ആലപ്പുഴ: വള്ളംകളിയുടെ ആവേശവും കുരുന്നു ഭാവനയും ഒന്നായപ്പോള്‍ കാന്‍വാസില്‍ വിടര്‍ന്നത് വര്‍ണവിസ്മയങ്ങള്‍. ഓഗസ്റ്റ് 10-ന് പുന്നമടക്കായലില്‍ നടക്കുന്ന 70-ാമത് നെഹ്റു ട്രോഫി വള്ളംകളിയുടെ ഭാഗമായി സ്‌കൂള്‍ വിദ്യാര്‍ഥികള്‍ക്കായി സംഘടിപ്പിച്ച കളറിംഗ്, പെയിന്‍റിംഗ് മത്സരമായ നിറച്ചാര്‍ത്തിലാണ് കുട്ടികള്‍ വള്ളംകളിയുടെ ആവേശം കാന്‍വാസില്‍ നിറച്ചത്.
എസ്ഡിവി സെന്‍റിനറി ഹാളില്‍ സംഘടിപ്പിച്ച മത്സരം ആലപ്പുഴ നഗരസഭാ അധ്യക്ഷ കെ.കെ. ജയമ്മയും ജില്ലാ കളക്ടര്‍ അലക്സ് വര്‍ഗീസും ചേര്‍ന്ന് കാന്‍വാസില്‍ ചിത്രം വരച്ച് ഉദ്ഘാടനം ചെയ്തു. നാനൂറോളം കുട്ടികളാണ് മത്സരത്തില്‍ പങ്കെടുത്തത്. കായലിന്‍റെയും കരയുടെയും രേഖാചിത്രത്തിന് നിറംനല്‍കലായിരുന്നു എല്‍.പി. സ്‌കൂള്‍ വിദ്യാര്‍ഥികളുടെ മത്സര വിഷയം. കുട്ടനാടന്‍ മഴക്കാഴ്ചയും വള്ളംകളിയുടെ ആവേശവും യഥാക്രമം യു.പി, ഹൈസ്‌കൂള്‍ വിഭാഗം വിദ്യാര്‍ഥികളുടെ മത്സരത്തിന് വിഷയമായി.
ചടങ്ങില്‍ നഗരസഭാ കൗണ്‍സിലറും പബ്ലിസിറ്റി കമ്മിറ്റി അംഗവുമായ സിമി ഷാഫി ഖാന്‍, പബ്ലിസിറ്റി കമ്മിറ്റി കണ്‍വീനറായ ജില്ലാ ഇന്‍ഫര്‍മേഷന്‍ ഓഫീസര്‍ കെ.എസ്. സുമേഷ്, അംഗങ്ങളായ കെ. നാസര്‍, സുഭാഷ് ബാബു, പി.കെ. ബൈജു, ജലാല്‍ അമ്പനക്കുളങ്ങര, രമേശന്‍ ചെമ്മാപറമ്പില്‍, അബ്ദുള്‍ സലാം ലബ്ബ, റോയ് പാലത്ര, അസിസ്റ്റന്‍റ് ഇന്‍ഫര്‍മേഷന്‍ ഓഫീസര്‍ സൗമ്യ ചന്ദ്രന്‍ തുടങ്ങിയവര്‍ പങ്കെടുത്തു.
നിറച്ചാര്‍ത്ത് മത്സര വിജയികള്‍
ആലപ്പുഴ: 70-ാമത് നെഹ്റു ട്രോഫി ജലോത്സവത്തിന്‍റെ ഭാഗമായി സ്‌കൂള്‍ വിദ്യാര്‍ഥികള്‍ക്കായി നിറച്ചാര്‍ത്ത്- കളറിംഗ്, പെയിന്‍റിംഗ് മത്സരങ്ങള്‍ സംഘടിപ്പിച്ചു. എല്‍പി, യുപി, എച്ച്എസ് വിഭാഗത്തിലായിരുന്നു മത്സരങ്ങള്‍.
എല്‍പി വിഭാഗത്തില്‍ ജ്യോതി നികേതന്‍ സ്‌കൂളിലെ എയ്ബല്‍ ജോണ്‍ ഒന്നാം സ്ഥാനവും മാതാ സീനിയര്‍ സെക്കന്‍ഡറി സ്‌കൂളിലെ ഗ്രേറ്റ ജെ. ജോര്‍ജ് രണ്ടാം സ്ഥാനവും ലറ്റര്‍ലാന്‍റ് സ്‌കൂളിലെ പത്മശ്രീ ശിവകുമാര്‍ മൂന്നാം സ്ഥാനവും കരസ്ഥമാക്കി.
യു.പി. വിഭാഗത്തില്‍ മണ്ണാറശാല യു.പി. സ്‌കൂളിലെ അബിന്‍ സുരേഷ് ഒന്നാം സ്ഥാനവും എസ്ഡിവി ബോയ്സ് എച്ച്എസിലെ ഹരിനന്ദന്‍ രണ്ടാം സ്ഥാനവും ശ്രീശങ്കര ഇംഗ്ലീഷ് മീഡിയം സ്‌കൂളിലെ അവന്തിക പി. നായര്‍ മൂന്നാം സ്ഥാനവും നേടി.
ഹൈസ്‌കൂള്‍ വിഭാഗത്തില്‍ കാര്‍മല്‍ അക്കാദമി എച്ച്എസ്എസിലെ അയാന ഫാത്തിമ ഒന്നാം സ്ഥാനവും എസ്ഡിവി ബോയ്സ് എച്ച്എസിലെ എസ്. നവനീത് രണ്ടാം സ്ഥാനവും സെന്‍റ് ജോസഫ്‌സ് ജിഎച്ച്എസ്എസിലെ സുമയ്യ നൗഷാദ് മൂന്നാം സ്ഥാനവും കരസ്ഥമാക്കി.
ചിത്രകാരന്‍മാരായ സതീഷ് വാഴവേലില്‍, സിറില്‍ ഡോമിനിക്, വിമല്‍ റോയ് എന്നിവരായിരുന്നു വിധികര്‍ത്താക്കള്‍.