ലാ പ്രസിഡന്റ് അനിമോന്റെ വെളിപ്പെടുത്തലുകളെ കുറിച്ച് അടിയന്തര അന്വേഷണം നടത്താന് സര്ക്കാര് തയാറാകണമെന്ന് അദ്ദേഹം ഫേസ്ബുക്കില് കുറിച്ചു.
എല്ലാ ബാറുകളും പണം നല്കിയാല് 250 കോടിയാകും. ഈ പണം എവിടേക്കാണ് പോകുന്നത്? പണമുണ്ടെങ്കില് സര്ക്കാര് നയത്തെ സ്വാധീനിക്കാന് കഴിയുമെന്ന് ഒരു ബാറുടമ പറയുന്നത് ഗൗരവമുള്ള കാര്യമാണ്.
സര്ക്കാരിന്റെ മുഖം വികൃതമാക്കുന്നതിന് വേണ്ടി കെട്ടിച്ചമയ്ക്കുന്ന കള്ളക്കഥയാണോ ഇതെന്ന് അറിയണം. സര്ക്കാരിന്റെ മദ്യനയത്തില് വരുത്തുന്ന ഏതൊരു മാറ്റവും പൊതുതാത്പര്യം കണക്കിലെടുത്താണ്.
അതല്ലാതെ ബാര് ഉടമകളുടെ നിക്ഷിപ്ത താത്പര്യങ്ങള് സംരക്ഷിക്കാന് ആണെന്ന് വരുത്തി തീര്ക്കുന്നത് അങ്ങേയറ്റം അപലപനീയമാണ്. അതുകൊണ്ട് അനിമോന്റെ വെളിപ്പെടുത്തലുകളെക്കുറിച്ച് അടിയന്തര അന്വേഷണം വേണമെന്നും ഫേസ്ബുക്ക് കുറിപ്പില് ആവശ്യപ്പെട്ടിട്ടുണ്ട്.