പ്രൈം വോളി ഫൈനൽ ലെഗ് മത്സരങ്ങള്‍ നാളെമുതല്‍ കൊച്ചിയിൽ
Thursday, February 23, 2023 12:26 AM IST
കൊച്ചി: റുപേ പ്രൈം വോളിബോള്‍ ലീഗിന്‍റെ ഫൈനല്‍ ലെഗ് മത്സരങ്ങള്‍ നാളെമുതല്‍ കടവന്ത്ര രാജീവ്ഗാന്ധി ഇന്‍ഡോര്‍ സ്‌റ്റേഡിയത്തില്‍ (റീജണല്‍ സ്‌പോര്‍ട്‌സ് സെന്‍റര്‍) നടക്കും.
രാത്രി ഏഴിനു നടക്കുന്ന ആദ്യമത്സരത്തില്‍ കാലിക്കട്ട് ഹീറോസ് ചെന്നൈ ബ്ലിറ്റ്‌സിനെ നേരിടും. എല്ലാ ദിവസവും രാത്രി ഏഴിനാണ് മത്സരങ്ങള്‍.
26നു രണ്ട് മത്സരങ്ങള്‍ അരങ്ങേറും. രാത്രി 9.30നായിരിക്കും രണ്ടാം മത്സരം. ബംഗളൂരു, ഹൈദരാബാദ് എന്നിവിടങ്ങളിലെ വിജയകരമായ മത്സരങ്ങള്‍ക്കു ശേഷമാണ് പ്രൈം വോളിബോള്‍ ലീഗ് കൊച്ചിയിലേക്കെത്തുന്നത്.
മാര്‍ച്ച് രണ്ടിന് ലീഗ് റൗണ്ട് മത്സരങ്ങള്‍ അവസാനിക്കും. മാര്‍ച്ച് മൂന്ന്, നാല് തീയതികളിലാണ് സെമിഫൈനല്‍ മത്സരങ്ങള്‍. അഞ്ചിന് കിരീടപ്പോരാട്ടം.
അഞ്ചു മത്സരങ്ങളില്‍നിന്നു നാലുജയവും ഒരു തോല്‍വിയുമായി ഒമ്പതു പോയിന്‍റുള്ള അഹമ്മദാബാദ് ഡിഫന്‍ഡേഴ്‌സാണ് പോയിന്‍റ് പട്ടികയില്‍ ഒന്നാമത്. അഞ്ചില്‍ നാലുകളി ജയിച്ച കോല്‍ക്കത്ത തണ്ടര്‍ബോള്‍ട്ട്‌സ് ആണ് എട്ടു പോയിന്‍റുമായി രണ്ടാമത്. ഇത്രയുംതന്നെ പോയിന്‍റുള്ള ഹൈദരാബാദ് ബ്ലാക്ക് ഹോക്‌സ് മൂന്നാംസ്ഥാനത്തുണ്ട്.
നാലുമത്സരം മാത്രം കളിച്ച കാലിക്കട്ട് ഹീറോസാണ് ആറു പോയിന്‍റുമായി നാലാമത്. ബംഗളൂരു ടോര്‍പ്പിഡോസ് (6), മുംബൈ മിറ്റിയോര്‍സ് (3), ചെന്നൈ ബ്ലിറ്റ്‌സ് (2), കൊച്ചി ബ്ലൂ സ്‌പൈക്കേഴ്‌സ് (0) എന്നിങ്ങനെയാണ് മറ്റു ടീമുകളുടെ പോയിന്‍റുനില. ഇതുവരെ ഒരു മത്സരവും ജയിക്കാത്ത കൊച്ചിക്ക് സ്വന്തം തട്ടകത്തില്‍ അവശേഷിക്കുന്ന മത്സരങ്ങളെല്ലാം നിര്‍ണായകമാണ്.
പോയിന്‍റ് ടേബിളിലെ ആദ്യ നാലുസ്ഥാനക്കാരാണ് സെമിഫൈനലില്‍ പ്രവേശിക്കുക.