കാട്ടാന ആക്രണം; കോതമംഗലത്ത് വയോധികയുടെ മൃതദേഹവുമായി വൻ പ്രതിഷേധം
Monday, March 4, 2024 12:56 PM IST
ഇടുക്കി: കാട്ടാന വയോധികയുടെ ജീവനെടുത്ത സംഭവത്തില് മൃതദേഹവുമായി വൻ പ്രതിഷേധം. മൃതദേഹവുമായി കോണ്ഗ്രസ് നേതാക്കളും നാട്ടുകാരും കോതമംഗലം ടൗണിലേക്ക് നീങ്ങുകയാണ്.
ഡീന് കുര്യാക്കോസ് എംപി, മാത്യു കുഴല്നാടന് എംഎൽഎ, എറണാകുളം ഡിസിസി പ്രസിഡന്റ് മുഹമ്മദ് ഷിയാസ് എന്നിവരുടെ നേതൃത്വത്തിലാണ് പ്രതിഷേധം. മോര്ച്ചറിയില് നിന്ന് മൃതദേഹം എടുത്തുകൊണ്ടുപോയി പ്രതിഷേധിക്കുന്നത് പോലീസ് തടയാന് ശ്രമിച്ചു.
എന്നാല് പോലീസിനെ തള്ളിമാറ്റി പ്രതിഷേധക്കാര് മുന്നോട്ട് നീങ്ങുകയായിരുന്നു. നേരത്തേ ഇന്ക്വസ്റ്റ് നടത്താനും നാട്ടുകാര് സമ്മതിച്ചിരുന്നില്ല.
ഇടുക്കി നേര്യമംഗലത്ത് ഇന്ന് രാവിലെയാണ് കാട്ടാന ആക്രമണത്തില് വയോധിക കൊല്ലപ്പെട്ടത്. കാഞ്ഞിരവേലി സ്വദേശി ഇന്ദിര രാമകൃഷ്ണൻ(78) ആണ് മരിച്ചത്.
കൂവ വിളവെടുക്കുന്നതിനിടെ കാട്ടാന ആക്രമിക്കുകയായിരുന്നു. സമീപത്ത് റബര് വെട്ടിക്കൊണ്ടിരുന്ന തൊഴിലാളികളാണ് ബഹളം കേട്ട് ഓടിയെത്തി കാട്ടാനയെ തുരത്തിയത്. ഇവരെ ഉടനെ കോതമംഗലം താലൂക്ക് ആശുപത്രിയിലേക്ക് കൊണ്ടുപോയെങ്കിലും വഴിമധ്യേ മരിച്ചു.