മുതലപ്പൊഴി: സമരം ശക്തമാക്കാൻ പ്രതിപക്ഷവും മത്സ്യത്തൊഴിലാളികളും
Saturday, July 15, 2023 5:12 PM IST
തിരുവനന്തപുരം: മുതലപ്പൊഴിയിൽ വള്ളം മറിഞ്ഞ് നാല് മത്സ്യത്തൊഴിലാളികൾ മരിക്കാനിടയായ സംഭവത്തിൽ ഞായറാഴ്ച മുതൽ വിവിധ സംഘടനകളുടെ പ്രതിഷേധ സമരങ്ങൾക്ക് തുടക്കമാകും.
ലത്തീൻ അതിരൂപത വികാരി ജനറാൽ മോണ്. യൂജിൻ പെരേരയ്ക്കെതിരെയും മത്സ്യത്തൊഴിലാളികൾക്കെതിരെയും പോലീസ് രജിസ്റ്റർ ചെയ്ത കേസുകൾ പിൻവലിക്കുക, പുലിമുട്ട് നിർമാണത്തിലെ അപാകത പരിഹരിക്കുക, സഭാ നേതൃത്വത്തെയും മത്സ്യബന്ധന സമൂഹത്തെയും അപമാനിച്ച മന്ത്രിമാർ മാപ്പ് പറയുക എന്നീ ആവശ്യങ്ങൾ ഉന്നയിച്ച് ഞായറാഴ്ച സംസ്ഥാന വ്യാപകമായാണ് പ്രതിഷേധ പരിപാടികൾ സംഘടിപ്പിച്ചിരിക്കുന്നത്. വിവിധ രൂപതകളുടെയും ഇടവകകളുടെയും സംഘടനകളുടെയും ആഭിമുഖ്യത്തിലാണ് പ്രതിഷേധവും സമരപരിപാടികളും നടത്തുന്നത്.
മുതലപ്പൊഴിയിലെ അപകടങ്ങൾ അവസാനിപ്പിക്കാനുള്ള നടപടികൾ സ്വീകരിക്കണമെന്നാവശ്യപ്പെട്ട് തിങ്കളാഴ്ച രാവിലെ പത്തിന് മുതലപ്പൊഴി, പെരുമാതുറ, പുതുകുറിച്ചി മേഖലകളിലെ മുസ്ലിംജമാഅത്തുകളുടെ കോർഡിനേഷൻ കമ്മിറ്റിയുടെ ആഭിമുഖ്യത്തിൽ മുതലപ്പൊഴി-താഴംപള്ളി ഹാർബർ എക്സിക്യൂട്ടീവ് എൻജിനീയറുടെ ഓഫീസിലേക്ക് പ്രതിഷേധമാർച്ചും ധർണയും സംഘടിപ്പിച്ചിട്ടുണ്ട്. പെരുമാതുറ മുതലപ്പൊഴി ഭാഗത്ത് നിന്നും പ്രകടനമായാണ് നാട്ടുകാർ എത്തുക. ധർണ പുതുകുറിച്ചി മുസ്ലിം ജമാഅത്ത് ചീഫ് ഇമാം സൽമാൻ അൽഖാസിമി ഉദ്ഘാടനം ചെയ്യും.
അപകടമരണങ്ങൾ തുടർക്കഥയാകുന്ന മുതലപ്പൊഴിയിലെ പുലിമുട്ട് നിർമാണത്തിലെ അപാകത പരിഹരിച്ച് മത്സ്യത്തൊഴിലാളികളുടെ ജീവൻ രക്ഷിക്കാനുള്ള നടപടികൾ സ്വീകരിക്കണമെന്നും മത്സ്യത്തൊഴിലാളികൾക്ക് വേണ്ട ക്ഷേമ പദ്ധതികൾ നടപ്പാക്കണമെന്നാവശ്യപ്പെട്ട് കോണ്ഗ്രസിന്റെ നേതൃത്വത്തിൽ സമരം സംഘടിപ്പിച്ചിട്ടുണ്ട്.
അടൂർ പ്രകാശ് എംപി രാവിലെ ഒൻപത് മുതൽ വൈകുന്നേരം അഞ്ച് വരെ മുതലപ്പൊഴിയിൽ നിരാഹാര സത്യാഗ്രഹം നടത്തും. കോണ്ഗ്രസ്, യുഡിഎഫ് പ്രവർത്തകരും നിരാഹാരസമരത്തിൽ പങ്കെടുക്കും.
സമരപരിപാടികളുടെ ഉദ്ഘാടനം പ്രതിപക്ഷ നേതാവ് വി.ഡി. സതീശൻ നിർവഹിക്കും. ഡിസിസി പ്രസിഡന്റ് പാലോട് രവി ഉൾപ്പെടെയുള്ള നേതാക്കൾ സംബന്ധിക്കും. സമാപന സമ്മേളനം രമേശ് ചെന്നിത്തല ഉദ്ഘാടനം ചെയ്യും.