വിഴിഞ്ഞം: മീൻ പിടിക്കുന്നതിനിടെ തിരയിൽപ്പെട്ട് വള്ളത്തിൽനിന്ന് കടലിൽ തെറിച്ച് വീണ മത്സ്യ ത്തൊഴിലാളി മരിച്ചു. വിഴിഞ്ഞം കോട്ടപ്പുറം തുലവിളയിൽ അനിൽ (42) ആണ് മരിച്ചത്.
കഴിഞ്ഞ ദിവസം വൈകുന്നേരം സിന്ധുയാത്രാമാതാ എന്ന വള്ളത്തിൽ വിഴിഞ്ഞം സ്വദേശികളായ മണിയൻ, സിൽവസ്റ്റർ ,യേശുദാസൻ എന്നിവർക്കൊപ്പമാണ് അനിൽ മീൻ പിടിക്കാൻ പുറപ്പെട്ടത്.
തീരത്ത് നിന്ന് 18 കിലോമീറ്റർ ഉൾക്കടലിൽ വലവിരിച്ച് മീൻ പിടിക്കുന്നതിനിടയിൽ രാത്രിയിലായിരുന്നുഅപകടം. വള്ളത്തിൽ നിന്ന് തെറിച്ച് വീണ അനിൽ മീൻ പിടിക്കാൻ വിരിച്ച വലയിൽ കുടുങ്ങി. കൂടെയുണ്ടായിരുന്നവർ ചേർന്ന് വലമാറ്റിയശേഷം ഇന്നലെ രാവിലെ വിഴിഞ്ഞം തുറമുഖത്ത് എത്തിച്ചു. ആംബുലൻസിൽ തിരുവനന്തപുരം മെഡിക്കൽ കോളജിൽ എത്തിച്ചെങ്കിലും രക്ഷിക്കാനായില്ല. വിഴിഞ്ഞം തീരദേശ പോലീസ് മേൽ നടപടി സ്വീകരിച്ചു.