കെഎസ്എസ്പിഎ കുടുംബസംഗമവും നവാഗതർക്ക് വരവേൽപ്പും

മലമ്പുഴ: കേരള സ്റ്റേറ്റ് സർവീസ് പെൻഷണേഴ്സ് അസോസിയേഷൻ മലമ്പുഴ നിയോജക മണ്ഡലം കമ്മിറ്റിയുടെ നേതൃത്വത്തിൽ കുടുംബസംഗമവും നവാഗതർക്ക് വരവേൽപ്പും സംഘടിപ്പിച്ചു. മലമ്പുഴ പഞ്ചായത്ത് കമ്യൂണിറ്റിഹാളിൽ വി.കെ. ശ്രീകണ്ഠൻ എംപി ഉദ്ഘാടനം ചെയ്തു.

കെഎസ്എസ്പിഎ മലമ്പുഴ നിയോജക മണ്ഡലം പ്രസിഡന്‍റ് എസ്. സൈലാമുദ്ദീൻ അധ്യക്ഷനായി.

സംസ്ഥാന വൈസ് പ്രസിഡന്‍റ് സി. ബാലൻ നവാഗതരെ ഷാളണിയിച്ച് സ്വീകരിച്ചു. വിവിധ കലാപരിപാടികളും അരങ്ങേറി.

ADVERTISEMENT

കേളി കലാസാഹിത്യവേദി അവാർഡ് സമ്മാനിച്ചു

മണ്ണാർക്കാട്: മണ്ണാർക്കാട്ടെ സാംസ്കാരിക സംഘടനയായ കേളി കലാസാഹിത്യവേദിയുടെ അഞ്ചാമത് കേളി അവാർഡ് മലപ്പുറം ജില്ലയിലെ തുവ്വൂരിൽ പ്രവർത്തിക്കുന്ന വിമല ഹൃദയാശ്രമത്തിന് പ്രഭാഷകൻ വി.കെ. സുരേഷ് ബാബു വിതരണം ചെയ്തു. 25000 രൂപയും വെങ്കല ശില്പവുമടങ്ങുന്ന അവാർഡ് വിമലഹൃദയാശ്രമം ഡയറക്ടർ സിസ്റ്റർ ബെൻസിറ്റ ഏറ്റുവാങ്ങി. അവാർഡ് നേടിയ സ്ഥാപനത്തെ പരിചയപ്പെടുത്തി കേളി വൈസ് പ്രസിഡന്‍റ് പി.എ. ഹസ്സൻ മുഹമ്മദ് പ്രസംഗിച്ചു. കേളിയുടെ ഒമ്പതാം വാർഷികാഘോഷത്തോട നുബന്ധിച്ചാണ് ചടങ്ങ് സംഘടിപ്പിച്ചത്. കേളിയുടെ പ്രസിഡന്‍റ് എം. ചന്ദ്രദാസൻ അധ്യക്ഷത വഹിച്ചു. സിസ്റ്റർ കിരൺ എംഎസ്ജെ മറുപടിപ്രസംഗം നടത്തി. മുൻ ഡെപ്യൂട്ടി സ്പീക്കർ ജോസ് ബേബി, മണ്ണാർക്കാട് റൂറൽ ബാങ്ക് പ്രസിഡന്‍റ് പി.എൻ. മോഹനൻ, കേളി രക്ഷാധികാരികളായ ടി.ആർ. സെബാസ്റ്റ്യൻ, രംഗനാഥൻ, എം. പുരുഷോത്തമൻ, ടി. ശിവപ്രകാശ്, പി. അച്ചുതനുണ്ണി, എം.ജി. സിജു എന്നിവർ പ്രസംഗിച്ചു.

പട്ടഞ്ചേരിയിൽ പൂട്ടിയിട്ട കടയിൽ അഗ്നിബാധ: ലക്ഷങ്ങളുടെ നഷ്ടം

വണ്ടിത്താവളം: പട്ടഞ്ചേരിയിൽ പൂട്ടിയ വ്യാപാരത്തിലുണ്ടായ അഗ്നിബാധയിൽ ലക്ഷങ്ങളുടെ നഷ്ടം. കരിപ്പാലി മോഹനന്‍റെ മകൻ കിഷോറിന്‍റേതാണ് പലചരക്ക് വ്യാപാരസ്ഥാപനം. സ്ഥാപനത്തിന്‍റെ ഒന്നാം നിലയിൽ കുടുങ്ങിയ മോഹനന്‍റെ ഭാര്യ രാജലക്ഷ്മിയെ സംഭവമറിഞ്ഞെത്തിയ യുവാക്കൾ അതിസാഹസികമായി രക്ഷപ്പെടുത്തി. ഇന്നലെ പുലർച്ചെ 5.15 നാണ് തീപിടിത്തമുണ്ടായത്. മോഹനനും ഭാര്യ രാജലക്ഷ്മിയും മാത്രമാണ് മുകളിലത്തെ നിലയിൽ താമസിച്ചിരുന്നത്. മോഹനൻ പുലർച്ചെ 4.45 ന് പൊള്ളാച്ചിയിലേക്ക് പലചരക്ക് സാധനങ്ങൾ വാങ്ങാൻ പോയ സമയത്തായിരുന്നു തീപിടിത്തം. എതിർവശത്ത് ചായക്കടയിലുണ്ടായിരുന്ന ഷാജഹാൻ, ശിവാനന്ദൻ അറുമുഖൻ, ദാസൻ, മുജീബ് എന്നിവരാണ് വീടിന്‍റെ സൺഷേഡിൽ കയറി രാജലക്ഷ്മിയെ കയറിൽ ബന്ധിച്ചു പുറത്തെത്തിച്ചത്.വ്യാപാരസ്ഥാ പനത്തിലുണ്ടായിരുന്നു ലക്ഷക്കണക്കിനു വിലമതിക്കുന്ന ഉരുപ്പടികൾ സർവതും കത്തിയമർന്നു. വിവരം ലഭിച്ചതിനെ തുടർന്നു ചിറ്റൂർ അഗ്നിരക്ഷാസേന=യെത്തി പ്രയത്നിച്ചതിനാൽ തീപടരുന്നത് ഒഴിവായി. ഓഫീസർമാരായ പി. സതീഷ്കുമാർ, വി. കൃഷ്ണദാസ്, എം. സന്തോഷ്, ലിജു, രാജേഷ് എന്നിവരാണ് ഒരുമണിക്കൂറോളം പണിപ്പെട്ട് തീയണച്ചത്.

വക്കാലയിൽ "കാഴ്ച' വാട്സ്ആപ് കൂട്ടായ്മ നിർമിച്ച സ്നേഹവീട് കൈമാറി

വടക്കഞ്ചേരി: കിഴക്കഞ്ചേരി വക്കാലയിൽ നിരാശ്രയരായ കുടുംബത്തിനായി കാഴ്ച വാട്സാപ്പ് കൂട്ടായ്മ നിർമിച്ച സ്നേഹഭവനം കൈമാറി. ഇന്നലെ വൈകുന്നേരം വീട്ടുമുറ്റത്ത് നടന്ന ചടങ്ങിൽ നിർമാണ പ്രവൃത്തികൾക്ക് നേതൃത്വം നൽകിയ കെ. കൃഷ്ണൻകുട്ടി, കെ.ജെ. പൗലോസ്, ബൈജു കുഴിക്കാട്ടിൽ എന്നിവർ ചേർന്നാണ് കുടുംബത്തിന് താക്കോൽ കൈമാറിയത്. വിനോദ് ചടങ്ങിനെത്തിയ നാട്ടുകാരെ സ്വാഗതം ചെയ്തു. സഹായിച്ചവർക്കെല്ലാം വാട്സാപ്പ് കൂട്ടായ്മയിലെ രമേഷ് നന്ദി പറഞ്ഞു. ഓമന ശിവരാമൻ ഇവരുടെ പതിമൂന്നും പതിനഞ്ചും വയസുള്ള പെൺമക്കളായ അപർണക്കും അനുപമക്കുമാണ് വീട് കൈമാറിയത്. വന്നവർക്കെല്ലാം ചെറിയ ചായ സൽക്കാരവുമുണ്ടായിരുന്നു. ഏതാനും മാസം മുമ്പാണ് ഇവരുടെ അച്ഛൻ ശിവരാമൻ പനി ബാധിച്ച് മരിച്ചത്. റബർ ടാപ്പിംഗ് തൊഴിലാളിയായിരുന്ന അച്ഛന്‍റെ മരണത്തോടെ കുടുംബത്തിന്‍റെ വരുമാനം നിലച്ച് നിത്യ ചെലവുകൾക്കു വഴിയില്ലാതായി. ഇതേ തുടർന്നാണ് കാഴ്ച വാട്സാപ്പ് കൂട്ടായ്മ ഇടപ്പെട്ട് വീട് നിർമാണത്തിന് മുന്നോട്ടുവന്നത്. ടാർപോളിൻ കൊണ്ടുമൂടിയ കുടിലിലാണ് ഏറെ വർഷങ്ങളായി കുടുംബം കഴിഞ്ഞിരുന്നത്.

ഗോമതി- കരിമ്പാറ റോഡിൽ അറ്റകുറ്റപ്പണി തുടങ്ങി

നെന്മാറ: മംഗലം- ഗോവിന്ദാപുരം സംസ്ഥാനപാതയിൽനിന്നും കരിമ്പാറവരെ നീളുന്ന ഗോമതി- കരിമ്പാറ പൊതുമരാമത്ത് റോഡിൽ അറ്റകുറ്റപ്പണികൾ ആരംഭിച്ചു. പൊതുമരാമത്ത് വകുപ്പ്, പഞ്ചായത്തിൽ നിന്നും റോഡ് ഏറ്റെടുത്തതിനു ശേഷം ആറു വർഷത്തിനു ശേഷമാണ് അറ്റകുറ്റപ്പണികൾ നടത്തുന്നത്. പൂർണമായും റോഡ് ഉപരിതലം പുതുക്കണമെന്ന് പ്രദേശവാസികളുടെ ആവശ്യം നിലനിൽക്കവേയാണ് താത്കാലികമായി അറ്റകുറ്റപ്പണി മാത്രം നടത്തുന്നത്. പോത്തുണ്ടി കുടിവെള്ള പദ്ധതിയുടെ ഭാഗമായി ഈ റോഡിൽ ബഹുഭൂരിപക്ഷം പ്രദേശങ്ങളിലും വിതരണ കുഴലുകളും സംഭരണിയിലേക്കുള്ള കുഴലുകളും സ്ഥാപിച്ചതോടെ ബഹുഭൂരിപക്ഷം പ്രദേശങ്ങളിലും റോഡ് തകർന്നു കിടക്കുകയായിരുന്നു. രണ്ടുവർഷം മുമ്പ് പൈപ്പുകൾ സ്ഥാപിച്ച ചില പ്രദേശങ്ങൾ മാത്രം ഭാഗികമായി അറ്റകുറ്റപ്പണി നടത്തിയെങ്കിലും പൂർണമായ തോതിൽ ഗതാഗതയോഗ്യമാക്കിയിരുന്നില്ല. പഞ്ചായത്തിൽ നിന്നും പൊതുമരാമത്തിന് കൈമാറിയതോടെ പതിനൊന്നര കിലോമീറ്റർ ദൈർഘ്യമുള്ള ഈ റോഡിന്റെ ശോചനീയാവസ്ഥ പരിഹരിക്കപ്പെടുമെന്ന് പ്രതീക്ഷയിലായിരുന്നു പ്രദേശവാസികൾ. എന്നാൽ വർഷങ്ങൾ കഴിഞ്ഞും അറ്റകുറ്റപ്പണി നടത്താത്തതിനാൽ ഈ റോഡ് തന്നെ ഉപേക്ഷിച്ച നിലയിലായിരുന്നു.

ജില്ലാ ബാസ്കറ്റ്ബോൾ ചാമ്പ്യൻഷിപ്പിൽ പാലക്കാട് രൂപത വൈദികരുടെ ടീമും

ഡോ. മാത്യു കല്ലടിക്കോട് പാലക്കാട്: ജില്ലാ സീനിയർ ബാസ്കറ്റ് ബോൾ ചാമ്പ്യൻഷിപ്പിൽ മത്സരിക്കാൻ പാലക്കാട് രൂപതയിലെ വൈദികരുടെ ടീമും. വോളിബോൾ അസോസിയേഷന്‍റെ നേതൃത്വത്തിലായിരുന്നു മത്സരം. പിഎഫ്ബിഎ പേരിലാണ് വൈദികരുടെ ടീം മത്സരത്തിനിറങ്ങിയത്. 11 വർഷം സെമിനാരി പരിശീലനത്തിൽ ആരോഗ്യ സംരക്ഷണത്തിനുവേണ്ടി ബാസ്കറ്റ്ബോൾ ഗെയിം പരിശീലിക്കുകയും കളിക്കുകയും ചെയ്തിരുന്ന വൈദികരാണിവർ. ജില്ലാ സീനിയർ ബാസ്കറ്റ്ബോൾ ചാമ്പ്യൻഷിപ്പിൽ പത്തോളം വരുന്ന വൈദികരുടെ ടീമും മികച്ച പ്രകടനം കാഴ്ചവച്ചു. മൂന്ന് പുളുകളായി നടന്ന ബാസ്കറ്റ് ബോൾ ചാമ്പ്യൻഷിപ്പിൽ പാലക്കാട് രൂപത വൈദികർ മൂന്നാം പുളിൽ ഒന്നാംസ്ഥാനം കരസ്ഥമാക്കി ക്വാർട്ടർ ഫൈനലിലേക്കു പ്രവേശിക്കുകയും തുടർന്ന് ക്വാർട്ടർ ഫൈനലിൽ വിജയിച്ച് സെമിഫൈനിലേക്ക് പ്രവേശിക്കുകയും ചെയ്തു.

തിരുവിഴാംകുന്ന് കച്ചേരിപ്പറമ്പിൽ കാട്ടാന ചരിഞ്ഞ നിലയിൽ

മണ്ണാർക്കാട്: തിരുവിഴാംകുന്ന് ഫോറസ്റ്റ് സ്റ്റേഷനുസമീപം കച്ചേരിപറമ്പ് നെല്ലിക്കുന്ന് ഇല്ലത്തുപാടത്ത് ജനവാസ മേഖലയിൽ കാട്ടാനയെ ചരിഞ്ഞ നിലയിൽ കണ്ടെത്തി. ഇന്നലെരാവിലെ അഞ്ചുമണിയോടെ നാട്ടുകാരാണ് പാടത്ത് കാട്ടാനയെ ചരിഞ്ഞ കണ്ടെത്തിയത്. വനപാലകർ സ്ഥലത്തെത്തി പരിശോധന നടത്തി. പോസ്റ്റുമോർട്ടത്തിനുശേഷമേ മരണകാരണം വ്യക്തമാവുകയുള്ളൂവെന്ന് അധികൃതർ അറിയിച്ചു. ഈ മേഖലയിൽ കാട്ടാനകളുടെ ശല്യം രൂക്ഷമാണ്.

കാട്ടാനകൾ നാട്ടിലിറങ്ങുന്നത് തടഞ്ഞില്ലെങ്കിൽ സമരമെന്നു കർഷക കോൺഗ്രസ്

മണ്ണാർക്കാട്: ജനവാസകേന്ദ്രത്തിലെ കൃഷിയിടത്തിൽ ആന ചരിഞ്ഞ സംഭവം അങ്ങേയറ്റം ഭീതിപ്പെടുത്തുന്നതും അപലപനീയവുമാണെന്ന് സ്ഥലം സന്ദർശിച്ച കർഷക കോൺഗ്രസ് നേതാക്കൾ പറഞ്ഞു. വന്യമൃഗശല്യം പ്രദേശവാസികൾക്കും കർഷകർക്കും വലിയ പ്രയാസം സൃഷ്ടിക്കുന്നുണ്ടെന്നും ഇതിന് നിയന്ത്രണം കൊണ്ടുവരാൻ കഴിയാത്തത് സർക്കാരിന്‍റെയും വനംവകുപ്പിന്‍റെയും പൂർണ പരാജയമാണെന്നും നേതാക്കൾ കുറ്റപ്പെടുത്തി. കാട്ടാനകൾ നാട്ടിലിറങ്ങുന്നത് തടയാനായില്ലെങ്കിൽ ശക്തമായ സമരപരിപാടികൾ ആരംഭിക്കുമെന്നും നേതാക്കൾ മുന്നറിയിപ്പുനൽകി. നിയോജകമണ്ഡലം പ്രസിഡന്‍റ് കെ.ജി. ബാബു, ടി.കെ. ഇപ്പു, മണികണ്ഠൻ വടശ്ശേരി, നൗഫൽ താളിയിൽ, പി. ഉസ്മാൻ, ഫൈസൽ താളിയിൽ എന്നിവരടങ്ങുന്ന സംഘമാണ് സംഭവസ്ഥലം സന്ദർശിച്ചത്.

ഉന്നതവിജയികളെ ക്ഷേമനിധി ബോർഡ് ആദരിച്ചു

പാലക്കാട്: കേരള കോ- ഓപറേറ്റീവ് എംപ്ലോയീസ് വെൽഫെയർ ബോര്‍ഡിലെ അംഗങ്ങളുടെ മക്കളില്‍ ജില്ലയിൽനിന്ന് ഉന്നതവിജയം നേടിയവര്‍ക്കുള്ള കാഷ് അവാര്‍ഡ് വിതരണം കണ്ണാടി സർവീസ് സഹകരണ ബാങ്ക് ഓഡിറ്റോറിയത്തിൽ മന്ത്രി കെ. കൃഷ്ണൻകുട്ടി നിർവഹിച്ചു. വിദ്യാഭ്യാസ സ്കോളർഷിപ്പ് വിതരണത്തിന്‍റെ ഉദ്ഘാടനവും കുടിശ്ശിക വിഹിതം ഒഴിവാക്കി കൊണ്ടുള്ള അംഗത്വ വിതരണത്തിന്‍റെ ജില്ലാതല ഉദ്ഘാടനവും കോങ്ങാട് എംഎൽഎ കെ. ശാന്തകുമാരി നിർവഹിച്ചു. ബോർഡ് വൈസ് ചെയർമാൻ അഡ്വ. ആർ. സനൽകുമാർ അധ്യക്ഷനായി. ബോർഡ് ഭരണ സമിതി അംഗം കെ.എൻ. സുകുമാരൻ മാസ്റ്റർ, പാക്സ് അസോസിയേഷൻ ജില്ലാ പ്രസിഡന്‍റ് എൻ.പി. വിനയകുമാർ, കണ്ണാടി സർവ്വീസ് സഹകരണ ബാങ്ക് പ്രസിഡന്‍റ് കെ.വി. സുരേന്ദ്രൻ പ്രസംഗിച്ചു.

ലക്കിടി നെഹ്്റു ലോ അക്കാദമിയിൽ മാരിടൈം അന്താരാഷ്ട്ര കോണ്‍ഫറൻസ് ഇന്നുമുതൽ

പാലക്കാട്: നെഹ്്റു ലോ അക്കാദമിയിൽ ഇന്നുമുതൽ 17 വരെ അന്താരാഷ്ട മാരിടൈം കോണ്‍ഫറൻസ് സംഘടിപ്പിക്കുമെന്ന് പ്രിൻസിപ്പൽ ഡോ. സോണി വിജയൻ പത്രസമ്മേളനത്തിൽ അറിയിച്ചു. ഇന്നുരാവിലെ ലക്കിടി കാന്പസിലെ ശാസ്ത്രഹാളിൽ മുൻനാവിക സേന വൈസ് അഡ്മിറൽ ജി. അശോക് കുമാർ ഉദ്ഘാടനം ചെയ്യും. സമുദ്രത്തിലെ കാലാവസ്ഥ പ്രശ്നങ്ങൾ, സമുദ്രത്തിനടിയിലെ ജീവജാലങ്ങൾ, സമുദ്രങ്ങളുമായി ബന്ധപ്പെട്ടുള്ള മറ്റ് വിഷയങ്ങളും ചർച്ച ചെയ്യും. രാജ്യത്തിനകത്തും പുറത്തുമുള്ള നിയമവിദഗ്ധർ, സാങ്കേതിക വിദഗ്ധർ, ഗവേഷകർ, വിദ്യാർഥികൾ തുടങ്ങിയവർ ഓണ്‍ലൈനായും ഓഫ്ലൈനായും പങ്കെടുക്കും. 17ന് ഉച്ചക്ക് രണ്ടരക്ക് നടക്കുന്ന സമാപന സമ്മേളനത്തിൽ ചെന്നൈ സിമാറ്റ്സ് ഡീംസ് ടു ബി യൂണിവേഴ്സിറ്റി പ്രഫ.ഡോ. ജേക്കബ് ജോസഫ്, പി. കുമാർ, അനൂപ് പത്മൻ പങ്കെടുക്കും. പത്രസമ്മേളനത്തിൽ പ്രിൻസിപ്പൽ കോ- ഓർഡിനേറ്റർ എം. ശ്രീനിവാസ്, പ്രഫ.പി.ഡി. സെബാസ്റ്റ്യൻ, കോണ്‍ഫറൻസ് കണ്‍വീനർ സി. ദിബീഷ് പങ്കെടുത്തു.

കാരുണ്യ സർവകലാശാലയുടെ സൗജന്യ മെഡിക്കൽ ക്യാമ്പ്

കോയന്പത്തൂർ: കാരുണ്യ സർവകലാശാലയുടെ സ്ഥാപകനും ചാൻസലറുമായ ഡോ. പോൾ ദിനകരന്‍റെ 63-ാം ജന്മവാർഷികത്തോടനുബന്ധിച്ച് കോയമ്പത്തൂർ കാരുണ്യ ഹോസ്പിറ്റൽ, നൽഉള്ളം ഫൗണ്ടേഷൻ, കാരുണ്യ യൂണിവേഴ്സിറ്റി ഹെറിറ്റേജ് സ്റ്റുഡന്‍റ് ക്ലബ്, വിദ്യാർഥികൾ തിരുവള്ളുവർ നഗറിലെ ഹല്ലൂവർ നഗറിൽ സൗജന്യ മെഡിക്കൽ ക്യാമ്പ് സംഘടിപ്പിച്ചു. നീലഗിരി, കൂനൂർ പരിസര പ്രദേശങ്ങളിലുള്ളവർ ക്യാമ്പിൽ പങ്കെടുത്തു. നൽഉള്ളം ഫൗണ്ടേഷൻ സ്ഥാപകൻ ഉളിക്കൽ ഷൺമുഖം ക്യാമ്പ് ഉദ്ഘാടനം ചെയ്തു. കാരുണ്യ ആശുപത്രി ഡയറക്ടർ ഡോ. സാമുവൽ തോമസ് ആശംസകൾ നേർന്നു. പ്രഫസർ നവീൻ സുന്ദർ സ്വാഗതം പറഞ്ഞു. ഉളിക്കൽ ടൗൺ പഞ്ചായത്ത് എക്‌സിക്യൂട്ടീവ് ഓഫീസർ സെന്തിൽകുമാർ, ചെയർമാൻ രാധ, മെംബർമാർ, ഡോ. സുന്ദരരാമൻ, കാരുണ്യ ജെപസിംഗ്, ഗ്രാമ നേതാക്കൾ എന്നിവർ പങ്കെടുത്തു. തിരുവള്ളുവർ, ബെംഗം, കമാലിൻ, പന്നവേണു, നെതിമന്ദു എന്നിവിടങ്ങളിൽ നിന്നുള്ള ഗ്രാമീണരും തിരുവള്ളുവർ നഗർ സ്പോർട്സ് ടീമും ക്യാമ്പിൽ പങ്കെടുത്തു.

നെഹ്രു ഗ്രൂപ്പിന്‍റെ ലഹരിവിരുദ്ധ മാരത്തൺ ശ്രദ്ധേയമായി

കോയമ്പത്തൂർ: നെഹ്‌റു വിദ്യാഭ്യാസ ഗ്രൂപ്പിന്‍റെ മയക്കുമരുന്നുരഹിത കോയമ്പത്തൂർ അവബോധ മാരത്തൺ നെഹ്‌റു സ്‌പോർട്‌സ് ഹാളിനുസമീപം നടത്തി. കോയമ്പത്തൂർ സൗത്ത്, ട്രിച്ചി ജോയിന്‍റ് കമ്മീഷണർ കാർത്തികേയൻ ഉദ്ഘാടനം ചെയ്തു. പി.കെ. ദാസ് യൂണിവേഴ്‌സിറ്റി പ്രോ- ചാൻസലറും നെഹ്‌റു വിദ്യാഭ്യാസ ഗ്രൂപ്പ് സിഇഒയും സെക്രട്ടറിയുമായ ഡോ.പി. കൃഷ്ണകുമാർ മുഖ്യപ്രഭാഷണം നടത്തി. കോളജ് വിദ്യാർത്ഥികളും പൊതുജനങ്ങളും ഉൾപ്പെടെ ഏകദേശം 2,300 പേർ അവബോധ മാരത്തണിൽ പങ്കെടുത്തു. നാലു വിഭാഗങ്ങളിലായി മത്സരങ്ങളും നടത്തി. കോയമ്പത്തൂരിലെ നെഹ്‌റു ആർട്‌സ് ആൻഡ് സയൻസ് കോളജ് പ്രിൻസിപ്പൽ ഡോ.വി. വിജയകുമാർ, പ്രോഗ്രാം കോ-ഓർഡിനേറ്റിംഗ് സെക്രട്ടറി അരുൺകുമാർ, കോ-ഓർഡിനേറ്റർമാരായ ഡോ.സി.എ. അസ്ലം മുകൈദീൻ, ഡോ. എസ്. മാരിമുത്തു എന്നിവർ മാരത്തണിനു നേതൃത്വം നൽകി.

പാടശേഖരങ്ങളിൽ മുഞ്ഞബാധ വ്യാപകം; കർഷകർ ആശങ്കയിൽ

നെന്മാറ: വിളഞ്ഞു തുടങ്ങിയ നെൽപ്പാടങ്ങളിൽ മുഞ്ഞയുടെ ആക്രമണം വ്യാപകം. നെന്മാറ, അയിലൂർ പഞ്ചായത്തുകളിലെ അകമ്പാടം, പോത്തുണ്ടി, ചെട്ടികുളമ്പ്, മരുതഞ്ചേരി മേഖലകളിലെ പാടശേഖരങ്ങളിലാണ് വ്യാപകമായി മുഞ്ഞയുടെ ആക്രമണം കണ്ടത്. ഏതാനും മീറ്റർ വലിപ്പത്തിൽ നെൽപ്പാടങ്ങളിൽ ഉണങ്ങിയ രീതിയിൽ നെൽച്ചെടികൾ കണ്ടതിനെ തുടർന്ന് കർഷകർ പരിശോധിച്ചപ്പോഴാണ് മുഞ്ഞബാധ സ്ഥിരീകരിച്ചത്. മുഞ്ഞബാധ കണ്ടയുടൻ നെൽപ്പാടങ്ങളിലെ വെള്ളം വാർത്തു കളഞ്ഞെങ്കിലും ദിവസങ്ങൾക്കകം കൂടുതൽ നെൽപ്പാടങ്ങളിലേക്ക് വ്യാപിക്കുകയാണ്. നെൽച്ചെടിയുടെ ചുവട്ടിൽ പറ്റിപ്പിടിച്ചിരിക്കുന്ന മുഞ്ഞ കൂട്ടത്തോടെ നെൽ ചെടികളിൽനിന്ന് നീരുറ്റി കുടിക്കുന്നതോടെയാണ് ചെടികൾ ഉണങ്ങി നെൽപ്പാടത്തു തന്നെ ചാഞ്ഞുവീഴുന്നത്. നെല്ല് പൂർണമായും പഴുത്തു തുടങ്ങിയിട്ടില്ലാത്തതിനാൽ കൊയ്തെടുത്താൽ തൂക്കം കുറയും എന്ന ആശങ്കയും കർഷകരിലുണ്ട്. കൃഷിവകുപ്പ് നിർദ്ദേശപ്രകാരം മുഞ്ഞയ്ക്ക് മരുന്നു തളിക്കുന്നതും ഏറെ ബുദ്ധിമുട്ട് അനുഭവപ്പെടുന്നതായി കർഷകർ പറയുന്നു. ദിവസങ്ങൾക്കകം തന്നെ പ്രജനനം നടത്തി പുതിയ കുഞ്ഞുങ്ങൾ വിരിയുന്നതും നീരൂറ്റി കുടിക്കുന്നതിനാലും ദിവസങ്ങൾക്കകം നെൽച്ചെടികൾ വൈക്കോൽ രൂപത്തിൽ ചാഞ്ഞുവീഴുകുകയാണ്. മരുന്നുതളി ഫലപ്രദമാകാത്ത ചില പാടശേഖരങ്ങളിൽ കർഷകർ നെല്ല് മൂപ്പ് എത്തുന്നതിന് മുമ്പ് തന്നെ കൊയ്തെടുക്കാനുള്ള ശ്രമം ആരംഭിച്ചിട്ടുണ്ട്.

പട്ടാന്പിയില്‌ "ശ്രദ്ധ' സൗജന്യ എൻട്രൻസ് ഫൗണ്ടേഷൻ കോഴ്സിനു തുടക്കം

പട്ടാന്പി: മുഹമ്മദ് മുഹസിൻ എംഎൽഎയുടെ നേതൃത്വത്തിൽ പട്ടാമ്പി നിയോജകമണ്ഡലത്തിൽ നടപ്പിലാക്കുന്ന ഫ്രീ എൻട്രൻസ് അറ്റ് ശ്രദ്ധ ക്ലാസുകൾക്ക് തുടക്കമായി. പട്ടാമ്പി സംസ്കൃത കോളജ് ഹാളിൽ നടന്ന പരിപാടി മുഹമ്മദ് മുഹസിൻ എംഎൽഎ ഉദ്ഘാടനം ചെയ്തു. ഈ വർഷം എസ്എസ്എൽസി, പ്ലസ് വൺ, പ്ലസ് ടു (സയൻസ്) കോഴ്സുകൾ പഠിക്കുന്ന വിദ്യാർഥികൾക്കായാണ് രണ്ടു മാസം നീണ്ടു നിൽക്കുന്ന പദ്ധതി സംഘടിപ്പിക്കുന്നത്. പരിപാടിയിൽ പട്ടാമ്പി നഗരസഭ ചെയർപേഴ്സൺ ഒ. ലക്ഷ്മിക്കുട്ടി അധ്യക്ഷയായി. ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്‌സൺ ഷാബിറ ടീച്ചർ, പട്ടാമ്പി നഗരസഭ കൗൺസിലർ രാജൻ, വിളയൂർ ഗ്രാമപഞ്ചായത്ത്‌ അംഗം മുജീബ് കരുവാങ്കുഴി, ശ്രദ്ധ കൺവീനർ ഡോ.കെ.പി. ആഷിഫ്, കരിയർ ഡെവലപ്മെന്‍റ് ട്രെയിനർമാർ പങ്കെടുത്തു.

ഒലിപ്പാറ-കോട്ടയം കെഎസ്ആർടിസി സർവീസിനായി മുറവിളി

നെന്മാറ: നെന്മാറ, അയിലൂർ പഞ്ചായത്തിലൂടെ ഒലിപ്പാറ, കയറാടി, നെന്മാറ വഴി കോട്ടയത്തേക്കുള്ള സർവീസ് പുനഃരാരംഭിച്ചില്ല. വിവിധ തലത്തിലുള്ള ജനപ്രതിനിധികളും പൊതുജനങ്ങളും നിരന്തരം ആവശ്യപ്പെട്ടിട്ടും ഒലിപ്പാറ- കയറാടി- കോട്ടയം സർവീസ് മാത്രമാണ് കോവിഡ് കാലത്തിനുശേഷം പുനഃരാരംഭിക്കാത്തത്. മലയോര കുടിയേറ്റ മേഖലയായ ഒലിപ്പാറയിൽനിന്ന് രാവിലെ ആറിന് സർവീസ് ആരംഭിച്ച് രാത്രി 8:30ന് തിരിച്ചെത്തുന്ന രീതിയിലായിരുന്നു സർവീസ്. മേഖലയിലുള്ളവരുടെ വ്യാപാര, ചികിത്സ തുടങ്ങി നാട്ടിലുള്ള ബന്ധുക്കളെ വരെ സന്ദർശിക്കാനും അതിരാവിലെ തൃശൂർ, എറണാകുളം ഭാഗത്തേക്ക് ജോലിക്ക് പോകുന്നവർക്കും തൃശൂർ റെയിൽവേ സ്റ്റേഷനിൽനിന്ന് തിരുവനന്തപുരം ഇന്‍റസിറ്റി ട്രെയിൻ കണക്്ഷനും ഏറെ സഹായകരമായിരുന്നു ഈ സർവീസ്. നെന്മാറ, കയറാടി, ഒലിപ്പാറ റൂട്ടിൽ അൺലിമിറ്റഡ് ഫാസ്റ്റ് പാസഞ്ചറായും ശേഷിക്കുന്ന റൂട്ടിൽ ലിമിറ്റഡ് സ്റ്റോപ്പ് ഫാസ്റ്റ് പാസഞ്ചറായുമാണ് സർവീസ് നടത്തിയിരുന്നത്. കെഎസ്ആർടിസിക്ക് മികച്ച വരുമാനം ലഭിക്കുന്നതുമായ സർവീസാണ് കെഎസ്ആർടിസി പുനഃരാരംഭിക്കാത്തത്. ഈ റൂട്ടിലൂടെ കെഎസ്ആർടിസി സർവീസ് ഒന്നുംതന്നെ ഇല്ലെന്നതാണ് ഏറെ സങ്കടകരം.

സ്മാർട്ട് വില്ലേജ് ഓഫീസുകളുടെ ഉദ്ഘാടനവും നിർമാണോദ്ഘാടനവും 20ന്

പാലക്കാട്: തൃത്താല മണ്ഡലത്തിൽ പരുതൂർ സ്മാർട്ട് വില്ലേജിന്‍റെ ഉദ്ഘാടനവും നാഗലശേരി വില്ലേജ് ഓഫീസിന്‍റെ നിർമാണോദ്ഘാടനവും 20 ന് നടക്കും. പരുതൂർ വില്ലേജ് ഓഫീസ് കെട്ടിട ഉദ്ഘാടനം രാവിലെ 10നും നാഗലശേരി വില്ലേജ് ഓഫീസിന്‍റെ നിർമാണ ഉദ്ഘാടനം രാവിലെ 11 നും റവന്യൂമന്ത്രി കെ. രാജൻ നിർവഹിക്കും. മന്ത്രി എം.ബി. രാജേഷ് അധ്യക്ഷനാകും. പ്ലാൻ ഫണ്ടിൽനിന്ന് 50 ലക്ഷം രൂപ വിനിയോഗിച്ചാണ് പരുതൂർ വില്ലേജ് ഓഫീസിന്‍റെ നിർമാണം പൂർത്തീകരിച്ചത്. ഫ്രണ്ട് ഓഫീസ്, വരാന്ത, വില്ലേജ് ഓഫീസർക്കുള്ള പ്രത്യേക മുറി, ഓഫീസ് സംവിധാനം, റെക്കോർഡ് റൂം, ഡൈനിംഗ് മീറ്റിംഗ് ഹാൾ, ഭിന്നശേഷി സൗഹൃദ ടോയലറ്റ്, പൊതുടോയ്‌ലറ്റ് തുടങ്ങിയ സൗകര്യങ്ങളും കെട്ടിടത്തിലുണ്ട്. സ്കീം ഫോർ സ്പെഷൽ അസിസ്റ്റൻസ് ടു സ്റ്റേറ്റ്സ് ഫോർ കാപ്പിറ്റൽ ഇൻവെസ്റ്റ് ഫണ്ടിൽ നിന്നും 45 ലക്ഷം രൂപ ചെലവിലാണ് നാഗലശേരി വില്ലേജ് ഓഫീസ് കെട്ടിടം നിർമിക്കുന്നത്.നിലവിൽ ബ്ലോക്ക് ഓഫീസിന് സമീപത്താണ് വില്ലേജ് ഓഫീസ് പ്രവർത്തിക്കുന്നത്.

ആനമൂളിയിൽ ഓട്ടോയിൽ കടത്തിയ സ്ഫോടകവസ്തുക്കൾ പിടികൂടി

മണ്ണാർക്കാട്: ഓട്ടോറിക്ഷയിൽ സ്ഫോടക വസ്തുക്കൾ അട്ടപ്പാടിയിലേക്ക് കടത്തുന്നതിനിടെ ഒരാളെ മണ്ണാർക്കാട് പോലീസ് അറസ്റ്റുചെയ്തു. തച്ചമ്പാറ മുണ്ടക്കാട്ടിൽ സന്ദീപ് (37) ആണ് അറസ്റ്റിലായത്. ഇന്നലെ രാവിലെ എട്ടോടെ ആനമൂളി ചെക്ക്പോസ്റ്റിനു സമീപം പോലീസ് നടത്തിയ വാഹന പരിശോധനയിലാണ് നിയമാനുസൃതമല്ലാതെ കടത്തുകയായിരുന്ന സ്ഫോടന വസ്തുക്കൾ പിടികൂടിയത്. എക്സ്പ്ലോസീവ് സ്റ്റിക്സ്, നോൺ ഇലക്ട്രിക് ഡിറ്റോനേറ്റർ, ഇലക്ട്രിക് ഡിറ്റോനേറ്റർ എന്നിവയാണ് പിടികൂടിയതെന്ന് മണ്ണാർക്കാട് പോലീസ് അറിയിച്ചു. മണ്ണാർക്കാട് സബ് ഇൻസ്പെക്ടർ എ.കെ. ശ്രീജിത്ത്, പുതൂർ എസ്ഐ അബ്ദുൽ ലത്തീഫ്, അഗളി ഡാൻസാഫ് ടീം എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.

നൂറ്റിയമ്പതു പേർക്ക് വിദേശജോലി ഉറപ്പാക്കി തൊഴിൽമേള

മണ്ണാർക്കാട്: അഡ്വ. എൻ. ഷംസുദ്ദീൻ എംഎൽഎ നടപ്പാക്കി വരുന്ന ഫ്ലെയിം സമഗ്ര വിദ്യാഭ്യാസ പദ്ധതിയുടെ ഭാഗമായി യുഎഇ ആസ്ഥാനമായി പ്രവർത്തിക്കുന്ന ഗ്രാൻഡ് ഹൈപ്പർ മാർക്കറ്റ് കമ്പനിയുടെ സഹകരണത്തോടെ തൊഴിൽ മേള സംഘടിപ്പിച്ചു. മണ്ണാർക്കാട് എംഇഎസ് കല്ലടി കോളജ് ഓഡിറ്റോറിയത്തിൽ എൻ. ഷംസുദ്ദീൻ എംഎൽഎ ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്‍റ് വി. പ്രീത അധ്യക്ഷയായി. ഗ്രാൻഡ് ഗ്രൂപ്പ് സിഎച്ച്ആർഒ എം.ടി. അനീസ് തൊഴിൽ അവസരങ്ങൾ വിശദീകരിച്ചു. മുനിസിപ്പൽ കൗൺസിലർ എൻ.വി. ഷറഫുന്നിസ, കെ.സി. അബ്ദുറഹ്്മാൻ, ഫ്ലെയിം കോർ ഗ്രൂപ്പ് ചെയർമാൻ ഹമീദ് കൊമ്പത്ത്, ഭാരവാഹികളായ കെ.ജി. ബാബു, സിദ്ദീഖ് പാറോക്കോട്, ജോബ് ഐസക്, പി.സി.എം. ഹബീബ്, ബിജു ജോസ്, മുഹ്സിൻ ചങ്ങലീരി, റിക്രൂട്ട്മെന്‍റ് മാനേജർ ടി.കെ. അർഷദ്, ജയപ്രകാശ് വാഴോത്ത്, സൈനുദ്ദീൻ കൈതച്ചിറ പ്രസംഗിച്ചു. നിയോജക മണ്ഡലത്തിലെ അഭ്യസ്തവിദ്യരായ യുവജനങ്ങൾക്ക് വിദേശ രാജ്യങ്ങളിൽ സൗജന്യ വിസയോടെ തൊഴിൽ അവസരങ്ങൾ ഒരുക്കുകയെന്ന ലക്ഷ്യത്തോടെ നടത്തിയ ജോബ് ഡ്രൈവിൽ നാനൂറിലധികം ഉദ്യോഗാർഥികൾ പങ്കെടുത്തു. യുഎഇ, ഖത്തർ, കുവൈറ്റ്, ഒമാൻ, സൗദി അറേബ്യ തുടങ്ങിയ അഞ്ച് രാജ്യങ്ങളിൽ പ്രവർത്തിക്കുന്ന ഗ്രാൻഡ് ഗ്രൂപ്പിന്‍റെ സ്ഥാപനങ്ങളിലെ വിവിധ തസ്തികകളിലേക്കായി സംഘടിപ്പിച്ച തൊഴിൽ മേളയിൽ നൂറ്റമ്പതോളം പേർക്ക് നിയമനം ഉറപ്പാക്കി.

പാറ മണ്ണൂക്കാട് പാലം നാടിനു സമർപ്പിച്ചു

പാലക്കാട്: പ്രതിസന്ധികളെ അതിജീവിച്ച് കേരള മോഡല്‍ വികസനം മുന്നോട്ടു പോവുകയാണെന്ന് മന്ത്രി പി.എ. മുഹമ്മദ് റിയാസ്. മലമ്പുഴ നിയോജക മണ്ഡലത്തിലെ എലപ്പുള്ളി, പുതുശ്ശേരി ഗ്രാമപഞ്ചായത്തുകളെ ബന്ധിപ്പിച്ച് കോരയാര്‍ പുഴക്ക് കുറുകെ നിര്‍മിച്ചിട്ടുള്ള പാറ മണ്ണൂക്കാട് പാലത്തിന്‍റെ ഉദ്ഘാടനം നിര്‍വഹിക്കുകയായിരുന്നു മന്ത്രി. കിഫ്ബി പദ്ധതിയില്‍ ഉള്‍പ്പെടുത്തി 8.6 കോടി രൂപ ചെലവില്‍ കേരള റോഡ് ഫണ്ട് ബോര്‍ഡാണ് പാറ മണ്ണുകാട് പാലത്തിന്‍റെ നിര്‍മാണം പൂര്‍ത്തീകരിച്ചത്. ഉദ്ഘാടന ചടങ്ങില്‍ എ. പ്രഭാകരന്‍ എംഎല്‍എ അധ്യക്ഷത വഹിച്ചു. മലമ്പുഴ ബ്ലോക്ക് പഞ്ചായത്ത് പ്രസിഡന്‍റ് വി. ബിജോയ്, എലപ്പുള്ളി ഗ്രാമപഞ്ചായത്ത് പ്രസിഡന്‍റ് കെ. രേവതി ബാബു, പുതുശ്ശേരി ഗ്രാമപഞ്ചായത്ത് പ്രസിഡന്‍റ് എൻ. പ്രസീത, ജില്ലാ പഞ്ചായത്ത് അംഗം എം. പദ്മിനി ടീച്ചർ, എലപ്പുള്ളി ഗ്രാമപഞ്ചായത്ത് അംഗങ്ങൾ പങ്കെടുത്തു.

കൊല്ലങ്കോടിന്‍റെ ടൂറിസംസാധ്യതകൾ പ്രയോജനപ്പെടുത്തും: മന്ത്രി

കൊല്ലങ്കോട്: രാജ്യത്തെ ഏറ്റവും മനോഹരമായ പത്ത് ഗ്രാമങ്ങളിലൊന്നായ കൊല്ലങ്കോടിന്‍റെ ടൂറിസം സാധ്യതകൾ പരമാവധി പ്രയോജനപ്പെടുത്തുന്നതിനായി വിനോദസഞ്ചാര വകുപ്പിന്‍റെ നേതൃത്വത്തിൽ പുതിയ പദ്ധതികൾ ആവിഷ്കരിക്കുമെന്നു പൊതുമരാമത്ത്, വിനോദസഞ്ചാരമന്ത്രി പി.എ. മുഹമ്മദ് റിയാസ്. കൊല്ലങ്കോട് ഗായത്രിപ്പുഴക്ക് കുറുകെയുള്ള ഊട്ടറ പാലത്തിന്‍റെ നിർമാണോദ്ഘാടനം നിർവഹിക്കുകയായിരുന്നു അദ്ദേഹം. കൊല്ലങ്കോടേക്കെത്തുന്ന സഞ്ചാരികളുടെ എണ്ണം വർധിക്കുന്നത് ടൂറിസം മേഖലയ്ക്ക് വലിയ ഉണർവ് നൽകുമെന്നും മന്ത്രി പറഞ്ഞു. ഈ വർഷത്തെ ഓണാഘോഷങ്ങൾക്കായി വിദേശ സഞ്ചാരികളെ ആകർഷിക്കാൻ സർക്കാർ നടത്തിയ ശ്രമങ്ങളുടെ ഫലമായി 12 രാജ്യങ്ങളിൽ നിന്ന് സഞ്ചാരികൾ കേരളത്തിലെത്തിയതായും മന്ത്രി അറിയിച്ചു. വൈദ്യുതിമന്ത്രി കെ. കൃഷ്ണന്‍കുട്ടി മുഖ്യാതിഥിയായ പരിപാടിയില്‍ കെ. ബാബു എംഎല്‍എ അധ്യക്ഷത വഹിച്ചു.

പുരസ്കാരനിറവിൽ വടക്കഞ്ചേരിയിലെ മുളങ്കൂട്ടത്തുരുത്തുകൾ

ഫ്രാൻസിസ് തയ്യൂർ വടക്കഞ്ചേരി: നവകേരളം പദ്ധതിയിൽ ഹരിതകേരള മിഷൻ ഏർപ്പെടുത്തിയ ജില്ലയിലെ മികച്ച ഒന്നും രണ്ടും പുരസ്കാരം നേടിയ മുളങ്കൂട്ടത്തുരുത്തുകൾ വടക്കഞ്ചേരി പഞ്ചായത്തിൽ. ടൗണിനടുത്ത് പഴയ ശ്രീരാമ തീയറ്ററിനു സമീപമുള്ള രണ്ടേക്കറിലേറെ വിസ്തൃതി വരുന്ന പുതുകുളത്തിന്‍റെ കരഭാഗത്ത് 40 സെന്‍റ് സ്ഥലത്തെ മുളങ്കൂട്ട തുരുത്തിനാണ് ഒന്നാംസ്ഥാനം. മംഗലം പാലത്തിനടുത്ത് മംഗലം പുഴയോരത്ത് ഒന്നര ഏക്കർ സ്ഥലത്തെ മുളങ്കൂട്ടത്തുരുത്ത് രണ്ടാംസ്ഥാനവും നേടി. കാടുമൂടി ആളുകൾ മാലിന്യങ്ങൾ നിക്ഷേപിച്ചിരുന്ന പ്രദേശങ്ങൾ ഇന്നിപ്പോൾ പല നിറങ്ങളിലുള്ള മുളകളുടെ കൗതുക പ്രദേശങ്ങളായി മാറി. സായാഹ്ന സവാരിക്കും സായാഹ്ന തെന്നലേൽക്കാനുമെല്ലാം പ്രായമായവർ ഉൾപ്പെടെ ഇപ്പോൾ ഈ പ്രദേശങ്ങളിലെത്തുന്നുണ്ട്. സാമൂഹ്യ വിരുദ്ധരുടെയും മദ്യപസംഘങ്ങളുടെയും കടന്നുകയറ്റം ഇല്ലാതാക്കാനുള്ള കർശന നടപടികളോടെയാണ് തുരുത്തുകളുടെ പരിപാലനം നടക്കുന്നത്. 2019 ൽ അന്നത്തെ പഞ്ചായത്ത് പ്രസിഡന്‍റായിരുന്ന അനിത പോൾസനും വാർഡുകളുടെ മുൻ മെംബർമാരുമായിരുന്ന പ്രസാദും വിശ്വനാഥനും ഉൾപ്പെടെയുള്ളവരുടെ നേതൃത്വത്തിലുള്ള ഭരണസമിതിയാണ് മുളങ്കൂട്ടതുരുത്ത് എന്ന ആശയത്തിൽ പുതുകുളത്തും മംഗലം പുഴയോരത്തും പുതു ആശയം നടപ്പിലാക്കിയത്. പുതുകുളത്ത് 140 മഞ്ഞ മുളകൾ നട്ടത് ഇപ്പോൾ അത് 3500 മുളകളായി വളർന്ന് വലിയമുളങ്കാടായി മാറി. കുളവും വശങ്ങൾ കെട്ടി സംരക്ഷിച്ചതോടെ സമീപവാസികൾക്കും അനുഗ്രഹമായി. മംഗലം പാലത്തിനടുത്ത് മുളങ്കൂട്ടതുരുത്തിൽ 200 തൈ നട്ടത് ഇപ്പോൾ മൂവായിരത്തിലധികമായതായി. തുരുത്തുകളുടെ പരിപാലകനായ ഹരിത കേരള മിഷൻ കിഴക്കഞ്ചേരി ഡിവിഷൻ റിസോഴ്സ് പേഴ്സനും ജൈവവൈവിധ്യ പരിപാലന സമിതി കൺവീനറുമായ കെ.എം. രാജു പറഞ്ഞു. ജില്ലാ പഞ്ചായത്ത് ഹരിതകേരള മിഷനും വടക്കഞ്ചേരി പഞ്ചായത്തും തൊഴിലുറപ്പ് പദ്ധതി എന്നിവയുടെ സംയുക്ത പരിശ്രമമാണ് പുരസ്കാര നിറവിനു പിന്നിൽ. ഹരിത കേരള മിഷൻ സംസ്ഥാന റിസോഴ്സ് പേഴ്സനും വടക്കഞ്ചേരി സ്വദേശിയുമായ ഡോ. പ്രഫ. കെ. വാസുദേവൻ പിള്ള, ജില്ലാ കോഡിനേറ്റർ വൈ. കല്യാണ കൃഷ്ണൻ, ജില്ലാ പഞ്ചായത്ത് മുൻ പ്രസിഡന്‍റും എംഎൽഎയുമായ അഡ്വ.കെ. ശാന്തകുമാരി, പഞ്ചായത്ത് പ്രസിഡന്‍റ് ലിസി സുരേഷ്, സ്റ്റാൻഡിംഗ് കമ്മിറ്റി ചെയർപേഴ്സൺമാരായ അഡ്വ.ശ്രീകല, രശ്മിഷാജി, നവകേരള മിഷൻ ബ്ലോക്ക് കോ ഓർഡിനേറ്റർ പി.എ. മീരാൻ സാഹിബ് എന്നിവരുടെ മേൽനോട്ടവും താത്പര്യവുമാണ് വടക്കഞ്ചേരി അംഗീകാരത്തിന്‍റെ നിറവറിഞ്ഞത്. ഈ മാസം 16ന് തിരുവനന്തപുരത്ത് നടക്കുന്ന ചടങ്ങിൽ മുഖ്യമന്ത്രി പിണറായി വിജയൻ പുരസ്കാരങ്ങൾ സമ്മാനിക്കും.

ജില്ലാ സഹോദയ സ്കൂൾ കലോത്സവം 18 മുതൽ ഭാരതമാതാ സ്കൂളിൽ

പാലക്കാട്: ജില്ലാ സഹോദയ സ്കൂൾ കലോത്സവം- സിംഫണി 18, 19, 20 ന് ചന്ദ്രനഗർ ഭാരതമാതാ സിഎംഐ പബ്ലിക് സ്കൂളിൽ നടക്കും. നാലു കാറ്റഗറികളിലായി 140 ഇനം മത്സരങ്ങൾ 21 വേദികളിലായി നടക്കും. നാലായിരത്തിമുന്നൂറോളം വിദ്യാർഥികൾ വിവിധ മത്സരങ്ങളിൽ മാറ്റുരയ്ക്കും. കലോത്സവത്തിന്‍റെ ഉദ്ഘാടനം സിനിമാതാരം രമേഷ് പിഷാരടി നിർവഹിക്കും. എഴുപത്തിരണ്ടോളം സ്കൂളുകൾ പങ്കെടുക്കുന്ന കലോത്സവത്തിന്‍റെ സമാപന സമ്മേളനം പിന്നണി ഗായകൻ ജി. വേണുഗോപാൽ ഉദ്ഘാടനം ചെയ്യും.

അയ്യപ്പൻകാവ് ജംഗ്ഷനിൽ വേഗനിയന്ത്രണം നടപ്പാക്കും: കെ. ശാന്തകുമാരി എംഎൽഎ

മണ്ണാർക്കാട്: മണ്ണാർക്കാട് കോങ്ങാട് റോഡിൽ അപകടം പതിവായ കാരാകുറുശ്ശി അയ്യപ്പൻകാവ് ജംഗ്ഷനിൽ താത്കാലിക വേഗനിയന്ത്രണ സംവിധാനം ഒരുക്കും. കെ. ശാന്തകുമാരി എംഎൽഎയുടെ നേതൃത്വത്തിൽ മോട്ടോർവാഹന വകുപ്പും പോലീസും കഴിഞ്ഞദിവസം സ്ഥലം സന്ദർശനത്തിനെ തുടർന്നാണ് തീരുമാനം. ഇറക്കവും വളവുമുള്ള ജംഗ്ഷനിൽ വേഗനിയന്ത്രണ സിഗ്നൽ സംവിധാനങ്ങൾ ഇല്ലാത്തത് അപകടങ്ങൾക്കു കാരണമായിരുന്നു. തൊട്ടടുത്ത ജംഗ്ഷനിലെ റോഡിലും വേഗനിയന്ത്രണം കൊണ്ടുവരും. കുളപ്പാൽ റോഡ്, പെരുന്തച്ചൻ പാത, ബാങ്ക് റോഡ്, നിരഞ്ജൻ റോഡ് ജംഗ്ഷൻ എന്നിവിടങ്ങളിലെ സ്ഥിതിയും വ്യത്യസ്തമല്ല. ടിപ്പുസുൽത്താൻ റോഡിലെയും നിരഞ്ജൻ റോഡിലെയും നവീകരണം പൂർത്തിയായതിനാൽ വാഹനങ്ങൾക്ക് അമിതവേഗമാണെന്നും പരാതിയുണ്ട്. അപകടഭീഷണി സംബന്ധിച്ച പരാതികൾ ഉയർന്നതോടെയാണ് എംഎൽഎ സ്ഥലം സന്ദർശിച്ചത്. റബിൾ സ്ട്രിപ്പ് സ്ഥാപിക്കലും ഗതാഗത നിയന്ത്രണവുമടക്കം ചർച്ചയിൽ വന്നു. ഇതു സംബന്ധിച്ച് സമഗ്രമായ യോഗം ചേരുമെന്നും തുടർ നടപടികൾ തീരുമാനിക്കുമെന്നും എംഎൽഎ പറഞ്ഞു. പഞ്ചായത്ത് അധ്യക്ഷ പ്രേമലത, ജില്ല പഞ്ചായത്ത് അംഗം പി. മൊയ്തീൻകുട്ടി എന്നിവരും എംഎൽഎക്കൊപ്പമുണ്ടായിരുന്നു.

വടക്കഞ്ചേരിയിൽ ഹോട്ടൽ ഭക്ഷണത്തിൽനിന്നു വിഷബാധയേറ്റ 20 പേർ ചികിത്സയിൽ

വടക്കഞ്ചേരി: വടക്കഞ്ചേരി ടൗണിൽ മെയിൻ റോഡിൽ ബസ് സ്റ്റാൻഡിനുമുന്നിലായുള്ള അൽ ചങ്ങായീസ് എന്ന ഹോട്ടലിൽ നിന്നും ഭക്ഷണം കഴിച്ച 20 പേർക്ക് ഭക്ഷ്യവിഷബാധ. അൽഫാം, മന്തി മറ്റു ചിക്കൻ കലർന്ന ഭക്ഷണങ്ങൾ, മയോണീസ് എന്നിവ കഴിച്ചവർക്കാണ് ഭക്ഷ്യവിഷബാധയേറ്റത്. വടക്കഞ്ചേരി, ആലത്തൂർ എന്നിവിടങ്ങളിലെ സർക്കാർ ആശുപത്രിയിലും മറ്റു സ്വകാര്യ ആശുപത്രികളിലുമാണ് ആളുകൾ ചികിത്സയിലുള്ളത്. ഭക്ഷ്യവിഷബാധയേറ്റ വിവരം അധികൃതർ രഹസ്യമാക്കിവച്ചത് സംഭവം പുറത്തറിയാനും വൈകി. വടക്കഞ്ചേരിയിലെ സ്വകാര്യ ആശുപത്രിയിൽ ചികിത്സയിലുള്ള നാലുപേർക്കു മാത്രമാണ് ഭക്ഷ്യവിഷബാധയുണ്ടായിട്ടുള്ളതെന്ന വിശദീകരണമാണ് ഭഷ്യ സുരക്ഷാ ഓഫീസർ ഒ.പി. നന്ദകിഷോർ പറയുന്നത്. ഹോട്ടലിൽ പരിശോധന നടത്തിയെങ്കിലും പഴകിയതൊന്നും കണ്ടെത്താനായില്ലെന്നും ഹോട്ടലിൽ ശുചിത്വത്തിന്‍റെ കുറവും ഭക്ഷണസാധനങ്ങൾ കൈകാര്യം ചെയ്യുന്നതിലെ പിഴവുമാണ് കാണാനായതെന്നും ഭഷ്യസുരക്ഷാ ഓഫീസർ പറഞ്ഞു. മതിയായ ഭക്ഷ്യ സുരക്ഷാ സംവിധാനങ്ങൾ ഏർപ്പെടുത്തിയതിനു ശേഷം മാത്രമേ ഹോട്ടൽ ഇനി തുറന്നു പ്രവർത്തിക്കാൻ പാടുള്ളുവെന്ന് നോട്ടീസ് നൽകി ഹോട്ടൽ അടപ്പിച്ചതായും അദേഹം അറിയിച്ചു. ഇക്കഴിഞ്ഞ ഒമ്പതിനു വൈകീട്ട് ഭക്ഷണം കഴിച്ചവർക്കാണ് ഭക്ഷ്യവിഷബാധയുണ്ടായത്. പത്താം തീയതി പുലർച്ചയോടെ പലർക്കും ഛർദിയും വയറിളക്കവും വയറുവേദനയും പനിയും ഉണ്ടാകാൻ തുടങ്ങി. പലരും ഏറെ അവശനിലയിലായി. നാലുദിവസമായിട്ടും ഇപ്പോഴും ചികിത്സ തുടരുന്നവരുമുണ്ട്. ആരുടെയും നില ഗുരുതരാവസ്ഥയിലില്ലെന്ന് ഡോക്ടർമാർ പറഞ്ഞതായും അധികൃതർ പറഞ്ഞു. സംഭവമുണ്ടായി ഒരുദിവസം കഴിഞ്ഞ് വൈകീട്ടാണ് ഭക്ഷ്യ സുരക്ഷാ വിഭാഗം വിവരമറിഞ്ഞ് ഹോട്ടലിൽ പരിശോധനക്ക് എത്തുന്നത്. അപ്പോഴേക്കും പഴയ സാധനങ്ങളെല്ലാം മാറ്റി ഹോട്ടൽ വൃത്തിയാക്കി. അതിനാൽ തന്നെ ഹോട്ടലിൽ നിന്നും പഴയ സാധനങ്ങളൊന്നും കണ്ടെത്താൻ കഴിഞ്ഞില്ലെന്നും ഫുഡ് സേഫ്റ്റി ഓഫീസർ പറയുന്നു. വടക്കഞ്ചേരി സാമൂഹ്യ ആരോഗ്യ കേന്ദ്രത്തിലെ ഹെൽത്ത് ഇൻസ്പെക്ടർ ഷിജി ആന്‍റണിയുടെ നേതൃത്വത്തിൽ ആരോഗ്യവകുപ്പ് വിഭാഗവും ഹോട്ടലിൽ പരിശോധന നടത്തി. 20 പേർക്ക് ഭക്ഷ്യവിഷബാധയേറ്റിട്ടുണ്ടെന്ന വിവരമാണ് ലഭിച്ചിട്ടുള്ളതെന്ന് ഹെൽത്ത് ഇൻസ്പെക്ടർ പറഞ്ഞു. ഈ എണ്ണം കൂടാനും സാധ്യതയുണ്ട്. വടക്കഞ്ചേരി ടൗണിൽ മാത്രം ഭക്ഷ്യ സുരക്ഷാ മാനദണ്ഡങ്ങൾ പാലിക്കാതെ ഒരു ഡസനിലേറെ ഭക്ഷണ കേന്ദ്രങ്ങൾ പ്രവർത്തിക്കുന്നുണ്ടെന്ന് പരാതിയുണ്ട്.

ഡോ. അഗർവാൾസ് കണ്ണാശുപത്രി പ്രവർത്തനം തുടങ്ങി; 30വരെ സൗജന്യ കൺസൾട്ടേഷൻ

പാലക്കാട്: ഇന്ത്യയിലെ വലിയ നേത്ര പരിചരണ ശൃംഖലകളിൽ ഒന്നായ ഡോ. അഗർവാൾസ് കണ്ണാശുപത്രി കേരളത്തിലെ അഞ്ചാമത്തെ ആശുപത്രി ഉദ്ഘാടനം ചെയ്തു. പാലക്കാട്ടെ കാലിക്കറ്റ് ബൈപാസ് റോഡിലെ സ്ഥാപനം നഗരസഭാ ചെയർപേഴ്സൺ പ്രമീള ശശിധരൻ ഉദ്ഘാടനം ചെയ്തു. ലോകോത്തര ഡയഗ്നോസ്റ്റിക്സ്, നൂതന ശസ്ത്രക്രിയകൾ, സമഗ്രമായ നേത്ര പരിചരണ സേവനങ്ങൾ ഇവിടെ ലഭ്യമാണെന്നു അധികൃതർ അറിയിച്ചു. ഉദ്ഘാടനത്തോടനുബന്ധിച്ച് ഡോ. അഗർവാൾസ് ഐ ഹോസ്പിറ്റൽ ഈമാസം മുഴുവൻ എല്ലാ പ്രായക്കാർക്കും സൗജന്യ കൺസൾട്ടേഷനുകൾ ലഭ്യമാണ്. പാലക്കാട് നിവാസികൾക്ക് +91 95949 24048 എന്ന നമ്പറിൽ ബന്ധപ്പെടുന്നതിലൂടെ സൗജന്യ സമഗ്ര നേത്ര പരിശോധനയും ലഭിക്കുന്നതായിരിക്കും. നേത്രചികിത്സയിൽ 50 വർഷത്തിലേറെ പരിചയസമ്പന്നനായ പാലക്കാട് നിന്നുള്ള സീനിയർ ഒഫ്താൽമോളജിസ്റ്റ് ഡോ. രാജഗോപാലൻ നായർ പുതിയ ആശുപത്രിയിലെ ആശുപത്രി നേതൃത്വത്തിന്‍റെ ഭാഗമാകും. മോഡുലാർ ഓപ്പറേഷൻ തിയേറ്റർ, നൂതന ഡയഗ്നോസ്റ്റിക് സംവിധാനങ്ങൾ, തിമിരം, കോർണിയൽ കെയർ, ഗ്ലോക്കോമ, ഡയബറ്റിക് റെറ്റിനോപ്പതി, റെറ്റിന ഡിസോർഡേഴ്സ്, പീഡിയാട്രിക് ഒഫ്താൽമോളജി എന്നിവയ്ക്കുള്ള പ്രത്യേക യൂണിറ്റുകൾ എന്നിവയുൾപ്പെടെയുള്ള അത്യാധുനിക അടിസ്ഥാന സൗകര്യങ്ങൾ ആശുപത്രിയിൽ സജ്ജീകരിച്ചിട്ടുണ്ട്.

കോട്ടോപ്പാടം എച്ച്എസ്എസ് സുവർണ ജൂബിലി: മാധ്യമ സെമിനാറും സ്നേഹാദരവും നടത്തി

കോട്ടോപ്പാടം: കോട്ടോപ്പാടം കെഎഎച്ച് ഹയർ സെക്കൻഡറി സ്കൂളിന്‍റെ സുവർണ ജൂബിലി ആഘോഷങ്ങളുടെ ഭാഗമായി മാധ്യമ സെമിനാറും പത്രമാധ്യമ പ്രവർത്തകർക്കുള്ള സ്നേഹാദരവും നടത്തി. സെമിനാർ ചലച്ചിത്ര നിരൂപകൻ ജി.പി. രാമചന്ദ്രൻ ഉദ്ഘാടനം ചെയ്തു. പിടിഎ പ്രസിഡന്‍റ് കെ.ടി. അബ്ദുള്ള അധ്യക്ഷത വഹിച്ചു. കേരള വെറ്ററിനറി സർവകലാശാല അസിസ്റ്റന്‍റ് പ്രഫസർ ഡോ.എം. മനോജ് മുഖ്യാതിഥിയായി. സ്കൂൾ പ്രിൻസിപ്പൽ എം.പി. സാദിഖ്, പ്രധാനാധ്യാപകൻ കെ.എസ്. മനോജ്, പത്ര മാധ്യമപ്രവർത്തകർ, സംഘാടക സമിതി ഭാരവാഹികൾ പങ്കെടുത്തു. മണ്ണാർക്കാട് എംഇഎസ് കോളജിലെ ജേർണലിസം വിദ്യാർഥികളും സ്കൂൾ സ്റ്റുഡന്‍റ്സ് മീഡിയ ക്ലബ് അംഗങ്ങളും സെമിനാറിൽ പങ്കെടുത്തു.

കാർഷിക പദ്ധതികൾ വിലയിരുത്താൻ കേന്ദ്രസംഘം നെന്മാറയിലെത്തി

നെന്മാറ: കാർഷിക മേഖലയിലെ കേന്ദ്രവിഷ്കൃത പദ്ധതികളുടെ അവലോകനവും പ്രവർത്തന പുരോഗതിയും വിലയിരുത്താൻ ജില്ലയിൽ കേന്ദ്രസംഘത്തിന്‍റെ പര്യടനം ആരംഭിച്ചു. പ്രവർത്തന പുരോഗതി വിലയിരുത്താനും ഫീൽഡ്തല പരിശോധനയ്ക്കുമായാണ് സംഘമെത്തിയത്. ഇതിന്‍റെ ഭാഗമായി നെന്മാറ വിത്തനശ്ശേരിയിൽ കൃഷിയിടം സന്ദർശിച്ചു. യന്ത്രവത്കരണവും സാങ്കേതികത്വവും വിഭാഗം കേന്ദ്ര ജോയിന്‍റ് സെക്രട്ടറി എസ്. രുക്മണി, ഡെപ്യൂട്ടി കമ്മീഷണർ എ.എൻ. മെശ്രാം, എഫ്എംടിടിഐ, ഹിസാർ ഡയറക്ടർ ഡോ. മുകേഷ് ജെയിൻ, എന്നിവരുടെ നേതൃത്വത്തിലുള്ള സംഘമാണെത്തിയത്. പാലക്കാട് പ്രിൻസിപ്പൽ കൃഷി ഓഫീസർ ആറുമുഖപ്രസാദ്, ഡെപ്യൂട്ടി ഡയറക്ടർമാരായ വി.സി. ഹരീന്ദ്രൻ, എംഡി സതീഷ് കുമാർ, കൃഷി അസിസ്റ്റന്‍റ് എക്സിക്യൂട്ടീവ് എൻജിനീയർ ജെ. ബിന്ദു, കൃഷി അസിസ്റ്റന്‍റ് ഡയറക്ടർ ചുമതലയുള്ള എം.കെ. മാനസ, കൃഷി ഓഫീസർ ധന്യ എന്നിവരും സംഘത്തെ അനുഗമിച്ചു. ജില്ലയിലെ കാർഷിക മേഖലയിലെ പ്രശ്നങ്ങളും പ്രതിസന്ധികളും കേന്ദ്രസംഘത്തെ ധരിപ്പിച്ചു. നെൽകൃഷി മേഖലയിലെ പ്രശ്നങ്ങളെക്കുറിച്ച് പഠിക്കുന്നതിനായാണ് കേന്ദ്രസംഘം കേരളത്തിൽ എത്തിയത്. പാലക്കാട്, തൃശൂർ, കുട്ടനാട്( ആലപ്പുഴ) മേഖലകളിലാണ് കേന്ദ്ര സംഘം സന്ദർശനം നടത്തുന്നത്. ഇതിന്‍റെ ഭാഗമായാണ് നെന്മാറയിൽ സംഘമെത്തിയത്. വിവിധ പ്രദേശങ്ങളിലായി നടത്തുന്ന സന്ദർശനത്തിൽ പാട്നയിലെ അരി ഗവേഷണകേന്ദ്രം, ഇന്ത്യൻ കൗൺസിൽ ഓഫ് അഗ്രികൾച്ചർ റിസർച്ച്, കേരള കാർഷിക സർവകലാശാല, ഐഐആർആർ ഹൈദരാബാദ്, നാളികേര വികസന ബോർഡ്, മുതിർന്ന കാർഷിക ശാസ്ത്രജ്ഞർ എന്നിവർ അടങ്ങുന്ന സംഘം വിവിധ സ്ഥലങ്ങളിലെ പ്രാദേശിക കർഷകരുമായി സംവദിക്കും.

കതിരണിഞ്ഞ പാടശേഖരങ്ങളിൽ ചാഴിശല്യം രൂക്ഷം

നെന്മാറ: മൂപ്പുകുറഞ്ഞ നെല്ല് കൃഷിചെയ്ത പാടങ്ങളിൽ കതിരിനൊപ്പം ചാഴിയുടെ ആക്രമണവും. അയിലൂർ കൃഷിഭവൻ പരിധിയിൽ തിരുവഴിയാട്, മരുതഞ്ചേരി, ചെട്ടികുളമ്പ്, പറയമ്പളം മേഖലകളിലെ നെൽപ്പാടങ്ങളിലാണ് ചാഴിശല്യം രൂക്ഷമായി കാണപ്പെട്ടത്. സമീപ കൃഷിയിടങ്ങളിൽ കതിരു നിരക്കുന്നതിനുമുമ്പ് സീസണിൽ ആദ്യം കതിരുനിരന്ന പാടങ്ങളിലാണ് ചാഴിശല്യം പെരുകിയത്. ചാഴിശല്യം കൂടിയ നെൽപ്പാടങ്ങളിൽ കർഷകർ കീടനാശിനി തളിക്കലും ആരംഭിച്ചു. പകൽ കനത്ത ചൂടുള്ളതിനാൽ നെൽച്ചെടികളുടെ താഴ്ഭാഗത്ത് ചാഴികൾ ഒളിഞ്ഞിരിക്കുന്നതിനാൽ സ്പർശനശേഷിയുള്ള കീടനാശിനി പ്രയോഗം കൂടുതൽ ഫലവത്തായി കാണുന്നില്ല. ആയതിനാൽ ബഹുഭൂരിപക്ഷം കർഷകരും രാവിലെയും വൈകിട്ടും വെയിൽ കുറഞ്ഞ സമയങ്ങളിലാണ് ചാഴിക്ക് കീടനാശിനി തളിക്കുന്നത്.

ഡെസ്റ്റിനേഷൻ ചലഞ്ച് ശക്തിപ്പെടുത്തും: മന്ത്രി പി.എ. മുഹമ്മദ് റിയാസ്

ആലത്തൂർ: ഡെസ്റ്റിനേഷൻ ചലഞ്ച് പദ്ധതി കൂടുതൽ ശക്തിയോടെ മുന്നോട്ടു കൊണ്ടുപോകുവാനാണ് സംസ്ഥാന സർക്കാർ ഉദ്ദേശിക്കുന്നതെന്ന് പൊതുമരാമത്ത്, ടൂറിസംമന്ത്രി പി.എ. മുഹമ്മദ് റിയാസ്. കാരമല ചിൽഡ്രൻസ് ആൻഡ്‌ അഡ്വഞ്ചർ പാർക്കിന്‍റെ ഉദ്ഘാടനം നിർവഹിക്കുകയായിരുന്നു മന്ത്രി. അന്താരാഷ്ട്ര തലത്തിൽ ടൈം മാഗസിൻ നടത്തിയ പഠനത്തിൽ ലോകത്തിൽ കണ്ടിരിക്കേണ്ട 50 ടൂറിസ്റ്റ് കേന്ദ്രങ്ങളെ തെരഞ്ഞെടുത്തതിൽ ഇന്ത്യയിലെ ഏക സംസ്ഥാനം കേരളമാണെന്നും മന്ത്രി പറഞ്ഞു. കേരളത്തിന്‍റെ ടൂറിസം ഭൂപടത്തിൽ ഇടം നേടുന്ന ഡെസ്റ്റിനേഷനായി കാരമല മാറിക്കഴിഞ്ഞു. 83.5 ലക്ഷം രൂപയുടെ ഭരണാനുമതിയാണ് പദ്ധതിക്ക് നൽകിയിട്ടുള്ളതെന്നും മന്ത്രി കൂട്ടിച്ചേർത്തു. പി.പി. സുമോദ് എം.എൽ.എ അധ്യക്ഷനായ പരിപാടിയിൽ ജില്ലാ പഞ്ചായത്ത് വൈസ് പ്രസിഡന്‍റ് സി.കെ. ചാമുണ്ണി, ആലത്തൂർ ബ്ലോക്ക് പഞ്ചായത്ത് പ്രസിഡന്‍റ് രജനി ബാബു, വൈസ് പ്രസിഡന്‍റ് കെ.സി. ബിനു, ബ്ലോക്ക് പഞ്ചായത്ത് അംഗങ്ങൾ, വിവിധ രാഷ്ട്രീയപാർട്ടി പ്രതിനിധികൾ പങ്കെടുത്തു.

മിന്നാംപാറ- മാട്ടുമല മേഖലയിൽ പ്ലാസ്റ്റിക് നിർമാർജനവും ഫീൽഡ് യാത്രയും

നെല്ലിയാന്പതി: കേരള വനം വന്യജീവി വകുപ്പ്, ഫോർട്ട് പെഡലേഴ്സ് പാലക്കാട്,ഡെക്കാത്ത്‌ലൺ പാലക്കാട് എന്നിവർ ചേർന്ന് ലിവിംഗ് ഓൺ ദി എഡ്ജ് - നമ്മുടെ മണ്ണും നീരും ഏറ്റവും മികച്ചത് അർഹിക്കുന്നു എന്ന സന്ദേശവുമായി നെന്മാറ ഡിവിഷൻ കൊല്ലങ്കോട് റേഞ്ച് തേക്കടി സെക്്ഷനിലെ മിന്നാംപാറ -മാട്ടുമല മേഖലയിൽ പ്ലാസ്റ്റിക് നിർമാർജ്ജനവും ഫീൽഡ് യാത്രയും നടത്തി. പതിനാലുകിലോമീറ്റർ നടന്നാണ് ഈ സംഘം മാട്ടുമല വ്യൂ പോയിന്‍റ്, മിന്നാംപാറ വ്യൂ പോയിന്‍റ് എന്നിവിടങ്ങളിലുമായി വിനോദയാത്രാസംഘങ്ങൾ അലക്ഷ്യമായി വലിച്ചെറിഞ്ഞ പ്ലാസ്റ്റിക്കും മറ്റു മാലിന്യങ്ങളും സുരക്ഷിതമായി നീക്കം ചെയ്തത്. ഇതിനു പുറമെ ജീപ്പുകളിൽ ഈ സ്ഥലങ്ങൾ സന്ദർശിക്കുന്ന യാത്രികർക്ക് കാടിന്‍റെ സ്വാഭാവിക ആവാസവ്യവസ്ഥ നിലനിർത്താനുള്ള ബോധവത്കരണവും നൽകി. ഇക്കഴിഞ്ഞ ഏപ്രിൽ മാസത്തിൽ എഴുപത്തിയഞ്ചോളം സൈക്കിളിസ്റ്റുകൾ പോത്തുണ്ടി മുതൽ പുലയാംപാറ വരെ നടത്തിയ ബോധവത്കരണ റാലിയുടെ തുടർച്ചയായാണ് മാലിന്യനിർമാർജന പ്രവർത്തനം സംഘടിപ്പിച്ചത്. ഫോർട്ട് പെഡല്ലേഴ്‌സ് പാലക്കാട് ഭാരവാഹികളായ ജയറാം കൂട്ടപ്ലാവിൽ, എ.ജി. ദിലീപ്, അഡ്വ. ലിജോ പനങ്ങാടൻ, ഡെക്കത്‌ലോൺ പാലക്കാടിലെ അനിനാസ് ലോറൻസ്, കൊല്ലങ്കോട് റേഞ്ച് ബീറ്റ് ഫോറസ്റ്റ് ഓഫീസർ ധനേഷ് എന്നിവർ നേതൃത്വം നൽകി. പരിപാടിയിൽ ആൻ മേരി റോബിൻ, മീനാക്ഷി കെ. ഗ്ലോറിയ, ഗോഡ്ലി എബ്രഹാം, ആർ.എ. അൻസാബ്,രഘു എന്നിവരും സജീവ പങ്കാളികളായി.

ആർദ്ര കേരളം പുരസ്കാരം: വെള്ളിനേഴിക്ക് ഒന്നാംസ്ഥാനം

പാലക്കാട്: ആരോഗ്യമേഖലയിലെ മികച്ച പ്രവർത്തനങ്ങൾക്കുള്ള 2023- 24 വർഷത്തെ ആർദ്ര കേരളം പുരസ്‌കാരം വെള്ളിനേഴി ഗ്രാമപഞ്ചായത്തിന്. ഗ്രാമപഞ്ചായത്ത് തലത്തിൽ സംസ്ഥാനത്തെ ഒന്നാം സ്ഥാനമാണ് വെള്ളിനേഴി നേടിയത്. 10 ലക്ഷം രൂപയാണ് സമ്മാനത്തുക. സമ്പൂർണ പൊതു കുടിവെള്ള സ്രോതസ് ഗുണമേന്മ നിർണയത്തിനും പരിഹാരത്തിനുമായി നടപ്പിലാക്കിയ തെളിനീർ പദ്ധതി, ഗർഭകാല ദമ്പതി സംഗമവും കൗമാര ആരോഗ്യ സംഗമവും ലക്ഷ്യമിട്ടുള്ള വാത്സല്യം വെള്ളിനേഴി പദ്ധതി, സമ്പൂർണ പ്രതിരോധ കുത്തിവയ്പ്പ് തുടങ്ങിയവയാണ് ഈ നേട്ടത്തിന് അർഹമാക്കിയത്. വയോജന ആരോഗ്യ സംഗമം സംഘടിപ്പിച്ച സാഖ്യസായാഹ്നം, ഹൃദയാരോഗ്യ, വൃക്ക രോഗ നിർണയത്തിനായുള്ള ഹൃദയപൂർവ്വം വെള്ളിനേഴി തുടങ്ങിയ പദ്ധതികളും പഞ്ചായത്ത് നടപ്പാക്കി. ഇതിനു പുറമെ ഭക്ഷ്യസുരക്ഷിത വെള്ളിനേഴി, ശുചിത്വ ഭവനം, സ്കൂളുകൾക്ക് പ്രഥമ ശുശ്രൂഷാ കിറ്റ്, ജീവൻരക്ഷാ സഹായ പരിശീലനം, മാനസികാരോഗ്യ പരിപാടിയായ 'മാർഗദീപ്തി' എന്നിവയും വെള്ളിനേഴിയുടെ നേട്ടങ്ങളാണ്. ജില്ലാതലത്തിൽ, ഗ്രാമപഞ്ചായത്തുകൾക്കായി ഏർപ്പെടുത്തിയ പുരസ്‌കാരങ്ങളിൽ ജില്ലയിൽ നിന്ന് പെരുവെമ്പ് ഗ്രാമപഞ്ചായത്ത് ഒന്നാം സ്ഥാനവും പൂക്കോട്ടുകാവ് ഗ്രാമപഞ്ചായത്ത് രണ്ടാം സ്ഥാനവും കരിമ്പ ഗ്രാമപഞ്ചായത്ത് മൂന്നാം സ്ഥാനവും നേടി. ഒന്നും രണ്ടും മൂന്നും സ്ഥാനക്കാർക്ക് യഥാക്രമം അഞ്ചുലക്ഷം രൂപ, മൂന്നുലക്ഷം രൂപ, രണ്ടുലക്ഷം രൂപ എന്നിങ്ങനെയാണ് സമ്മാനത്തുക ലഭിക്കുക.

യുവക്ഷേത്ര കോളജ് വിദ്യാർഥികൾക്ക് വിസ വിതരണം ചെയ്തു

മുണ്ടൂർ: യുവക്ഷേത്ര കോളജ് ഹോട്ടൽ മാനേജ്മെന്‍റ് വിദ്യാർത്ഥികളുടെ വിസ വിതരണം പാലക്കാട് രൂപത ബിഷപ് മാർ പീറ്റർ കൊച്ചുപുരയ്ക്കൽ ഉദ്ഘാടനം ചെയ്തു. പ്രിൻസിപ്പൽ ഡോ.ടോമി ആന്‍റണി അധ്യക്ഷനായിരുന്നു. ഡയറക്ടർ റവ.ഡോ. മാത്യു ജോർജ് വാഴയിൽ മുഖ്യപ്രഭാഷണം നിർവഹിച്ചു. വൈസ് പ്രിൻസിപ്പൽ റവ.ഡോ. ജോസഫ് ഓലിക്കൽകൂനൽ സ്വാഗതവും അസിസ്റ്റന്‍റ് ഡയറക്ടറും ടെയ്നിംഗ് ആൻഡ് പ്ലെയ്സ്മെന്‍റ് ഓഫീസറുമായ റവ.ഡോ. ലിനോ സ്‌റ്റീഫൻ ഇമ്മട്ടി നന്ദിയും പറഞ്ഞു. കാമ്പസ് ഇന്‍റർവ്യൂ വഴി ദുബായ് മദീനത്ത് ജുമീറ ഹോട്ടലിൽ പ്ലെയ്സ്മെന്‍റ് ലഭിച്ച വിദ്യാർഥികളുടെ വിസയാണ് വിതരണം ചെയ്തത്.

മെഡിസെപ് പ്രീമിയം തുക വർധിപ്പിക്കരുത്: സർവീസ് പെൻഷണേഴ്സ് അസോസിയേഷൻ

പാലക്കാട്: ആരോഗ്യ ഇൻഷ്വറൻസ് പദ്ധതിയെ ജിഎസ്ടിയിൽനിന്നും കേന്ദ്ര ജിഎസ്ടി കൗൺസിൽ ഒഴിവാക്കിയതിനാൽ സർവീസ് പെൻഷൻകാരുടെ മെഡിസെപ് പ്രീമിയം തുക വർധിപ്പിക്കുവാനുള്ള സർക്കാറിന്‍റെ നീക്കം ഉപേക്ഷിക്കണമെന്നു കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ ജില്ലാ നേതൃയോഗം ആവശ്യപ്പെട്ടു. സംഘടനകളുമായി കൂടിയാലോചനകൾ നടത്താതെയും മെഡിസെപിൽ നിലവിലുള്ള അപാകതകൾ പരിഹരിക്കാതെയും ഏകപക്ഷീയമായി പ്രീമിയം മാത്രം ഒറ്റയടിക്ക് വർധിപ്പിക്കുവാനുള്ള നീക്കം പെൻഷൻകാരോടു കാണിക്കുന്ന ക്രൂരതയാണെന്ന് യോഗം അഭിപ്രായപ്പെട്ടു. സംസ്ഥാന വൈസ് പ്രസിഡന്‍റ് സി. ബാലൻ യോഗം ഉദ്ഘാടനം ചെയ്തു. ജില്ലാ പ്രസിഡന്‍റ് കെ. ബാലകൃഷ്ണൻ അധ്യക്ഷത വഹിച്ചു. ജില്ലാ സെക്രട്ടറി കെ.എം.എം. റഷീദ്, സംസ്ഥാന സെക്രട്ടറിയേറ്റ് അംഗം എം .പോൾ, എം. ഉണ്ണികൃഷ്ണൻ, പുത്തൂർ രാമകൃഷ്ണൻ, എ. ഗോപിനാഥൻ, ആർ. മണി, വി. ആന്‍റണി, കെ.കെ. ശൈലജ, സി.ടി. രമണി, ജമീലറഷീദ്, കെ. നാരായണൻ, പോൾ പി. ആലിസ്, പി.ഡി. ഗ്രേസി എന്നിവർ പ്രസംഗിച്ചു.

ബസിനുനേരേ കാട്ടാനയുടെ ആക്രമണം

നീലഗിരി: ഓവേലി മൂലക്കാട്ട് റോഡിൽ ബസിനുനേരെ കാട്ടാനയുടെ ആക്രമണം. മൂലക്കാട്ട് റോഡിൽ യാത്രക്കാരെ കയറ്റി നീങ്ങുകയായിരുന്ന സർക്കാർബസിനു മുന്നിലേക്ക് കാട്ടാന പാഞ്ഞടുത്തു. ബസിന്‍റെ മുൻവശം തലകൊണ്ട് ഇടിച്ചുതകർത്തു. ബസ് ഓടിച്ചുപോകാൻ ശ്രമിച്ചെങ്കിലും കാട്ടാന പ്രകോപനം തുടർന്നു. യാത്രികർ ബഹളംവച്ചതിനെത്തുടർന്ന് ആന പിന്നീട് കാടുകയറി. യാത്രികർ ആർക്കും പരിക്കില്ല. വഴിയാത്രക്കാർ പകർത്തിയ വീഡിയോ പിന്നീട് സോഷ്യൽ മീഡിയയിൽ വൈറലാവുകയും ചെയ്തു.

പട്ടിത്തറയില്‍ സമൂഹ ഞാറ്റടി തയാറാക്കലിനു തുടക്കം

പട്ടാന്പി: പട്ടിത്തറയില്‍ സമൂഹ ഞാറ്റടിക്ക് തുടക്കമായി. പട്ടിത്തറ ഒതളൂരിലെ 20 ഏക്കറോളം വരുന്ന പാടത്താണ് നെല്‍കൃഷിക്കായുള്ള ഞാറ്റടി തയാറാക്കലിനു തുടക്കം കുറിച്ചത്. പാലക്കാട് കൃഷി വിജ്ഞാന കേന്ദ്രം, കൃഷി വകുപ്പ്, പട്ടിത്തറ പഞ്ചായത്ത് എന്നിവരുടെ സംയുക്ത ആഭിമുഖ്യത്തിലാണ് പദ്ധതി നടപ്പാക്കുന്നത്. രോഗപ്രതിരോധ ശേഷി വര്‍ധിപ്പിക്കുന്നതിനായി സ്യൂഡോമൊണസ് ലായനിയില്‍ മുക്കിയ വിത്തുകളാണ് ഞാറ്റടിയില്‍ വിതച്ചത്. പട്ടിത്തറ ഗ്രാമപഞ്ചായത്ത് പ്രസിഡന്‍റ് പി. ബാലന്‍ ഞാറ്റടിയുടെ ഉദ്ഘാടനം നിര്‍വഹിച്ചു. പട്ടിത്തറ വികസനകാര്യ സ്റ്റാന്‍റിംഗ് കമ്മിറ്റി ചെയര്‍പേഴ്സണ്‍ കെ. ശശിരേഖ അധ്യക്ഷയായി. സ്ഥിരം സമിതി അധ്യക്ഷ ചെയര്‍പേഴ്സണ്‍ കെ.പി. രാധ, വാര്‍ഡ് അംഗങ്ങളായ എ.കെ. നന്ദകുമാര്‍, വി. അബ്ദുള്ളക്കുട്ടി, കൃഷി വിജ്ഞാന കേന്ദ്രം മേധാവി ഡോ.കെ.വി. സുമിയ, പട്ടിത്തറ കൃഷിഓഫീസര്‍ ശ്രീലക്ഷ്മി, ഗ്രാമപഞ്ചായത്ത് അസിസ്റ്റന്‍റ് സെക്രട്ടറി ബിജു കെ. ഫ്രാന്‍സിസ്, കൃഷി വിജ്ഞാന കേന്ദ്രത്തിലെയും കൃഷി വകുപ്പിലെയും മറ്റുദ്യോഗസ്ഥര്‍, കര്‍ഷകര്‍ തുടങ്ങിയവര്‍ പങ്കെടുത്തു.

നന്ദിയോട് കമ്യൂണിറ്റി ഹെല്‍ത്ത് സെന്‍ററില്‍ പുതിയ കെട്ടിടംനിർമാണം അന്തിമഘട്ടത്തിൽ

വണ്ടിത്താവളം: നന്ദിയോട് കമ്യൂണിറ്റി ഹെല്‍ത്ത് സെന്‍ററില്‍ പുതിയ ഐപി/ഒപി ബ്ലോക്കിന്‍റെ ഒന്നാം ഘട്ട നിര്‍മാണം അവസാനഘട്ടത്തിൽ. ചിറ്റൂര്‍ എംഎല്‍എയും മന്ത്രിയുമായ കെ. കൃഷ്ണന്‍കുട്ടിയുടെ പ്രത്യേക ഇടപെടലിനെ തുടര്‍ന്നാണ് 300 ലക്ഷം രൂപ അനുവദിച്ച് പുതിയ ബ്ലോക്ക് നിര്‍മിക്കുന്നത്. 2021-22 സാമ്പത്തിക വര്‍ഷത്തെ ബജറ്റില്‍ ഉള്‍പ്പെടുത്തിയാണ് തുക വകയിരുത്തിയിട്ടുള്ളത്. മൂന്ന് നിലകളിലായി നിര്‍മിക്കുന്ന കെട്ടിടത്തിന്‍റെ ഒന്നാംഘട്ടത്തില്‍ 640 ചതുരശ്ര മീറ്റര്‍ വിസ്തീര്‍ണമുള്ള ആദ്യനിലയാണ് പൂര്‍ത്തിയാക്കുന്നത്. അത്യാഹിത വിഭാഗം, ഫാര്‍മസി, നഴ്സ് സ്റ്റേഷന്‍, ചികിത്സാ- ഇന്‍ജക്്ഷന്‍ റൂമുകള്‍, കോള്‍ഡ് ചെയിന്‍ റൂം, കണ്‍സള്‍ട്ടേഷന്‍ റൂമുകള്‍, വിശാലമായ കാത്തിരിപ്പ് സ്ഥലങ്ങള്‍, ശുചിമുറികള്‍, സ്റ്റോര്‍ റൂമുകള്‍ തുടങ്ങിയ സൗകര്യങ്ങളാണ് ആദ്യനിലയില്‍ ഉള്‍പ്പെടുത്തിയിട്ടുള്ളത്. മൂന്നു മാസത്തിനകം നിര്‍മാണം പൂര്‍ത്തിയാക്കി പുതിയ കെട്ടിടം പ്രവര്‍ത്തനസജ്ജമാക്കാനാണ് ലക്ഷ്യമിടുന്നത്.

എസ്ബിഐ പെൻഷണേഴ്സ് ആൻഡ് റിട്ടയറീസ് അസോസിയേഷൻ ജില്ലാ സമ്മേളനം

പാലക്കാട്: എസ്ബിഐ പെൻഷണേഴ്സ് ആൻഡ് റിട്ടയറീസ് അസോസിയേഷൻ ജില്ലാ സമ്മേളനം സംസ്ഥാന പ്രസിഡന്‍റ് രാധാകൃഷ്ണൻ പുല്ലഞ്ചേരി ഉദ്ഘാടനം ചെയ്തു. ജില്ലാ പ്രസിഡന്‍റ് രാമകൃഷ്ണൻ കുട്ടിനാത്ത് അധ്യക്ഷത വഹിച്ച യോഗത്തിൽ സംസ്ഥാന ജനറൽ സെക്രട്ടറി ഫിലിപ് കോശി മുഖ്യപ്രഭാഷണം നടത്തി. ഭഗവത്ഗീത ഹിന്ദിയിൽനിന്നും മലയാളത്തിലേക്ക് തർജമചെയ്ത എം. ഗിരിജാബായിയെ യോഗത്തിൽ ആദരിച്ചു. ബാങ്കുകളിൽ മൂന്നു ദശാബ്ദ കാലമായിട്ടും പെൻഷൻ പരിഷ്കരിക്കാത്തതിൽ യോഗം പ്രതിഷേധിച്ചു. ബാങ്കുകളിൽ പെൻഷൻ പരിഷ്കരണം ഉടൻ നടപ്പിലാക്കുക, ആരോഗ്യ ഇൻഷ്വറൻസ് പ്രീമിയം ബാങ്കുകൾ വഹിക്കുക, കമ്യൂട്ടേഷൻ അപാകത പരിഹരിക്കുക, സ്പെഷൽ അലവൻസ് പെൻഷനുകൂടി കണക്കാക്കുക എന്നീ ആവശ്യങ്ങൾ യോഗത്തിൽ ഉന്നയിച്ചു. സംസ്ഥാന അസിസ്റ്റന്‍റ് ജനറൽ സെക്രട്ടറി എസ്. ബാലകൃഷ്ണൻ, ജില്ലാ സെക്രട്ടറി കെ.എൻ. ഹർഷൻ, ജില്ലാ ട്രഷറർ വി. രാജാമണി പ്രസംഗിച്ചു. ജില്ലാ വൈസ് പ്രസിഡന്‍റ് പി. അച്ചുതനുണ്ണി സ്വാഗതവും ജില്ലാ ജോയിന്‍റ് സെക്രട്ടറി കെ.എൻ. രഘുപതി നന്ദിയും പറഞ്ഞു.

പുതുവൃന്ദാവനമാകാൻ മലന്പുഴ ഉദ്യാനം

മലമ്പുഴ: പുതുമോടിക്കായി മലന്പുഴ ഉദ്യാനം ഒരുങ്ങുന്നു. കഴിഞ്ഞദിവസം അടച്ചിട്ട ഉദ്യാനം മാസങ്ങൾക്കുശേഷം തുറക്കുന്പോൾ അക്ഷരാർഥത്തിൽ കേരളത്തിന്‍റെ ഉദ്യാനറാണിയെന്ന പദവി അന്വർഥമാക്കുമെന്നാണ് അധികൃതർ പറയുന്നത്. കേന്ദ്ര സർക്കാരിന്‍റെ സ്വദേശി ദർശൻ 2.0 പദ്ധതിയിൽ ഉൾപ്പെടുത്തി 75.87 കോടി രൂപ ചെലവിൽ നവീകരണ പ്രവൃത്തികൾ നടത്തുന്നതിനായിട്ടാണ് മലമ്പുഴ ഉദ്യാനം വ്യാഴാഴ്ച മുതൽ അടച്ചിട്ടത്. ഇനിയൊരു അറിയിപ്പുണ്ടാകുന്നതുവരെ ഉദ്യാനം അടച്ചിടും. ജലസേചന വകുപ്പിന്‍റെ സംയുക്ത സഹകരണത്തോടെയാണ് സംസ്ഥാന ടൂറിസം വകുപ്പ് പദ്ധതി നടപ്പിലാക്കുന്നത്. മലമ്പുഴയുടെ പ്രകൃതിഭംഗിക്ക് കോട്ടംതട്ടാതെ സന്ദർശകരെ തൃപ്തിപ്പെടുത്തുന്ന തരത്തിലായിരിക്കും ഉദ്യാനം നവീകരിക്കുക. പദ്ധതിയുടെ ഭാഗമായി വാട്ടർ തീം പാർക്കുകൾ, വാട്ടർ ഫൗണ്ടനുകൾ, കുട്ടികൾക്കും മുതിർന്നവർക്കുമായി പ്രത്യേകം റൈഡുകൾ, പുതിയ വിനോദ കേന്ദ്രങ്ങൾ, ഓർക്കിഡ് പുഷ്പങ്ങൾക്കായി ഓർക്കിഡ് പാർക്കുകൾ എന്നിവയും സജ്ജമാക്കുന്നുണ്ട്. നിലവിലുള്ള ഉദ്യാനത്തിന്‍റെ രൂപകല്പനയിൽ മാറ്റംവരുത്തി ഉദ്യാനത്തിനകത്ത് സന്ദർശകർക്കായി നടപ്പാതകളും വിശ്രമകേന്ദ്രങ്ങളും ഒരുക്കുന്നുണ്ട്. പരിസ്ഥിതിസൗഹൃദ മാലിന്യ സംസ്കരണവും ഭിന്നശേഷിക്കാർക്ക് സുഗമസഞ്ചാരത്തിനായുള്ള പ്രത്യേകം റാമ്പുകളും നിർമിക്കും. മാന്പഴത്തോട്ടങ്ങളും പരന്പരാഗത കലാരൂപങ്ങൾ അവതരിപ്പിക്കാൻ ഉദ്യാനത്തിനകത്ത് പ്രത്യേക വേദികളും ഒരുക്കും.

അന്പതിന പരിപാടികളുമായി ഒരുവർഷക്കാലം നീണ്ടുനിൽക്കുന്ന ആഘോഷപരിപാടികൾ

മണ്ണാർക്കാട്: കോട്ടോപ്പാടം കല്ലടി അബ്ദുഹാജി ഹയർസെക്കൻഡറി സ്‌കൂൾ സുവർണ ജൂബിലിയുടെ ഭാഗമായി ഒരുവർഷക്കാലം നീണ്ടുനിൽക്കുന്ന ആഘോഷ പരിപാടികൾ നടത്തുമെന്ന് സംഘാടക സമിതി ഭാരവാഹികൾ അറിയിച്ചു. മികച്ച അധ്യാപകനുള്ള സംസ്ഥാന പുരസ്കാരം ഗണിത ശാസ്ത്രാധ്യാപകൻ പി. ഗിരീഷിനെ തേടിയെത്തിയത് ആഘോഷ പരിപാടികളുടെ മാറ്റുകൂട്ടുമെന്നും ഇവർ പറഞ്ഞു. മൂന്നാം തവണയാണ് മികച്ച അധ്യാപക പുരസ്‌കാരം വിദ്യാലയത്തിന് ലഭിക്കുന്നത്. മുൻ പ്രധാനാധ്യാപകരായ പി.എൻ. മോഹനൻ, കെ. ഹസ്സൻ എന്നിവർ സംസ്ഥാന അധ്യാപക അവാർഡ് കരസ്ഥമാക്കിയിരുന്നു. സുവർണ ജൂബിലി ബ്ലോക്കിന്‍റെ നിർമാണം പുരോഗമിക്കുകയാണ്. സെമിനാർ ഹാൾ, ലൈബ്രറി, സ്‌റ്റാഫ് റൂം, സ്കൂ‌ൾ ഗ്രൗണ്ട്, ഇംഗ്ലീഷ് മീഡിയം ക്ലാസുകൾക്ക് പ്രത്യേക ബ്ലോക്ക് എന്നിവയുടെ നിർമാണം പൂർത്തിയായി. വിദ്യാഭ്യാസ, സാമൂഹ്യ പിന്നോക്കാവസ്ഥ അനുഭവിച്ചിരുന്ന കോട്ടോപ്പാടം മേഖലയിലെ വിദ്യാർഥികൾക്ക് പ്രൈമറി സ്‌കൂൾ പഠനത്തിനുശേഷം ഹൈസ്‌കൂൾ വിദ്യാഭ്യാസത്തിനായി കിലോമീറ്ററുകൾ അകലെയുള്ള വിദ്യാലയങ്ങളെ ആശ്രയിക്കേണ്ട ദുരവസ്ഥക്ക് പരിഹാരമായാണ് സാമൂഹ്യപ്രവർത്തകനായിരുന്ന കല്ലടി അബ്ദുഹാജി 1976 ൽ കോട്ടോപ്പാടം ഹൈസ്കൂൾ സ്ഥാപിച്ചത്. 1979 ൽ യുപി വിഭാഗവും 2002 മുതൽ ഹയർ സെക്കൻഡറി വിഭാഗവും അനുവദിച്ചു. അഞ്ചുമുതൽ 12 വരെ ക്ലാസുകളിലായി രണ്ടായിരത്തിലധികം വിദ്യാർഥികളും നൂറിലേറെ അധ്യാപകരും ജീവനക്കാരുമാണ് വിദ്യാലയത്തിലുളളത്. ഒരു വർഷക്കാലം നീണ്ടുനിൽക്കുന്ന ആഘോഷ പരിപാടികളുടെ ഭാഗമായി സുവർണ ജൂബിലി ലോഗോ പ്രകാശനം, വിളംബര റാലി, രക്തദാന ക്യാമ്പ്, മീഡിയ സെമിനാർ, പൂർവ അധ്യാപക, വിദ്യാർഥി സംഗമം, ആരോഗ്യ സെമിനാർ, മെഡിക്കൽ ക്യാമ്പ്, വിദ്യാഭ്യാസ, ശാസ്ത്ര സാങ്കേതിക പ്രദർശനം, ജില്ലാതല കലാ,കായിക മത്സരങ്ങൾ, ഇന്‍റർ സ്‌കൂൾ ക്വിസ്, ജീവകാരുണ്യ സേവന പ്രവർത്തനങ്ങൾ, പ്രത്യേക പരിഗണന അർഹിക്കുന്ന കുട്ടികൾക്കായി വിനോദയാത്ര, രക്ഷാകർതൃ സംഗമം, വർണോത്സവം, പ്രകൃതി പഠന ക്യാമ്പ്, നോ ടു ഡ്രഗ്‌സ് കാമ്പയിൻ, ട്രാഫിക്, സൈബർ സുരക്ഷാ ബോധവൽകരണ പരിപാടികൾ, വിദ്യാഭ്യാസ സാംസ്‌കാരിക സെമിനാറുകൾ, ഫോട്ടോഗ്രാഫി, റീൽസ് മത്സരങ്ങൾ, വൃക്ഷതൈ നടൽ, സ്നേഹാദരം, ഗുരുവന്ദനം, ഫിലിം ഫെസ്റ്റ്, സീനിയർ സിറ്റിസൺസ് മീറ്റ്, എഴുത്തുകൂട്ടം സാഹിത്യ ശിൽപശാല, സർഗോത്സവം, സ്മരണിക പ്രകാശനം, ഭക്ഷ്യമേള, തൊഴിൽ പരിശീലന ശില്പ‌ശാലകൾ, കാർഷിക മേള, ഗോൾഡൻ ജൂബിലി കെട്ടിട സമർപ്പണവുംസമാപന സമ്മേളനവുമുൾപ്പെടെ 50 പരിപാടികളാണ് ആസൂത്രണം ചെയ്തിരിക്കുന്നത്. സ്കൂൾ മാനേജിംഗ് ട്രസ്റ്റ് ചെയർമാൻ കല്ലടി അബൂബക്കർ, പ്രിൻസിപ്പൽ എം.പി. സാദിഖ്, പ്രധാനാധ്യാപകൻ കെ.എസ്. മനോജ്, പിടിഎ പ്രസിഡന്‍റ് കെ.ടി. അബ്ദുള്ള, സംഘാടക സമിതി ഓർഗനൈസിംഗ് കൺവീനർ കെ. മൊയ്തുട്ടി, മീഡിയ കമ്മിറ്റി ചെയർമാൻ ഹമീദ് കൊമ്പത്ത്, കൺവീനർ ബാബു ആലായൻ, സി.പി. വിജയൻ, പി. സൈനുൽ ആബിദ്, പി. മനോജ് എന്നിവർ പത്രസമ്മേളനത്തിൽ പങ്കെടുത്തു.

പൊറ്റശേരി സർവീസ് സഹകരണ ബാങ്ക് സായാഹ്നശാഖ തുറന്നു

കാഞ്ഞിരപ്പുഴ: അറുപത് വർഷത്തെ പ്രവർത്തന പാരമ്പര്യമുള്ള പൊറ്റശേരി സർവീസ് സഹകരണ ബാങ്കിന്‍റെ സായാഹ്നശാഖ കാഞ്ഞിരം ഹെഡ് ഓഫീസിനു മുകളിൽ ഒന്നാംനിലയിൽ പ്രവർത്തനമാരംഭിച്ചു. വി.കെ. ശ്രീകണ്ഠൻ എംപി ഉദ്ഘാടനം ചെയ്തു. ബാങ്ക് പ്രസിഡന്‍റ് ജോയ് ജോസഫ് അധ്യക്ഷനായി. സ്ട്രോംഗ് റൂം ഉദ്ഘാടനം എൻ. ഷംസുദ്ദീൻ എംഎൽഎ നിര്‍വഹിച്ചു. ബാങ്ക് സെക്രട്ടറി ശോഭ അലക്സാണ്ടർ റിപ്പോര്‍ട്ട് അവതരിപ്പിച്ചു. ആദ്യ നിക്ഷേപ സ്വീകരണം കാഞ്ഞിരപ്പുഴ പഞ്ചായത്ത് പ്രസിഡന്‍റ് സതി രാമരാജൻ നിര്‍വഹിച്ചു. മുതിർന്ന സഹകാരികളെ ഡിസിസി സെക്രട്ടറി സി. അച്യുതൻ ആദരിച്ചു. തച്ചമ്പാറ പഞ്ചായത്ത് പ്രസിഡന്‍റ് ബാബു, കാഞ്ഞിരപ്പുഴ സഹകരണ അർബൻ ക്രെഡിറ്റ് സൊസൈറ്റി പ്രസിഡന്‍റ് ചെറൂട്ടി മുഹമ്മദ്, ബിജി ടോമി, കെ. താജുദ്ദീൻ, അസിസ്റ്റന്‍റ് രജിസ്ട്രാർ സി.ജി. സാബു, വാർഡ് മെംബർമാരായ ദിവ്യ, പി. രാജൻ, ടി. കുമാരൻ, ടി.കെ. റഫീഖ്, ഹുസൈനാർ വളവുള്ളി, എൻ.എം. സെബാസ്റ്റ്യൻ, ഓമനക്കുട്ടൻ, അനൂപ് പാലക്കൽ, മോഹൻ ഐസക്, ജോർജ് നമ്പുശേരിൽ, അരുൺ സക്കറിയ, ബാലൻ പൊറ്റശേരി, എ. രാജഗോപാല്‍, ടോജി ജോസഫ്, ബാങ്ക് ഡയറക്ടര്‍ റഫീഖ്, ബിജുമോൻ ജോസഫ് കടുകുമാക്കൽ എന്നിവർ പ്രസംഗിച്ചു.

കസ്റ്റഡിമർദനം: കൊല്ലങ്കോട് പോലീസ് സ്റ്റേഷനിലേക്ക് മാർച്ച്

കൊല്ലങ്കോട്: കൊല്ലങ്കോട് പോലീസ് സ്റ്റേഷനിൽ ലോക്കപ്പ് മർദനം നടത്തിയ ഉദ്യോഗസ്ഥരെ സർവീസിൽ നിന്നും പുറത്താക്കണമെന്ന് ആവശ്യപ്പെട്ട് യൂത്ത് കോണ്‍ഗ്രസ് ജില്ലാ കമ്മിറ്റി കൊല്ലങ്കോട് പോലീസ് സ്റ്റേഷനിലേക്ക് നടത്തിയ മാർച്ചിൽ സംഘർഷം. നിരപരാധിയായ വിജയകുമാറിനെ കള്ളക്കേസിൽ കുടുക്കിയും ലോക്കപ്പിൽ ക്രൂരമായി മർദിക്കുകയും ചെയ്ത അന്നത്തെ കൊല്ലങ്കോട് സിഐയും നിലവിൽ തൃശൂർ എസിപിയുമായ സലീഷ് എം. ശങ്കരനെയും മർദനത്തിന് നേതൃത്വം നൽകിയ പോലീസുകാരെയും സർവീസിൽ നിന്ന് പുറത്താക്കണമെന്ന് ആവശ്യപ്പെട്ടാണ് മാർച്ച് നടത്തിയത്. പൊള്ളാച്ചി റോഡിൽ നിന്നും ആരംഭിച്ച മാർച്ച് പോലീസ് സ്റ്റേഷന് സമീപം ബാരിക്കേഡ് വച്ച് തടഞ്ഞു. പ്രതിഷേധവുമായി എത്തിയ യൂത്ത് കോണ്‍ഗ്രസ് പ്രവർത്തകർ ബാരിക്കേഡ് മറികടക്കാനും മറിച്ചിടാനും ശ്രമിച്ചതോടെ പോലീസും പ്രവർത്തകരും തമ്മിൽ ഉന്തും തള്ളും ഉണ്ടായി. ഇതിന് പിന്നാലെ പോലീസ് പ്രവർത്തകർക്ക് നേരെ ജലപീരങ്കി പ്രയോഗിച്ചു. പലതവണ ജലപീരങ്കി പ്രയോഗിച്ചിട്ടും പ്രവർത്തകർ പിരിഞ്ഞു പോകാൻ കൂട്ടാക്കിയില്ല. തുടർന്ന് പോലീസും പ്രവർത്തകരും തമ്മിൽ സംഘർഷമുണ്ടായി. ഇതിന് പിന്നാലെ യൂത്ത് കോണ്‍ഗ്രസ് നേതാക്കളായ മനു പല്ലാവൂർ, ശ്യാം ദേവദാസ്, സി. വിഷ്ണു, കെ.ജി. രാഹുൽ, പ്രദീപ് നെന്മാറ, ബാബു കൊല്ലങ്കോട് എന്നിവരെ പോലീസ് അറസ്റ്റ് ചെയ്തു. നേതാക്കളുടെ അറസ്റ്റിൽ പ്രതിഷേധിച്ച് യൂത്ത് കോണ്‍ഗ്രസ് പ്രവർത്തകർ കൊല്ലങ്കോട് ടൗണിൽ പ്രതിഷേധ പ്രകടനം നടത്തി. യൂത്ത് കോണ്‍ഗ്രസ് ജില്ലാ പ്രസിഡന്‍റ് കെ.എസ്. ജയഘോഷ് മാർച്ച് ഉദ്ഘാടനം ചെയ്തു. നെന്മാറ നിയോജകമണ്ഡലം പ്രസിഡന്‍റ്് മനു പല്ലാവൂർ അധ്യക്ഷനായി.

മണ്ണാർക്കാട് ലയൺസ് ക്ലബ് കലാഭിവന്ദനം സംഘടിപ്പിച്ചു

മണ്ണാർക്കാട്: കല, സേവനം, സാമൂഹികം എന്നീ മേഖലയിൽ നേട്ടങ്ങൾ കൈവരിച്ച വ്യക്തികളെ ആദരിക്കുന്നതിന് ലയൺസ് ക്ലബ് മണ്ണാർക്കാട് കലാഭിവന്ദനം 2025 സംഘടിപ്പിച്ചു. നെല്ലിപ്പുഴ പാലാട്ട് റസിഡൻസിയിൽ നടന്ന പരിപാടിയിൽ ദേശീയ ചലച്ചിത്രപുരസ്കാരജേതാവ് പി. മോഹൻദാസ്, രാഷ്ട്രപതിയിൽ നിന്ന് പോലീസ്മെഡൽ നേടിയ എസ്പി ഫിറോസ് എം. ഷഫീക്ക്, ഗവർണറിൽ നിന്ന് കേരളകൗമുദി അവാർഡ് നേടിയ ഡോ. ഷിബു, സംസ്ഥാന അധ്യാപക അവാർഡ് നേടിയ ഗിരീഷ്, മുഖ്യമന്ത്രിയുടെ പോലീസ് മെഡൽ ജേതാക്കളായ പി.വി. ബിജുമോൻ, എം.സി. ഷാഫി, ഫോറസ്റ്റ് മെഡൽ നേടിയ സി. സുരേഷ് ബാബു എന്നിവരെ ആദരിച്ചു. മാധ്യമ രംഗത്ത് രണ്ടു പതിറ്റാണ്ട് പിന്നിട്ടവരെയും ബിസിനസ് രംഗത്തെ മികവുറ്റ ലയൺസ് ക്ലബ് മെംബർമാരെയും ആദരിച്ചു. എൻ. ഷംസുദ്ദീൻ എംഎൽഎ ഉദ്ഘാടനം ചെയ്തു. പ്രസിഡന്‍റ് സാംസൺ അധ്യക്ഷനായി. ആലങ്കോട് ലീലാകൃഷ്ണൻ മുഖ്യപ്രഭാഷണം നടത്തി. കെടിഡിസി ചെയർമാൻ പി.കെ. ശശി, നഗരസഭ ചെയർമാൻ സി. മുഹമ്മദ് ബഷീർ, നഗരസഭ പ്രതിപക്ഷ നേതാവ് ടി.ആർ. സെബാസ്റ്റ്യൻ, ലയൺസ് ക്ലബ് ഡിസ്ട്രിക്റ്റ് ഗവർണർ ടി. ജയകൃഷ്ണൻ, ലയൺസ് സോൺ ചെയർമാൻ ഷൈജു ചിറയിൽ, പി.എം. സുബ്രഹ്മണ്യൻ, വി.ജെ. ജോസഫ്, പ്രോഗ്രാം കമ്മിറ്റി ചെയർമാൻ ഡോ. ഷിബു, റെജിമോൻ ജോസഫ് തുടങ്ങിയവർ പങ്കെടുത്തു. മണ്ണാർക്കാട് പാലിയേറ്റീവ് കെയറിന്‍റെ സാന്ത്വന പ്രവർത്തനങ്ങൾക്ക് ധനസഹായം നൽകി. മണ്ണാർക്കാട് എഎൽപി സ്കൂളിലെ കുട്ടികളുടെ കലാവിരുന്നും ഉണ്ടായിരുന്നു.

നെന്മാറ-ഒലിപ്പാറ റോഡ് നിർമാണം; രാത്രിയിൽ യന്ത്രങ്ങൾ കടത്താനുള്ള ശ്രമം തടഞ്ഞു

നെന്മാറ: നെന്മാറ- ഒലിപ്പാറ റോഡിലെ നിർമാണ യന്ത്രസാമഗ്രികൾ കടത്താൻ വീണ്ടും ശ്രമം. രണ്ടുമാസത്തിലേറെയായി നിർമാണപ്രവർത്തനം മുടങ്ങിക്കിടക്കുന്നതിനാൽ വിവിധ യന്ത്രങ്ങൾ കൈപ്പഞ്ചേരിയിൽ മറ്റു നിർമാണ വസ്തുക്കളോടൊപ്പം പ്ലാസ്റ്റിക് കവറുകളും ടാർപ്പായയും കെട്ടി പൊതിഞ്ഞുവെച്ചിരിക്കുകയായിരുന്നു. കഴിഞ്ഞദിവസം രാത്രി 11 ന് ലോറികൾ എത്തി യന്ത്രസാമഗ്രികൾ കടത്തിക്കൊണ്ടു പോകാൻ കരാറുകാരൻ നടത്തിയ ശ്രമമാണ് പ്രദേശവാസികളുടെ ശ്രദ്ധയിൽപ്പെട്ടതോടെ തടഞ്ഞത്. രാത്രി 11 ന് ശേഷമായതിനാൽ പ്രദേശവാസികൾ മോഷണശ്രമം ആണെന്ന ധാരണയിലായിരുന്നു. പിന്നീടാണ് കരാറുകാരന്‍റെ ആൾക്കാരാണ് യന്ത്രങ്ങൾ കടത്തിക്കൊണ്ടുപോകാൻ വന്നതെന്ന് അറിയുന്നത്. ഇതോടെ ആക്‌ഷൻ കൗൺസിൽ പ്രവർത്തകരെ വിവരമറിയിക്കുകയും ചെയ്തു. ആക്‌ഷൻകമ്മിറ്റി ഭാരവാഹികളായ കെ. രഘുകുമാർ, എസ്.എം. ഷാജഹാൻ, എസ്. ഉമ്മർ, റഷീദ് ഒലിപ്പാറ, വി. വിനേഷ് എന്നിവരുടെ നേതൃത്വത്തിൽ പ്രദേശവാസികളുടെ സഹായത്തോടെ തടഞ്ഞു. നെന്മാറ പോലീസിൽ വിവരം അറിയിച്ചതിന് തുടർന്ന് രാത്രി പോലീസ് സ്ഥലത്തെത്തി യന്ത്രസാമഗ്രികൾ കൊണ്ടുപോകുന്നത് നിർത്തിവച്ചു. ഇന്നലെ പോലീസ് സ്റ്റേഷനിൽ കരാറുകാരന്‍റെ പ്രതിനിധികളും ആക്‌ഷൻ കൗൺസിൽ പ്രതിനിധികളും പോലീസ് സാന്നിധ്യത്തിൽ പൊതുമരാമത്ത് ദേശീയപാത അധികൃതരുമായി ചർച്ച നടത്തി. 17ന് പൊതുമരാമത്ത് അധികൃതർ കരാറുകാരന് നോട്ടീസ് നൽകി വിളിച്ചുവരുത്തി പ്രശ്നം ചർച്ച ചെയ്യുമെന്ന് അറിയിച്ചു. കഴിഞ്ഞ ജൂലൈ 30നും കരാറുകാരൻ റോഡുപണിക്ക് കൊണ്ടുവന്ന യന്ത്രസാമഗ്രികൾ ഇടുക്കി ജില്ലയിലെ നിർമാണപ്രവർത്തനത്തിനായി കൊണ്ടുപോകാൻ ശ്രമം നടത്തിയിരുന്നു. തുടർന്ന് യന്ത്രസാമഗ്രികൾ മാസങ്ങളായി ടാർപോളിൻ കൊണ്ട് മൂടി പൊതിഞ്ഞുകെട്ടി വച്ചിരിക്കുകയായിരുന്നു.

കാഴ്ചശേഷിയില്ലാത്ത ഗൃഹനാഥയ്ക്ക് ലോട്ടറിവില്പനയ്ക്കു തണലൊരുക്കി

വടക്കഞ്ചേരി: കാഴ്ചശേഷിയില്ലാത്ത നിർധനഗൃഹനാഥയ്ക്ക് ലോട്ടറിവില്പനയ്ക്കുള്ള തണലൊരുക്കി വടക്കഞ്ചേരി ലയൺസ് ക്ലബ്. വടക്കഞ്ചേരി ബസ് സ്റ്റാൻഡിൽ ലോട്ടറിവില്പന നടത്തി ഉപജീവനമാർഗം കണ്ടെത്തുന്ന സരോജിനി പൊന്മലയ്ക്കാണ് ലയൺസ് ക്ലബിന്‍റെ താങ്ങായത്. വെയിലും മഴയും ഏൽക്കാതെ തൊഴിൽ ചെയ്യാൻ വലിയൊരു കളർഫുൾ കുടയാണ് ക്ലബ് നൽകിയത്. ടിക്കറ്റുകൾ പ്രദർശിപ്പിക്കാനുള്ള സ്റ്റാൻഡ്, കസേര, മേശ, ബാഗ് തുടങ്ങിയവയും ക്ലബിന്‍റെ വകയായി നൽകി. ചടങ്ങിനെത്തിയവരെല്ലാം ലോട്ടറി ടിക്കറ്റ് എടുത്തും സഹായിച്ചു. പഞ്ചായത്ത് വൈസ് പ്രസിഡന്‍റ് വി.ജെ. ഉസനാർ പരിപാടി ഉദ്ഘാടനം ചെയ്തു. വാർഡ് മെംബർ ഗിരിജ, ക്ലബ് പ്രസിഡന്‍റ് കെ.പി. രാജേന്ദ്രൻ, സെക്രട്ടറി സജോ ജോർജ്, പ്രശാന്ത് മേനോൻ, ബേബി വർഗീസ്, ഡോ. കുട്ടമണി, ജോസ് ജോർജ്, ബാബു പീറ്റർ, കെ.പി. എൽദോസ്, ജ്യോതി തോമസ് പ്രസംഗിച്ചു.

വിധവയും രണ്ടു പെൺമക്കളുമുള്ള കുടുംബത്തിന് വീടൊരുക്കി വാട്സാപ്പ് കൂട്ടായ്മ

വടക്കഞ്ചേരി: നിരാശ്രയരായ കുടുംബത്തിന് സുരക്ഷിതമായ വീടൊരുക്കി വാട്സാപ്പ് കൂട്ടായ്മ. കിഴക്കഞ്ചേരി വക്കാലയിലെ ഓമന ശിവരാമൻ, ഇവരുടെ പതിമൂന്നും പതിനഞ്ചും വയസുള്ള പെൺമക്കളായ അപർണക്കും അനുപമയ്ക്കുമാണ് കാഴ്ച എന്ന വാട്സാപ്പ് കൂട്ടായ്മ താങ്ങായത്. വീടിന്‍റെ താക്കോൽദാനവും ഗൃഹപ്രവേശനവും നാളെ വൈകുന്നേരം മൂന്നിന് നടക്കുമെന്ന് കൂട്ടായ്മ പ്രവർത്തകർ അറിയിച്ചു. ഏതാനും മാസം മുമ്പാണ് ഇവരുടെ അച്ഛൻ ശിവരാമൻ പനി ബാധിച്ച് മരിച്ചത്. റബർ ടാപ്പിംഗ് തൊഴിലാളിയായിരുന്ന അച്ഛന്‍റെ മരണത്തോടെ കുടുംബത്തിന്‍റെ വരുമാനം നിലച്ചു. നിത്യചെലവുകൾക്ക് വഴിയില്ലാതായി. പ്രായപൂർത്തിയായി വരുന്ന രണ്ട് പെൺമക്കൾ, അവരുടെ പഠനം, വീടില്ലാത്ത സാഹചര്യം, സഹായത്തിന് അടുത്ത ബന്ധുക്കളോ വീട്ടുകാരോ ഇല്ലാത്ത സ്ഥിതി. എല്ലാം ആലോചിച്ച് അമ്മ ഓമനയും ഏറെ വിഷമത്തിലായിരുന്നു. ടാർപോളിൻ കൊണ്ട് മൂടിയ കുടിലിലാണ് ഏറെ വർഷങ്ങളായി കുടുംബം കഴിയുന്നത്. മൺതറയും സുരക്ഷിതമല്ലാത്ത ഷെഡുമായതിനാൽ മഴക്കാലങ്ങളെല്ലാം കടന്നുപോകാൻ ഇവർ ഏറെ പ്രയാസപ്പെട്ടു. ഇതിനിടെയാണ് കുടുംബത്തിന്‍റെ ദൈന്യസ്ഥിതി കൂട്ടായ്മ പ്രവർത്തകർ അറിഞ്ഞത്. 450 അംഗങ്ങളുള്ള വാട്സ്ആപ്പ് കൂട്ടായ്മ കുടുംബത്തിന് സുരക്ഷിതമായ വീട് ഒരുക്കാനുള്ള പ്രവർത്തനങ്ങളുമായി രംഗത്തിറങ്ങി. വീട് നിർമാണ സാധനങ്ങൾ സ്പോൺസർ ചെയ്തും മറ്റു സഹായങ്ങളുമായി പ്രദേശത്തെ പലരും മനുഷ്യത്വപ്രവൃത്തിക്ക് പ്രോത്സാഹനം നൽകി. കൂട്ടായ്മയിലെ കെ. കൃഷ്ണൻകുട്ടിയും കെ.ജെ. പൗലോസും ബൈജുവുമെല്ലാം പ്രവർത്തനങ്ങൾക്ക് ചുക്കാൻ പിടിച്ചതോടെ കുറഞ്ഞ സമയത്തിനുള്ളിൽ കുടുംബത്തിന്‍റെ സ്വപ്നഭവനം യാഥാർഥ്യമായി. സുരക്ഷിതമായി കഴിയാൻ വീടായതിന്‍റെ സന്തോഷത്തിലാണ് അമ്മ ഓമനയ്ക്കൊപ്പം വിദ്യാർഥികളായ അപർണയും അനൂപമയുമിപ്പോൾ. ക്ലാസിലെ അടുത്ത കൂട്ടുകാരികളോടൊക്കെ പുതിയ വീട് ഒരുങ്ങുന്ന കാര്യം ഇവർ പറഞ്ഞിട്ടുണ്ട്. ഗൃഹപ്രവേശനത്തിന് അവരും എത്തും. വരുന്നവരെയൊക്കെ സ്വീകരിക്കാനുള്ള തയ്യാറെടുപ്പിലാണ് ഇവർ. വാട്സ്ആപ്പ് കൂട്ടായ്മയിലെ പകുതിയിലേറെ പേരും കുടുംബത്തിന്‍റെ ഗൃഹപ്രവേശനത്തിൽ പങ്കെടുക്കുമെന്ന് കെ. കൃഷ്ണൻകുട്ടി പറഞ്ഞു.കൂടായ്മയിൽ എല്ലാ വിഭാഗം ആളുകളുമുണ്ട്. വിവിധ രാഷ്ടീയ പാർട്ടിക്കാരും സർക്കാർ ജീവനക്കാർ ഉൾപ്പെടെ വിവിധ തൊഴിൽ മേഖലയിലുള്ളവരുമുണ്ട്. ഇതിനാൽ തന്നെ താക്കോൽദാനത്തിന് വിഐപികളെയൊന്നും പ്രത്യേകം ക്ഷണിച്ചിട്ടില്ല. കൂട്ടായ്മയിലെ പ്രവർത്തകർ തന്നെയാകും ഉദ്ഘാടകർ.

അപകടങ്ങൾ ഒഴിവാക്കാൻ വടക്കഞ്ചേരി ടൗണിൽ ട്രാഫിക് ഐലൻഡ് സ്ഥാപിക്കണം

വടക്കഞ്ചേരി: വാഹനത്തിരക്കേറിയ ടൗൺ റോഡിലെ പ്രധാന ജംഗ്‌ഷനുകളിൽ ട്രാഫിക് ഐലൻഡോ ബാരിക്കേഡുകളോ സ്ഥാപിച്ച് വാഹനങ്ങളുടെ ദിശ നിയന്ത്രിച്ചുവിടണമെന്ന ആവശ്യം ശക്തം. മെയിൻ റോഡിൽ മന്ദം, സുനിതമുക്ക് എന്നീ രണ്ട് ജംഗ്ഷനുകളിലാണ് ബാരിക്കേഡുകൾ സ്ഥാപിച്ച് വാഹനങ്ങൾ തിരിച്ചുവിടേണ്ട ആവശ്യകത കൂടുതലുള്ളത്. ഇവിടെ പലഭാഗത്തേക്കായി വഴികൾ തിരിഞ്ഞുപോകുന്നതിനാൽ വാഹനങ്ങൾ തലങ്ങും വിലങ്ങും പായുന്ന സ്ഥിതിയാണിപ്പോൾ. ട്രാഫിക് സിഗ്നലുകൾ തെറ്റിച്ച് വലതുവശം ചേർന്നാണ് പല വാഹനങ്ങളും ചെറിയ വഴികളിലേക്ക് തിരിയുന്നത്. ഇതുമൂലം അപകടങ്ങളും നിത്യസംഭവമാണെന്ന്സമീപത്തെ വ്യാപാരികൾ പറയുന്നു. ബുധനാഴ്ച രാത്രിയാണ് സുനിത ജംഗ്ഷനടുത്ത് പിക്കപ്പും ബുള്ളറ്റും കൂട്ടിയിടിച്ച് ബാങ്ക് മാനേജരായ യുവാവ് മരിച്ചത്. ട്രാഫിക് നിയമങ്ങൾ തെറ്റിച്ചുള്ള വാഹനങ്ങളുടെ ഓട്ടത്തിൽ കാൽനടയാത്രക്കാരാണ് ഏറെ കഷ്ടപ്പെടുന്നത്. റോഡിനു കുറുകെകടക്കാൻ പ്രായമായവർ പരസഹായം തേടണം. ബാരിക്കേഡുകളോ ട്രാഫിക് ഐലൻഡോ ഈ ജംഗ്ഷനുകളിൽ സ്ഥാപിച്ചാൽ വാഹനങ്ങൾ ഏതു വഴി തിരിയും എന്നൊക്കെ കണ്ട് കാൽനടയാത്രക്കാർക്കു കടന്നുപോകാനും സൗകര്യപ്രദമാകും. മന്ദം ജംഗ്ഷനിൽനിന്നു ഗ്രാമം റോഡിലേക്കുള്ള വഴി വൺവേ ആക്കിയിട്ടുണ്ടെങ്കിലും ഇതു തിരിച്ചറിയാനുള്ള ബോർഡുകളോ മറ്റു സംവിധാനങ്ങളോ ഇവിടെയില്ല. ഇതിനാൽ ടൗൺ അറിയാത്തവർ രണ്ടു ദിശയിലേക്കും വാഹനങ്ങൾ ഓടിച്ചുപോകും. മെയിൻ റോഡിലെ അനധികൃത കച്ചവടങ്ങളും വാഹന പാർക്കിംഗ് തുടരുന്നതും അപകടങ്ങൾക്കു കാരണമാകുന്നുണ്ട്.

മംഗലംഡാമിന്‍റെ ആയക്കെട്ട് പ്രദേശങ്ങളിൽ വൻകുറവെന്നു കണക്കുകൾ

വടക്കഞ്ചേരി: നെൽകൃഷി ചെയ്യുന്ന മംഗലംഡാമിന്‍റെ ആയക്കെട്ട് പ്രദേശങ്ങളിൽ വലിയ കുറവ് വന്നതായി കണക്കുകൾ. 1956 ൽ മംഗലംഡാം കമ്മീഷൻ ചെയ്യുമ്പോഴുള്ള ആയക്കെട്ട് പ്രദേശത്തിന്‍റെ മൂന്നിലൊരുഭാഗവും ഇപ്പോൾ ഇല്ലാതായെന്നാണ് വിലയിരുത്തൽ. നെൽപ്പാടങ്ങൾ മണ്ണിട്ടു നികത്തി മറ്റുവിളകൾ നിറഞ്ഞതും അനധികൃത നിലംനികത്തലും കെട്ടിടനിർമാണവുമെല്ലാം ഡാമിലെ വെള്ളം ഉപയോഗിച്ച് നെൽകൃഷി ചെയ്യുന്ന കൃഷിഭൂമിയുടെ വിസ്തൃതിയിൽ ഭീമമായ കുറവുണ്ടാക്കി. അനധികൃത ഭൂ ഉപയോഗംമൂലം കനാൽ വെള്ളം എത്താതെ ഹെക്ടർ കണക്കിന് ഭൂമി തരിശിടുകയും പിന്നീട് അതെല്ലാം പറമ്പുകളും താമസസ്ഥലങ്ങളും കെട്ടിടങ്ങളുമായി മാറുകയായിരുന്നു. നെൽപ്പാടങ്ങളുടെ വിസ്തൃതി കുറഞ്ഞപ്പോൾ ഡാമിൽ നിന്നുള്ള മെയിൻ കനാലുകൾ പോലും പലയിടത്തും ഉപയോഗശൂന്യമായി. അഞ്ചുമൂർത്തി മംഗലത്ത് ഫയർ സ്റ്റേഷന് പിറകിലായി ഏറെ ദൂരത്തിൽ വലതുകര മെയിൻ കനാലിൽ നിന്നുള്ള സബ് കനാൽ ഉപയോഗശൂന്യമായാണ് കിടക്കുന്നത്. വർഷങ്ങളായി ഈ കനാലിലൂടെ വെള്ളം വിടുന്നില്ല. വെള്ളം വിട്ടാലും വാലറ്റത്ത് കൃഷിഭൂമിയില്ല. കനാലും കനാൽ പുറംപോക്ക് പ്രദേശങ്ങളും സ്വകാര്യ വ്യക്തികൾ കൈയേറി വില്പന നടത്തുന്നതും തകൃതിയാണ്. കനാല്‍ മൂടി വഴികളും റോഡുകളുമായി. മുമ്പൊക്കെ കനാലിനു കുറുകെ ചെറിയ നടപ്പാതയുണ്ടാക്കണമെങ്കിൽ പല തവണ ഓഫീസുകൾ കയറിയിറങ്ങിയാലെ അനുമതി ലഭിക്കു.എന്നാൽ ഇപ്പോൾ ആർക്കും കനാൽ മൂടി സൗകര്യത്തിന് വഴിയുണ്ടാക്കാമെന്ന സ്ഥിതിയായി. ചില സബ് കനാലുകളുടെ വാലറ്റം എവിടെയാണെന്ന് തിരിച്ചറിയാൻ പോലും കഴിയാത്ത വിധം കൈയേറ്റങ്ങൾ വ്യാപകമാണ്. കാടുമൂടി കിടക്കുന്ന ഇത്തരം കനാലുകൾ മാലിന്യ നിക്ഷേപ കേന്ദ്രമായും മാറി. വടക്കഞ്ചേരി ബസ് സ്റ്റാൻഡിൽ നിന്നുള്ള റോഡുകൾ പലതും നിർമിച്ചിട്ടുള്ളത് കനാലുകൾ നികത്തിയാണെന്ന് പറയുന്നു. മംഗലംഡാമിൽ നിന്നും ഇടതു, വലതുകര മെയിൻ കനാലുകളുടെ ദൂരം 45 കിലോമീറ്ററോളമാണ്. വലതുകര കനാൽ വണ്ടാഴി, വടക്കഞ്ചേരി, കാവശേരി എന്നീ പഞ്ചായത്തുകൾ കടന്നാണ് പോകുന്നത്. ഇടതുകര കനാൽ കിഴക്കഞ്ചേരി, വടക്കഞ്ചേരി, കണ്ണമ്പ്ര, പുതുക്കോട് എന്നീ പഞ്ചായത്തുകളിലൂടെയുമാണുള്ളത്. കഴിഞ്ഞ കുറച്ചു വർഷങ്ങളായി കനാലുകളുടെ മെയിന്‍റനൻസ് വർക്കുകളും കാടുവെട്ടലും കാര്യക്ഷമമല്ലാത്തതിനാൽ വാലറ്റങ്ങളിലേക്ക് വെള്ളം എത്താതെ നെൽകൃഷി ഒരു പൂ കൃഷിയായി കർഷകർ ചുരുക്കി. കൂർക്ക, ഇഞ്ചി തുടങ്ങി മറ്റു കൃഷികളിലേക്ക് കർഷകർ മാറി. ഇതുവഴിയും നെൽകൃഷിയിൽ കുറവുവന്നിട്ടുണ്ട്. 73.2 കിലോമീറ്ററായിരുന്ന ഫീൽഡ് കനാലുകളുടെ ദൈർഘ്യത്തിലും കുറവുണ്ടായി. കനാലുകളും ഹെക്ടർ കണക്കിന് വരുന്ന കനാൽ പുറമ്പോക്കുകളും സംരക്ഷിക്കാൻ ബന്ധപ്പെട്ട വകുപ്പുകളും നടപടി സ്വീകരിക്കുന്നില്ല.

നെൽപ്പാടവരമ്പുകളിലെ വെണ്ടകൃഷി കർഷകർക്ക് അധികവരുമാനമാകുന്നു

വണ്ടിത്താവളം: വയൽവരമ്പുകൾ ക്കുചുറ്റും വെണ്ടയും ചീരയും കൃഷിയിറക്കിയത് കർഷകർക്ക് ഇടവരുമാനമായി. നാടൻ വെണ്ട, ചീര എന്നിവക്ക് വിപണിയിൽ ആവശ്യക്കാരും ഏറെയാണ്. മുന്പ് പയറിനങ്ങളാണ് കൃഷിയിറക്കിയിരുന്നത്. ഉദ്ദേശിച്ച വരുമാനം ലഭിക്കാതായപ്പോഴാണ് വെണ്ട, ചീരകൃഷിയിലേക്ക് തിരിഞ്ഞത്. വയലുകളിൽ ഈർപ്പം ഉള്ളതിനാൽ ജലവിതരണവും വേണ്ടിവരുന്നില്ല. മാത്രമല്ല ചെടികൾക്ക് മരുന്നു തളിയോ മറ്റു പരിചരണമില്ലെന്നതിനാൽ കർഷകന് പ്രത്യേക ചെലവ് വരുന്നുമില്ല. രാത്രി സമയങ്ങളിൽ പന്നി വരമ്പുകൾ കുത്തിമറിക്കുന്നത് തടയാനാവുന്നില്ലെന്നതാണ് കർഷകന്‍റെ ആവലാതി.

ഹരിതകർമസേനക്ക് അഭിമാനമായി ഗിരിജയും ചന്ദ്രികയും

വടക്കഞ്ചേരി: വണ്ടാഴി പഞ്ചായത്ത് രണ്ടാം വാർഡിലെ ഹരിതകർമസേനാംഗങ്ങളായ ഗിരിജക്കും ചന്ദ്രികക്കും നാട്ടുകൂട്ടങ്ങളുടെ അഭിനന്ദനങ്ങൾ. ഇല്ലായ്മയിലും സത്യസന്ധത ഉയർത്തി പ്പിടിച്ചതിനാണ് ഈ ജനാംഗീകാരം. വീടുകളിൽ നിന്നും ശേഖരിച്ച അജൈവവസ്തുക്കൾ തരംതിരിക്കുന്നതിനിടെ കിട്ടിയ സ്വർണമോതിരം ഉടമയെ കണ്ടെത്തി ഇവർ തിരിച്ചേൽപ്പിക്കുകയായിരുന്നു. പാഴ് വസ്തുക്കളിൽ നിന്നും അപ്രതീക്ഷിതമായി സ്വർണമോതിരം കിട്ടിയ വിവരം പഞ്ചായത്ത് അധികൃതരെ അറിയിക്കുകയുണ്ടായി. ഉടമയെ കണ്ടെത്താൻ പിന്നെ അന്വേഷണമായി. ഒടുവിൽ മോതിരത്തിന്‍റെ ഉടമയായ ചല്ലുപടി പുല്ലയിലെ വാസുവും കുടുംബവുമാണെന്ന് തിരിച്ചറിഞ്ഞു. കുടുംബത്തെ പഞ്ചായത്ത് ഓഫീസിലേക്ക് വിളിച്ചുവരുത്തി മോതിരം കൈമാറി. പഞ്ചായത്ത് പ്രസിഡന്‍റ് കെ.എൽ. രമേഷ്, വൈസ് പ്രസിഡന്‍റ് പി. ശശികല, സ്റ്റാൻഡിംഗ് കമ്മിറ്റി ചെയർമാൻമാരായ ഷക്കീർ, പി. ശശികുമാർ, ചെയർപേഴ്സൺ സുബിത, മെംബർമാരായ മീനാകുമാരി, ഡിനോയ് കോമ്പാറ, സെക്രട്ടറി കെ.ജി. സജീവ് കുമാർ, അസിസ്റ്റന്‍റ് സെക്രട്ടറി കെ. ചെന്താമരാക്ഷൻ, ജൂണിയർ സൂപ്രണ്ട് എം. ഹംസ, ജൂണിയർ ഹെൽത്ത്‌ ഇൻസ്‌പെക്ടർ പി. മഞ്ജു തുടങ്ങിയവർ ഉടമക്ക് മോതിരം കൈമാറുന്നതിൽ പങ്കെടുത്തു.

കേളി അവാർഡ് തുവ്വൂർ വിമലഹൃദയാശ്രമത്തിന്

മണ്ണാർക്കാട്: പ്രമുഖ സാംസ്കാരികസംഘടനയായ കേളി കലാസാഹിത്യവേദിയുടെ ഒമ്പതാം വാർഷികാഘോഷവും അഞ്ചാമത് കേളി അവാർഡ് ദാനവും നാളെ വൈകുന്നേരം അഞ്ചിന് മണ്ണാർക്കാട് റൂറൽ ബാങ്ക് ഹാളിൽ നടക്കും. വയോജന സംരക്ഷണ പ്രവർത്തനങ്ങൾ മാതൃകാപരമായി നടത്തുന്ന വ്യക്തികൾക്കോ സംഘടനക്കോ ആണ് അവാർഡ് നൽകുന്നത്. 25,000 രൂപയും വെങ്കലശില്പവുമാണ് കേളി അവാർഡ്. ഈ വർഷം അവാർഡ് നൽകുന്നത് 148 വയോജനങ്ങളെ സംരക്ഷിച്ചു വരുന്ന "ആകാശപ്പറവകൾ’ നടത്തുന്ന മലപ്പുറം ജില്ലയിലെ തുവ്വൂർ വിമല ഹൃദയാശ്രമത്തിനാണ്. പ്രഭാഷകൻ വി.കെ. സുരേഷ്ബാബു കണ്ണൂർ ആണ് ഉദ്ഘാടകൻ. മണ്ണാർക്കാട്ടെ കലാകാരൻമാർ അവതരിപ്പിക്കുന്ന കലാവിരുന്നും ഒരുക്കിയിട്ടുണ്ട്. കേളി പ്രസിഡന്‍റ് എം. ചന്ദ്രദാസൻ അധ്യക്ഷത വഹിക്കും. കേളി രക്ഷാധികാരികളായ ടി.ആർ. സെബാസ്റ്റ്യൻ, രംഗനാഥൻ, എം. പുരുഷോത്തമൻ, കേരള സ്റ്റേറ്റ് ലൈബ്രറി കൗൺസിലർ പി.എൻ. മോഹനൻ എന്നിവർ പ്രസംഗിക്കും. വിമല ഹൃദയാശ്രമത്തിനുവേണ്ടി സിസ്റ്റർ കിരൺ എംഎസ്ജെ മറുപടിപ്രസംഗം നടത്തും. പത്രസമ്മേളനത്തിൽ കേളി രക്ഷാധികാരി ടി.ആർ. സെബാസ്റ്റ്യൻ, പ്രസിഡന്‍റ് എം. ചന്ദ്രദാസൻ, വൈസ് പ്രസിഡന്‍റ് ഹസൻ മുഹമ്മദ്, ജോയിന്‍റ് സെക്രട്ടറി എം.വി. കൃഷ്ണൻകുട്ടി, എക്സിക്യൂട്ടീവ് മെംബർ മനോജ് എന്നിവർ പങ്കെടുത്തു.

ജനവാസമേഖലയിലെ ക്വാറി പ്രവർത്തനം നിർത്താൻ ഗ്രാമസഭായോഗ തീരുമാനം

കൊഴിഞ്ഞാമ്പാറ: പൊതുജനങ്ങളുടെ ജീവനും സുരക്ഷയ്ക്കും വെല്ലുവിളിയായ എരുത്തേമ്പതി പഞ്ചായത്ത് മലയാണ്ടികൗണ്ടന്നൂരിലെ കരിങ്കൽക്വാറിയുടെ പ്രവർത്തനം നിർത്തിവയ്ക്കാൻ തീരുമാനം. കഴിഞ്ഞ ദിവസം ചേർന്ന പ്രത്യേക ഗ്രാമസഭയിലാണ് തീരുമാനമായത്. ക്വാറി പ്രവർത്തനം മൂലം ദുരിതത്തിലായ നാട്ടുകാരുടെ പരാതിയുടെ അടിസ്ഥാനത്തിലാണ് പ്രത്യേക ഗ്രാമസഭ കൂടിയത്. ക്വാറിയുടെ പ്രവർത്തനത്തിൽ വിയോജിപ്പ് രേഖപ്പെടുത്തി 130 ഓളം വരുന്ന പ്രദേശവാസികളുടെ നിവേദനം അടുത്ത ഭരണസമിതി യോഗത്തിൽ ചർച്ചക്ക് വെക്കും. തുടർന്ന് ക്വാറി ഉടമയ്ക്ക് പ്രവർത്തനം നിർത്തിവക്കണമെന്ന് കാണിച്ച ്നോട്ടീസ് നൽകുമെന്ന് ഗ്രാമപഞ്ചായത്ത് വൈസ് പ്രസിഡന്‍റ് ആർ.സി. സമ്പത്ത്കുമാർ അറിയിച്ചു. മുൻവർഷവും നാട്ടുകാരുടെ ഇടപെടലിനെ തുടർന്ന് ക്വാറിക്ക് സ്റ്റോപ്പ് മെമ്മോ നൽകി നിർത്തിയിരുന്നു. കുടുംബങ്ങൾ താമസിക്കുന്നതിനു നൂറുമീറ്റർ ദൂരപരിധിയിൽ പാറ പൊട്ടിക്കലും അനുബന്ധ ഇടപാടുകളും പാടില്ലെന്ന നിയമവ്യവസ്ഥ ലംഘിച്ച് അനുമതി നൽകിയെന്നതായിരുന്നു ആരോപണം. വിവിധ വകുപ്പുകളിൽ നിന്നും ലഭിച്ചപതിനൊന്നോളം അനുമതികളുമായാണ് ക്വാറിയുടമ പഞ്ചായത്തിൽ ലൈസൻസിനായി അനുമതി തേടിയതെന്നും രേഖകളുടെ അടിസ്ഥാനത്തിലാണ് അന്ന് അനുമതി നൽകിയതെന്നും പഞ്ചായത്ത് സെക്രട്ടറി ജയാനന്ദൻ പറഞ്ഞു. എഴുത്തേമ്പതി പഞ്ചായത്തിലെ പ്രധാനപ്പെട്ട രണ്ട് പഞ്ചായത്ത് റോഡുകളിലൂടെ ക്വാറിയിൽ നിന്നുമുള്ള കല്ലുമായെത്തുന്ന ടോറസ് ലോറികൾ പോകരുതെന്ന നിബന്ധന വെച്ചാണ് ലൈസൻസ് നൽകിയിരുന്നതെന്ന് പഞ്ചായത്ത് ഉപാധ്യക്ഷൻ അറിയിച്ചു. എന്നാൽ ആഴ്ചകൾക്ക് മുൻപ് കരിങ്കല്ലു കയറ്റി ലോറി ഇതിലൂടെ കടന്നുപോയതായും നാട്ടുകാർ പറയുന്നുണ്ട്. ക്വാറിയിൽ നിന്നുള്ള വാഹനങ്ങൾ കടന്നുപോകുന്നതിനാൽ പ്രദേശത്തെ റോഡുകൾ തകരുന്നതായും നാട്ടുകാർ പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]