ADVERTISEMENT

ADVERTISEMENT

അൽഫോൻസാ കോളജിൽ ഇഗ്നൈറ്റ് 2025 സംഘടിപ്പിച്ചു

തിരുവമ്പാടി: അൽഫോൻസാ കോളജിൽ നാലുവർഷ ബിരുദ പഠനത്തിന്‍റെ പ്രാരംഭം കുറിക്കുന്ന ഇൻഡക്ഷൻ പ്രോഗ്രാം "ഇഗ്നൈറ്റ് 2025' സംഘടിപ്പിച്ചു.

പരിപാടി ഐആർഎസ് ഓഫീസറും മുൻ സിബിഐസി ചെയർമാനുമായ ഡോ. ജോൺ ജോസഫ് ഉദ്ഘാടനം ചെയ്തു. എഴുത്തുകാരൻ ഡോ. സോമൻ കടലൂർ ചടങ്ങിൽ മുഖ്യപ്രഭാഷണം നടത്തി. കോളജ് അഡ്മിനിസ്ട്രേറ്റ൪ ഫാ. മനോജ് ജോയി കൊല്ലംപറമ്പിൽ അധ്യക്ഷത വഹിച്ചു.

ചടങ്ങിൽ പ്രിൻസിപ്പൽ ഡോ. ഷൈജു ഏലിയാസ്, വൈസ് പ്രിൻസിപ്പൽ എം.സി. സെബാസ്റ്റ്യൻ, കോളജ് യൂണിയൻ വൈസ് ചെയർപേഴ്സൺ സാനിയാമോൾ ചാൾസ് എന്നിവർ പ്രസംഗിച്ചു.

ADVERTISEMENT

മാനസികാരോഗ്യ അവബോധ ക്ലാസ് സംഘടിപ്പിച്ചു

മുക്കം: കൊടിയത്തൂർ ഗ്രാമപഞ്ചായത്ത് കുടുംബശ്രീ സിഡിഎസിന്‍റെയും ജിആർസിയുടെയും ആഭിമുഖ്യത്തിൽ ചെറുവാടി ഗവ. ഹൈസ്കൂളിൽ മാനസികാരോഗ്യ അവബോധ ക്ലാസ് സംഘടിപ്പിച്ചു. കൊടിയത്തൂർ പഞ്ചായത്ത് പ്രസിഡന്‍റ് ദിവ്യ ഷിബു ഉദ്ഘാടനം ചെയ്തു. സിഡിഎസ് ചെയർപേഴ്സൺ ഷീന അധ്യക്ഷത വഹിച്ചു. കുതിരവട്ടം ജില്ലാ മെന്‍റൽ ഹെൽത്ത് പ്രോഗ്രാം പ്രൊജക്ട് ഓഫീസർ രമ്യ ക്ലാസ് എടുത്തു. പ്രധാനാധ്യാപിക എം.എൻ. നിഷ, കമ്മ്യൂണിറ്റി കൗൺസിലർ ആദിത്യ, സിഡിഎസ് മെമ്പർ കസ്ന, ഷമീമ തുടങ്ങിയവർ പ്രസംഗിച്ചു.

പണിമുടക്ക് ദിനത്തിലെ അനിഷ്ട സംഭവങ്ങൾ; വിവാദമൊടുങ്ങാതെ മുക്കം

മുക്കം: സംയുക്ത തൊഴിലാളി യൂണിയനുകൾ ആഹ്വാനം ചെയ്ത പൊതുപണിമുടക്കിനിടെ സിപിഎം, ഡിവൈഎഫ്ഐ നേതാക്കളുടെ നേതൃത്വത്തിൽ മുക്കത്തുണ്ടായ സംഭവ വികാസങ്ങളിൽ വിവാദം ഇനിയും അവസാനിച്ചില്ല. മുക്കം മത്സ്യ മാർക്കറ്റിൽ മത്സ്യ വിൽപ്പനക്കാരനെ നിർബന്ധിച്ച് അടപ്പിച്ചതും മണ്ണണ്ണ ഒഴിക്കുമെന്ന് ഭീഷണിപ്പെടുത്തിയതും മിനി സിവിൽ സ്റ്റേഷനിൽ ജീവനക്കാരനെ ഭീഷണിപ്പെടുത്തയതുമെല്ലാം നേരത്തെ വിവാദമായിരുന്നു. സംഭവവുമായി ബന്ധപ്പെട്ട ട്രോളുകൾ സോഷ്യൽ മീഡിയയിൽ വലിയ തോതിൽ പ്രചരിക്കുന്നുണ്ട്. അതിനിടെ സിപിഎമ്മിന്‍റെത് ഗുണ്ടായിസമാണെന്നാരോപിച്ച് മുസ്ലീം ലീഗ് പ്രവർത്തകർ മുക്കത്ത് പ്രകടനം നടത്തി. മുക്കം നഗരസഭ, കാരശേരി പഞ്ചായത്ത് കമ്മിറ്റികളുടെ നേതൃത്വത്തിലായിരുന്നു പ്രകടനം. തിരുവമ്പാടി നിയോജകമണ്ഡലം മുസ്ലിം ലീഗ് സെക്രട്ടറിമാരായ ദാവൂദ് മുത്താലം, ഗഫൂർ കല്ലുരുട്ടി, എ.കെ. സാദിഖ്, മുക്കം നഗരസഭ മുസ്ലിം ലീഗ് പ്രസിഡന്‍റ് എ.എം. അബൂബക്കർ, ജനറൽ സെക്രട്ടറി ഐ.പി. ഉമ്മർ, യൂത്ത് ലീഗ് ജില്ലാ സെക്രട്ടറി എം.ടി. സെയ്ദ് ഫസൽ, മുനീർ മുത്താലം, ഗസീബ് ചാലൂളി തുടങ്ങിയവർ നേതൃത്വം നൽകി. അതേ സമയം ദേശീയ പണിമുടക്കിനെ തുടർന്ന് സിപിഎമ്മിനെതിരേ നടക്കുന്ന അപവാദ പ്രചാരണങ്ങൾക്കെതിരേ മുക്കത്ത് പ്രതിഷേധ പ്രകടനവും,പൊതുയോഗവും സംഘടിപ്പിച്ചു. സിപിഎം തിരുവമ്പാടി ഏരിയാ കമ്മിറ്റിയുടെ നേതൃത്വത്തിലാണ് പരിപാടി സംഘടിപ്പിച്ചത്. സിപിഎം ഏരിയ കമ്മിറ്റി ഓഫീസ് പരിസരത്ത് നിന്നാരംഭിച്ച പ്രകടനം മുക്കം ബസ് സ്റ്റാൻഡിൽ സമാപിച്ചു. ‌സിപിഎം ഏരിയ സെക്രട്ടറി വി.കെ വിനോദ് ഉദ്ഘാടനം ചെയ്തു. ജോണി എടശേരി അധ്യക്ഷത വഹിച്ചു.

ബേപ്പൂരിൽ മൂന്ന് തീരദേശ റോഡ് നവീകരണത്തിന് ഫണ്ട്

കോഴിക്കോട്: ബേപ്പൂർ നിയോജക മണ്ഡലത്തിൽ മൂന്ന് തീരദേശ റോഡുകളുടെ നവീകരണ പ്രവൃത്തികൾക്കായി 199.60 ലക്ഷം രൂപയുടെ ഭരണാനുമതി ലഭിച്ചതായി മന്ത്രി പി.എ. മുഹമ്മദ് റിയാസ് അറിയിച്ചു. മണ്ഡലത്തിലെ തീരദേശ റോഡുകൾ നവീകരിക്കുന്നതിന് ഫണ്ട് അനുവദിക്കണമെന്ന് ആവശ്യപ്പെട്ട് ഫിഷറീസ് മന്ത്രിക്ക് കത്ത് നൽകിയതിനെ തുടർന്നാണ് തുക അനുവദിച്ചത്.കടലുണ്ടി പഞ്ചായത്തിലെ ശ്രീദേവി സ്കൂൾ ബസ്സ്റ്റോപ്പ് മുതലാരംഭിക്കുന്ന മുരുകല്ലിങ്ങൽ ചീർപ്പ് പുഴയോരം റോഡിന് 77.90 ലക്ഷം രൂപയും കോർപ്പറേഷൻ പരിധിയിൽ ബേപ്പൂർ മേഖലയിലെ 48-ാം ഡിവിഷനിൽ പാടത്തു പറമ്പ് ഡ്രൈനേജ് കം ഫുട്പാത്ത് നിർമാണത്തിന് 91.50 ലക്ഷം രൂപയും ബേപ്പൂർ മാത്തോട്ടം 53-ാം ഡിവിഷനിൽ മുണ്ടേപ്പാടം റോഡ് നവീകരണത്തിന് 30.20 ലക്ഷം രൂപയുമാണ് വകയിരുത്തിയിട്ടുള്ളത്.ഹാർബർ എൻജിനീയറിങ് വകുപ്പിനാണ് എല്ലാ റോഡുകളുടെയും നിർമാണ ചുമതല. നടപടികൾ പൂർത്തിയാക്കി എത്രയും വേഗം പ്രവൃത്തി ആരംഭിക്കുന്നതിന് നിർദ്ദേശം നൽകിയതായും മന്ത്രി പറഞ്ഞു.

വീട്ടില്‍ മോഷ്ടാവ് കയറുന്ന സിസിടിവി ദൃശ്യങ്ങള്‍ പുറത്ത്

കൊയിലാണ്ടി: ദേശീയപാതയ്ക്ക് അരികില്‍ വീട്ടില്‍ മോഷ്ടാവ് കയറുന്ന സിസിടിവി ദൃശ്യങ്ങള്‍ പുറത്ത്. റോഡരികില്‍ നിന്നും വീടിന്‍റെ മതില്‍ ചാടി അകത്തുകടന്ന ഇയാള്‍ മുകള്‍നിലവരെ കയറിയിട്ടുണ്ട്. എന്നാല്‍ വീട്ടില്‍ നിന്നും ഒന്നും മോഷണം പോയിട്ടില്ല. എന്നാല്‍ ഇതിനു തൊട്ടുപിറകിലുള്ള മാവുള്ളി പുറത്തൂട്ട് ശ്രേയസ് എന്നയാളുടെ വീട്ടിലെ ബൈക്ക് മോഷണം പോയിട്ടുണ്ട്. ആന്തട്ട ഗവ.യുപി സ്‌കൂളിന് സമീപത്തുള്ള തെങ്ങിലോട്ട് സറീനയുടെ വീട്ടില്‍ വെള്ളിയാഴ്ചപുലര്‍ച്ചെ മൂന്നുമണിയോടെയാണ് മോഷ്ടാവ് കയറിയത്. ഇയാൾ റെയിന്‍കോട്ടും ഹെല്‍മറ്റും ധരിച്ചിരുന്നു. മതില്‍ ചാടി താഴെ ഇറങ്ങി ഷൂ അഴിച്ച് കയ്യില്‍ പിടിച്ചശേഷം പിറകുവശത്തെ ഗ്രില്‍ വഴിയാണ് മുകളിലേക്ക് കയറിയത്. പിറകിലെ വീട്ടിലെ ബൈക്ക് മോഷണം പോയ സാഹചര്യത്തില്‍ വീട്ടുകാര്‍ അടുത്ത വീട്ടിലെത്തി സിസിടിവി ദൃശ്യങ്ങള്‍ പരിശോധിച്ചപ്പോഴാണ് മോഷണശ്രമം ശ്രദ്ധയില്‍പ്പെട്ടത്. കൊയിലാണ്ടി പോലീസില്‍ പരാതി നല്‍കി.

കർഷകരുടെ വിളകൾക്ക് ഇൻഷ്വറൻസ് ഉറപ്പുവരുത്തണം: കർഷക കോൺഗ്രസ്

കൂടരഞ്ഞി: വനാതിർത്തിയിലുള്ള കാർഷികവിളകൾക്ക് കാർബൺ ഫണ്ട് ഉപയോഗിച്ച് ഇൻഷ്വറൻസ് പരിരക്ഷ ഉറപ്പുവരുത്തണമെന്നും വന്യമൃഗങ്ങൾ കാർഷിക വിളകൾ നശിപ്പിച്ചാൽ അഞ്ച് ലക്ഷം രൂപയിൽ കുറയാത്ത നഷ്ട പരിഹാരം നൽകണമെന്നും കർഷക കോൺഗ്രസ് സംസ്ഥാന പ്രസിഡന്‍റ് മാജുഷ് മാത്യൂസ് ആവശ്യപ്പെട്ടു. കാട്ടാന ജീപ്പ് തള്ളി മറിച്ച പീടികപ്പാറ തേനരുവി ഏറ്റുമാനുക്കാരൻ ജോസഫ് ഏബ്രഹാമിന്‍റെ വീട് സന്ദർശിച്ച ശേഷം സംസാരിക്കുകയായിരുന്നു അദ്ദേഹം. രൂക്ഷമായ കാട്ടാന ശല്യത്തിന് അടിയന്തര പരിഹാരം കാണാത്ത പക്ഷം ശക്തമായ സമരപരിപാടികൾക്ക് തുടക്കം കുറിക്കുമെന്നും സമരത്തിന്‍റെ ആദ്യപടിയായി താമരശേരി ഫോറസ്റ്റ് റെയ്ഞ്ച് ഓഫീസിലേക്ക് 22 ന് മാർച്ച് നടത്തുമെന്നും അദ്ദേഹം കൂട്ടിച്ചേർത്തു. കർഷക കോൺഗ്രസ് ജില്ല പ്രസിഡന്‍റ് അഡ്വ. ബിജു കണ്ണന്തറ, മില്ലി മോഹൻ, സണ്ണി കാപ്പാട്ടുമല, എം. സിറാജ്ജുദിൻ, തമ്പി പറകണ്ടം, സണ്ണി പെരുകിലം തറപ്പേൽ, അഡ്വ. സിബു തോട്ടത്തിൽ, ദേവസ്യ ചോള്ളാമടം, അനിഷ് പനച്ചിയിൽ, ജോർജ് കുട്ടി കക്കാടംപൊയിൽ, നിസാറ ബിഗം, ജോഷി കുമ്പുക്കൽ, ബെന്നി ആലപ്പാട്ട് എന്നിവർ സംഘത്തിലുണ്ടായിരുന്നു.

കാട്ടാന ആക്രമിച്ച പ്രദേശം സന്ദർശിച്ചു

കൂടരഞ്ഞി: പീടികപ്പാറ മരത്തോട് ഭാഗത്ത് കാട്ടാന ആക്രമണത്തിന് ഇരയായ വിലങ്ങുപാറ ജോസഫ് എന്ന കർഷകന്‍റെ വീട് കോൺഗ്രസ് നേതാക്കൾ സന്ദർശിച്ചു. പ്രദേശത്തെ ജനങ്ങൾ നേരിടുന്ന പ്രശ്നങ്ങൾക്ക് പരിഹാരം കാണാൻ മുന്നിലുണ്ടാവുമെന്ന് നേതാക്കൾ ഉറപ്പ് നൽകി. കോൺഗ്രസ് കെപിസിസി മെമ്പർ ഹബീബ് തമ്പി, ജില്ലാ പഞ്ചായത്ത് മെമ്പർ ബോസ് ജേക്കബ്, മണ്ഡലം പ്രസിഡന്‍റ് സണ്ണി പെരുകിലംതറപ്പേൽ, വാർഡ് പ്രസിഡന്‍റ് തോമസ് മനയാനി, ബൂത്ത് പ്രസിഡന്‍റ് ബാബു പുക്കളത്തിൽ, ബെന്നി ആലപ്പാട്ട്, ജോഷി കൂബുക്കൽ, മുഹമ്മദ് വെള്ളിലതൊടി, പൗലോസ് താന്നിമുള, ഷിജോ വേലൂർ, ജിന്‍റോ പുഞ്ച തറപ്പേൽ തുടങ്ങിയവർ സന്ദർശിച്ചു.

ചെളി സർവീസ് റോഡിലേക്ക് ; യാത്രാദുരിതം

കോഴിക്കോട്: രാമനാട്ടുകര∙ ബൈപാസ് ജംഗ്ഷന്‍ മേൽപാലത്തിന്‍റെ താഴെയുള്ള ചെളി സർവീസ് റോഡിലേക്ക് വ്യാപിക്കുന്നത് യാത്രക്കാരെ വലയ്ക്കുന്നു. പന്തീരാങ്കാവ് ഭാഗത്തുനിന്നു ജംഗ്ഷനിലേക്ക് എത്തുന്ന സർവീസ് റോഡിലാണ് ചെളി പരന്നത്. ചെളിക്കെട്ടിലൂടെ വാഹനങ്ങൾ പോകുമ്പോൾ നടപ്പാതയിൽ സഞ്ചരിക്കുന്നവരുടെ ദേഹത്ത് തെറിക്കുന്നു. ആറുവരിപ്പാതയ്ക്കായി പുതിയ മേൽപാലം നിർമിച്ച ശേഷം അടിഭാഗത്തെ മണ്ണ് നീക്കം ചെയ്യാത്തതാണു മഴയിൽ ചെളി പരക്കാൻ ഇടയാക്കിയത്. ശക്തമായ മഴ പെയ്യുമ്പോഴാണു ചെളിവെള്ളം റോഡിലേക്ക് ഒഴുകിയെത്തുന്നത്. പാലത്തിനു താഴെ ചരക്കുവാഹനങ്ങൾ നിർത്തിയിടുന്ന ഭാഗം ആകെ ചെളിക്കുളമാണ്.‌ ദൂരസ്ഥലങ്ങളിൽ നിന്നു വരുന്ന ചരക്കു ലോറിക്കാർ മേൽപാലത്തിനു നിർത്തിയിടുന്നത്. ഇങ്ങനെ എത്തുന്ന ലോറികൾ കടന്നു പോയാണു പ്രദേശം വൃത്തിഹീനമായത്.

എംഡിഎംഎ കേസിൽ യൂത്ത് ലീഗ് നേതാവ് പിടിയിൽ

കൂടരഞ്ഞി: എംഡിഎംഎ കേസിൽ കൂന്പാറയിലെ യൂത്ത് ലീഗ് നേതാവ് പിടിയിൽ. കൂടരഞ്ഞി പഞ്ചായത്ത് മുൻ പ്രസിഡന്‍റ് സാദിഖലി കൂമ്പാറയാണ് അറസ്റ്റിലായത്. 400 ഗ്രാം എംഡിഎംഎയുമായി അബ്ദുൾഖാദർ എന്നയാളെ ബേക്കൽ പോലീസ് അറസ്റ്റ് ചെയ്തിരുന്നു. അബ്ദുൽ ഖാദറിന്‍റെ മൊഴിയുടെ അടിസ്ഥാനത്തിൽ സാദിഖലിയുടെ വീട്ടിൽ എത്തിയപ്പോഴേക്കും ഭാര്യയെയും കൂട്ടി രക്ഷപെടുകയായിരുന്നു. കൈകാണിച്ചിട്ടും നിർത്താതെ പോയ കാറിനെ വയനാട്ടിൽ ലക്കിടിയിൽ നിന്നും ബത്തേരി പോലീസ് കസ്റ്റഡിയിൽ എടുക്കുകയും ബേക്കൽ പോലീസിന് കൈമാറുകയുമായിരുന്നു. പിന്നീട് കോടതിയിൽ ഹാജരാക്കി റിമാൻഡ് ചെയ്തു.

ശുചിത്വത്തിൽ മാതൃക തീർത്ത് കടലും തീരവും

കോഴിക്കോട്: ശുചിത്വസാഗരം സുന്ദര തീരം പദ്ധതിയിൽ സംസ്ഥാനത്ത് ഒന്നാമതെത്തിയ കോഴിക്കോട് ജില്ല മുന്നോട്ട് വെക്കുന്നത് ഒറ്റക്കെട്ടായ പ്രവർത്തനങ്ങളുടെ വിജയഗാഥ. കടലിലും തീരത്തും അടിഞ്ഞുകൂടുന്ന പ്ലാസ്റ്റിക് മാലിന്യങ്ങള്‍ നീക്കാന്‍ സംസ്ഥാന സര്‍ക്കാര്‍ ആവിഷ്‌കരിച്ച ശുചിത്വസാഗരം സുന്ദര തീരം. പദ്ധതിയില്‍ മികച്ച പ്രവര്‍ത്തനം നടത്തിയതിനുള്ള സംസ്ഥാനതല അവാര്‍ഡ് കോഴിക്കോട് ജില്ലയ്ക്ക് ലഭിച്ചതായി മന്ത്രി സജി ചെറിയാന്‍ കഴിഞ്ഞ ദിവസം പ്രഖ്യാപിച്ചിരുന്നു. കടല്‍ത്തീരം പ്ലാസ്റ്റിക് മുക്തവും ശുചിത്വമുള്ളതും മനോഹരവുമാക്കുന്നതില്‍ ഏറ്റവും മികച്ച പങ്ക് വഹിച്ചതിനാണ് പുരസ്‌കാരം. മത്സ്യബന്ധനം, തദ്ദേശ സ്വയംഭരണം, യുവജനകാര്യം, വിനോദ സഞ്ചാരം വകുപ്പുകളുടെയും അവയുടെ നിയന്ത്രണത്തിലുള്ള വിവിധ സ്ഥാപനങ്ങള്‍, സംഘങ്ങള്‍, സന്നദ്ധ സേവകര്‍ എന്നിവരുടെ സഹകരണത്തോടെയുമാണ് പദ്ധതി നടപ്പിലാക്കിയത്. ജില്ലയിൽ അഴിയൂര്‍ പഞ്ചായത്തിലെ എരിക്കല്‍ ബീച്ച് മുതല്‍ കടലുണ്ടി പഞ്ചായത്തിലെ വാക്കടവ് കോര്‍ണിഷ് മസ്ജിദ് വരെ ഓരോ കിലോമീറ്റര്‍ ഇടവെട്ട് സജ്ജീകരിച്ച 72 ആക്ഷന്‍ കേന്ദ്രങ്ങള്‍ കേന്ദ്രീകരിച്ചാണ് പദ്ധതി നടപ്പിലാക്കിയത്. ഇതിന്‍റെ മുന്നോടിയായി തദ്ദേശ സ്വയംഭരണ സ്ഥാപനങ്ങളെയും രാഷ്ട്രീയ പാര്‍ട്ടികളെയും, വിവിധ വകുപ്പുകളെയും സംയോജിപ്പിച്ച് ആക്ഷന്‍ കേന്ദ്രങ്ങള്‍ കേന്ദ്രീകരിച്ച് പരിപാടിയുടെ വിജയത്തിനായി വിവിധ സംഘാടക സമിതികള്‍ രൂപീകരിക്കുകയുയും ചെയ്തു.

കോടതി മുറ്റത്ത് ക്രിക്കറ്റ് ആവേശം; ജഡ്ജിമാരെ തോല്‍പിച്ച് ജീവനക്കാര്‍

കോഴിക്കോട്: പതിവില്ലാതെ കോഴിക്കോട് ജില്ലാ കോടതി മുറ്റത്ത് നിറഞ്ഞുനിന്ന ക്രിക്കറ്റ് ആവേശം കണ്ട് കോടതിയില്‍ എത്തിയവര്‍ക്ക് കൗതുകം. ജഡ്ജിമാരും കോടതി ജീവനക്കാരും തമ്മിലുള്ള ആവേശകരമായ കളിയിൽ കോടതി ജീവനക്കാരുടെ ടീം 58 റൺസിന് വിജയിച്ചു. ടോസ് നേടിയ ജഡ്ജിമാരുടെ ടീം ബൗളിംഗ് തെരഞ്ഞെടുത്തോടെ കോടതി മുറ്റത്ത് കണ്ടത്ത് വീറും വാശിയും നിറഞ്ഞ മത്സരം. എട്ട് ഓവറിൽ കോടതി ജീവനക്കാർ 119 റൺസ് നേടി.അഡീഷനൽ ജില്ലാ ജഡ്ജി ആർ.മധുവിന്‍റെ നേതൃത്വത്തിലിറങ്ങിയ ജഡ്ജിമാരുടെ ടീമിന് 61 റൺസേ എടുക്കാനായുള്ളൂ. കോർട്ട്മെൻസ് കാലിക്കറ്റിന്‍റെ കുടുംബോത്സവുമായി ബന്ധപ്പെട്ടാണ് ന്യായാധിപൻമാരും ജീവനക്കാരും തമ്മിലുള്ള ക്രിക്കറ്റ് മത്സരം നടന്നത്. ക്രിക്കറ്റ് കളിക്കാരൻ കൂടിയായിരുന്ന പ്രിൻസിപ്പൽ മുൻസിഫ് പി.വിവേകിന്‍റെ ഓർമയ്ക്കായി ഏർപ്പെടുത്തിയ എവർ റോളിങ് ട്രോഫിക്കായാണ് ക്രിക്കറ്റ് മത്സരം നടന്നത്. മത്സരം ഒന്നാം അഡീഷനൽ ജില്ലാ ജഡ്ജി എൻ.ആർ.കൃഷ്ണകുമാർ ഉദ്ഘാടനം ചെയ്തു. വിജയികൾക്ക് ഇന്ന്നടക്കുന്ന കോടതി ജീവനക്കാരുടെ കുടുംബോത്സവത്തിൽ ട്രോഫികൾ സമ്മാനിക്കും.

എംടിയുടെ ഓര്‍മയ്ക്ക് ദൃശ്യശില്‍പവുമായി സബര്‍മതി കലാസാംസ്‌കാരിക സമിതി

കോഴിക്കോട്: പേരാമ്പ്ര ചെറുവണ്ണൂരിലെ സബര്‍മതി കലാസാംസ്‌കാരിക സമിതി എം.ടി. വാസുദേവന്‍ നായരുടെ ഓര്‍മയ്ക്കായി എം.ടി. എഴുത്തിന്‍റെ ആത്മാവ് എന്ന ദൃശ്യശില്‍പം ഒരുക്കി. പാട്ടും നൃത്തവും നാടകവും ചേര്‍ന്ന ദൃശ്യശില്‍പത്തിന്‍റെ അവതരണം ഇന്ന് സബര്‍മതി ഓഡിറ്റോറിയത്തിലും 14ന് കോഴിക്കോട് ടൗണ്‍ ഹാളിലും നടക്കും. എം.ടി.യുടെ പ്രശസ്ത നോവലുകളിലെ പള്ളിവാളും ചിലമ്പും, ഓളവും തീരവും, മഞ്ഞ്, രണ്ടാമൂഴം,ഇരുട്ടിന്റെ ആത്മാവ്, അക്കല്‍ ദാമയില്‍ പൂക്കള്‍ വിടരുമ്പോള്‍ എന്നീ കൃതികളിലെ കഥാപാത്രങ്ങളെ വേദിയില്‍ എത്തിക്കും. ഇരുട്ടിന്റെ ആത്മാവിലെ വേലായുധനും ഓളവും തീരത്തിലെ ബാപ്പുട്ടിയും സൈനബയും മഞ്ഞിലെ വിമലയും പള്ളിവാളും ചിലമ്പിലെ വെളിച്ചപ്പാടും രണ്ടാമൂഴത്തിലെ ഭീമനും ദ്രൗപദിയും അക്കല്‍ദാമലയിലെ പൂക്കള്‍ വിടരുമ്പോളിലെ യുദാസും പുതിയ കാലത്തില്‍ എം.ടിയോടു സംവദിക്കുന്ന രീതിയിലാണ് രചനയും രംഗഭാഷയും നിര്‍വഹിച്ചിരിക്കുന്നതെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു.അക്ബര്‍ കക്കട്ടിലിന്‍റെ സ്നേഹിതന്മാര്‍ എന്ന ചെറുകഥയെ ആസ്പദമാക്കി ഒരു കോയിക്കോടന്‍ ഹല്‍വ എന്ന നാടകവും അരങ്ങേറും. ഇന്ന് സബര്‍മതി ഓഡിറ്റോറിയത്തില്‍ നാടകം അവതരിപ്പിക്കും. വാര്‍ത്താസമ്മേളനത്തില്‍ രമേശ് കാവില്‍, അജയ് ഗോപാല്‍, ആംസിസ് മുഹമ്മദ് എന്നിവര്‍ പങ്കെടുത്തു.

മലയോരത്ത് മത്സരാവേശം : മലബാർ റിവർ ഫെസ്റ്റിവൽ ഓഫ് റോഡ് ഫൺ ഡ്രൈവ് ഇന്നു മുതല്‍

കോടഞ്ചേരി: ടൂറിസംവകുപ്പ് സംഘടിപ്പിക്കുന്ന 11-ാം മലബാർ റിവർ ഫെസ്റ്റിവൽ 24 മുതൽ 27 വരെ കോടഞ്ചേരി പഞ്ചായത്തിലെ ഇരുവഞ്ഞിപ്പുഴയിലും ചാലിപ്പുഴയിലുമായി നടക്കും. തദ്ദേശസ്വയംഭരണവകുപ്പുമായി സഹകരിച്ച് കേരള അഡ്വഞ്ചർ ടൂറിസം പ്രൊമോഷൻ സൊസൈറ്റി, ജില്ലാ ടൂറിസം പ്രൊമോഷൻ കൗൺസിൽ എന്നിവയുടെ ആഭിമുഖ്യത്തിലാണ് മല്‍സരങ്ങള്‍ സംഘടിപ്പിക്കുന്നത്. ഇന്ത്യൻ കയാക്കിംഗ് ആൻഡ് കനോയിംഗ് അസോസിയേഷൻ ആണ് പരിപാടിയുടെ സാങ്കേതികനിയന്ത്രണം നിർവഹിക്കുകയെന്നും വിവിധസംസ്ഥാനങ്ങളിൽനിന്നും 17 രാജ്യങ്ങളിൽനിന്നുമുള്ള കായാക്കർമാർ ഫെസ്റ്റിവലിൽ പങ്കാളികളാകുമെന്നും സംഘാടകർ അറിയിച്ചു. പ്രചാരാണർഥം വ്യത്യസ്ത മത്സരങ്ങളും പരിപാടികളും നടത്തുന്നു. ഇന്ന് രാവിലെ ഒമ്പതിന് തേവര്‍മലയില്‍ ഓഫ് റോഡ് ഫൺ ഡ്രൈവ് നടത്തും. ലിന്‍റൊ ജോസഫ് എംഎൽഎ ഉദ്ഘാടനം ചെയ്യുന്ന ചടങ്ങിൽ കോടഞ്ചേരി പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശ്ശേരി അധ്യക്ഷത വഹിക്കും. 14 കയാക്കിംഗ് താരങ്ങൾ ഉൾപ്പെടെ വിവിധ സംസ്ഥാനങ്ങളിൽനിന്നുള്ള മുൻനിര കയാക്കിങ് താരങ്ങളും മലബാർ റിവർ ഫെസ്റ്റിവലിൽ പങ്കെടുക്കുമെന്ന് മന്ത്രി പി.എ. മുഹമ്മദ് റിയാസ് പറഞ്ഞു. കയാക്കിംഗ് രംഗത്തെ ഏറ്റവും പ്രമുഖതാരങ്ങളാണ് എത്തുക. രാജ്യത്തെ സാഹസികവിനോദങ്ങളുടെ കേന്ദ്രമായി സംസ്ഥാനത്തെ മാറ്റുകയാണ് ലക്ഷ്യമെന്നും മന്ത്രി പറഞ്ഞു. മലബാർ റിവർ ഫെസ്റ്റിന്‍റെ ഭാഗമായി ഇരുവഞ്ഞിപ്പുഴയിലും ചാലിപ്പുഴയിലും റിവർ റാഫ്റ്റിംഗ് ആരംഭിച്ചു. പാഡിൽ മോങ്ക്സ് അഡ്വഞ്ചറസ് ഉടമയും കയാക്കറുമായ ബിശ്വാസ് രാധിന്‍റെ നേതൃത്വത്തിലാണ് റിവർ റാഫ്റ്റിംഗ് ആരംഭിച്ചത്. റാഫ്റ്റിൽ ഒരേ സമയം എട്ട് പേർക്ക് യാത്ര ചെയ്യാം. പാറക്കൂട്ടങ്ങൾ നിറഞ്ഞതും കുത്തൊഴുക്കുമുള്ള പുഴയിലൂടെ റാഫ്റ്റ് ചെയ്യുന്നത് സാഹസികതനിറഞ്ഞതാണ്. റാഫ്റ്റ് നിയന്ത്രിക്കാൻ ഒരാളും സുരക്ഷ ഒരുക്കി മറ്റൊരാൾ കയാക്ക് തോണിയിലും ഒപ്പം ഉണ്ടാകും. ശക്തമായ ഒഴുക്കിൽ പുഴയിലൂടെ തുഴഞ്ഞു പോകുന്ന സംഘങ്ങളെ കാണാൻ പുഴയോരങ്ങളിൽ ഒട്ടേറെപ്പേർ എത്തുന്നുണ്ട്. പുഴകളിൽ നീരൊഴുക്ക് കുറയുന്നത്വരെ എല്ലാ ദിവസങ്ങളിലും റാഫ്റ്റിംഗ് ഉണ്ടായിരിക്കുമെന്ന് ബിശ്വാസ് രാധ് പറഞ്ഞു.

വിദ്യാരംഗം കലാസാഹിത്യ വേദി ഉദ്ഘാടനം ചെയ്തു

കോഴിക്കോട്: ആനക്കാംപൊയിൽ സെന്‍റ് മേരീസ് യുപി സ്കൂളിൽ വിദ്യാരംഗം കലാസാഹിത്യവേദിയുടെയും വിവിധ ക്ലബുകളുടെയും ഉദ്ഘാടനം വാർഡ് മെമ്പർ മഞ്ജു ഷിബിൻ നിർവഹിച്ചു. കുട്ടികളിലെ ‌ കലാപരവും മറ്റ് അഭിരുചികളെയും പരിപോഷിപ്പിക്കുക എന്ന ലക്ഷ്യത്തോടെയാണ് വിദ്യാരംഗം കലാസാഹിത്യ വേദിയും മറ്റ് ക്ലബുകളും ആരംഭിച്ചത്. പിടിഎ പ്രസിഡന്‍റ് ഫ്രിജിൽ അധ്യക്ഷത വഹിച്ചു. പ്രധാനാധ്യാപകൻ റോയ് ജോസ്, അധ്യാപകരായ എൻ.ജെ. ദീപ, അരുൺ ബെന്നി, അൻസ സജി എന്നിവർ പ്രസംഗിച്ചു. വിദ്യാർഥികളുടെ വിവിധ കലാപരിപാടികളും ചടങ്ങിൽ‌ നടന്നു.

പ്രതിഷേധ സദസ് സംഘടിപ്പിച്ചു

കോഴിക്കോട്: പണിമുടക്ക് ദിനത്തിൽ ജോലിക്ക് ഹാജരായ വെസ്റ്റ്ഹിൽ എൻജിനീയറിംഗ് കോളജ് ജീവനക്കാരനും ബ്രാഞ്ച് പ്രസിഡന്‍റുമായ കെ.ടി. രമേശനെ ഓഫീസിൽ അതിക്രമിച്ച് കയറി കൈയ്യേറ്റം ചെയ്ത സമരക്കാരുടെ നടപടിക്കെതിരേ എൻജിഒ അസോസിയേഷൻ പ്രതിഷേധ സദസ് സംഘടിപ്പിച്ചു. ജില്ലാ പ്രസിഡന്‍റ് പ്രേംനാഥ് മംഗലശേരി ഉദ്ഘാടനം ചെയ്തു. താമരശേരി ബ്രാഞ്ച് പ്രസിഡന്‍റ് പി. അരുൺ അധ്യക്ഷനായി. സെറ്റോ ജില്ലാ ചെയർമാൻ സിജു കെ. നായർ, താലൂക്ക് ചെയർമാൻ മധു രാമനാട്ടുകര, ജില്ലാ വൈസ് പ്രസിഡന്‍റ് രഞ്ജിത്ത് ചേമ്പാല, എലിസമ്പത്ത് ടി. ജേക്കബ്, കെ. ലിജിന, കെ.ടി. രാജി, റോഷ്ണ ഡെൻസിൽ എന്നിവർ പ്രസംഗിച്ചു. പ്രതിഷേധ പ്രകടനത്തിന് എം.വി. ബഷീർ, വി. ബെനഡിക്ട്, കെ. ജോതിഷ് കുമാർ, കെ. അഫ്സൽ, കെ. ജയേഷ്, കെ.ടി. രമേശൻ, കെ.ടി. നിഖിൽ എന്നിവർ നേതൃത്വം നൽകി.

തെരുവു നായകൾ കൂട്ടത്തോടെ ചത്ത നിലയിൽ

ചക്കിട്ടപാറ: ചക്കിട്ടപാറ ടൗണിലുണ്ടായിരുന്ന തെരുവു നായകളെ ടൗണിന്‍റെ പല ഭാഗത്തായി ചത്തനിലയിൽ കണ്ടെത്തി. ഭക്ഷണത്തിൽ വിഷം ചേർത്ത് നൽകി കൊന്നതെന്നാണ് അനുമാനം. ചില വീടുകളിൽ നിന്ന് ഉപേക്ഷിച്ച മികച്ചയിനം നായകളും കൂട്ടത്തിലുണ്ട്. സംഭവത്തിൽ അന്വേഷണം വേണമെന്ന് മൃഗ സ്‌നേഹികൾ ആവശ്യപ്പെട്ടു.

കക്കയത്ത് അടിയന്തരാവസ്ഥയുടെ വാർഷികം ആചരിച്ചു

കൂരാച്ചുണ്ട്: സിപിഎം ബാലുശേരി ഏരിയ കമ്മിറ്റിയുടെ നേതൃത്വത്തിൽ അടിയന്തരാവസ്ഥയുടെ ഒൻപതാം വാർഷികം ആചരണത്തോടനുബന്ധിച്ച് അടിയന്തരാവസ്ഥയുടെ ചരിത്രം പേറുന്ന കക്കയത്ത് "ഓർമ്മകളുടെ പോരാട്ടം' എന്ന പേരിൽ പരിപാടി സംഘടിപ്പിച്ചു. സിപിഎം കേന്ദ്ര കമ്മിറ്റി അംഗവും എൽഡിഎഫ് കൺവീനറുമായ ടി.പി രാമകൃഷ്ണൻ ഉദ്ഘാടനം ചെയ്തു. ജില്ലാ കമ്മിറ്റി അംഗം സച്ചിൻ ദേവ് എംഎൽഎ അധ്യക്ഷത വഹിച്ചു. അടിയന്തരാവസ്ഥയിൽ ജയിൽവാസം അനുഭവിക്കുകയും പോലീസ് പീഡനത്തിന് ഇരയാവുകയും ചെയ്ത പോരാളികളെ ജില്ലാ സെക്രട്ടറി എം. മെഹബൂബ് ആദരിച്ചു. ഇസ്മായിൽ കുറുമ്പൊയിൽ, ടി.കെ. സുമേഷ്, പി.പി പ്രേമ, വി.എം. കുട്ടികൃഷ്ണൻ, എം.കെ. നളിനി, എ.കെ. മണി, പി.പി. രവീന്ദ്രനാഥ്, കെ.ജി. അരുൺ, വി.ജെ. സണ്ണി എന്നിവർ പ്രസംഗിച്ചു.

വായന പക്ഷാചരണത്തിന് സമാപനം

കോഴിക്കോട്: വായനയുടെ പ്ലാറ്റ്ഫോമുകളും രീതികളും മാത്രമാണ് മാറുന്നതെന്നും വായന നിലയ്ക്കുന്നില്ലെന്നും സെമിനാര്‍. ഏത് പ്ലാറ്റ്‌ഫോമിലൂടെ വായിച്ചാലും വായനാനുഭവം ഒരുപോലെയാണെന്നും വായനയിലൂടെ വ്യക്തി എന്ത് ഉള്‍ക്കൊള്ളുന്നു എന്നതാണ് പ്രധാനമെന്നും ഡിജിറ്റല്‍ വായനയില്‍ സംഘടിപ്പിച്ച സെമിനാര്‍ അഭിപ്രായപ്പെട്ടു. വായന പക്ഷാചാരണത്തോടനുബന്ധിച്ച് ജില്ലാ ഇന്‍ഫര്‍മേഷന്‍ ഓഫീസിന്‍റെയും ജില്ലാ ഭരണകൂടത്തിന്‍റെയും കാലിക്കട്ട് യൂണിവേഴ്സിറ്റി ജില്ലാ എന്‍എസ്എസിന്‍റെയും സംയുക്താഭിമുഖ്യത്തില്‍ വായന പക്ഷാചരണ സമാപനത്തിന്‍റെ ഭാഗമായി ഡിജിറ്റല്‍ വായന എന്ന വിഷയത്തില്‍ കോളജ് വിദ്യാര്‍ഥികള്‍ക്കായി സംഘടിപ്പിച്ച സെമിനാറിലാണ് പുതുവായന ചര്‍ച്ചയായത്. ഫാറൂഖ് ട്രെയിനിംഗ് കോളജില്‍ നടന്ന സെമിനാര്‍ ഡെപ്യൂട്ടി കളക്ടര്‍ ഗോപിക ഉദയന്‍ ഉദ്ഘാടനം ചെയ്തു. പുത്തന്‍ സാങ്കേതിക വിദ്യകള്‍ വായനയും എഴുത്തും കൂടുതല്‍ ജനകീയമാക്കിയെന്ന് ഡെപ്യൂട്ടി കളക്ടര്‍ പറഞ്ഞു. വിദ്യാര്‍ഥികള്‍ കൂടുതല്‍ സമയം വായനക്കായി മാറ്റിവെക്കാന്‍ തയാറാവണമെന്നും അവര്‍ പറഞ്ഞു. ഫാറൂഖ് ട്രെയിനിംഗ് കോളജ് പ്രിന്‍സിപ്പല്‍ പ്രഫ. ടി മുഹമ്മദ് സലീം അധ്യക്ഷത വഹിച്ചു.

ഇടതു സംഘടനകൾ ആക്രമണം അഴിച്ചുവിടുന്നു: കെപിഎസ്ടിഎ

കോഴിക്കോട്: തുടർഭരണം നഷ്ടമാകുമെന്ന യാഥാർഥ്യം ഉൾക്കൊള്ളാൻ കഴിയാത്ത ഇടത് പക്ഷ സംഘടനകൾ അക്രമം അഴിച്ചു വിടുകയാണെന്ന് കെപിഎസ്ടിഎ സംസ്ഥാന ജനറൽ സെക്രട്ടറി പി.കെ. അരവിന്ദൻ പറഞ്ഞു. അധ്യാപകർക്കും ജീവനക്കാർക്കും എഴുപത്തിഅയ്യായിരം കോടിയുടെ ആനുകൂല്യങ്ങൾ കുടിശികയാക്കിയ സംസ്ഥാന ഗവൺമെന്‍റിനെതിരേ സമരം ചെയ്യാതെ കേന്ദ്രത്തിനെതിരേ സമരാഭാസം നടത്തുകയാണ് ഇടത് പക്ഷ സംഘടനകൾ. അപഹാസ്യമായ സമരത്തിന്‍റെ മറവിൽ സമരം ചെയ്യാത്ത അധ്യാപകരെ ആക്രമിച്ചവർക്കെതിരേ നടപടി സ്വീകരിക്കണമെന്ന് ആവശ്യപ്പെട്ട് കെപിഎസ്ടിഎ കോഴിക്കോട് ജില്ലാ കമ്മിറ്റി സംഘടിപ്പിച്ച പ്രതിഷേധ മാർച്ച് ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ പ്രസിഡന്‍റ് ടി.ടി. ബിനു അധ്യക്ഷത വഹിച്ചു.

കാർ വൈദ്യുതി പോസ്റ്റിൽ ഇടിച്ചു തകർന്നു

കോടഞ്ചേരി: കൈതപ്പൊയിൽ- അഗസ്ത്യന്മുഴി റോഡിൽ വീണ്ടും വാഹനാപകടം. കണ്ണോത്ത് അങ്ങാടിയിൽ നിയന്ത്രണംവിട്ട കാർ വൈദ്യുതി പോസ്റ്റിൽ‌ ഇടിച്ചു. അരീക്കോട് സ്വദേശിയുടെകാറാണ് അപകടത്തിൽപെട്ടത്. ആർക്കും പരിക്കില്ല. പോസ്റ്റ് തകർന്നതിനാൽ പ്രദേശത്ത് വൈദ്യുതി ബന്ധം തടസപ്പെട്ടു. രണ്ടുമാസത്തിനിടെ നിരവധി അപകടങ്ങളാണ് ഇവിടെ നടന്നത്.

വിവരാവകാശ സൗഹൃദ കളക്ടറേറ്റ്: സംഘാടക സമിതി രൂപീകരിച്ചു

കോഴിക്കോട്: കളക്ടറേറ്റിലെ എല്ലാ ഓഫീസുകളെയും വിവരാവകാശ സൗഹൃദമാക്കി മാറ്റുന്ന ക്യാമ്പയിന്‍ പ്രവര്‍ത്തനങ്ങള്‍ക്ക് സംഘാടക സമിതി രൂപീകരിച്ചു. സംസ്ഥാന വിവരാവകാശ കമ്മീഷണര്‍ അഡ്വ. ടി.കെ. രാമകൃഷ്ണന്‍ രക്ഷാധികാരിയും ജില്ലാ കളക്ടര്‍ സ്നേഹില്‍ കുമാര്‍ സിംഗ് ചെയര്‍മാനും എഡിഎം പി. സുരേഷ് നോഡല്‍ ഓഫീസറുമായാണ് സംഘാടക സമിതി. വിവരാവകാശ നിയമം പാര്‍ലമെന്‍റ് പാസാക്കിയ ജൂണ്‍ 15 മുതല്‍ നിയമം പൂര്‍ണമായി നിലവില്‍വന്ന ഒക്ടോബര്‍ 12 വരെയുള്ള ക്യാമ്പയിന്‍ കാലയളവില്‍, വിവരാവകാശ നിയമത്തെ കുറിച്ച് ഉദ്യോഗസ്ഥര്‍ക്കും പൊതുജനങ്ങള്‍ക്കും അവബോധമുണ്ടാക്കുകയും സിവില്‍ സ്റ്റേഷനിലെ മുഴുവന്‍ ഓഫീസുകളെയും വിവരാവകാശ സൗഹൃദ ഓഫീസാക്കി മാറ്റുകയുമാണ് ലക്ഷ്യമെന്ന് സംസ്ഥാന വിവരാവകാശ കമീഷണര്‍ അഡ്വ. ടി.കെ. രാമകൃഷ്ണന്‍ പറഞ്ഞു. ക്യാമ്പയിന്‍റെ ഭാഗമായി 14ന് കളക്ടറേറ്റ് കോണ്‍ഫറന്‍സ് ഹാളില്‍ വിവരാവകാശ നിയമവുമായി ബന്ധപ്പെട്ട് സെമിനാര്‍ സംഘടിപ്പിക്കും. ഒക്ടോബര്‍ 12ന് വിവരാവകാശ സൗഹൃദ കളക്ടറേറ്റ് പ്രഖ്യാപനവും നടത്തും. കളക്ടറുടെ ചേംബറില്‍ ചേര്‍ന്ന യോഗത്തില്‍ സംസ്ഥാന വിവരാവകാശ കമ്മീഷണര്‍ അഡ്വ. ടി.കെ. രാമകൃഷ്ണന്‍, ജില്ലാ കളക്ടര്‍ സ്നേഹില്‍ കുമാര്‍ സിംഗ്, എഡിഎം പി. സുരേഷ്, സബ് കളക്ടര്‍ ഹര്‍ഷില്‍ ആര്‍. മീണ, ജില്ല ഇന്‍ഫര്‍മേഷന്‍ ഓഫീസര്‍ സി.പി. അബ്ദുൾ കരീം, ജില്ല ലോ ഓഫീസര്‍ സി.കെ. ഫൈസല്‍, വിവിധ വകുപ്പ് മേധാവികള്‍ എന്നിവര്‍ പങ്കെടുത്തു.

നാദാപുരത്ത് അത്യാധുനിക ബസ് സ്റ്റാന്‍ഡും ഷോപ്പിംഗ് കോംപ്ലക്‌സും

നാദാപുരം: നാദാപുരത്ത് അത്യാധുനിക സൗകര്യങ്ങളോടെ പുതിയ ബസ് സ്റ്റാന്‍ഡും ഷോപ്പിംഗ് കോംപ്ലക്‌സും ഒരുക്കും. 21 ബസുകള്‍ക്ക് പാര്‍ക്കിംഗ് സൗകര്യത്തോടെയുള്ള ബേസ്‌മെന്‍റ്, ബസ്‌ബേ, വെയിറ്റിംഗ് ഏരിയ, സാനിറ്റേഷന്‍ കോംപ്ലക്‌സ്, ലൈബ്രറി ഹാള്‍, 200 പേര്‍ക്കിരിക്കാവുന്ന ശീതീകരിച്ച മിനി കോണ്‍ഫറസ് ഹാള്‍, കടമുറികള്‍, ലിഫ്റ്റ് എന്നിവയാണ് പദ്ധതിയുടെ ഭാഗമായി ഒരുക്കുക. കെട്ടിടത്തിന്‍റെ നിര്‍മിതി പൂര്‍ണമായും പരിസ്ഥിതി സൗഹൃദമായിരിക്കും. സ്റ്റീല്‍ പ്രീ ഫാബ് സ്ട്രക്ചറിലാകും ഷോപ്പിംഗ് കോംപ്ലക്‌സ് നിര്‍മാണം. കാലപ്പഴക്കത്താല്‍ ജീര്‍ണിച്ച ബസ് സ്റ്റാന്‍ഡ് കെട്ടിടം പൊളിച്ചുമാറ്റണമെന്ന് 2023ല്‍ കോഴിക്കോട് ഗവ. എഞ്ചിനീയറിങ് കോളജിലെ സ്ട്രക്ചറല്‍ വിഭാഗം നിര്‍ദേശിച്ചതിനെ തുടര്‍ന്നാണ് ഗ്രാമപഞ്ചായത്ത് പുതിയ കെട്ടിടവും ബസ്‌ബേയും നിര്‍മിക്കാന്‍ തീരുമാനിച്ചത്. സര്‍ക്കാര്‍ അനുമതി ലഭിച്ചതോടെ 2024 ആഗസ്റ്റ് 28ന് നിലവിലെ കെട്ടിടം പൊളിക്കല്‍ ആരംഭിച്ചു. ഇതോടെ കച്ചവടക്കാരും നാട്ടുകാരും ഒരുപോലെ ബുദ്ധിമുട്ടിലായിരുന്നു. സ്‌കൂള്‍ കുട്ടികള്‍ മുതല്‍ പ്രായമായവര്‍ വരെ ഇരിപ്പിടമില്ലാതെ ബസ് കാത്തുനില്‍ക്കേണ്ട സ്ഥിതിയായിരുന്നു. പുതിയ ബസ്‌സ്റ്റാന്‍ഡ് പദ്ധതിക്ക് 2025 മാര്‍ച്ച് അഞ്ചിനാണ് 13.76 കോടി രൂപയുടെ സാങ്കേതികാനുമതി ലഭിച്ചത്. ടെണ്ടര്‍ നടപടികള്‍ പൂര്‍ത്തിയായിട്ടുണ്ട്. പ്രവൃത്തി ഉദ്ഘാടനം 28ന് തദ്ദേശ സ്വയംഭരണ വകുപ്പ് മന്ത്രി എം.ബി. രാജേഷ് നിര്‍വഹിക്കുമെന്ന് ഗ്രാമപഞ്ചായത്ത് പ്രസിഡന്‍റ് വി.വി. മുഹമ്മദലി അറിയിച്ചു. ബസ് സ്റ്റാന്‍ഡ് യാഥാര്‍ഥ്യമാക്കാന്‍ 501 അംഗ കമ്മിറ്റിയും രൂപീകരിച്ചു. സ്വാഗതസംഘ രൂപീകരണയോഗം ഗ്രാമപഞ്ചായത്ത് പ്രസിഡന്‍റ് ഉദ്ഘാടനം ചെയ്തു. വൈസ് പ്രസിഡന്‍റ് അഖില മര്യാട്ട് അധ്യക്ഷത വഹിച്ചു.

വ്യാജ നോട്ടുകളുടെ ഉറവിടം കണ്ടെത്തണം: ബിജെപി

കോഴിക്കോട്: കൊമ്മേരിയിലെ മുക്കണ്ണിതാഴത്തുള്ള അയല്‍ക്കൂട്ടത്തിലെ അംഗം കുറ്റിയില്‍ താഴത്തെ ഒരു സഹകരണ ബാങ്കില്‍ നിക്ഷേപിക്കാന്‍ കൊണ്ടുവന്ന വ്യാജ നോട്ടുകളുടെ ഉറവിടം കണ്ടെത്തണമെന്ന് ബിജെപി ജില്ല ജനറല്‍ സെക്രട്ടറി ടി.വി. ഉണ്ണികൃഷ്ണന്‍ ആവശ്യപ്പെട്ടു. ബിജെപി കൊമ്മേരി ഏരിയ പ്രവര്‍ത്തക കണ്‍വന്‍ഷന്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. അന്വേഷണം ഊര്‍ജിതപ്പെടുത്തി യഥാർഥ പ്രതികളെ പുറത്ത് കൊണ്ടുവരണം. അഞ്ഞൂറ് രൂപയുടെ 21 നോട്ടുകളാണ് ബാങ്കിലെത്തിയത്. വ്യാജ നോട്ടും കള്ളപ്പണവും വ്യാപകമായിരിക്കുകയാണ്. സാമ്പത്തിക കുറ്റാന്വേഷണ വിഭാഗത്തെ അന്വേഷണ ചുമതല ഏല്‍പ്പിക്കണമെന്നും അദ്ദേഹം പറഞ്ഞു. ഏരിയ പ്രസിഡന്‍റ് പി.വി. ദിനേശന്‍ അധ്യക്ഷത വഹിച്ചു.

വിദേശയാത്ര: പാസ്പോർട്ടിന് ഒരു വർഷം എങ്കിലും കാലാവധി ഉറപ്പാക്കണമെന്ന് നിര്‍ദേശം

കോഴിക്കോട്: വിദേശയാത്രയ്ക്ക് ഒരുങ്ങുന്നവർ പാസ്‌പോര്‍ട്ടിന് ഒരു വർഷമെങ്കിലും കാലാവധി ഉണ്ടെന്നുറപ്പാക്കണമെന്നു റീജണല്‍ പാസ്പോർട്ട് ഓഫീസ്. പാസ്പോർട്ട് കാലാവധി ഇല്ലാത്തതിനാൽ യാത്ര മുടങ്ങുകയോ മാറ്റിവയ്ക്കുകയോ ചെയ്യേണ്ടി വരുന്നവരുടെ എണ്ണം കൂടുന്നതിനാലാണിത്. വിനോദയാത്രയ്ക്ക് ടിക്കറ്റ് എടുത്ത ശേഷം, പാസ്പോർട്ടിന് 6 മാസം കാലാവധി ഇല്ലാത്തതിനാൽ കഴിഞ്ഞ വർഷം ഒട്ടേറെ പേരുടെ യാത്ര മുടങ്ങിയതായി റീജനൽ പാസ്പോർട്ട് ഓഫീസർ പറഞ്ഞു. വിമാന നിരക്ക് കുറവായിരിക്കുമെന്നതിനാൽ, ട്രാവൽ ഏജൻസി വഴി നേരത്തെ തന്നെ ടൂർ പാക്കേജ് ബുക്ക് ചെയ്യുന്നവരാണധികവും. യാത്രയുടെ അന്നോ തലേന്നോ മാത്രമേ പലരും പാസ്പ‍ോർട്ട് നോക്കാറുള്ളൂ. പാസ്പോ‍ർട്ടിന് 6 മാസം കാലാവധിയില്ലെങ്കിൽ പല രാജ്യങ്ങളും വീസ അനുവദിക്കില്ലെന്നും കൂട്ടിച്ചേര്‍ത്തു.കുടുംബത്തിൽ ഒരാൾക്കു മാത്രം യാത്ര ചെയ്യാൻ കഴിയാതെ പോയ സംഭവങ്ങൾ ആവർത്തിച്ചിട്ടുണ്ട്. ഒന്നോ രണ്ടോ ദിവസം കൊണ്ട് പാസ്പോർട്ട് കിട്ടണമെന്ന ആവശ്യവുമായാണ് ഇത്തരം ആളുകൾ പാസ്പോർട്ട് ഓഫിസിലെത്തുക. തൊഴിൽ, വിദ്യാർഥി വീസകളിൽ യാത്ര ചെയ്യുന്നവരും ഇതുപോലെ കുടുങ്ങാറുണ്ട്. പലപ്പോഴും ട്രാവൽ ഏജന്‍റുമാരും പാസ്പോർട്ടിന്‍റെ കാലാവധി ശ്രദ്ധിക്കാറില്ല. ഹജ്, ഉംറ യാത്രയ്ക്ക് ഒരുങ്ങുന്നവരും പാസ്പോർട്ടിന്‍റെ കാലാവധി ഒരു വർഷമെങ്കിലു ഉണ്ടെന്ന് ഉറപ്പാക്കണമെന്നുംഅധികൃതര്‍ അറിയിച്ചു. പാസ്പോർട്ടിലെ വിശദാംശങ്ങളിൽ മാറ്റം വരുത്താൻ ഇപ്പോൾ എളുപ്പമാണ്. www.Passportindia.Gov.in എന്ന സൈറ്റിലും passportseva ആപ്പിലും വിശദാംശങ്ങൾ ലഭ്യമാണ്.

വീട് ഭാഗികമായി തകര്‍ത്തു, കൃഷി നശിപ്പിച്ചു : വീണ്ടും കാട്ടാനകളുടെ ആക്രമണം

കൂടരഞ്ഞി: കക്കാടംപൊയിൽ മരത്തോട് ഭാഗത്ത് വീണ്ടും കാട്ടാന ആക്രമണം. വൃദ്ധ ദമ്പതികളുടെ വീട് ആക്രമിച്ചു. കഴിഞ്ഞദിവസം രാത്രി 12 ന് ശേഷമാണ് സംഭവം. 80 വയസുള്ള ജോസഫും ഭാര്യയുമാണ് ആ സമയം വീട്ടില്‍ ഉണ്ടായിരുന്നത്. വീട് ഭാഗികമായി തകർന്നു. പൊളിഞ്ഞ ഭാഗം നാട്ടുകാരുടെ സഹായത്തോടെ താത്കാലികമായി നന്നാക്കിയിട്ടുണ്ട്. കഴിഞ്ഞ ദിവസം കാട്ടാന ഇറങ്ങിയ ഭാഗത്തുനിന്നും ഈ പ്രദേശത്തേക്ക് 500 മീറ്റർ വ്യത്യാസമേയുള്ളു. മുൻപ് ജനവാസ കേന്ദ്രത്തിൽ ഇറങ്ങിയ കാട്ടാന ഏബ്രഹാം ഏറ്റുമാനുക്കാരന്‍റെ വീട്ടുമുറ്റത്ത് നിർത്തിയിട്ടിരുന്ന ജീപ്പ് കുത്തി മറിച്ചിട്ടിരുന്നു. തുടർച്ചയായി ഉണ്ടാകുന്ന ഇത്തരം ആക്രമണങ്ങൾ ജനങ്ങളെ ഭീതിയിലാക്കുന്നുണ്ട്. വെള്ളവും തീറ്റയും കുറയുമ്പോഴാണ് ആന കാടു വിട്ട് നാട്ടിൽ ഇറങ്ങുന്നതെന്നാണ് അധികൃതരുടെ വാദം. മഴക്കാലത്ത് നാളിതു വരെ ആന നാട്ടിൽ ഇറങ്ങാറില്ലായിരുന്നു. ആനകളുടെ എണ്ണം വർധിച്ചതാണ് കാരണം. അക്രമാസക്തനായ ആനയെ പിടികൂടിയില്ലെങ്കിൽ ഇനിയും ആക്രമണം തുടരും. എത്രയും വേഗം മനുഷ്യനും സ്വത്തിനും ഭീഷണിയായ ആനയെ മയക്കു വെടിവച്ച് പിടികൂടണം. കൂടാതെ സ്ഥിരമായി ആനയിറങ്ങുന്ന പ്രദേശമായതിനാൽ ആർആർടിയുടെ സാന്നിധ്യം മുഴുവൻ സമയവും ഉണ്ടാകണമെന്നും നാട്ടുകാർ ആവശ്യപ്പെട്ടു. പെരുവണ്ണാമൂഴി: ചക്കിട്ടപാറ പന്നിക്കോട്ടൂർ ഉന്നതിയിൽ കാട്ടാനക്കൂട്ടത്തിന്‍റെ ആക്രമണം. ബുധനാഴ്ച രാത്രി ഇവിടെയെത്തിയ കാട്ടാനകൾ വ്യാപകമായി കൃഷി നശിപ്പിച്ചു. തെങ്ങ്, കമുങ്ങ്, നൂറ് കണക്കിനു വാഴകൾ എന്നിവയെല്ലാം നശിപ്പിച്ചതിൽപെടും. വീട്ടിലുണ്ടായിരുന്ന ആളുകളെ അക്രമിക്കാനും ശ്രമിച്ചു. ചിറയൻ പുറത്ത് ഷാജന്‍റെ വിറകുപുര തകർത്തു. തെക്കുപുറത്ത് അനിതയുടെ വീട്ടംഗങ്ങളെയാണ് അക്രമിക്കാൻ ശ്രമിച്ചത്. ഗോപാലൻ നെട്ടോടി, ശ്രീധരൻ കേളോത്ത് ചാലിൽ, കൃഷ്ണൻ ആശാരിക്കണ്ടി, രമണി പയോർകണ്ടി താഴെ കുനി, അംബിക വൈരങ്ക മീത്തൽ തുടങ്ങിയവരുടെ കൃഷികളാണ് നശിപ്പിച്ചത്. ജനങ്ങൾക്കു കാവലായി പെരുവണ്ണാമൂഴി വനപാലകർ രാത്രി മുഴുവൻ ഉന്നതിയിൽ തമ്പടിച്ചത് ആശ്വാസമായി. പെരുവണ്ണാമൂഴി ഉൾവനത്തിൽ നിന്നാണ് കാട്ടാന സംഘം ജനവാസ കേന്ദ്രങ്ങളിലെത്തുന്നത്. വനവുമായി അതിർത്തി പങ്കിടുന്ന ചക്കിട്ടപാറ പഞ്ചായത്തിലെ പൂഴിത്തോട്, ചെമ്പനോട, പന്നിക്കോട്ടൂർ, കൂവപ്പൊയിൽ, വട്ടക്കയം, ചെങ്കോട്ടക്കൊല്ലി, സീതപ്പാറ, പേരാമ്പ്ര എസ്റ്റേറ്റ് എന്നിവിടങ്ങളിൽ വന്യമൃഗങ്ങൾ ഭീഷണി ഉയർത്തുകയാണ്. ചക്കിട്ടപാറ പഞ്ചായത്ത് പ്രസിഡന്‍റ് കെ. സുനിൽ, വാർഡ് മെമ്പർ എം.എം. പ്രദീപൻ, മുൻ മെമ്പർ നടേരി ബാലകൃഷ്ണൻ എന്നിവർ സ്ഥലം സന്ദർശിച്ചു.

മത്സ്യ‌ബന്ധനത്തിനിടെ തൊഴിലാളി കുഴഞ്ഞുവീണു മരിച്ചു

കൊയിലാണ്ടി: മത്സ്യബന്ധനത്തിനിടെ തൊഴിലാളി കുഴഞ്ഞുവീണു മരിച്ചു. വിരുന്നുകണ്ടി പീടിയേക്കൽ സജീവൻ (54) ആണ് മരിച്ചത്. കുഴഞ്ഞുവീണ ഉടനെ കൊയിലാണ്ടി താലൂക്ക് ആശുപത്രിയിലും തുടർ‌ചികിത്സക്കായി മലബാർ മെഡിക്കൽ കോളജ് ആശുപത്രിയിലും സജീവനെ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. മൃതദേഹം പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടുനൽകും. ഭാര്യ: കവിത. മക്കൾ: ആദർശ്, അഭിനന്ദ്.

മത്സ്യ‌ബന്ധനത്തിനിടെ തൊഴിലാളി കുഴഞ്ഞുവീണു മരിച്ചു

കൊയിലാണ്ടി: മത്സ്യബന്ധനത്തിനിടെ തൊഴിലാളി കുഴഞ്ഞുവീണു മരിച്ചു. വിരുന്നുകണ്ടി പീടിയേക്കൽ സജീവൻ (54) ആണ് മരിച്ചത്. കുഴഞ്ഞുവീണ ഉടനെ കൊയിലാണ്ടി താലൂക്ക് ആശുപത്രിയിലും തുടർ‌ചികിത്സക്കായി മലബാർ മെഡിക്കൽ കോളജ് ആശുപത്രിയിലും സജീവനെ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. മൃതദേഹം പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടുനൽകും. ഭാര്യ: കവിത. മക്കൾ: ആദർശ്, അഭിനന്ദ്.

ഹയര്‍സെക്കന്‍ഡറി തുല്യത: 1985 പേര്‍ പരീക്ഷയെഴുതും

കോഴിക്കോട്: ഇന്ന് മുതല്‍ 27 വരെ നടക്കുന്ന ഹയര്‍സെക്കന്‍ഡറി തുല്യത പരീക്ഷയെഴുതാന്‍ ജില്ലയില്‍നിന്ന് 1985 പഠിതാക്കള്‍. ഒന്നാം വര്‍ഷ പരീക്ഷക്ക് 761 പേരും രണ്ടാം വര്‍ഷത്തേതിന് 1224 പേരുമാണ് രജിസ്റ്റര്‍ ചെയ്തത്. 14 പരീക്ഷാ കേന്ദ്രങ്ങളാണ് ജില്ലയിലുള്ളത്. മേരിക്കുന്ന് എന്‍ജിഒ ക്വാര്‍ട്ടേഴ്‌സ് സ്‌കൂള്‍ കേന്ദ്രത്തില്‍ പരീക്ഷയെഴുതുന്ന വിരമിച്ച കായികാധ്യാപകന്‍ 77കാരനായ നാരായണനാണ് മുതിര്‍ന്ന പഠിതാവ്.

പ്രതിഷേധിച്ചു

പേരാമ്പ്ര: ആരോഗ്യ വകുപ്പ് മന്ത്രി വീണാ ജോർജിനെതിരേ യുഡിഎഫും ബിജെപിയും നടത്തുന്ന ആഭാസ സമരത്തിനെതിരേ ജനാധിപത്യ മഹിളാ അസോസിയേഷൻ നൊച്ചാട് സൗത്ത് മേഖലാ കമ്മിറ്റിയുടെ നേതൃത്വത്തിൽ വെള്ളിയൂരിൽ പ്രതിഷേധ പ്രകടനവും പൊതു യോഗവും നടത്തി. പ്രഭാ ശങ്കർ, സലില, പദ്മിനി, സുനിത നാഞ്ഞൂറ, സനില ചെറുവറ്റ എന്നിവർ നേതൃത്വം നൽകി. സിപിഎം ലോക്കൽ സെക്രട്ടറി എടവന സുരേന്ദ്രൻ ഉദ്ഘാടനം ചെയ്തു.

യൂത്ത് ലീഗ് സമരാഗ്നി സംഘടിപ്പിച്ചു

പേരാമ്പ്ര: ആരോഗ്യ മന്ത്രി വീണാ ജോർജ് രാജി വയ്ക്കുക എന്ന ആവശ്യമുന്നയിച്ച് പേരാമ്പ്ര നിയോജക മണ്ഡലം യൂത്ത് ലീഗ് സമരാഗ്നി എന്ന പേരിൽ പ്രകടനവും മന്ത്രിയുടെ കോലം കത്തിക്കൽ പ്രതിഷേധവും സംഘടിപ്പിച്ചു. സമരത്തിന് നിയോജക മണ്ഡലം പ്രസിഡന്‍റ് പി.സി. മുഹമ്മദ്‌ സിറാജ്, ജനറൽ സെക്രട്ടറി ശിഹാബ് കന്നാട്ടി, കെ.സി. മുഹമ്മദ്‌, സലീം മിലാസ്, സത്താർ കീഴരിയൂർ, സി.കെ ജറീഷ്, ശംസുദ്ധീൻ വടക്കയിൽ, സി.കെ. ഹാഫിസ്, ആർ.എം. നിഷാദ്, സഈദ് അയനിക്കൽ, എം.കെ. ഫസലുറഹ്‌മാൻ, ആഷിക് പുല്യോട്ട് എന്നിവർ നേതൃത്വം നൽകി.

മലയോര ഹൈവേ; വീട്ടിലേക്കുള്ള വഴി നഷ്ടപ്പെട്ട് കുടുംബം

ചക്കിട്ടപാറ: പെരുവണ്ണാമൂഴിയിൽ നിന്നു ചക്കിട്ടപാറക്ക് നടന്നു കൊണ്ടിരിക്കുന്ന മലയോര ഹൈവേ പ്രവൃത്തി കാരണം പുളിക്കൽ സാബുവിന്‍റെ കുടുംബത്തിനു വീട്ടിലേക്കുള്ള വഴിയില്ലാതായി. ഹെൽത്ത്‌ സെന്‍ററിനു സമീപം റോഡിന്‍റെ താഴെ ഭാഗത്താണ് വീട്. പാതയിൽ നിന്നു വീട്ടിലേക്ക് സ്റ്റെപ്പുകൾ ഇറങ്ങിയായിരുന്നു സഞ്ചാരം. ഹൈവേ നിർമ്മാണം തുടങ്ങിയപ്പോൾ സ്റ്റെപ്പുകൾ ഉണ്ടായിരുന്ന പാത ഭാഗം ഉയർത്തി. എങ്കിലും ഇതിന്‍റെ വശത്തുകൂടി കല്ലിട്ട് താൽക്കാലിക വഴി ഉണ്ടാക്കി കൊടുത്തു. ഇതിനു സമീപം മണ്ണിട്ടും പാത നൽകി. കനത്ത മഴയിൽ ഈ രണ്ടു സംവിധാനവും ഒലിച്ചു പോയി. വഴി നേരെയാക്കി തരണമെന്നാവശ്യപ്പെട്ട് കർഷകനായ സാബു കരാറുകാരുടെ പിന്നാലെ നടക്കുകയാണ് പ്രശ്നം കഴിഞ്ഞ ശനിയാഴ്ച നടന്ന കൊയിലാണ്ടി താലൂക്ക് വികസന സമിതിയിൽ ചക്കിട്ടപാറക്കാരനായ സമിതി അംഗം രാജൻ വർക്കി ഉന്നയിച്ചു. അടിയന്തിരമായി സാബുവിന്‍റെ കുടുംബത്തിനു വഴി നിർമിച്ചു നൽകണമെന്ന് യോഗത്തിൽ അധ്യക്ഷത വഹിച്ച പന്തലായനി ബ്ലോക്ക് പഞ്ചായത്ത് പ്രസിഡന്‍റ് പി. ബാബുരാജ് കേരളാ റോഡ് ഫണ്ട് ബോർഡിനു നിർദ്ദേശവും നൽകി.

പെരുമണ്ണയില്‍ ഗ്രാമവണ്ടി ഓടിത്തുടങ്ങി

കോഴിക്കോട്: പെരുമണ്ണ പഞ്ചായത്ത് ജനകീയാസൂത്രണ വാര്‍ഷിക പദ്ധതിയില്‍ ഉള്‍പ്പെടുത്തി തുടക്കം കുറിച്ച കെഎസ്ആര്‍ടിസി ഗ്രാമവണ്ടിയുടെ ഫ്‌ളാഗ് ഓഫ് വനംമന്ത്രി എ.കെ. ശശീന്ദ്രന്‍ നിര്‍വഹിച്ചു. സ്വന്തം കാലില്‍ നില്‍ക്കാന്‍ കരുത്തുള്ളതാക്കി കെഎസ്ആര്‍ടിസിയെ മാറ്റാന്‍ പൊതുജനങ്ങളുടെ പിന്തുണയുണ്ടാവണമെന്ന് മന്ത്രി ആവശ്യപ്പെട്ടു. ഉള്‍നാടന്‍ ഗതാഗത സൗകര്യ വികസനത്തിന് സഹായകരമായാണ് ഗ്രാമവണ്ടി പദ്ധതി നടപ്പാക്കുന്നത്. പെരുമണ്ണ പഞ്ചായത്തിലെ ബസ് സര്‍വീസ് ഇല്ലാത്ത സ്ഥലങ്ങള്‍ക്ക് പ്രാധാന്യം നല്‍കിയാണ് റൂട്ട് നിശ്ചയിച്ചിട്ടുള്ളത്. രാവിലെ 6.30ന് കോഴിക്കോട് നഗരത്തില്‍ നിന്നാണ് സര്‍വീസ് തുടങ്ങുക. റെയില്‍വേ സ്റ്റേഷനില്‍ പോയി പാലാഴി, പെരുമണ്ണ, ഊര്‍ക്കടവ്, എടവണ്ണപ്പാറ വരെ പോകും. തിരിച്ച് പെരുമണ്ണ, പുത്തൂര്‍മടം, പയ്യടി മീത്തല്‍, പാലാഴി, കോവൂര്‍ വഴി മെഡിക്കല്‍ കോളജില്‍ അവസാനിക്കും. രാവിലെ 10.10നാണ് മെഡിക്കല്‍ കോളജില്‍ എത്തുക. പിന്നീട് 12.25, 3.50 എന്നീ സമയങ്ങളിലും എടവണ്ണപ്പാറയില്‍നിന്ന് പെരുമണ്ണ വഴി മെഡിക്കല്‍ കോളജിലേക്ക് വണ്ടി എത്തും. രാത്രി 7. 10 കോഴിക്കോട് നഗരത്തില്‍ റൂട്ട് അവസാനിക്കും.

പൈങ്കുളം പാടശേഖരം കൃഷിയോഗ്യമാക്കണമെന്ന്

പേരാമ്പ്ര: പേരാമ്പ്ര പഞ്ചായത്തിലെ പതിനേഴാം വാർഡിൽ സ്ഥിതി ചെയ്യുന്ന പൈങ്കുളം പാടശേഖരത്തെ ആധുനിക യന്ത്രങ്ങൾ ഉപയോഗിച്ച് മെച്ചപ്പെടുത്തി കൃഷി യോഗ്യമാക്കാൻ നടപടി സ്വീകരിക്കണമെന്ന് എരവട്ടൂർ ടൗൺ യൂണിറ്റ് കർഷക സംഘം സമ്മേളനം ആവശ്യപ്പെട്ടു. ‌ ഏക്കർ കണക്കിന് വ്യാപിച്ചു കിടക്കുന്ന നെൽവയൽ കൃഷി പുനരാരംഭിക്കാൻ കര്‍ഷകരെ പരിശീലിപ്പിക്കുന്നതിനും വേണ്ട നടപടികൾ സ്വീകരിക്കണമെന്നും യോഗം അഭിപ്രായപ്പെട്ടു. പഴയ കാലത്ത് നരിക്കിലാപ്പുഴ മുതൽ പുതുക്കൈ പുറത്തു വരെ സുഖകരമായി വെള്ളം ഒഴുകി പോയിരുന്ന തോട് പുനർ നിർമിച്ച് ജൈവത്തോട് ആക്കി രൂപപ്പെടുത്തുകയും കൃഷിക്ക് അനുയോജ്യമായി പ്രവർത്തന ക്ഷമമാക്കുകയും ചെയ്യണമെന്ന് സമ്മേളനം ആവശ്യപ്പെട്ടു. മേഖലാ സെക്രട്ടറി കെ.പി. ഗോപി ഉദ്ഘാടനം ചെയ്തു. പ്രസിഡന്‍റ് ടി.എം. ബാലകൃഷ്ണൻ റിപ്പോർട്ട് അവതരിപ്പിച്ചു. ഇ.എം. ബാബു അധ്യക്ഷത വഹിച്ചു. കെ. രാധാകൃഷ്ണൻ, എം.എം. രാജേഷ്, ടി.പി. ഗംഗാധരൻ, ഇ. കുഞ്ഞബ്ദുള്ള, സി.കെ. ബാലകൃഷ്ണൻ, ഷാജി തലത്താറ, പി. ശശി, കെ. രാധാകൃഷ്ണൻ നായർ, ശശി തലത്താറ എന്നിവർ പ്രസംഗിച്ചു. പുതിയ ഭാരവാഹികൾ: പി. ശശി (പ്രസിഡന്‍റ്), കെ. രാധാകൃഷ്ണൻ (വൈസ് പ്രസിഡന്‍റ്), ഇ.എം. ബാബു (സെക്രട്ടറി), ഷാജി തലത്താറ (ജോയിന്‍റ് സെക്രട്ടറി), ടി.പി. ഗംഗാധരൻ (ട്രഷറർ).

ഗ്യാസ് സിലിണ്ടറില്‍ നിന്ന് തീ പടര്‍ന്നു; വീട്ടുപകരണങ്ങള്‍ കത്തിനശിച്ചു

വടകര: താഴെ അങ്ങാടി കൊയിലാണ്ടി വളപ്പില്‍ പാചക വാതക സിലിണ്ടറില്‍ നിന്ന് തീ പടര്‍ന്ന് വീട്ടുപകരണങ്ങള്‍ കത്തിനശിച്ചു. അപകടത്തില്‍ വീടിന്‍റെ അടുക്കള ഭാഗത്തിനു കേടുപറ്റി. പുതിയപുരയില്‍ ഉസ്മാന്‍റെ വീട്ടിലാണ് അഗ്നിബാധ. പാചകം ചെയ്യുന്നതിനിടെ ഗ്യാസ് സിലിണ്ടറില്‍ നിന്ന് തീ ഉയരുകയായിരുന്നു. ഉസ്മാനും ഭാര്യയും മാത്രമാണ് വീട്ടില്‍ ഉണ്ടായിരുന്നത്. ഇരുവരും പരിക്കേല്‍ക്കാതെ രക്ഷപ്പെട്ടു. ഇവരുടെ നിലവിളികേട്ട് സമീപത്തുള്ള ആളുകള്‍ ഓടിക്കൂടി വെള്ളം ഒഴിച്ച് തീ നിയന്ത്രിക്കുകയായിരുന്നു. വടകരയില്‍ നിന്നു ഫയര്‍ഫോഴ്സ് സ്ഥലത്തെത്തി. ഫ്രിഡ്ജ് ഉള്‍പെടെയുള്ള വീട്ടുപകരണങ്ങള്‍ കത്തിനശിച്ചു. വയറിംഗിനു കേടുപറ്റി. കെ.കെ.രമ എംഎല്‍എ, കൗണ്‍സിലര്‍ ബി.വി.നിസാബി എന്നിവര്‍ സ്ഥലം സന്ദര്‍ശിച്ചു.

വന്യമൃഗ ശല്യം; ജനങ്ങളുടെ ആശങ്ക അകറ്റണമെന്ന്

കൂടരഞ്ഞി: കൂമ്പാറ, പീടികപ്പാറ, തേനരുവി എന്നിവിടങ്ങളിൽ കാട്ടാന ആക്രമണം മൂലം ജനങ്ങൾ ഭീതിയിലാണെന്നും ജനങ്ങളുടെ ആശങ്ക അകറ്റാൻ അടിയന്തര നടപടി സ്വീകരിക്കണമെന്നും കർഷക കോൺഗ്രസ് ജില്ലാ പ്രസിഡന്‍റ് അഡ്വ. ബിജു കണ്ണന്തറ ആവശ്യപ്പെട്ടു. രൂക്ഷമായ കൃഷിനാശം കർഷകരുടെ ജീവിതത്തെയാണ് ബാധിക്കുന്നത്. കാട്ടാനകളെ പ്രതിരോധിക്കാൻ സോളാർ വേലികൾ കാര്യക്ഷമമല്ലാത്തതിനാൽ കിടങ്ങുകൾ നിർമിക്കുകയാണ് വേണ്ടത്. നിർമിത ബുദ്ധിയുടെ സഹായത്തോടുകൂടി അവയെ പ്രതിരോധിക്കണം. വന്യമൃഗങ്ങളിൽ നിന്നും കൃഷിക്കും കർഷകനും സംരക്ഷണം ലഭിക്കാൻ അടിയന്തര നടപടി സ്വീകരിക്കണമെന്നും കൃഷിനാശം സംഭവിച്ചവർക്ക് അടിയന്തര സഹായം നൽകണമെന്നും അദ്ദേഹം ആവശ്യപ്പെട്ടു.

കാട്ടാനശല്യത്തിന് ശാശ്വത പരിഹാരം വേണം: ആർജെഡി

കൂടരഞ്ഞി: കൂടരഞ്ഞി പഞ്ചായത്തിലെ തേനരുവി ഭാഗത്ത് കാട്ടാന ശല്യംരൂക്ഷമായ സാഹചര്യത്തിൽ ഡിഫ്ഒ സന്ദർശിക്കുകയും സ്ഥലത്ത് ആന ഇറങ്ങാതിരിക്കുന്നതിന് ആധുനികതയിലുള്ള ഫെൻസിംഗ് സ്ഥാപിക്കണമെന്നും ആർജെഡി കൂടരഞ്ഞി പഞ്ചായത്ത് കമ്മിറ്റി ആവശ്യപ്പെട്ടു. തേനരുവിയിൽ ആന വീട്ടുമുറ്റത്തെ ജീപ്പ് മറിച്ചിട്ട ഏറ്റുമാനൂർകാരൻ ജോസുകുട്ടിയുടെ കുടുംബത്തെ ആർജെഡി നേതാക്കൾ സന്ദർശിച്ചു. സ്ഥിരമായി ആനയിറങ്ങുന്ന പ്രദേശമായതിനാൽ ആർആർടിയുടെ സാന്നിധ്യം മുഴുവൻ സമയവും ഉണ്ടാകണമെന്നും ആവശ്യപ്പെട്ടു. ജനങ്ങളുടെ ജീവനും സ്വത്തിനും സംരക്ഷണം നൽകണമെന്ന് ആവശ്യപ്പെട്ട് 11ന് പീടിക പാറയിൽ ജനകീയ പ്രതിഷേധ ജ്വാല സംഘടിപ്പിക്കുന്നതിനും തീരുമാനിച്ചു. പി.എം. തോമസ്, വിൽസൺ പുല്ലുവേലിൽ, ജോർജ് മങ്കരയിൽ, മാത്യു വർഗീസ്, തോമസ് പ്ലാക്കാട്ട്, ജിൻസ് ഇടമനശേരി, ജോസ് കള്ളിപ്പാറ, അരുൺ മുകേഷ് എന്നിവരാണ് പ്രദേശം സന്ദർശിച്ചത്.

സംസ്ഥാന പാതയോരത്ത് സാമൂഹ്യ വിരുദ്ധ ശല്യം രൂക്ഷം

മുക്കം: മലയോര മേഖലയിൽ സംസ്ഥാന പാതയോരത്തും ജനവാസം കുറഞ്ഞ പ്രദേശങ്ങളിലും ലഹരി മാഫിയയും മോഷണസംഘവും വ്യാപിക്കുന്നു. കോഴിക്കോട്- മലപ്പുറം ജില്ല അതിർത്തിയോടു ചേർന്ന കാരശേരി പഞ്ചായത്തിലെ ആദംപടി, വെല്ലാറ, തോണിച്ചാൽ, ഗോതമ്പ റോഡ് ഭാഗങ്ങളിലാണ് സാമൂഹിക വിരുദ്ധരുടെ ശല്യം കൂടിയതായി പരാതി ഉയർന്നത്. വല്ലാറ റബർ എസ്റ്റേറ്റിൽനിന്ന് പാൽ, ഷീറ്റ്, ഒട്ടുപാൽ, റാട്ട തുടങ്ങിയവ കളവ് പോകുന്നത് പതിവാണ്.റബർ തോട്ടങ്ങൾ സാമൂഹ്യ വിരുദ്ധരുടെ കേന്ദ്രമായിരിക്കുകയാണ്. കഴിഞ്ഞദിവസം വെല്ലാറയിലെ തന്‍റെ ഷെഡിൽ സൂക്ഷിച്ച റബർ ഷീറ്റുകൾ കളവുപോയതായി ചിറ്റാറിപ്പിലാക്കൽ പ്രഫ. സി.കെ. അഹമദ്‌ പറഞ്ഞു. മുക്കം പോലീസിൽ പരാതി നൽകിയിട്ടുണ്ട്. പക്ഷേ നടപടികളൊന്നും ഉണ്ടായിട്ടില്ല. പകലിലും ഇവിടെ ലഹരി സംഘങ്ങൾ ചുറ്റി കറങ്ങുന്നതായി നാട്ടുകാരും പറഞ്ഞു. ഇതിനിടെ കൊയിലാണ്ടി എടവണ്ണ റോഡില്‍ ഗോതമ്പറോഡിൽ സൂപ്പര്‍മാര്‍ക്കറ്റില്‍ ഗ്ലാസിന്‍റെ പൂട്ട് പൊട്ടിച്ച് രാത്രിയില്‍ മോഷണം നടന്നു. രാവിലെ കടതുറക്കാന്‍ എത്തിയ ജീവനക്കാരാണ് പൂട്ട് കുത്തിത്തുറന്ന നിലയില്‍ കണ്ടത്. സംസ്ഥാന പാതയോരത്ത് ബസ് കാത്തിരിപ്പ് കേന്ദ്രങ്ങൾ രാത്രിയിലും ആളൊഴിഞ്ഞ സമയങ്ങളിലും ലഹരി മാഫിയകളുടെ കേന്ദ്രമായി മാറുന്നുണ്ട്. ഇടയ്ക്ക് പോലീസ് പിടികൂടാറുണ്ടെങ്കിലും പോലീസിന്‍റെ ശ്രദ്ധയും നടപടിയും പോരെന്നാണ് നാട്ടുകാർ പറയുന്നത്.

ഹരിത കര്‍മസേനയുടെ സാമ്പത്തികം: സമഗ്ര പരിശോധന നടത്തണമെന്ന് യുഡിഎഫ്

കോഴിക്കോട് : കോര്‍പറേഷന്‍ ഹരിത കര്‍മസേനയുടെ സംഘാടനത്തെയും സാമ്പത്തിക മാനേജ്‌മെന്‍റിലുള്ള അവിഹിത ഇടപെടലിനെയും കുറിച്ച് സമഗ്ര പരിശോധന നടത്തണമെന്ന് യുഡിഎഫ് കൗണ്‍സില്‍ പാര്‍ട്ടി ആവശ്യപ്പെട്ടു. സേനാംഗങ്ങളുടെ ജനാധിപത്യാവകാശം അനുവദിക്കുകയും വേണം. യാതൊരുവിധ നിയമന ഉത്തരവുമില്ലാതെ ഓഫീസില്‍ അക്കൗണ്ടന്‍റ് വന്ന് ജോലി എടുക്കുന്നത് ഞെട്ടിപ്പിക്കുന്നതാണ്. സ്ഥലം മാറി പോയ ഹെല്‍ത്ത് ഇന്‍സ്പക്ടര്‍ (എച്ച്‌ഐ) ഹരിത സേനയെ ഇപ്പോഴും ഭരിക്കുന്നത് ദുരൂഹമാണ്. ഈ നിയമനത്തിന് പിന്നിലും ഇയാളുടെ കരങ്ങളുണ്ട്. മൂന്ന് കണ്‍സോഷ്യങ്ങള്‍ക്കും മേല്‍നോട്ടം വഹിക്കുന്ന എക്‌സിക്യൂട്ടീവ് കമ്മിറ്റികളുടെയും എച്ച്ഐ.മാരും ഏകാധിപത്യ പ്രവണത അവസാനിപ്പിക്കണം. തെറ്റു ചൂണ്ടിക്കാണിക്കുന്ന സേനാംഗങ്ങളെ ഭീഷണിപ്പെടുത്തി വരുതിയിലാക്കുന്ന പ്രവണത സേനയെ തകര്‍ച്ചയിലേക്ക് തള്ളിവിടും. അവരുടെ മെച്ചപ്പെട്ട പ്രവര്‍ത്തനം ചൂഷണം ചെയ്യരുത്. സേനാംഗങ്ങള്‍ക്ക് പ്രാതിനിധ്യമില്ലാത്ത കോര്‍ കമ്മിറ്റി അധികാര കേന്ദ്രമായി സേനയുടെ ഭീമന്‍ ബാങ്ക് നിക്ഷേപത്തിന് മുകളില്‍ നടത്തുന്ന നീക്കം ക്രമക്കേടിന് ആക്കം കൂട്ടും. സേനാംഗങ്ങള്‍ കലക്ട് ചെയ്യുന്നവയും ഏജന്‍സി കൊണ്ട് പോകുന്നവയും തമ്മില്‍ അന്തരമുണ്ട്. ഇവയെ സംബന്ധിച്ച് നല്‍കിയ പരാതിയില്‍ നടപടി സ്വീകരിക്കാതിരുന്നത് സംശയകരമാണ്. ഇതേ കുറിച്ച് സമഗ്ര പരിശോധനക്ക് തയാറായാല്‍ തെളിവ് നല്‍കാന്‍ തയാറാണെന്നും കൗണ്‍സില്‍ പാര്‍ട്ടി ലീഡര്‍ കെ.സി. ശോഭിതയും ഡെപ്യൂട്ടി ലീഡര്‍ കെ.മൊയ്തീന്‍ കോയയും വ്യക്തമാക്കി.

ജില്ലയിൽ ഹര്‍ത്താലായി ദേശീയ പണിമുടക്ക്

ബലപ്രയോഗവും ഭീഷണിയുമായി സമരാനുകൂലികള്‍ കോഴിക്കോട്: വിവിധ തൊഴിലാളി യൂണിയനുകളുടെ ആഭിമുഖ്യത്തില്‍ സംഘടിപ്പിച്ച ദേശീയ പണിമുടക്ക് ജില്ലയില്‍ പൂര്‍ണ്ണം. ഹര്‍ത്താലിന്‍റെ പ്രതീതി സൃഷ്ടിച്ച പണിമുടക്കില്‍ സ്വകാര്യ-സര്‍ക്കാര്‍ സ്ഥാപനങ്ങള്‍, ബാങ്കുകള്‍, വ്യാപാര സ്ഥാപനങ്ങള്‍, വിദ്യാഭ്യാസ സ്ഥാപനങ്ങള്‍ തുടങ്ങിയവ അടഞ്ഞുകിടന്നു. പൊതുഗതാഗത മേഖലയും സ്തംഭിച്ചു. പോലീസ് സംരക്ഷണത്തില്‍ കെഎസ്ആര്‍ടിസി ബസുകള്‍ കോണ്‍വോയ് ആയി നാമമാത്ര സര്‍വീസുകള്‍ നടത്തി. അന്തര്‍ സംസ്ഥാന കെഎസ്ആര്‍ടിസി ബസ് സര്‍വീസുകള്‍ സംസ്ഥാന അതിര്‍ത്തി മുതല്‍ പോലീസ് സംരക്ഷണത്തില്‍ ലക്ഷ്യ സ്ഥാനത്തെത്തിച്ചു. ഓട്ടോ-ടാക്‌സി, സ്വകാര്യ ബസ് സര്‍വീസുകള്‍ പൂര്‍ണമായും പണിമുടക്കില്‍ പങ്കാളികളായി. കോഴിക്കോട് കോര്‍പറേഷന്‍ ബേപ്പൂര്‍ സോണല്‍ ഓഫീസ്, മുക്കം തുടങ്ങിയ സ്ഥലങ്ങളില്‍ പണിമുടക്കുമായി ബന്ധപ്പെട്ട് സംഘര്‍ഷമുണ്ടായി. വിവിധ സ്ഥലങ്ങളില്‍ സമരാനുകൂലികള്‍ വാഹനങ്ങള്‍ തടഞ്ഞു. ഫറോക്ക്: ഫറോക്കില്‍ മാധ്യമ പ്രവര്‍ത്തകന് നേരെ സമരാനുകൂലികളുടെ ആക്രമണമുണ്ടായി. ഫറോക്ക് ചെറുവണ്ണൂരില്‍ സ്വകാര്യ ഡെന്‍റല്‍ ക്ലിനിക്ക് സമരാനുകൂലികള്‍ അടപ്പിക്കുന്നത് റിപ്പോര്‍ട്ട് ചെയ്യാനെത്തിയ എന്‍.വി. മുസമ്മിലിനെയാണ് മുപ്പതോളം വരുന്ന സംഘം ആക്രമിച്ചത്. മുസമ്മിലിന്‍റെ ഐഡി കാര്‍ഡ് വലിച്ചു കീറിയ സംഘം മര്‍ദ്ദിക്കുകയും ഭീഷണിപ്പെടുത്തുകയും മൊബൈല്‍ ഫോണ്‍ പിടിച്ചുവാങ്ങുകയും ചെയ്തതായി പരാതിയുണ്ട്. ബഹളം കേട്ട് സംഭവസ്ഥലത്തെത്തിയ നല്ലളം പോലിസ് സിഐയാണ് മാധ്യമ പ്രവര്‍ത്തകനെ രക്ഷപ്പെടുത്തിയത്. ഇന്നലെ രാവിലെ പത്തോടെയാണ് സംഭവം. താലൂക്ക് ആശുപത്രിയില്‍ ചികിത്സ തേടിയ മുസമ്മില്‍ സംഭവത്തില്‍ നല്ലളം പോലിസില്‍ പരാതി നല്‍കി. മുക്കം: ദേശീയ പണിമുടക്കില്‍ മുക്കം അടക്കമുള്ള ടൗണുകളില്‍ കടകമ്പോളങ്ങള്‍ പൂര്‍ണമായും അടഞ്ഞുകിടന്നു. മുക്കത്ത് തുറന്നു പ്രവര്‍ത്തിച്ച മത്സ്യ-മാംസ കടകള്‍ ഉള്‍പ്പെടെയുള്ള സ്ഥാപനങ്ങള്‍ സമരക്കാര്‍ ബലമായി അടപ്പിച്ചു. മിനി സിവില്‍ സ്റ്റേഷന്‍ പൂട്ടിക്കാന്‍ ശ്രമിച്ചത് സംഘര്‍ഷത്തിനും കാരണമായി. മുക്കത്ത് പണിമുടക്കിനിടെ സംഘര്‍ഷാവസ്ഥയുമുണ്ടായി. മത്സ്യക്കടയില്‍ മണ്ണെണ്ണ ഒഴിക്കുമെന്ന് സിപിഎം നേതാവ് ഭീഷണി മുഴക്കി. ഈ സമയമെല്ലാം അവിടെ ഉണ്ടായിരുന്ന മുക്കം പോലീസ് കടക്കാരന് സംരക്ഷണമൊരുക്കാന്‍ തയ്യാറായില്ല. മുക്കം മിനി സിവില്‍ സ്റ്റേഷനിലെത്തിയ സമരാനുകൂലികള്‍ എ.ഇ.ഒ ഓഫീസ്, കൃഷിഭവന്‍ എന്നിവിടങ്ങളിലുമെത്തി ജീവനക്കാര്‍ക്കെതിരെ രൂക്ഷമായ ഭാഷയിലാണ് പ്രതികരിച്ചത്. സംസ്ഥാന പാതയോരത്തെ മുക്കം മാള്‍ ബലം പ്രയോഗിച്ച് അടപ്പിക്കുകയും ചെയ്തു. ഈ സ്ഥലത്തും പോലീസുണ്ടായിരുന്നുവെങ്കിലും ഇടപെട്ടില്ല. ബംഗളൂരുവിലേക്കുള്ള ദീര്‍ഘദൂര ബസ് ഏറെ നേരം തടഞ്ഞിട്ടതിനാല്‍ യാത്രക്കാരും വെട്ടിലായി. മുക്കത്ത് തുറന്ന് പ്രവര്‍ത്തിച്ച സ്വകാര്യ ബാങ്കുകളും സമരാനുകൂലികള്‍ അടപ്പിച്ചു. കൊയിലാണ്ടി: ദേശീയ പൊതുപണിമുടക്ക് കൊയിലാണ്ടിയില്‍ ഹര്‍ത്താലായി മാറി. പക്ഷെ കൊയിലാണ്ടിയുടെ പ്രധാന വ്യാപാരകേന്ദ്രമായ ഫിഷിംഗ് ഹാര്‍ബറിനെ പണിമുടക്ക് ബാധിച്ചില്ല. ഇവിടെ നിന്നും മറ്റു സ്ഥലങ്ങളിലെക്ക് മത്സ്യ കയറ്റുമതി സജീവമായിരുന്നു. നിരവധിപേര്‍ മത്സ്യം വാങ്ങാനായി ഹാര്‍ബറിലെത്തി. കൂരാച്ചുണ്ട്: കൂരാച്ചുണ്ടില്‍ ദേശീയ പണിമുടക്ക് പൂര്‍ണം. സര്‍ക്കാര്‍ സ്ഥാപനങ്ങള്‍, ബാങ്കുകള്‍ എന്നിവയൊന്നും തുറന്നു പ്രവര്‍ത്തിച്ചില്ല. സ്‌കൂളുകളില്‍ നാമമാത്രമായി അധ്യാപകര്‍ എത്തിയെങ്കിലും വിദ്യാര്‍ഥികള്‍ കുറവായിരുന്നു. ടാക്‌സി വാഹനങ്ങളും മറ്റും സര്‍വീസ് നടത്തിയില്ല. അനിഷ്ട സംഭവങ്ങള്‍ ഉണ്ടായില്ല. അത്യാവശ്യം സ്വകാര്യ വാഹനങ്ങള്‍ ഓടി.

കാട്ടാന ആക്രമണം: ഫോറസ്റ്റ് ഓഫീസിന് മുമ്പില്‍ പ്രതിഷേധിച്ചു

കൂടരഞ്ഞി: കൂമ്പാറ പീടികപ്പാറ തേനരുവിയിൽ വീടിന്‍റെ മുറ്റത്തു നിർത്തിയിട്ടിരുന്ന ജീപ്പ് കാട്ടാന കുത്തിമറിച്ചു നശിപ്പിച്ചതില്‍ കോണ്‍ഗ്രസ് കൂടരഞ്ഞി മണ്ഡലം കമ്മറ്റി കൂമ്പാറ സെക്‌‌ഷന്‍ ഫോറസ്റ്റ് ഓഫീസിന് മുമ്പില്‍ പ്രതിഷേധ സമരം നടത്തി. മണ്ഡലം പ്രസിഡന്‍റ് സണ്ണി പെരുകിലം തറപ്പേല്‍ ഉദ്ഘാടനം ചെയ്തു. സണ്ണി കിഴുക്കാരക്കാട്ട്, ജോഷി കൂമ്പുക്കല്‍, ഷേര്‍ളി ജോസ്, എ.പി.മണി, ബോബി ഷിബു, ജോര്‍ജ്കുട്ടി കക്കാടംപൊയില്‍, ഷിജോ ജോര്‍ജ്, നിസാറ ബീഗം, ഹസീന, ബാബു പൂക്കളം, ലീലാമ്മ മുള്ളനാനി, രാജേഷ് മണിമലതറപ്പേല്‍, ജോമ സുരേഷ് തുടങ്ങിയവര്‍ സംസാരിച്ചു.

സില്‍വര്‍ ജൂബിലി നിറവില്‍ മുക്കം വൈഎംസിഎ

മുക്കം: മുക്കം വൈഎംസിഎയുടെ സില്‍വര്‍ ജൂബിലി ആഘോഷത്തിന്‍റെ ഭാഗമായി ഒരാഴ്ച നീണ്ടുനില്‍ക്കുന്ന പരിപാടികള്‍ സംഘടിപ്പിക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. കോഴിക്കോട് തെരുവോരങ്ങളില്‍ വസിക്കുന്ന ആളുകള്‍ക്ക് വ്യാഴാഴ്ച ആശ്രയ എഡ്യുക്കേഷണല്‍ ചാരിറ്റി ട്രസ്റ്റുമായി സഹകരിച്ച് പൊതിച്ചോര്‍ വിതരണം ചെയ്യും. വെള്ളിയാഴ്ച ഡോണ്‍ബോസ്‌കോ കോളജില്‍ ലഹരിവിരുദ്ധ ബോധവത്കരണ ക്ലാസ് നടത്തും. സി.ജി. ഷാജു നേതൃത്വം നല്‍കും. സമാപന സമ്മേളനം മുക്കം മലയോരം ഹോട്ടല്‍ കോണ്‍ഫറന്‍സ് ഹാളില്‍ വച്ച് ജസ്റ്റിസ് ജെ.ബി. കോശി ഉദ്ഘാടനം ചെയ്യും. വാര്‍ത്താസമ്മേളനത്തില്‍ ജോസ് മുണ്ടത്താനം, തോമസ് കുരിശുംമൂട്ടില്‍, ജേക്കബ് കല്ലടാല്‍ എന്നിവര്‍ പങ്കെടുത്തു.

പിണറായി രാജ്യദ്രോഹത്തിനു കൂട്ടുനില്‍ക്കുന്നു: എ.പി. അബ്ദുള്ളകുട്ടി

ബാലുശേരി: പാക് ചാര വ്‌ളോഗര്‍ ജ്യോതി മല്‍ഹോത്രയെ സര്‍ക്കാര്‍ ചെലവില്‍ കേരളത്തില്‍ കൊണ്ടുവന്നതോടെ മുഖ്യമന്ത്രി പിണറായി വിജയനും മരുമകന്‍ മന്ത്രി മുഹമ്മദ് റിയാസും രാജ്യദ്രോഹ പ്രവര്‍ത്തനത്തിന് കൂട്ടുനില്‍ക്കുകയാണ് ചെയ്തതെന്ന് ബിജെപി ദേശീയ ഉപാധ്യക്ഷന്‍ എ.പി. അബ്ദുള്ളകുട്ടി പറഞ്ഞു. ആരോഗ്യമന്ത്രി വീണാ ജോര്‍ജ് രാജിവയ്ക്കണമെന്നാവശ്യപ്പെട്ട് ബിജെപി കോഴിക്കോട് റൂറല്‍ ജില്ലാ കമ്മറ്റിയുടെ നേതൃത്വത്തില്‍ ബാലുശേരി താലൂക്ക് ആശുപത്രിയിലേക്ക് നടത്തിയ മാര്‍ച്ച് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. പാക് ചാര വനിതയായ ജ്യോതി മല്‍ഹോത്രയ്ക്ക് യാത്രാകൂലിയും വേതനവും ഭക്ഷണവും താമസ സൗകര്യങ്ങളും നല്‍കാന്‍ മന്ത്രി മുഹമ്മദ് റിയാസിന്‍റെ സര്‍ക്കാരിന് പണമുണ്ട്. എന്നാല്‍ പാവങ്ങളുടെ ആശുപത്രികളില്‍ മരുന്നും ശസ്ത്രക്രിയ ഉപകരണങ്ങളും വാങ്ങാന്‍ കാശില്ലെന്നും അബ്ദുള്ളകുട്ടി പറഞ്ഞു. ജില്ലാ പ്രസിഡന്‍റ് ടി. ദേവദാസ് അധ്യക്ഷത വഹിച്ചു. ജനറല്‍ സെക്രട്ടറിമാരായ ഗിരീഷ് തേവള്ളി, കെ. രജനീഷ് ബാബു, വൈസ് പ്രസിഡന്‍റുമാരായ ഷാന്‍ കട്ടിപ്പാറ, ശോഭാ രാജന്‍, ടി.എ. നാരായണന്‍, എം.സി. ശശീന്ദ്രന്‍, കെ. ശശീന്ദ്രന്‍, ജോസ് വാലുമണ്ണേല്‍ എന്നിവര്‍ സംസാരിച്ചു.

കേരള കോണ്‍ഗ്രസ്-എം സംസ്‌കാര വേദി സുകുമാര്‍ അഴീക്കോടിനെ അനുസ്മരിച്ചു

കോഴിക്കോട്: കേരള കോണ്‍ഗ്രസ്-എം സംസ്‌കാര വേദിയുടെ ആഭിമുഖ്യത്തില്‍ "പ്രഫ. സുകുമാര്‍ അഴീക്കോട് ജന്മശതാബ്ദി അനുസ്മരണ സമ്മേളനം' സംഘടിപ്പിച്ചു. ഗാന്ധിഗൃഹത്തില്‍ സംഘടിപ്പിച്ച സമ്മേളനം മുന്‍ എംഎല്‍എ ജോണി നെല്ലൂര്‍ ഉദ്ഘാടനം ചെയ്തു. സംസ്‌കാര വേദി സംസ്ഥാന പ്രസിഡന്‍റ് ഡോ. വര്‍ഗീസ് പേരയില്‍ അധ്യക്ഷത വഹിച്ചു. പ്രഫ. വര്‍ഗീസ് മാത്യു "അഴിക്കോട് അനുസ്മരണം' നടത്തി. കേരള കോണ്‍ഗ്രസ് ജില്ലാ പ്രസിഡന്‍റ് ടി.എം. ജോസഫ്, സംസ്‌കാര വേദി ജില്ലാ പ്രസിഡന്‍റ് പ്രഫ. ചാര്‍ലി കട്ടക്കയം, സെക്രട്ടറി സിറിയക് പാലംതട്ടേല്‍, കേരള പ്രഫഷണല്‍ ഫ്രണ്ട് സംസ്ഥാന പ്രസിഡന്‍റ് ബേബി സെബാസ്‌റ്റ്യന്‍, രാജു ജേക്കബ്, ജയപ്രകാശ് പനക്കല്‍ എന്നിവര്‍ സംസാരിച്ചു.

ദേശീയ പണിമുടക്ക്: ഐക്യദാര്‍ഢ്യ സദസ് സംഘടിപ്പിച്ചു

കോഴിക്കോട്: സാര്‍വത്രികമായ സ്വകാര്യവത്കരണത്തിലേക്കാണ് രാജ്യം പോകുന്നതെന്ന് സിഐടിയു സംസ്ഥാന പ്രസിഡന്‍റ് ടി.പി. രാമകൃഷ്ണന്‍ എംഎല്‍എ. രാജ്യത്ത് എല്ലാമേഖലകളിലും കോര്‍പറേറ്റ് വത്കരണം ശക്തിപ്പെട്ടു. സ്വകാര്യവത്കരണത്തിനും കുത്തകവത്കരണത്തിനും അടിസ്ഥാനമായ നയസമീപനങ്ങളാണ് കേന്ദ്രസര്‍ക്കാര്‍ സ്വീകരിക്കുന്നതെന്നും അദ്ദേഹം പറഞ്ഞു. കേരള പത്രപ്രവര്‍ത്തക യൂണിയനും കേരള ന്യൂസ്പേപ്പര്‍ എംപ്ലോയിസ് ഫെഡറേഷനും സംയുക്തമായി സംഘടിപ്പിച്ച ദേശീയ പണിമുടക്ക് ഐക്യദാര്‍ഢ്യ സദസ് ഉദ്ഘാടനം ചെയ്യുകയായിരുന്നു അദ്ദേഹം. കെയുഡബ്ല്യുജെ ജില്ലാ പ്രസിഡന്‍റ് ഇ.പി. മുഹമ്മദ് അധ്യക്ഷത വഹിച്ചു. ഐഎന്‍ടിയുസി ജില്ലാ പ്രസിഡന്‍റ് കെ. രാജീവ്, എസ്ടിയു ജില്ലാ ജനറല്‍ സെക്രട്ടറി എ.ടി അബ്ദു, കെഎന്‍ഇഎഫ് സംസ്ഥാന സെക്രട്ടറിയേറ്റ് അംഗങ്ങളായ ഒ.സി. സജീന്ദ്രന്‍, വി.എ. മജീദ്, എം.കെ. അന്‍വര്‍, ജില്ലാ സെക്രട്ടറി പി.കെ. സജിത, സംസ്ഥാന കമ്മിറ്റി അംഗം എം. ഫിറോസ് ഖാന്‍, സി. രതീഷ്‌കുമാര്‍ എന്നിവര്‍ സംസാരിച്ചു.

‘ഓട്ടോ തൊഴിലാളികളെ പോലീസിന്‍റെ ജോലി ഏല്‍പ്പിക്കരുത് ’

കോഴിക്കോട്: പോലീസ് ചെയ്യേണ്ട ജോലി ഓട്ടോറിക്ഷ തൊഴിലാളികളെ ഏല്‍പ്പിക്കുന്നത് ശരിയല്ലെന്ന് മനുഷ്യാവകാശ കമ്മീഷന്‍ ജുഡീഷല്‍ അംഗം കെ. ബൈജുനാഥ്. ഇത് നിയമം കൈയിലെടുക്കുന്നതിന് പ്രേരണ നല്‍കുമെന്നും ഉത്തരവില്‍ പറഞ്ഞു. കോഴിക്കോട് റെയില്‍വേ സ്റ്റേഷനിലെ നാലാം പ്ലാറ്റ്‌ഫോമില്‍ ഓട്ടോ ഡ്രൈവര്‍മാര്‍ ഓട്ടോറിക്ഷ നിയന്ത്രിക്കുന്നതും ആളുകളെ കയറ്റുന്നതും നേരില്‍ കണ്ടിട്ടുള്ളതാണെന്നും കമ്മീഷന്‍ ഉത്തരവില്‍ പറഞ്ഞു. ഓട്ടോറിക്ഷ ഡ്രൈവര്‍മാരുടെ നിയമവിരുദ്ധ പ്രവര്‍ത്തനങ്ങള്‍ക്കെതിരേ കര്‍ശന നടപടികള്‍ സ്വീകരിക്കണമെന്നും കമ്മീഷന്‍ സിറ്റി പോലീസ് കമ്മീഷണര്‍ക്ക് നിര്‍ദേശം നല്‍കി. 2016 മുതല്‍ നഗരത്തില്‍ ഓട്ടോ ഓടിച്ച് ജീവിക്കുന്നയാള്‍ നല്‍കിയ പരാതിയിലാണ് നടപടി. ചില ഡ്രൈവര്‍മാരുടെ നിയമവിരുദ്ധ, അനാശാസ്യ പ്രവര്‍ത്തനങ്ങള്‍ എതിര്‍ത്തതിന്‍റെ ഫലമായി തങ്ങളെ ശാരീരികമായി ഉപദ്രവിക്കുകയാണെന്ന് പരാതിയില്‍ പറയുന്നു. ഇവര്‍ നടത്തുന്ന മയക്കുമരുന്ന് വിതരണത്തിനെതിരേ പരാതിപ്പെടാന്‍ ജീവഭയം കാരണം ആര്‍ക്കും കഴിയാറില്ല. റെയില്‍വേ പ്ലാറ്റ്‌ഫോം ഒന്ന്, നാല്, ആനി ഹാള്‍ റോഡ്, ലിങ്ക് റോഡ് എന്നിവിടങ്ങളിലാണ് ഇവരുടെ താവളം. റെയില്‍വേ സ്റ്റേഷനില്‍ പോലീസ് എയ്ഡ് പോസ്റ്റ് പ്രവര്‍ത്തനരഹിതമാണെന്നും പരാതിയില്‍ പറയുന്നു. റെയില്‍വേ പ്ലാറ്റ്‌ഫോമില്‍ എത്തുന്നവരെ തര്‍ക്കം കൂടാതെ ഓട്ടോയില്‍ കയറ്റിവിടാന്‍ സ്റ്റേഷനിലെ ഓഫീസര്‍മാര്‍ക്ക് നിര്‍ദേശം നല്‍കിയിട്ടുണ്ടെന്ന് സിറ്റി കമ്മീഷണര്‍ റിപ്പോര്‍ട്ടില്‍ പറഞ്ഞു. റെയില്‍വേ എയ്ഡ് പോസ്റ്റ് കൃത്യമായി പരിശോധിക്കാന്‍ നൈറ്റ് ഓഫീസര്‍മാര്‍ക്ക് നിര്‍ദേശം നല്‍കിയിട്ടുണ്ടെന്നും റിപ്പോര്‍ട്ടില്‍ പറയുന്നു.

കെട്ടിട നിര്‍മാണം പാതിവഴിയില്‍ : അത്യോടി ആയുര്‍വേദ ഡിസ്‌പെന്‍സറിക്ക് വേണം അടിയന്തര ചികിത്സ

ജോണ്‍സണ്‍ പൂകമല കൂരാച്ചുണ്ട്: മലയോര ഗ്രാമമായ കൂരാച്ചുണ്ടിലെ നൂറുകണക്കിനു കുടുംബങ്ങള്‍ ആശ്രയിക്കുന്ന അത്യോടി സര്‍ക്കാര്‍ ആയുര്‍വേദ ഡിസ്പെന്‍സറിയ്ക്കായി നിര്‍മാണമാരംഭിച്ച കെട്ടിടം പൂര്‍ത്തീകരിക്കാത്തതിനാല്‍ രോഗികളും ജീവനക്കാരും ദുരിതത്തില്‍. കിടത്തി ചികിത്സാ ആവശ്യങ്ങള്‍ക്കായി രണ്ടുവര്‍ഷം മുമ്പാണ് കെട്ടിട നിര്‍മാണ പ്രവൃത്തി ആരംഭിച്ചത്. ഭിത്തി കെട്ടി മേല്‍ക്കൂര വാര്‍ത്തതല്ലാതെ കിടത്തിചികിത്സ ആരംഭിക്കാനുള്ള യാതൊരു നടപടിയും അധികൃതര്‍ സ്വീകരിച്ചിട്ടില്ല. 2020 -21ല്‍ പുരുഷന്‍ കടലുണ്ടി എംഎല്‍എയുടെ ആസ്തി വികസന ഫണ്ടില്‍ നിന്നും അനുവദിച്ച 30 ലക്ഷം രൂപ ചെലവഴിച്ചാണ് ഇരുപത് ബെഡുകളുള്ള കെട്ടിട നിര്‍മാണം ആരംഭിച്ചത്. വയറിംഗ്, പ്ലംബിംഗ് തുടങ്ങിയ പ്രവൃത്തികളാണിനി പൂര്‍ത്തീകരിക്കാനുള്ളത്. കിടത്തി ചികിത്സ തുടങ്ങണമെങ്കില്‍ ഇവിടെ എട്ട് ജീവനക്കാരെയെങ്കിലും നിയമിക്കണം. നിലവില്‍ ഡിസ്പെന്‍സറിയില്‍ ആറ് ജീവനക്കാരാണുള്ളത്. ദിനംപ്രതി നൂറോളം പേരാണ് ഇവിടെ ചികിത്സ തേടിയെത്തുന്നത്. വിവിധ ആദിവാസി ഉന്നതികളിലുള്ള നിരവധി കുടുംബങ്ങളും ചികിത്സക്കായി ഇവിടെ എത്തുന്നുണ്ടെങ്കിലും വിദഗ്ധ ചികിത്സകള്‍ക്കായി കിലോമീറ്ററുകള്‍ യാത്ര ചെയ്ത് മറ്റ് ആശുപത്രികളെ ആശ്രയിക്കേണ്ടി വരുന്നു. പഞ്ചായത്ത് വിട്ടുനല്‍കിയ 27 സെന്‍റ് ഭൂമിയില്‍ പ്രവര്‍ത്തിക്കുന്ന അത്യോടി സര്‍ക്കാര്‍ ആയുവേദ ഡിസ്പെന്‍സറി അസൗകര്യങ്ങള്‍ മൂലം വീര്‍പ്പുമുട്ടുന്ന സാഹചര്യത്തില്‍ പുതിയ കെട്ടിടം പ്രവര്‍ത്തനസജ്ജമാക്കാനായി പഞ്ചായത്ത് ജില്ലാ മെഡിക്കല്‍ ഓഫീസര്‍ക്ക് നിവേദനം സമര്‍പ്പിച്ചിട്ടുണ്ടെങ്കിലും ഇതിന്‍റെ തുടര്‍ നടപടികള്‍ വൈകുകയാണ്. ജില്ലയില്‍ തന്നെ ഏറ്റവും പഴക്കമുള്ള ആയുര്‍വേദ ഡിസ്പെന്‍സറിയാണ് കൂരാച്ചുണ്ട് പഞ്ചായത്തിലെ അത്യോടി ഗവ.ഡിസ്പെന്‍സറി. അന്പത് വര്‍ഷങ്ങള്‍ പിന്നിട്ട ഡിസ്‌പെന്‍സറി കാലപ്പഴക്കം ചെന്ന കെട്ടിടത്തിലാണ് പ്രവര്‍ത്തിക്കുന്നത്. കൂരാച്ചുണ്ടിലെയും സമീപ പ്രദേശങ്ങളായ കോട്ടൂര്‍, കായണ്ണ, ചക്കിട്ടപാറ പ്രദേശങ്ങളിലെയും നിരവധി രോഗികള്‍ ഇവിടെ ചികിത്സ തേടിയെത്തുന്നുണ്ട്.

പൊതു ശുചിമുറി തുറന്നില്ല; ചക്കിട്ടപാറയില്‍ ജനം ദുരിതത്തില്‍

ചക്കിട്ടപാറ: ലക്ഷക്കണക്കിനു രൂപ വകയിരുത്തി 2022ല്‍ നവീകരിച്ച് ഉദ്ഘാടനം ചെയ്ത ചക്കിട്ടപാറ പഞ്ചായത്തിന്‍റെ പൊതു ശുചിമുറി മാസങ്ങളായി അടഞ്ഞുകിടക്കുന്നു. മാലിന്യമുക്ത നവകേരളം പദ്ധതിയില്‍ 2025 മാര്‍ച്ച് 24ന് ചക്കിട്ടപാറയെ സമ്പൂര്‍ണ ശുചിത്വ പഞ്ചായത്തായി പ്രഖ്യാപിച്ചിരുന്നു. എന്നിട്ടും പൊതു ശുചിമുറി ഉപകാരപ്രദമാക്കാന്‍ അധികൃതര്‍ക്കു കഴിഞ്ഞിട്ടില്ല. ടൗണിലെത്തുന്ന പൊതുജനങ്ങളും വ്യാപാരികളും ഓട്ടോ-ടാക്സി ജീവനക്കാരും പ്രാഥമികാവശ്യം നിര്‍വഹിക്കാന്‍ സൗകര്യമില്ലാതെ ബുദ്ധിമുട്ടുകയാണ്. ഗ്രാമസഭയില്‍ വിഷയം അവതരിപ്പിച്ചപ്പോള്‍ ശുചിമുറി വീണ്ടും നവീകരിക്കുമെന്ന് മാസങ്ങള്‍ക്കു മുമ്പ് അധികൃതര്‍ പറഞ്ഞിരുന്നുവെങ്കിലും ഇതുവരെ നടപടിയായിട്ടില്ല.

കൊളക്കണ്ടി-പാറക്കണ്ടി റോഡിന്‍റെ പുനർ നിർമാണം: തൽസ്ഥിതി റിപ്പോർട്ട് ഹാജരാക്കണമെന്ന് മനുഷ്യാവകാശ കമ്മീഷൻ

കോഴിക്കോട്: ചെങ്ങോട്ടുകാവ് പഞ്ചായത്തിലെ ചേലിയ വാർഡിൽ 20 വർഷമായി തകർന്നു കിടക്കുന്ന കൊളക്കണ്ടി-പാറക്കണ്ടി പഞ്ചായത്ത് റോഡ് 2024-25 സാമ്പത്തിക വർഷം പുനർനിർമിക്കാമെന്ന പഞ്ചായത്ത് സെക്രട്ടറിയുടെ റിപ്പോർട്ടിന്‍റെ അടിസ്ഥാനത്തിൽ സ്വീകരിച്ച നടപടികളുടെ റിപ്പോർട്ട് സമർപ്പിക്കണമെന്ന് മനുഷ്യാവകാശ കമ്മീഷൻ ജുഡീഷൽ അംഗം കെ. ബൈജുനാഥ് ഉത്തരവിട്ടു. കഴിഞ്ഞ വർഷം നൽകിയ ഉത്തരവിന്‍റെ അടിസ്ഥാനത്തിൽ സ്വീകരിച്ച നടപടികളാണ് ഇപ്പോൾ ആവശ്യപ്പെട്ടിരിക്കുന്നത്.ഗ്രാമസഭാ ലിസ്റ്റിൽ രണ്ടാമതായി ഉൾപ്പെടുത്തിയ റോഡ് പുനർനിർമിക്കാത്തതിന് കാരണം ഫണ്ടിന്‍റെ അപര്യാപ്തതയാണെന്ന് ചെങ്ങോട്ടുകാവ് പഞ്ചായത്ത് സെക്രട്ടറി മുമ്പ് സമർപ്പിച്ച റിപ്പോർട്ടിൽ പറഞ്ഞിരുന്നു. പ്രദേശവാസി തദ്ദേശസ്വയംഭരണ മന്ത്രിക്ക് നൽകിയ പരാതിയുടെ അടിസ്ഥാനത്തിൽ 2024-25ൽ വാർഡിൽ പദ്ധതിയിൽ ഫണ്ടിന്‍റെ ലഭ്യതക്കനുസരിച്ച് റോഡ് പുനർനിർമിക്കാൻ തീരുമാനമെടുത്തുവെന്നും റിപ്പോർട്ടിൽ പറഞ്ഞിരുന്നു. ഈ റിപ്പോർട്ടിന്‍റെ അടിസ്ഥാനത്തിൽ സ്വീകരിച്ച നടപടികളാണ് കമ്മീഷൻ ആവശ്യപ്പെട്ടത്.

സ്വകാര്യബസ് പണിമുടക്ക് ജില്ലയില്‍ പൂര്‍ണം; യാത്രക്കാര്‍ വലഞ്ഞു

കോഴിക്കോട്: സ്വകാര്യബസ് പണിമുടക്ക് ജില്ലയില്‍ പൂര്‍ണം. യാത്രക്കാര്‍ വലഞ്ഞു. സ്വകാര്യബസുകള്‍ ഒന്നും റോഡില്‍ ഇറങ്ങിയില്ല. വിദ്യാര്‍ഥികളുടെ ബസ് ചാര്‍ജ് വര്‍ധിപ്പിക്കണമെന്നതടക്കമുള്ള ആവശ്യങ്ങള്‍ ഉന്നയിച്ചാണ് സ്വകാര്യബസുകള്‍ സൂചനാ പണിമുടക്ക് നടത്തിയത്. കെഎസ്ആര്‍ടിസി അധിക സര്‍വീസുകള്‍ നടത്തിയതിനാല്‍ ചില റൂട്ടുകളില്‍ ചെറിയ ആശ്വാസമായി.സ്വകാര്യ ബസുകള്‍ കൂടുതല്‍ ഓടിയിരുന്ന ബാലുശേരി, മെഡിക്കല്‍ കോളജ്, മാവൂര്‍, റെയില്‍വേ സ്‌റ്റേഷന്‍ തുടങ്ങിയ സ്ഥലങ്ങളിലേക്ക് കോഴിക്കോട് ഡിപ്പോയില്‍ നിന്ന് കെഎസ്ആര്‍ടിസി അധിക സര്‍വീസുകള്‍ നടത്തി. രണ്ടു ബസുകളാണ് ഇതിനു വിനിയോഗിച്ചത്. യാത്രക്കാര്‍ കൂടുതലുള്ള സ്ഥലങ്ങളിലേക്കാണ് കെഎസ്ആര്‍ടിസി ഓടിയത്. ഇരുചക്ര വാഹനങ്ങളും കാറുകളുമെല്ലാം റോഡില്‍ നിറഞ്ഞു. മിക്കവരും ഇരുചക്രവാഹനങ്ങളിലാണ് യാത്രചെയ്തത്. സ്വന്തമായി കാറുള്ളവര്‍ അവയും ഉപയോഗപ്പെടുത്തി. ഓട്ടോറിക്ഷകളും ടാക്‌സികളും റോഡില്‍ സജീവമായിരുന്നു.

മലയോര മേഖലയിലെ ജനങ്ങള്‍ മുള്‍മുനയില്‍ : തേനരുവിയില്‍ കര്‍ഷകരുടെ കണ്ണീര്‍ അരുവി തീര്‍ത്ത് കാട്ടാനക്കൂട്ടം

പ്രതീഷ് ഉദയന്‍ കൂടരഞ്ഞി: മലയോര മേഖലയായ കൂമ്പാറ പീടികപ്പാറ തേനരുവിയില്‍ കര്‍ഷകരുടെ കണ്ണീര്‍ വീഴ്ത്തി കാട്ടാനക്കൂട്ടത്തിന്‍റെ വിളയാട്ടം. കൂടരഞ്ഞി പഞ്ചായത്തിലെ കക്കാടംപൊയിലിനോട് ചേര്‍ന്നു കിടക്കുന്ന തേനരുവി പ്രദേശം കാട്ടാനകളുടെ വിഹാരകേന്ദ്രമായി മാറിയിരിക്കുകയാണ്. കാര്‍ഷിക വിഭവങ്ങളാല്‍ സമൃദ്ധമായ ഈ പ്രദേശത്തുനിന്ന് കാട്ടാനകള്‍ വിട്ടുപോകുന്നില്ല. ഇടയ്ക്ക് നിലമ്പൂര്‍ കൊടുപുഴ വനമേഖലയിലേക്ക് പോകുമെങ്കിലും വൈകാതെതന്നെ ഒറ്റയ്ക്കും കൂട്ടമായുമെത്തുന്ന കാട്ടാനകള്‍ ദിവസങ്ങള്‍ തമ്പടിച്ച് സകലതും ചവിട്ടിയരക്കുകയാണ്. ഇങ്ങനെ പോയാല്‍ എങ്ങനെ ജീവിക്കുമെന്നാണ് കര്‍ഷകരുടെ ചോദ്യം. അതിനിടെ ഇന്നലെ രാത്രി തേനരുവി ഏബ്രാഹം ഏറ്റുമാനുക്കാരന്‍റെ വീട്ടുമുറ്റത്ത് നിര്‍ത്തിയിട്ടിരുന്ന ജീപ്പ് കാട്ടാന കുത്തി മറിച്ചിട്ടു. കുറച്ചുകാലങ്ങളായി ഒറ്റയാന്‍ ഈ പ്രദേശത്ത് ഭീതി വിതച്ചുകൊണ്ട് നിലയുറപ്പിച്ചിരിക്കുകയാണ്. കഴിഞ്ഞദിവസം ബൈക്ക് യാത്രികന്‍ ഒറ്റയാന്‍റെ മുമ്പില്‍ നിന്നും തലനാരിഴയ്ക്കാണ് രക്ഷപ്പെട്ടത്. കൂടരഞ്ഞി ഗ്രാമപഞ്ചായത്ത് പ്രസിഡന്‍റ് ആദര്‍ശ് ജോസഫ് സ്ഥലം സന്ദര്‍ശിച്ച് കാട്ടാനയെ തുരത്താന്‍ ഫോറസ്റ്റ്, ആര്‍ആര്‍ടി ഉദ്യോഗസ്ഥര്‍ക്ക് നിര്‍ദേശം നല്‍കി. വാഴ, പപ്പായ, മാങ്കോസ്റ്റിന്‍, റമ്പൂട്ടാന്‍, അവക്കാഡോ, സപ്പോട്ട, ജാതി, തെങ്ങ്, പ്ലാവ്, കൊക്കോ തുടങ്ങിയ ഫലവൃക്ഷ കൃഷി ഏറെയുള്ള പ്രദേശമാണ് തേനരുവി. അടുത്തകാലം വരെ ഇവിടുത്തെ ഭൂമി പൊന്നുംവിലയ്ക്ക് വാങ്ങാന്‍ ആളുണ്ടായിരുന്നു. വന്യജീവികള്‍ ജീവനും സ്വത്തിനും ഭീഷണിയായതോടെ ഈ ഗ്രാമത്തില്‍ ഇപ്പോള്‍ ആളുകള്‍ പുറത്തിറങ്ങാനാകാതെ പകച്ചു നില്‍ക്കുകയാണ്. ബാങ്ക് വായ്പയടക്കം ലഭ്യമാക്കി കൃഷി ചെയ്യുന്ന കര്‍ഷകര്‍ വല്ലാത്ത ആശങ്കയിലാണ്. വര്‍ഷങ്ങള്‍ നട്ടുനനച്ചു പരിപാലിച്ചു വളര്‍ത്തിയെടുത്ത വിളകള്‍ ഒറ്റരാത്രികൊണ്ടു കാട്ടാനകള്‍ നശിപ്പിക്കുമ്പോള്‍ കര്‍ഷകര്‍ ആത്മഹത്യയുടെ വക്കിലാണ്. ബാങ്ക് വായ്പ എങ്ങനെ തിരിച്ചടയ്ക്കുമെന്ന ചോദ്യം കര്‍ഷകര്‍ക്ക് കടുത്ത വെല്ലുവിളിയാവുകയാണ്. വന്യജീവി ശല്യം മൂലമുള്ള കൃഷിനാശത്തിനാകട്ടെ വനംവകുപ്പ് നാമമാത്രമായ തുകയാണ് നഷ്ടപരിഹാരം നല്‍കുന്നത്. "ജനങ്ങൾ വന്യമൃഗശല്യം മൂലം വലയുന്നു' കൂടരഞ്ഞി പഞ്ചായത്തിലെ പൂവാറംതോട്, കക്കാടംപൊയില്‍ മലയോര മേഖലയിലെ ജനങ്ങളാകെ വന്യമൃഗശല്യം മൂലം വലയുകയാണ്. ആന, കടുവ, പുലി, കാട്ടുപന്നി തുടങ്ങിയ വന്യമൃഗങ്ങള്‍ ജനവാസ മേഖലയില്‍ ഇറങ്ങുന്നത് പതിവാണ്. പകല്‍ സമയങ്ങളില്‍ പോലും കാട്ടാനക്കൂട്ടം ജനവാസ മേഖലയില്‍ തമ്പടിക്കുന്നു. വിവരം വനപാലകരെ അറിയിക്കുമ്പോള്‍ ജീവനക്കാരും വാഹനങ്ങളുമില്ലെന്നുള്ള മുടന്തന്‍ ന്യായീകരണങ്ങളാണ് ഉണ്ടാകുന്നതെന്ന് ബിജെപി കൂടരഞ്ഞി പഞ്ചായത്ത് കമ്മിറ്റി ചൂണ്ടിക്കാട്ടി. ജനങ്ങളുടെ ജീവനും സ്വത്തിനും സംരക്ഷണം നല്‍കണമെന്ന് ആവശ്യപ്പെട്ട് സമരപരിപാടികള്‍ക്ക് നേതൃത്വം നല്‍കാനും യോഗം തീരുമാനിച്ചു. യോഗത്തില്‍ പഞ്ചായത്ത് കമ്മിറ്റി പ്രസിഡന്‍റ് വിന്‍സ് മാത്യു വിലങ്ങുപാറ അധ്യക്ഷത വഹിച്ചു. ജനറല്‍ സെക്രട്ടറി സുബ്രഹ്‌മണ്യന്‍ മമ്പാട്ട്, സംസ്ഥാന സമിതി അംഗം ജോസ് വാലുമണ്ണില്‍ എന്നിവര്‍ സംസാരിച്ചു. നിരീക്ഷണം ഊര്‍ജിതമാക്കി വനംവകുപ്പ് താമരശേരി ഫോറസ്റ്റ് റേഞ്ചിനു കീഴിലുള്ള പീടികപ്പാറ സെക്‌ഷന്‍ അധീനതയിലുള്ള പ്രദേശമാണ് തേനരുവി. ഇവിടെ ആര്‍ആര്‍ടിയുടെ നേതൃത്വത്തില്‍ നിരീക്ഷണം ഊര്‍ജിതപ്പെടുത്തിയതായി സെക്‌ഷന്‍ ഓഫീസര്‍ പി. സുബീര്‍ അറിയിച്ചു. ആനക്കുട്ടത്തെ ഒട്ടേറെത്തവണ വിരട്ടിയോടിച്ചെങ്കിലും വീണ്ടും എത്തുകയാണ്. ജില്ലാ അതിര്‍ത്തിയില്‍ സൗരോര്‍ജ വേലി സ്ഥാപിക്കുക മാത്രമേ രക്ഷയുള്ളുവെന്നാണ് സെക്‌ഷന്‍ ഓഫീസറുടെ അഭിപ്രായം. എടവണ്ണ റേഞ്ചിനു കീഴിലുള്ള കൊടുമ്പുഴ സ്റ്റേഷന്‍ ജില്ലാ അതിര്‍ത്തിയില്‍ നിന്ന് മൂന്നു കിലോമീറ്റര്‍ ദൈര്‍ഘ്യത്തില്‍ സൗരോര്‍ജവേലി സ്ഥാപിക്കുന്ന പ്രവൃത്തി തുടങ്ങിയതായി ഡെപ്യൂട്ടി റേഞ്ചര്‍ എ. നാരായണന്‍ അറിയിച്ചു.

പെരുമാൾപുരത്തും തിക്കോടിയിലും ലോറി റോഡിലെ കുഴിയില്‍ കുടുങ്ങി

പയ്യോളി: മഴ കനത്തതോടെ റോഡിൽ രൂപപ്പെട്ട കുഴികൾ കാരണം തിങ്കളാഴ്ച കാലത്തും പയ്യോളി മേഖലയിൽ കനത്ത ഗതാഗതക്കുരുക്ക്. പെരുമാൾ പുരത്തെ വെള്ളക്കെട്ടിൽ ഭാരം കയറ്റിയ ലോറി കുഴിയിൽ വീണ് കയറാൻ ആകാതെ വന്നത് മണിക്കൂറുകൾ നീണ്ട ഗതാഗതക്കുരുക്കിനാണ് ഇടയാക്കിയത്. കോട്ടയത്തേക്ക് മരവുമായി പോവുകയായിരുന്ന ലോറിയാണ് അപകടാവസ്ഥയിൽ ആയത്. പോലീസ് ഇടപെട്ട് പിന്നീട് നിർമാണ കമ്പനിയുടെ ഹൈഡ്രോളിക് ക്രെയിൻ സ്ഥലത്തെത്തിച്ചാണ് ലോറി ഉയർത്തി ഗതാഗതം പുനസ്ഥാപിച്ചത്. ആറുവരി പാതയുടെ നിർമാണം കഴിഞ്ഞ തിക്കോടി പാലൂരിൽ സമാനമായ മറ്റൊരു ലോറി ചെരിഞ്ഞ് അപകടാവസ്ഥയിൽ ആയത് ഗതാഗത തടസ്സത്തിനിടയാക്കി. കണ്ണൂരിൽ നിന്ന് പെരുമ്പാവൂരിലെ പ്ലൈവുഡ് ഫാക്ടറിലേക്ക് മരവുമായി പോവുകയായിരുന്നു ലോറിയാണ് അപകടാവസ്ഥയിൽ ആയത്. ഇതേ തുടർന്ന് തിക്കോടി മേഖലയിൽ ദേശീയപാത ഇരുവശത്തേക്കുള്ള ഗതാഗതം സർവീസ് റോഡ് വഴി തിരിച്ചുവിട്ടത് കൂടുതൽ ഗതാഗതക്കുരുക്കിന് കാരണമായി. തിങ്കളാഴ്ച രാവിലെ പതിവ് തിരക്ക് കൂടി ആയതോടെ ബസുകൾ ഉൾപ്പെടെയുള്ള വാഹനങ്ങൾ പല വഴിയിലൂടെ തിരിച്ചു വിടേണ്ടി വന്നു. കഴിഞ്ഞദിവസം ജില്ലാ കളക്ടര്‍ ഇടപെട്ട് റോഡിന്‍റെ പ്രശ്നങ്ങൾ പരിഹരിക്കാൻ ദേശീയപാത അതോറിറ്റിയോടും നിർമാണ കമ്പനിയോടും ആവശ്യപ്പെട്ടിരുന്നെങ്കിലും കുഴിയുള്ള ഇടങ്ങളിൽ മെറ്റൽ പാകി അധികൃതരുടെ കണ്ണിൽ പൊടി ഇടുകയാണ് കരാർ കമ്പനി ചെയ്തത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]