യുവതിയെ ശല്യം ചെയ്തു; പോലീസുകാരനെതിരെ കേസ്
Monday, May 20, 2024 12:39 AM IST
മുംബൈ: മഹാരാഷ്ട്രയിലെ നാഗ്പൂരിൽ യുവതിയെ ശല്യം ചെയ്തെന്ന പരാതിയിൽ പോലീസ് ഇൻസ്പെക്ടർക്കെതിരെ കേസ്. അകോല ജില്ലയിലാണ് സംഭവം. 22കാരിയാണ് പരാതിക്കാരി.
അകോല ജില്ലയിലെ ഖദാൻ പോലീസ് സ്റ്റേഷനിലെ ഇൻസ്പെക്ടറായ ധനഞ്ജയ് സെയർ (53) എന്നയാൾക്കെതിരെയാണ് കേസ്. യുവതിയുടെ പിതാവിന്റെ പരിചയക്കാരനാണ് ധനഞ്ജയ്.
മത്സര പരീക്ഷകൾക്ക് തയാറെടുക്കാൻ സഹായിക്കാനെന്ന വ്യാജേന ധനഞ്ജയ് തന്നെ ഇടയ്ക്ക് വിളിച്ചിരുന്നുവെന്ന് യുവതി പരാതിയിൽ പറയുന്നു. തനിക്കൊപ്പം താമസിക്കാനും ഇയാൾ യുവതിയെ നിർബന്ധിച്ചു. ഇയാളുടെ പെരുമാറ്റത്തിൽ സംശയം തോന്നിയ യുവതി ധനഞ്ജയ്യുമായുള്ള ഫോൺ വിളി അവസാനിപ്പിച്ചു.
പിന്നീട് യുവതിയുടെ വിലാസം കണ്ടെത്തിയ ധനഞ്ജയ് ശനിയാഴ്ച ഇവിടെയെത്തി. യുവതി ജോലിക്ക് പോയെങ്കിലും ഇയാൾ പിന്നാലെ പോയി യുവതിയുടെ കൈയിൽ പിടിച്ചു. തുടർന്ന് യുവതി ബഹളം വച്ചതിനെ തുടർന്ന് ഇയാൾ സ്ഥലത്തു നിന്നും രക്ഷപെടുകയായിരുന്നു.
യുവതിയുടെ പരാതിയുടെ അടിസ്ഥാനത്തിൽ നന്ദൻവൻ പോലീസ് ധനഞ്ജയ് സെയ്റിനെതിരെ പീഡനത്തിന് കേസെടുത്തതായും ഉദ്യോഗസ്ഥർ കൂട്ടിച്ചേർത്തു.