ബംഗളൂരു: കേരളം സമാജം ബംഗളൂരു സൗത്ത് വെസ്റ്റ് ഓണാഘോഷം വളരെ വിപുലമായ രീതിയിൽ 24ന് രാവിലെ 10 മുതൽ കെങ്കേരി ദുബാസിപ്പാളായ ഡിഎസ്എ ഭവനിൽ വച്ചു നടത്തി. സിനിമാ സംവിധായകൻ ലാൽ ജോസ് ഓണാഘോഷം ഉത്ഘാടനം ചെയ്തു.
തുടർന്ന് സമാജം അംഗങ്ങളുടെ വിവിധയിനം കലാപരുപാടികളായ മോഹിനിയാട്ടം, ഭാരതനാട്ട്യം, തിരുവാതിരകളി, കേരള ദർശനം, മാർഗംകളി, ഒപ്പന, സിനിമാറ്റിക് ഡാൻസ്, രതീഷ് വരവൂർ അവതരിപ്പിച്ച മോണോആക്ട്, പ്രശസ്ത മലയാളം കവിതകളുടെ ദൃശ്യാവിഷ്കാരം, ചെണ്ടമേളംഎന്നിവയും അരങ്ങേറി.
വിഭവസമൃദ്ധമായ സദ്യയും ഉണ്ടായിരുന്നു. വൈകുന്നേരം അഞ്ച് മുതൽ സിനിമ പിന്നണി ഗായകർ നേതൃത്വം നൽകിയ മെഗാ ഗാനമേള, വിനോദ് പൊന്നാനി, ഷിനു കൊടുവള്ളി എന്നിവർ അവതരിപ്പിച്ച കോമഡി ഷോ, നിയാസ് കണ്ണൂരിന്റെ വ്യത്യസ്തമായ ഡാൻസ് പെർഫോമൻസ് എന്നിവയും ഉണ്ടായിരുന്നു.
ലാൽ ജോസ് സമാജം നടത്തിയ വിവിധയിനം മത്സരങ്ങളിൽ വിജയികളായവർക്ക് പാരിതോഷികങ്ങൾ വിതരണം ചെയ്തു. എസ്എസ്എൽസി/പിയുസി എന്നി പരീക്ഷകളിൽ ഉന്നതവിജയം കരസ്ഥമാക്കിയ വിദ്യാർഥികൾക്കുള്ള വരപ്രത് ബാലകൃഷ്ണൻ നമ്പ്യാർ മെമ്മോറിയൽ ക്യാഷ് പ്രൈസ്, സർട്ടിഫിക്കറ്റ് എന്നിവയും നൽകി.
അഡ്വ. പ്രമോദ് വരപ്രത് അധ്യക്ഷൻ ആയിരുന്നു. സാമൂഹിക, സാംസ്കാരിക പ്രവർത്തകരായ അനുപമ പഞ്ചാക്ഷരി, സതീഷ് തോട്ടശേരി എന്നിവർ സംസാരിച്ചു. സെക്രട്ടറി പ്രദീപ് സ്വാഗതവും ട്രഷറർ ശിവദാസ് നന്ദിയും രേഖപ്പെടുത്തി.