സുരേഷ് ഗോപി തൃശൂരിൽ, അനിൽ ആന്റണി പത്തനംതിട്ടയിൽ
Saturday, March 2, 2024 7:03 PM IST
ന്യൂഡൽഹി: ലോക്സഭ തെരഞ്ഞെടുപ്പിനുള്ള ബിജെപിയുടെ ആദ്യ സ്ഥാനാർഥി പട്ടികയിൽ കേരളത്തിൽനിന്ന് 12 പേർ ഇടം പിടിച്ചു. തൃശൂരിൽ സുരേഷ് ഗോപി ജനവിധി തേടും.
കേന്ദ്രമന്ത്രിമാരായ രാജീവ് ചന്ദ്രശേഖറും വി. മുരളീധരനും കേരളത്തിൽനിന്നു ജനവിധി തേടും. രാജീവ് ചന്ദ്രശേഖർ തിരുവനന്തപുരത്ത് മത്സരിക്കുന്പോൾ വി. മുരളീധരൻ ആറ്റിങ്ങലിൽ ജനവിധി തേടും.
അടുത്തിടെ ബിജെപിയിൽ ചേർന്ന മുതിർന്ന കോണ്ഗ്രസ് നേതാവായ എ.കെ. ആന്റണിയുടെ മകൻ അനിൽ ആന്റണിയും ആദ്യ പട്ടികയിൽ ഇടം പിടിച്ചു. പത്തനംതിട്ടിയിൽനിന്നുമാണ് അനിൽ ജനവിധി തേടുക.
മുതിർന്ന നേതാവ് എം.ടി. രമേശ് കോഴിക്കോട് മത്സരിക്കും. ശോഭ സുരേന്ദ്രൻ ആലപ്പുഴയിൽനിന്നും മത്സരിക്കും. പാലക്കാട് സി. കൃഷ്ണകുമാറും കണ്ണൂരിൽ സി. രഘുനാഥും മത്സരിക്കും. വടകരയിൽ പ്രഫുൽ കൃഷ്ണയെയും മലപ്പുറത്ത് ഡോ. അബ്ദുൾ സലാമിനെയും ബിജെപി കളത്തിലിറക്കി.
പൊന്നാനിയിൽ നിവേദിത സുബ്രഹ്മണ്യവും കാസർഗോഡ് എം.എൽ. അശ്വനിയും ജനവിധി തേടും.