ഓസ്ട്രേലിയയ്ക്ക് മലയാളി മന്ത്രി; കായികമന്ത്രിയായി ജിന്സണ് ചാള്സ്
Tuesday, September 10, 2024 9:53 AM IST
പാലാ: ഓസ്‌ട്രേലിയയില്‍ മന്ത്രിയായി ആന്‍റോ ആന്‍റണി എംപിയുടെ സഹോദരപുത്രന്‍ ജിന്സണ് ചാള്സ്. ഓസ്‌ടേലിയയില്‍ മന്ത്രിയാകുന്ന ആദ്യ ഇന്ത്യക്കാരനെന്ന ബഹുമതിയാണ് ജിന്സണ് ചാള്സ് സ്വന്തമാക്കിയത്‌. നോര്‍ത്തേണ്‍ ടെറിട്ടറി റീജണല്‍ അസംബ്ലിയിലാണ് ഇദ്ദേഹം മന്ത്രിയായത്.
മൂന്നിലവ് സ്വദേശി ജിന്സണ് ചാള്സ് പുന്നത്താനായില്‍ ചാള്സ് ആന്‍റണിയുടെയും ഡെയ്‌സി ചാള്‍സിന്‍റെയും പുത്രനാണ്. സ്‌പോര്‍ട്‌സ് സാസ്‌കാരിക വകുപ്പിന്‍റെ ചുമതല ജിന്സണ് ലഭിക്കും. ഓസ്‌ട്രേലിയയിലെ സാന്‍ഡേഴ്‌സണ്‍ മണ്ഡലത്തില്‍നിന്നുമാണ് ജിന്സണ് വിജയിച്ചത്.
എട്ട് വര്‍ഷമായി ലേബര്‍ പാര്‍ട്ടി പ്രതിനിധിയും മന്ത്രിസഭയിലെ മുന്‍ ആഭ്യന്തരമന്ത്രിയും നിലവില്‍ മന്ത്രിസഭാ അംഗവുമായ കെയ്റ്റ് വെര്‍ഡര്‍ പ്രതിനിധീകരിക്കുന്ന മണ്ഡലമാണ് ലിബറല്‍ പാര്‍ട്ടി പ്രതിനിധിയായി മത്സരിച്ച് ജിന്സണ് തിരിച്ചുപിടിച്ചത്.
നഴ്‌സിംഗ് മേഖലയില്‍ ജോലി നേടി 2011ല്‍ ഓസ്‌ട്രേലിയയിലെത്തിയ ജിന്സണ് നിലവില്‍ നോര്‍ത്തേണ്‍ ടെറിട്ടറി സര്‍ക്കാരിന്‍റെ ടോപ് എന്‍ഡ് മെന്‍റൽ ഹെല്‍ത്ത് ഡയറക്ടറും ചാള്സ് ഡാര്‍വിന്‍ യൂണിവേഴ്‌സിറ്റിയിലെ ലക്ചററുമാണ്.