യുപിയിലെ രാജ്യസഭാ തെരഞ്ഞെടുപ്പ്; കൂറ് മാറ്റ ഭീഷണിയില് എസ്പി; ചീഫ് വിപ്പ് രാജിവച്ചു
Tuesday, February 27, 2024 12:36 PM IST
ലക്നോ: രാജ്യസഭാ തെരഞ്ഞെടുപ്പ് നടക്കുന്ന ഉത്തര്പ്രദേശില് നാടകീയ നീക്കങ്ങള്. സമാജ്വാദി പാര്ട്ടിക്ക് കനത്ത തിരിച്ചടിയായി നിയമസഭയില് പാര്ട്ടിയുടെ ചീഫ് വിപ്പ് രാജിവച്ചു. ഉഞ്ചാഹറില് നിന്നുള്ള എംഎല്എ കൂടിയായ മനോജ് കുമാര് പാണ്ഡെയാണ് രാജിവച്ചത്.
തെരഞ്ഞെടുപ്പില് എസ്പി എംഎല്എമാര് കൂറ് മാറുമെന്ന അഭ്യൂഹങ്ങള് ശക്തമാകുന്നതിനിടെയാണ് രാജി. ഇതിനിടെ ഇന്ന് രാവിലെ നിയമസഭയിലെത്തിയ എസ്പി എംഎല്എ രാകേഷ് പ്രതാപ് സിംഗ് വോട്ട് രേഖപ്പെടുത്തിയ ശേഷം ജയ് ശ്രീറാം മുഴക്കിയിരുന്നു.
ഇന്ന് രാജ്യസഭാ തെരഞ്ഞെടുപ്പ് നടക്കാനിരിക്കെ തിങ്കളാഴ്ച രാത്രി എസ്പി അധ്യക്ഷന് അഖിലേഷ് യാദവ് വിളിച്ച് ചേര്ത്ത യോഗത്തില് മനോജ് പാണ്ഡെയും രാകേഷ് പ്രതാപ് സിംഗും അടക്കമുള്ള എട്ട് എംഎല്എമാര് പങ്കെടുത്തിരുന്നില്ല. മുകേഷ് വര്മ, മഹാരാജി പ്രജാപതി, പൂജ പാല്, രാകേഷ് പാണ്ഡെ, വിനോദ് ചതുര്വേദി, ഗ്, അഭയ് സിംഗ് എന്നിവരാണ് യോഗത്തിന് എത്താതിരുന്ന മറ്റുള്ളവര്. എസ്പിയുടെ പത്തോളം എംഎല്എമാര് തങ്ങള്ക്കൊപ്പം നില്ക്കുമെന്ന് ബിജെപിയും അവകാശവാദമുന്നയിച്ചിരുന്നു.
ഉത്തര്പ്രദേശിലെ പത്ത് രാജ്യസഭാ സീറ്റുകളിലേക്കാണ് തെരഞ്ഞെടുപ്പ് നടക്കുന്നത്. എംഎല്എമാരുടെ അംഗസംഖ്യ അനുസരിച്ച് ബിജെപിക്ക് ഏഴും സമാജ് വാദി പാര്ട്ടിക്ക് മൂന്നും സ്ഥാനാര്ഥികളെ വിജയിപ്പിക്കാനാകും. എന്നാല് ബിജെപി എട്ടാമത്തെ സ്ഥാനാര്ഥിയെ പ്രഖ്യാപിച്ചതിന് പിന്നാലെയാണ് എസ്പി എംഎല്എമാരെ ചാക്കിട്ട് പിടിക്കാനുള്ള ശ്രമങ്ങള് തുടങ്ങിയത്.
മുന് കേന്ദ്രമന്ത്രി ആര്പിഎന് സിംഗ്, മുന് എംപി ചൗധരി തേജ്വിര് സിംഗ്, മുതിര്ന്ന സംസ്ഥാന നേതാവ് അമര്പാല് മൗര്യ, മുന് മന്ത്രി സംഗീത ബാലവന്ത്, പാര്ട്ടി വക്താവ് സുധാന്ഷു ത്രിവേദി, മുന് എംഎല്എ സാധന സിംഗ്, മുന് ആഗ്ര മേയര് നവീന് ജെയ്ന് എന്നിവരെയാണ് ബിജെപി മത്സരത്തിനായി നിര്ത്തിയിരിക്കുന്നത്.
ഇതിനുപുറമേ ബിജെപി എട്ടാം സ്ഥാനാര്ഥിയായി സഞ്ജയ് സേത്തിനെ രംഗത്തിറക്കിയതോടെ ഒരു സീറ്റില് ശക്തമായ മത്സരമാണ് നടക്കുന്നത്. അഭിനേത്രി ജയാ ബച്ചന്, വിരമിച്ച ഐഎഎസ് ഓഫിസര് അലോക് രഞ്ജന്, ദലിത് നേതാവ് ലാല് സുമന് എന്നിവരാണ് സമാജ്വാദി പാര്ട്ടിയുടെ സ്ഥാനാര്ഥികള്.