"മദ്യകേരള'മായി മാറും: പുതിയ മദ്യശാലകൾ അനുവദിക്കരുതെന്ന് സുധീരൻ
സ്വന്തം ലേഖകൻ
Tuesday, August 8, 2023 3:43 PM IST
തിരുവനന്തപുരം: പുതിയ മദ്യനയം കേരളത്തെ സമ്പൂര്ണ നാശത്തിലേക്ക് നയിക്കുമെന്ന് ചൂണ്ടിക്കാട്ടി മുതിർന്ന കോൺഗ്രസ് നേതാവ് വി.എം. സുധീരൻ മുഖ്യമന്ത്രിക്ക് കത്ത് നൽകി. പുതിയ മദ്യശാലകൾ അനുവദിച്ചാൽ സംസ്ഥാനം ‘മദ്യകേരള’മായി മാറുമെന്നും സുധീരൻ കത്തിൽ വിമർശിക്കുന്നു.
മയക്കുമരുന്ന് ഉൾപ്പെടെയുള്ള ലഹരി വസ്തുക്കളുടെ വിതരണവും വിപണനവും ഫലപ്രദമായി തടയുന്നതിൽ സർക്കാർ ഗുരുതരമായ വീഴ്ചയാണ് വരുത്തിയിരിക്കുന്നത്. സർക്കാരിന്റെ മദ്യവ്യാപനനയം കൂടി കണക്കിലെടുത്താൽ കേരളം സർവനാശത്തിലേക്കാണ് നീങ്ങുന്നത്.
2016ൽ പിണറായി സർക്കാർ അധികാരത്തിലിരിക്കുമ്പോൾ സംസ്ഥാനത്ത് 29 ബാറുകൾ മാത്രമാണുണ്ടായിരുന്നത്. ഇപ്പോഴത് ആയിരത്തോളമായി മാറി. എൽഡിഎഫ് പ്രകടനപത്രികയിലെ വാഗ്ദാനങ്ങൾ അട്ടിമറിക്കുന്ന തീരുമാനമാണിതെന്നും സുധീരൻ പറഞ്ഞു.