മൂന്നാം സീറ്റിൽ വിട്ടുവീഴ്ചയില്ലെന്ന് ലീഗ്; സമവായത്തിലൂടെ പരിഹരിക്കുമെന്ന് കോണ്ഗ്രസ്; ഉഭയകക്ഷി ചര്ച്ച തുടങ്ങി
Sunday, February 25, 2024 11:06 AM IST
കൊച്ചി: ലോക്സഭാ തെരഞ്ഞെടുപ്പിൽ മുസ്ലീം ലീഗിന്റെ മൂന്നാം സീറ്റ് ആവശ്യത്തില് ലീഗ്-കോണ്ഗ്രസ് നേതാക്കള് തമ്മിലുള്ള ഉഭയകക്ഷി ചര്ച്ച ആലുവയില് തുടങ്ങി. ആലുവയിലെ ഗസ്റ്റ് ഹൗസിലാണ് യോഗം.
പ്രശ്നം സൗഹൃദപരമായി തീര്ക്കുമെന്ന് കെപിസിസി പ്രസിഡന്റ് കെ.സുധാകരന് ചര്ച്ചയ്ക്ക് മുമ്പ് പ്രതികരിച്ചു. വിഷയം ചര്ച്ച ചെയ്ത് സമവായത്തിലൂടെ പരിഹരിക്കുമെന്ന് ചെന്നിത്തലയും മാധ്യമങ്ങളോട് പറഞ്ഞു.
എന്നാല് മൂന്നാം സീറ്റ് വേണമെന്ന കടുപിടുത്തം ലീഗ് തുടരുകയാണ്. മൂന്നാം സീറ്റ് വേണമെന്ന ആവശ്യത്തില് ഉറച്ച് നില്ക്കുന്നതായി ഇ.ടി.മുഹമ്മദ് ബഷീര് എംപി പ്രതികരിച്ചു.
വിട്ടുവീഴ്ച ചെയ്യാന് കഴിയാത്ത സാഹചര്യമാണ് നിലവിലുള്ളത്. ലീഗിന്റെ ന്യായമായ ആവശ്യം കോണ്ഗ്രസ് അംഗീകരിക്കുമെന്നാണ് കരുതുന്നതെന്നും അദ്ദേഹം കൂട്ടിച്ചേര്ത്തു.
പി.കെ.കുഞ്ഞാലിക്കുട്ടി, കെ .പി.എ മജീദ്, പി.എം.എ സലാം, ഇ. ടി.മുഹമ്മദ് ബഷീര് എന്നിവരാണ് ലീഗിന്റെ ഭാഗത്തുനിന്ന് ചർച്ചയിൽ പങ്കെടുക്കുന്നത്. കെ.സുധാകരന്, പ്രതിപക്ഷ നേതാവ് വി.ഡി.സതീശന്, യുഡിഎഫ് കണ്വീനര് എം.എം.ഹസന് എന്നിവര് കോണ്ഗ്രസിന്റെ ഭാഗത്തുനിന്ന് ചര്ച്ചയില് പങ്കെടുക്കും.
കോണ്ഗ്രസുമായുള്ള ചര്ച്ചയില് തീരുമാനമായില്ലെങ്കില് ഒറ്റയ്ക്ക് മത്സരിക്കുന്നത് അടക്കമുള്ള കടുത്ത നിലപാടിലേക്ക് ലീഗ് നീങ്ങിയേക്കുമെന്നാണ് വിവരം.