കിളിയന്തറ: വിദ്യാർഥികൾക്ക് സ്കൂൾ തലത്തിൽ തന്നെ സിവിൽ സർവീസ് പരിശീലനം നല്കുക എന്ന ലക്ഷ്യത്തോടെ തലശേരി കോർപറേറ്റ് എഡ്യുക്കേഷണൽ ഏജൻസി നടപ്പിലാക്കിയ പൊതു വിജ്ഞാന പരിശീലന പദ്ധതിയായ മാസ്റ്റർ മൈൻഡ് 2K23 പരീക്ഷയിൽ ഉയർന്ന റാങ്ക് നേടിയ 12 കുട്ടികൾക്ക് സൗജന്യ വിമാന യാത്ര ഏർപ്പെടുത്തി കിളിയന്തറ സെന്റ് തോമസ് ഹൈസ്കൂൾ.
ആറുമുതൽ പത്തുവരെയുള്ള ക്ലാസുകൾക്ക് കോർപറേറ്റ് തലത്തിൽ ജനുവരി മാസത്തിൽ നടത്തിയ പൊതുവിജ്ഞാന പരീക്ഷയിൽ ആദ്യ12 റാങ്കും സ്കൂൾ നേടിയിരുന്നു. തലശേരി കോർപ്പറേറ്റ് എഡ്യുക്കേഷണൽ ഏജൻസി തലത്തിൽ ഒരു സ്കൂൾ നേടുന്ന ഏറ്റവും മികച്ച നേട്ടങ്ങളിൽ ഒന്നാണിത്.
റാങ്ക് ജേതാക്കളയ അഭിനവ് ബോസ്, ഏബൽ ജോ തോമസ്, ബ്രേവിയ സൂസൻ സാബു, എഡ്വിൻ ജിയോ സാജൻ, അനന്യ സി പ്രസാദ്, ആൻ തെരേസ തോമസ്, പ്രണവ്, അനിറ്റ തെരേസ കുര്യൻ, എൻ. ഗാൽഡിൻ, ദൃശ്യ പ്രദീപ്, കെ. ശ്യാമ പ്രിയദാസ്, ശ്രേയ പ്രദീപ് എന്നീ കുട്ടികൾക്കാണ് സ്കൂൾ അപൂർവ സൗകര്യം ഒരുക്കിയത്.
കണ്ണൂരിൽ നിന്നും കൊച്ചിയിലേക്കായിരുന്നു കുട്ടികളുടെ വിമാനയാത്ര. വിമാന യാത്ര കൂടാതെ മെട്രോ റെയിൽ, വാട്ടർ മെട്രോ യാത്രയും കുട്ടികളെ സംബന്ധിച്ച് നവ അനുഭവമായിരുന്നു. മാസ്റ്റർ മൈൻഡ് പൊതുവിജ്ഞാന പരിശീലന പരിപാടിയുടെ പരിശീലകൻ പി. റോബിൻ ജോസഫ്, അധ്യാപകരായ ജോജി ജോർജ്, ടി.എം. ശ്രീജ എന്നിവർ യാത്രയ്ക്ക് നേതൃത്വം നല്കി.