ഫോമാ ഇലക്ഷൻ സെപ്റ്റംബർ 6 ന്; നാമനിർദേശപത്രികകൾ ലഭിക്കേണ്ട അവസാന തീയതി ഓഗസ്റ്റ് 6
Tuesday, July 7, 2020 6:27 PM IST
ഫിലഡൽഫിയ: റാഡിസണ്‍ ട്രിവോസ് ഹോട്ടലില്‍ (2400 Old Lincoln Hwy, Trevose, PA 19053) സെപ്റ്റംബര്‍ 5, 6, 7 തീയതികളിൽ നടക്കുന്ന ഫോമാ കൺവൻഷനോടനുബന്ധിച്ചു 2020 -22 ലെ ഫോമാ ഭരണസമിതിയിലേക്കുള്ള തെരഞ്ഞെടുപ്പ് സെപ്റ്റംബർ 6നു (ഞായർ) നടക്കും. നാമനിർദേശ പത്രികകൾ ലഭിക്കേണ്ട അവസാന തീയതി ഓഗസ്റ്റ് 6 വരെ ആയിരിക്കുമെന്ന് ഫോമാ ഇലക്ഷൻ കമ്മീഷൻ ചെയർമാൻ ജോർജ് മാത്യു, സിപിഎ, കമ്മീഷണർമാരായ സണ്ണി പൗലോസ്, സ്റ്റാൻലി കളരിക്കാമുറിയിൽ എന്നിവര്‍ സംയുകത പ്രസ്താവനയിൽ അറിയിച്ചു.

ഫോമാ ജനറൽ ബോഡി മീറ്റിംഗ്, തെരഞ്ഞെടുപ്പ് എന്നിവയുമായി ബന്ധപ്പെട്ട നിർദേശങ്ങളും വിശദ വിവരങ്ങളും അടങ്ങിയ ഫോമാ ജനറൽ സെക്രട്ടറിയുടെ അറിയിപ്പ് ഇതിനോടകം ഫോമയുമായി ബന്ധപ്പെട്ട എല്ലാ അംഗസംഘടനകൾക്കും അയച്ചിട്ടുണ്ട്. കത്തിലെ നിർദ്ദേശങ്ങളിൽ കാണിച്ചിരിക്കുന്നതുപോലെ മത്സരാർഥികൾകൾ ഫീസും പൂരിപ്പിച്ച നാമനിർദ്ദേശ പത്രികയും ഓഗസ്റ്റ് 6 നു മുന്പായി തെരഞ്ഞെടുപ്പ് കമ്മീഷൻ ചെയർമാൻ ജോർജ് മാത്യു, കോട്ട്മാൻ അവന്യൂ, ഫിലഡെൽഫിയ പി എ 19111 (George Mathew, 1922 Cottman Ave, Philadelphia, PA-19111) എന്ന വിലാസത്തിൽ അയച്ചു കൊടുക്കേണ്ടതാണ്. നാമനിർദ്ദേശ പത്രികയുടെ കോപ്പി [email protected] ലേക്ക് ഇമെയിൽ ചെയ്യാവുന്നതാണ്.

നിലവിലുള്ള ഫോമാ ഭരണഘടനയുടെയും ബൈലോകളുടെയും ആർട്ടിക്കിൾ സെക്ഷൻ 2 അനുസരിച്ച് പ്രതിനിധികളായി ഫോമാ ദേശീയ സമിതിയിലെ എല്ലാ അംഗങ്ങളും അംഗ സംഘടനകളുടെ ഏഴ് (7) പ്രതിനിധികളും ജനറൽ ബോഡിയിൽ ഉൾപ്പെടുന്നു. അവർക്കു മാത്രമേ ജനറൽ ബോഡി മീറ്റിംഗിൽ വോട്ടുചെയ്യാനും തെരഞ്ഞെടുക്കപ്പെട്ട സ്ഥാനങ്ങളിലേക്ക് സ്ഥാനാർത്ഥികളായി മത്സരിക്കുവാനും അവകാശമുള്ളൂ. ദേശീയ ഉപദേശക സമിതിയിൽ നിലവിലുള്ള എല്ലാ പ്രസിഡന്‍റുമാരോ മുൻ പ്രസിഡന്‍റ് (എക്സ് ഒഫിഷ്യൽ) മാരോ അവരുടെ പ്രതിനിധികളോ അംഗ സംഘടനകളുടെ പ്രതിനിധികളായും എക്സിക്യൂട്ടീവ്, നാഷണൽ കമ്മിറ്റി അംഗങ്ങളും ഉൾപ്പെടുന്നു. ഈ ദേശീയ ഉപദേശക സമിതിയിലെ അംഗങ്ങളെ മാത്രമേ കൗൺസിലിലെ സ്ഥാനങ്ങളിലേക്ക് തെരഞ്ഞെടുക്കാനാകൂ.

2015ലും 2017 ലും നടന്ന ജനറൽ ബോഡി മീറ്റിംഗിൽ അംഗീകരിച്ച ഫോമായുടെ ഭരണഘടനയും ബൈലോകളും നിങ്ങളുടെ കൂടുതൽ അറിവിലേക്കായി ഫോമാ വെബ്സൈറ്റിൽ (www .fomaa.com/Constitution) അവലോകനം ചെയ്യാവുന്നതാണ്.
നിങ്ങൾക്ക് എന്തെങ്കിലും ചോദ്യങ്ങളോ സംശയങ്ങളോ ഉണ്ടെങ്കിൽ, ദയവായി മുഖ്യ തെരഞ്ഞെടുപ്പു കമ്മീഷണറയോ അല്ലെങ്കിൽ മറ്റ് കമ്മീഷൻ അംഗങ്ങളുമായോ നിങ്ങൾക്ക് ബന്ധപ്പെടാവുന്നതാണ്.

ആസൂത്രണം ചെയ്ത രീതിയിൽ അന്ന് കൺവൻഷൻ നടക്കുകയാണെങ്കിൽ നിങ്ങളുടെ സഹകരണത്തോടെ നൂറു ശതമാനവും ന്യായവും നീതിയുക്തവുമായ ഒരു തെരഞ്ഞെടുപ്പ് നടത്തുമെന്ന് ഞങ്ങൾ നിങ്ങൾക്ക് ഉറപ്പ് നൽകുന്നതായി തെരഞ്ഞെടുപ്പ് കമ്മീഷൻ ചെയർമാൻ ജോർജ് മാത്യു, സിപിഎ, കമ്മീഷണർമാരായ സണ്ണി പൗലോസ്, സ്റ്റാൻലി കളരിക്കാമുറിയിൽ എന്നിവർ വ്യക്തമാക്കി.

ഫോമ 2020-22 തെരഞ്ഞെടുപ്പുകൾക്കുള്ള നിയമങ്ങൾ

എക്സിക്യൂട്ടീവ് കമ്മിറ്റി, ദേശീയ കമ്മിറ്റി, ദേശീയ ഉപദേശക സമിതി എന്നിവയിലേക്ക് സ്ഥാനാർത്ഥികളെ നാമനിർദ്ദേശം ചെയ്യുന്നതിനുള്ള നാമനിർദ്ദേശ പത്രിക ജനറൽസെക്രട്ടറി എല്ലാ അംഗ സംഘടനകൾക്കും ഇതോടകം അയച്ചുകൊടുത്തിട്ടുണ്ട്.

ജനറൽ ബോഡി മീറ്റിംഗിന്റെയും ദേശീയ ഉപദേശക സമിതി യോഗങ്ങളുടെയും വേദി, സമയം എന്നിവയുടെ എല്ലാ വിശദാംശങ്ങളും സെക്രട്ടറിയുടെ കത്തിൽ ഉണ്ട്.

സംഘടനയുടെ പ്രസിഡന്‍റും സെക്രട്ടറിയും നാമനിർദ്ദേശം അംഗീകരിച്ചാൽ സ്വയം നാമനിർദ്ദേശങ്ങൾ അനുവദനീയമാണ്.

താഴെ പറയുന്ന തസ്തികകളിലേക്കാണ്‌ തെരഞ്ഞെടുപ്പു നടക്കുക

പ്രസിഡന്‍റ് വൈസ് പ്രസിഡന്‍റ് , ജനറൽ സെക്രട്ടറി, ജോയിന്‍റ് സെക്രട്ടറി, ട്രഷറർ, ജോയിന്‍റ് ട്രഷറർ.


റീജണൽ വൈസ് പ്രസിഡന്‍റുമാർ (12) (ഒരു റീജിയന് ഒരാൾ വീതം ഓരോ റീജണിൽ നിന്നും 2 കമ്മിറ്റി മെമ്പേഴ്‌സിനെ ഉൾപ്പെടുത്തിക്കൊണ്ട് 24 കമ്മിറ്റി അംഗങ്ങൾ).

18 നും 30 നും ഇടയിൽ പ്രായമുള്ള യുവജന പ്രതിനിധികൾ (3)

വനിതാ പ്രതിനിധികൾ (3)

ദേശീയ ഉപദേശക സമിതി അംഗങ്ങൾ:

ചെയർമാൻ, വൈസ് ചെയർമാൻ, സെക്രട്ടറി, ജോയിന്‍റ് സെക്രട്ടറി.

പ്രസിഡന്‍റ് സ്ഥാനത്തിന് 500 ഡോളർ, വൈസ് പ്രസിഡന്‍റ്, സെക്രട്ടറി, ജോയിന്‍റ് സെക്രട്ടറി, ട്രഷറർ, ജോയിന്‍റ് ട്രഷറർ എന്നിവർക്ക് 250 ഡോളർ, മറ്റു എല്ലാ കമ്മിറ്റി അംഗങ്ങൾക്കും ദേശീയ ഉപദേശക സമിതി ഓഫീസർമാർക്കും 150 ഡോളർ വീതവും ആയിരിക്കും നാമനിർദ്ദേശ ഫീസ്. യുവജന പ്രതിനിധികൾക്ക് ഫീസില്ല.

ആവശ്യമായ എല്ലാ രേഖകളോടും ഒപ്പുകളോടെയും പൂരിപ്പിച്ച നാമനിർദ്ദേശ ഫോം 2020 ഓഗസ്റ്റ് 6-നോ അതിനുമുമ്പോ തെരഞ്ഞെടുപ്പു കമ്മീഷൻ ചെയർമാൻ Mr. George Mathew, 1922 Cottman Ave Philadelphia, PA-19111 എന്ന വിലാസത്തിലേക്ക് മെയിൽ ചെയ്യണം.നാമനിർദ്ദേശ ഫോമുകളുടെ പകർപ്പ് [email protected] എന്ന വിലാസത്തിൽ ഇമെയിൽ ചെയ്യാവുന്നതുമാണ്.

ഒരു വ്യക്തിയെ ഒരു സ്ഥാനത്തേക്ക് മാത്രമേ നാമനിർദ്ദേശം ചെയ്യാൻ കഴിയൂ, മീറ്റിംഗുകളിൽ പങ്കെടുക്കേണ്ടത് അംഗീകൃതവും രജിസ്റ്റർ ചെയ്തതുമായ പ്രതിനിധിയായിരിക്കണം.

വാർഷിക പൊതുയോഗത്തിലേക്കും ദേശീയ ഉപദേശക സമിതി യോഗത്തിലേക്കും എല്ലാ പ്രതിനിധികളും കൺവൻഷനായി രജിസ്റ്റർ ചെയ്യണം. തിരിച്ചറിയലിനായി സാധുവായ ഒരു ഫോട്ടോ ഐഡി ഉണ്ടായിരിക്കണം. (ഡ്രൈവർ ലൈസൻസ്, പാസ്‌പോർട്ട് അല്ലെങ്കിൽ സ്റ്റേറ്റ് നൽകിയ ഐഡി പോലുള്ളവ)

ഓരോ അംഗസംഘടനയുടെയും പ്രസിഡന്‍റും സെക്രട്ടറിയും ഉചിതമായ ഫോമുകളിൽ ഒപ്പിട്ട് തെരഞ്ഞെടുപ്പിനുള്ള സ്ഥാനാർഥികളുടെയും പ്രതിനിധികളുടെ പട്ടികയുടെയും അംഗീകാരം നൽകണം.

മത്സരിച്ച എല്ലാ തെരഞ്ഞെടുപ്പുകളും രഹസ്യ ബാലറ്റിലൂടെ നടത്തും. നാമനിർദ്ദേശ പത്രിക പിൻവലിക്കാനുള്ള അവസാന തീയതി ഓഗസ്റ്റ് 2020 ഓഗസ്റ്റ് 11 ആണ്. നിശ്ചിത തീയതിയിലോ അതിനു മുമ്പോ ഏതെങ്കിലും സ്ഥാനാർഥി നാമനിർദ്ദേശം പിൻവലിക്കുകയോ അല്ലെങ്കിൽ തെരഞ്ഞെടുപ്പു കമ്മീഷൻ സ്ഥാനാർഥിയെ അയോഗ്യനാക്കുകയോ ചെയ്താൽ അവരുടെ നാമനിർദ്ദേശ ഫീസ് തിരികെ നൽകുന്നതാണ്. 2020 ഓഗസ്റ്റ് 6 നുശേഷം ലഭിക്കുന്ന എല്ലാ നാമനിർദ്ദേശ പത്രികളും അയോഗ്യരാക്കപ്പെടും.

ഓരോ അംഗ സംഘടനകൾ‌ അവരവരുടെ നിലവിലുള്ള അംഗത്വ കുടിശികയായ നൂറു ഡോളർ ഫോമാ ട്രഷററുമായി പരിശോധിക്കേണ്ടതും അവരുടെ ഓർഗനൈസേഷന്‍റെ അംഗത്വം കുടിശികയില്ലാതെ പുതുക്കിയതാണെന്ന് ഉറപ്പുവരുത്തേണ്ടതുമാണ്. പ്രോക്സി വോട്ട് അനുവദനീയമല്ല, വോട്ടുചെയ്യാനും തെരഞ്ഞെടുക്കാനും വാർഷിക പൊതുയോഗത്തിലും ദേശീയ ഉപദേശക സമിതി യോഗത്തിലും സ്ഥാനാർഥികൾ നേരിട്ടു ഹാജരാകണം.

നാമനിർദ്ദേശം ചെയ്യപ്പെട്ടവരുടെ പേരു വിവരങ്ങൾ തെരഞ്ഞെടുപ്പ് കമ്മീഷൻ ചെയർമാന് ലഭിച്ചിട്ടുണ്ടോ എന്നു ഉറപ്പുവരുത്തേണ്ടത് നോമിനികളുടെ ഉത്തരവാദിത്തമായിരിക്കും. തെരഞ്ഞെടുപ്പ് കമ്മീഷൻ ചെയർമാൻ രണ്ട് ദിവസത്തിനുള്ളിൽ ഈമെയിൽ വഴി സ്ഥിരീകരിക്കുന്നതായിരിക്കും.

വോട്ടിംഗ് പരിസരത്ത് വോട്ടർമാർക്ക് മാത്രമേ അനുമതിയുള്ളൂ, വോട്ടിംഗ് പരിസരത്ത് ഒരു സ്ഥാനാർഥിയുടെയും പ്രചാരണം അനുവദിക്കില്ല. ഇക്കാര്യത്തിൽ കൂടുതൽ വ്യക്തത ആവശ്യമുണ്ടെങ്കിൽ അല്ലെങ്കിൽ മുകളിലുള്ള നിർദ്ദേശങ്ങളോ നിയമങ്ങളോ സംബന്ധിച്ച് എന്തെങ്കിലും സംശയമുള്ളവർ തെരഞ്ഞെടുപ്പു കമ്മീഷൻ അംഗങ്ങളെ സമീപിക്കേണ്ടതാണ്.

റിപ്പോർട്ട് : ജോസഫ് ഇടിക്കുള