സ്കൂൾ പ്രവേശനോത്സവം ; സ്വാഗത സംഘം രൂപീകരിച്ചു
Monday, May 20, 2024 11:29 PM IST
കൊച്ചി: സംസ്ഥാനതല സ്കൂൾ പ്രവേശനോത്സവവുമായി ബന്ധപ്പെട്ട് സ്വാഗത സംഘം രൂപീകരിച്ചു. മന്ത്രി വി.ശിവൻകുട്ടിയുടെ അധ്യക്ഷതയിൽ എളമക്കര സ്കൂളിൽ ചേർന്ന സ്വാഗത സംഘം രൂപീകരണ യോഗം മന്ത്രി പി.രാജീവ് ഉദ്ഘാടനം ചെയ്തു.
ഈ അക്കാദമിക് വർഷത്തെ പ്രവർത്തനങ്ങൾ കുറ്റമറ്റതാക്കുന്നതിനുള്ള എല്ലാ പ്രവർത്തനങ്ങളും പൂർത്തീകരിച്ചതായി മന്ത്രി വി.ശിവൻകുട്ടി പറഞ്ഞു. ജൂൺ മൂന്നിന് എളമക്കര ഗവ. ഹയർ സെക്കൻഡറി സ്കൂളിൽ മുഖ്യമന്ത്രി പിണറായി വിജയൻ സംസ്ഥാനതല സ്കൂൾ പ്രവേശനോത്സവം ഉദ്ഘാടനം ചെയ്യും.
ഇതിന്റെ ഭാഗമായി സംസ്ഥാനത്താകെ ജില്ലാതല പ്രവേശനോത്സവവും തദ്ദേശ സ്ഥാപനാടിസ്ഥാനത്തിലും എല്ലാ സ്കൂളുകളിലും പ്രവേശനോത്സവവും സംഘടിപ്പിക്കും. ഇന്ത്യയിൽ ആദ്യമായി അധ്യാപകർക്ക് നിർമിത ബുദ്ധിയിൽ പരിശീലനം നൽകാൻ കേരളത്തിന് കഴിഞ്ഞെന്ന് മന്ത്രി പറഞ്ഞു.
ഒന്നു മുതൽ ഒമ്പതു വരെയുള്ള ക്ലാസുകളിൽ ഓൾ പ്രൊമോഷൻ നൽകുമ്പോൾ അക്കാദമിക് നിലവാരം കൂടി പരിഗണിക്കും. ഇതുമായി ബന്ധപ്പെട്ട ചർച്ചകൾക്കായി 28ന് വിദ്യാഭ്യാസ കോൺ ക്ലൈവ് തിരുവനന്തപുരത്ത് സംഘടിപ്പിക്കും.