"അമ്മ' ജനറൽ ബോഡി യോഗം പൂർത്തിയായി; സംഘടനാ തെരഞ്ഞെടുപ്പ് അടുത്ത വർഷം
Sunday, June 25, 2023 11:45 PM IST
കൊച്ചി: താരസംഘടന "അമ്മ'യുടെ 29-ാമത് ജനറല് ബോഡി യോഗം കലൂര് ഗോകുലം കണ്വന്ഷന് സെന്ററില് ചേർന്നു.
ചലച്ചിത്ര മേഖലയിലെ ലഹരിമരുന്ന് ഉപയോഗം സംബന്ധിച്ച പരാതികൾ നിലനിൽക്കുന്ന സാഹചര്യത്തിനിടെ നടന്ന യോഗത്തിൽ, ശ്രീനാഥ് ഭാസിക്ക് സംഘടനയിൽ അംഗത്വം നൽകേണ്ടെന്ന് തീരുമാനിച്ചു.
നിർമാതാക്കളുടെ സംഘടനയുടേതടക്കം വിലക്ക് ഭാസിക്ക് ഉള്ളതിനാല് അവരുടെ കൂടി എന്ഒസി ലഭിച്ച ശേഷം അംഗത്വം നല്കുന്നത് സംബന്ധിച്ച് തീരുമാനമെടുത്താല് മതിയെന്ന് ജനറൽ ബോഡി തീരുമാനിച്ചു.
"അമ്മ'യുടെ യോഗത്തെപ്പറ്റി മുന്കൂട്ടി അറിയിച്ചിട്ടും താരങ്ങള്ക്ക് അവധി നല്കാതെ ഇന്ന് ചിത്രീകരണം തുടര്ന്ന അഞ്ച് ചിത്രങ്ങളുടെ നിര്മാതാക്കളെ സംഘടന ഫോണിലൂടെ പ്രതിഷേധം അറിയിച്ചു.
2024 ജൂണില് പുതിയ ഭരണസമിതിയുടെ തെരഞ്ഞെടുപ്പ് നടത്തുവാനും യോഗം തീരുമാനിച്ചിട്ടുണ്ട്. പ്രസിഡന്റ് മോഹന്ലാലിന്റെ അധ്യക്ഷതയില് ചേര്ന്ന യോഗത്തില് അമ്മയുടെ പുതിയ ഡിജിറ്റല് ഐഡന്റിറ്റി കാര്ഡ് മമ്മൂട്ടിക്ക് നല്കി വിതരണോദ്ഘാടനം നിര്വഹിച്ചു.