ആവേശം അതിരുകടന്നു; രാഹുലും അഖിലേഷും പ്രസംഗിക്കാതെ മടങ്ങി
Sunday, May 19, 2024 9:25 PM IST
ലക്നോ: ഉത്തര്പ്രദേശിലെ പ്രയാഗ്രാജില് ഇന്ത്യാ മുന്നണിയുടെ തെരഞ്ഞെടുപ്പ് റാലിയിലേക്ക് ആള്ക്കൂട്ടം ഇരച്ചെത്തിയതോടെ രാഹുൽ ഗാന്ധിയും അഖിലേഷ് യാദവും പ്രസംഗിക്കാതെ മടങ്ങി.
ബാരിക്കേഡുകള് മറികടന്ന് പ്രവര്ത്തകര് എത്തിയതോടെ നേതാക്കള് പരിപാടി വെട്ടിച്ചുരുക്കി പോകുകയായിരുന്നു. പ്രയാഗ് രാജിലെ ഫുല്പുര് മണ്ഡലത്തിലെ പാഡിലയിലായിരുന്നു സംഭവം.
നേതാക്കൾ എത്തിയതോടെ കോൺഗ്രസ്, എസ്പി പ്രവർത്തകർ നിയന്ത്രണം വിട്ട് വേദിയിലേക്ക് കയറാൻ ശ്രമിച്ചതായും റിപ്പോർട്ടുണ്ട്. അഖിലേഷ് യാദവും രാഹുൽ ഗാന്ധിയും പാർട്ടി പ്രവർത്തകരോട് ശാന്തരാകാൻ അഭ്യർഥിച്ചെങ്കിലും പ്രവർത്തകർ കുതിച്ചെത്തുകയായിരുന്നു.
സ്ഥിതിഗതികൾ നിയന്ത്രണാതീതമായതോടെ ഇരു നേതാക്കളും പ്രസംഗിക്കാൻ പോലും നിൽക്കാതെ വേദി വിടുകയായിരുന്നു. തുടർന്ന് ഇരുവരും പ്രയാഗ്രാജ് ജില്ലയിലെ തന്നെ അലഹാബാദ് ലോക്സഭാ മണ്ഡലത്തിൽ ഉൾപ്പെടുന്ന കരച്ചനയിൽ സംഘടിപ്പിച്ച യോഗത്തിൽ പങ്കെടുത്തു.