കേരള സർവകലാശാലാ ജോയിന്‍റ് രജിസ്ട്രാറെ നീക്കി
Tuesday, July 8, 2025 2:19 AM IST
തിരുവനന്തപുരം: കേരള സര്‍വകലാശാലയില്‍ നാടകീയ നീക്കങ്ങള്‍ തുടരുന്നു. കേരള സര്‍വകലാശാലാ ജോയിന്‍റ് രജിസ്ട്രാര്‍ പി. ഹരികുമാറിനെ ചുമതലകളില്‍നിന്നു നീക്കി. വൈസ് ചാന്‍സലറുടെ താത്കാലിക ചുമതലയുള്ള സിസ തോമസിന്‍റേതാണ് നടപടി.
അഡ്മിനിസ്‌ട്രേഷന്‍ ജോയിന്‍റ് രജിസ്ട്രാര്‍ സ്ഥാനത്തു നിന്ന് അക്കാദമിക് വിഭാഗത്തിലേക്കാണ് മാറ്റിയത്. പകരം ഡോ. മിനി കാപ്പനെ രജിസ്ട്രാറായും ഹേമ ആനന്ദിനെ ജോയിന്‍റ് രജിസ്ട്രാറായും നിയമിച്ചു.
ഹേമ ആനന്ദിനു ഭരണ വിഭാഗം ചുമതലയും നല്‍കിയിട്ടുണ്ട്. വൈസ് ചാന്‍സലറുടെ അനുമതിയില്ലാതെ സസ്‌പെന്‍ഷനിലായിരുന്ന രജിസ്ട്രാര്‍ക്ക് ഹരികുമാര്‍ ചുമതല കൈമാറിയെന്നു കാണിച്ചാണ് നടപടി.
കഴിഞ്ഞ ദിവസം വൈസ് ചാന്‍സലറുടെ ചുമതല വഹിക്കുന്ന ഡോ. സിസ തോമസ് പിരിച്ചുവിട്ടതിനുശേഷവും തുടര്‍ന്ന സിന്‍ഡിക്കറ്റ് യോഗത്തില്‍ ഹരികുമാര്‍ പങ്കെടുത്തിരുന്നു. ഇതില്‍ വിശദീകരണം തേടിയെങ്കിലും ഹരികുമാര്‍ നല്‍കിയിരുന്നില്ല. ഇതിനു പിന്നാലെയാണ് വൈസ് ചാന്‍സലര്‍ ഇദ്ദേഹത്തെ ചുമതലകളില്‍ നീക്കിയത്.