കടമക്കുടിക്ക് അഴകായി ജോണേട്ടന്റെ ഞണ്ടും മീനും പിന്നെ കായൽ ടൂറിസവും
Thursday, April 3, 2025 4:41 PM IST
വ്യവസായ നഗരമായ കൊച്ചിയുടെ അതിർത്തിയെങ്കിലും തികച്ചും വ്യത്യസ്തമാണു കടമക്കുടി എന്ന കായൽ ഗ്രാമം. 1341 ലെ വെള്ളപ്പൊക്കത്തിൽ കൊച്ചി അഴിമുഖം രൂപപ്പെട്ടപ്പോൾ ഉടലെടുത്ത ദ്വീപുകളിൽ ഒന്നാണ് കടമക്കുടി.
ഞണ്ടും ചെമ്മീനും ഉൾപ്പടെയുള്ള മത്സ്യകൃഷിയും പൊക്കാളി നെൽകൃഷിയുമാണ് പ്രധാന തൊഴിൽ.
സുന്ദരം... ഈ ഗ്രാമക്കാഴ്ചകൾ
പ്രശാന്തമായ ജലാശയങ്ങൾ, ചേറിൽ മുളയും തൈതലും ഉപയോഗിച്ചു കെട്ടിപ്പൊക്കിയ ബണ്ടുകൾ, ബണ്ടുകളിൽ നിരനിരയായി നിറയെ കായ്ച്ചു നിൽക്കുന്ന തെങ്ങുകൾ, കണ്ടൽക്കാടുകൾ, മീൻ പിടിക്കാൻ ചീനവലകൾ, ചെറുതും വലുതുമായ വഞ്ചികൾ,
ടൂറിസ്റ്റുകളെ കാത്തുകിടക്കുന്ന പലതരം ബോട്ടുകൾ, വേലിയേറ്റത്തിലും വേലിയിറക്കത്തിലും വെള്ളം നിയന്ത്രിക്കുന്ന ചീപ്പുകൾ, ചെമ്മീൻ കെട്ടുകൾ, ചിലയിടങ്ങളിൽ താറാവിൻ കൂട്ടങ്ങൾ, ഒറ്റക്കാലിൽ തപസുചെയ്യുന്ന വർണകൊക്കുകൾ... അഴകിന്റെ പര്യായമാണ് കടമക്കുടി.
പ്രഭാതത്തിലും സായംസന്ധ്യയിലുമാണ് കടമക്കുടി ഏറെ സുന്ദരിയാകുന്നത്. പ്രഭാത സൂര്യ കിരണങ്ങൾ ജലാശയത്തിൽ വീഴുന്പോൾ ഇളകുന്ന കുഞ്ഞോളങ്ങൾക്ക് പറഞ്ഞറിയിക്കാനാവാത്ത സൗന്ദര്യം. സന്തോഷത്തിമർപ്പിൽ പറന്നകലുന്ന കൊറ്റികളെയും നീർകാക്കകളെയും സാക്ഷി നിറുത്തി ചെറുവഞ്ചികളിൽ മത്സ്യബന്ധനം നടത്തുന്നവർ.
അറബിക്കടലിലേക്ക് ആഴ്ന്നിറങ്ങുന്ന അസ്തമയ സൂര്യനെ കാണാൻ കുടുംബസമേതം എത്തുന്നവർ ഞണ്ടുകറി, മീൻ പൊരിച്ചത്, കപ്പയും മീനും, പുട്ടും നാടൻ താറാവുകറിയും ഒരുക്കിയ ലൈവ് തട്ടുകടകൾ... കായലിന്റെ വൈബ് ആവോളം ആസ്വദിക്കാൻ കടമക്കുടിയിൽ തന്നെ വരണം.
ഇതിനോട് ചേർന്നാണ് ജോണേട്ടന്റെ പ്രസിദ്ധമായ ജോണ്സ് ഹാവൻ. ഭൂമിയിലെ സ്വർഗം. അല്ലെങ്കിൽ സഞ്ചാരികളുടെ പറുദീസ. അതിനു മുന്പ് ജോണേട്ടന്റെ ഞണ്ട് കൃഷിയെക്കുറിച്ച് അറിയാം.
ജോണ്സ് ഹാവൻ
ഞണ്ട് കൃഷിയിൽ അത്ഭുതങ്ങൾ രചിക്കുകയാണ് കടമക്കുടി പഞ്ചായത്തിലെ കല്ലുവീട്ടിൽ ജോ ണും അദ്ദേഹത്തിന്റെ ജോണ്സ് ഹാവൻ ഫാമും. കിലോയ്ക്ക് 2800 രൂപ വരെ വിലവരുന്ന ഡബിൾ എക്സൽ വലിപ്പവും പച്ചനിറവുമുള്ള ഞണ്ടുകളെ സിംഗപ്പൂരിലേക്കും ചൈനയിലേക്കുമാണ് കയറ്റി അയയ്ക്കുന്നത്.
എന്നാൽ, തയ്വാൻകാർക്ക് പ്രിയം ചുവന്ന മുട്ടകളുള്ള പെണ് ഞണ്ടിനെയാണ്. അതും 500 മുതൽ 750 ഗ്രാം വരെ തൂക്കം വരുന്ന ബിഗ് കാറ്റഗറി തന്നെ. ജോണിന് ഓർമ വയ്ക്കുന്ന കാലം മുതൽ മീനിനൊപ്പമായിരുന്നു ജീവിതം. അപ്പൻ തൊമ്മന് ചെമ്മീൻ കെട്ടായിരുന്നു.
അപ്പനെ സഹായിക്കാൻ എപ്പോഴും അമ്മ മറിയവും ഉണ്ടാകും. അഞ്ചുമക്കളിൽ ഇളയവനായ ജോണും ഇവരെ സഹായിക്കാൻ ഒപ്പം കൂടുക പതിവായിരുന്നു. സ്കൂൾ വിട്ടു വന്നാൽ ഒട്ടും വൈകാതെ ചെമ്മീൻ കെട്ടിലെത്തും. അതായിരുന്നു രീതി.

തുടക്കം 40 വർഷം മുന്പ്
ഏതാണ്ട് 40 വർഷം മുന്പാണ് ജോണ് ഞണ്ടു കൃഷിയിലേക്ക് തിരിയുന്നത്. ജോണ്സ് ഹാവൻ എന്ന പേര് അന്വർഥമാകും പോലെ ഞണ്ടുകളുടെ തടാകം തന്നെയാണ് ഈ ഫാം. രണ്ടരയേക്കർ പാടത്താണു ഞണ്ട് ഫാമിംഗ്.
കൂടാതെ തിരുത, കരിമീൻ, പിലോപ്പി (തിലാപ്പിയ) എന്നീ മത്സ്യങ്ങളും. ന്ധനല്ല രീതിയിൽ കൃഷി ചെയ്യുകയും കാലാവസ്ഥ അനുകൂലമാവുകയും ചെയ്താൽ ഏറ്റവും നല്ല ബിസിനസാണിത്. സീ ഫുഡ് മേഖലയിൽ ഇത്രയും ബെനഫിറ്റ് കിട്ടുന്ന മറ്റൊരു കൃഷിയുമില്ല’- 69 കാരനായ ജോണേട്ടൻ പറയുന്നു.
കിലോയ്ക്ക് 2800 രൂപവരെ
ഒരു കിലോ മുതൽ ഒന്നര കിലോവരെ തൂക്കം വരുന്ന ഡബിൾ എക്സൽ കാറ്റഗറിയിലുള്ള ഞണ്ടിന്റെ വില കിലോയ്ക്ക് 2800 രൂപയാണ്. 750 - 1000 ഗ്രാം വരെ തൂക്കം വരുന്ന എക്സലിന് 1800 - 2000 വരെയാണ് വില.
500 ഗ്രാമിന് മുകളിലുള്ള ബിഗ് കാറ്റഗറിക്ക് 1100 മുതലാണ് വില. 350-500 ഗ്രാമുള്ള മീഡിയത്തിന് 900 രൂപ വരെ. ഇതിൽ മീഡിയം കാറ്റഗറി ഏറ്റവും കൂടുതൽ കോൽക്കത്തയിലേക്കാണ് കയറ്റിപ്പോകുന്നത്. നല്ല മാംസമുള്ള കാറ്റഗറികൾക്ക് ലുലു മാളുകളിലും പ്രധാന ഹോട്ടലുകളിലും വലിയ ഡിമാൻഡാണ്.
വിദേശത്തേക്കു കയറ്റുമതി ചെയ്യുന്നതും വടക്കുകിഴക്കൻ സംസ്ഥാനങ്ങളിലേക്ക് കയറ്റിപ്പോകുന്നതുമെല്ലാം ചെന്നൈയിലെ ഏജൻസികൾ മുഖാന്തരമാണ്. എല്ലാദിവസവും വൈകിട്ടുള്ള ചെന്നൈ മെയിലിലാണ് ഇവിടെ നിന്നുള്ള ഓർഡറുകൾ ചെന്നൈയിൽ എത്തിക്കുന്നത്.
ഏക മകൻ തോമസ് ജോണ് ആണു വില്പനയുടെ കാര്യങ്ങൾ നോക്കുന്നത്. വരാപ്പുഴ മാർക്കറ്റിൽ മൊത്തക്കച്ചവട സ്റ്റാളുമുണ്ട്.
കൃഷി രീതി
ചെളി നന്നായി ഉണങ്ങിയ ഫാമാണ് ഞണ്ട് കൃഷിക്ക് ഉത്തമം. കീടങ്ങൾ ഇല്ലാത്ത ഇത്തരം ഫാമിലാണ് ഞണ്ടുകൾ തടം തെരഞ്ഞിരിക്കുന്നതും പടം പൊഴിക്കുന്നതും. പടം പൊഴിക്കുന്നതനുസരിച്ചാണ് വളർച്ച.
നവംബർ മുതൽ ജൂണ് വരെയാണ് പ്രധാനമായും ഞണ്ട് ഫാമിംഗ്. ഒക്ടോബർ അവസാനം നവംബർ ആദ്യം കടലിൽ നിന്ന് ഉപ്പ് കയറി വരും. ഈ സമയത്ത് 100 ഗ്രാം മുതൽ 500 ഗ്രാംവരെ വലിപ്പമുള്ള ഞണ്ടിൻ കുഞ്ഞുങ്ങളെ ഫാമിൽ നിക്ഷേപിക്കും.
ഫാമുകളിൽ ഇവ മുട്ടയിടില്ല. കടലും കായലും ചേരുന്ന നേരിയ ഉപ്പുവെള്ളത്തിലാണ് ഇവ മുട്ടയിടുകയും വിരിയുകയും ചെയ്യുന്നത്. അവിടെനിന്ന് മുക്കുവരാണ് കുഞ്ഞുങ്ങളെ ശേഖരിച്ച് ഫാമുകൾക്കു നൽകുന്നത്. കുഞ്ഞുങ്ങൾക്ക് കിലോ 500 രൂപയാണ് വില.
തീറ്റ
നല്ല ഫ്രഷ് ചെറുമീനുകളാണ് ഇവയുടെ തീറ്റ. സീസണിൽ ചാള, നങ്ക്, നത്തോലി തുടങ്ങിയ മീനുകൾ കുറഞ്ഞ വിലയ്ക്ക് ലഭിക്കും. അല്ലാത്തപ്പോൾ ഇത്തരം ചെറുമീനുകൾ ഐസിട്ടോ ഉപ്പിലിട്ടോ സൂക്ഷിച്ചശേഷം ഭക്ഷണമായി നൽകും.
കക്കയും കക്കയിറച്ചിയും വളരെ നല്ലതാണെങ്കിലും വില താങ്ങാനാകാത്തതിനാൽ പ്രോത്സാഹിപ്പിക്കാറില്ല. ആറുമാസത്തിനകം ഇവ 700 ഗ്രാം മുതൽ ഒന്നര കിലോവരെ തൂക്കം വയ്ക്കും.
പച്ചയായാലും ചുവപ്പായാലും പെണ്ണിന് ആണിനേക്കാൾ വലിപ്പവും മാംസവും കുറവായിരിക്കും. കാലുകളും ചെറുതായിരിക്കും. പെണ്ണിനെയും ആണിനെയും തിരിച്ചറിയുന്നത് അവയുടെ പൊത്ത നോക്കിയാണ്.

കരിമീൻ, തിരുത, പിലോപ്പി
ഞണ്ട് വളർത്തുന്ന അതേ ഫാമിൽത്തന്നെ കരിമീൻ, തിരുത, പിലോപ്പി എന്നിവയും ഇദ്ദേഹം കൃഷി ചെയ്യുന്നുണ്ട്. ഫാമിനെ രണ്ടായി തിരിച്ചശേഷം ഒന്നിൽ 10,000 വീതം കരിമീൻ, പിലോപ്പി കുഞ്ഞുങ്ങളെയും മറ്റൊന്നിൽ 5000 തിരുതക്കുഞ്ഞുങ്ങളെയും നിക്ഷേപിക്കും.
ഞണ്ട് പടം പൊഴിക്കുന്ന വേസ്റ്റും വേലിയേറ്റ സമയത്ത് കായലിൽനിന്നു കയറിവരുന്ന ചെമ്മീൻ കുഞ്ഞുങ്ങളും ഇവയ്ക്കും ഭക്ഷണമാകും. പ്രത്യേക തീറ്റച്ചെലവില്ലാതെത്തന്നെ ഇവ വളരും. അതിനാൽ ഈ മീനുകൾക്ക് നല്ല നെയ്യും സ്വാദും ഉണ്ടാകും. ചെളിച്ചൂര് തീരെ ഉണ്ടാവുകയുമില്ല.
ഒരു കിലോയ്ക്ക് മുകളിൽ തൂക്കമുള്ള തിരുതയ്ക്ക് 700 രൂപയാണ് കിലോ വില. അതിനു താഴെ ഉള്ളവയ്ക്ക് 500 - 550. പിലോപ്പി 250-300 ഗ്രാം തൂക്കമായാൽ പിടിച്ചു തുടങ്ങും; ഇവയ്ക്ക് കിലോ 300 രൂപ വില കിട്ടും. ക്രിസ്മസ്, ന്യൂ ഇയർ, പെരുന്നാൾ, ഈസ്റ്റർ തുടങ്ങി വിശേഷാവസരങ്ങളോടനുബന്ധിച്ചാണ് കരിമീൻ വിളവെടുപ്പ്.
150 ഗ്രാമും അതിനുമുകളിലും തൂക്കമുള്ളവയെ എ ഗ്രേഡിലാണ് കണക്കാക്കുക. ഇവയ്ക്ക് 600 രൂപയാണ് കിലോ വില. കരിമീനിന്റെയും പിലോപ്പിയുടെയും കുഞ്ഞുങ്ങൾ ഫാമിൽത്തന്നെ വിരിയുകയും ചെയ്യും.
കായൽ ടൂറിസം
കടമക്കുടി പഞ്ചായത്ത് ടൂറിസം ഡെസ്റ്റിനേഷനായി തെരഞ്ഞെടുക്കപ്പെട്ടതോടെ ജോണ്സ് ഹാവൻ ഫാം ടൂറിസം കേന്ദ്രമായും മാറിക്കഴിഞ്ഞു. ടൂറിസ്റ്റുകൾക്കായി ഹട്ട്, ഉൗഞ്ഞാൽ, പെഡസ്റ്റൽ ബോട്ട് എന്നിവയും താമസിക്കാനായി നാല് എസി റൂമുകളും വാട്ടർ ഫ്രന്റേജുള്ള സിറ്റൗട്ടും ഒരുക്കിയിട്ടുണ്ട്. സഞ്ചാരികൾക്ക് കായൽക്കാഴ്ചകൾ കാണാനായി വലിയ ബോട്ടും ചെറിയ ബോട്ടുമുണ്ട്.
ഗ്രൂപ്പുകളായി നിരവധിപ്പേരാണ് ഇവിടെ എത്തുന്നത്. ലയണ്സ്, ജെസിഐ, റോട്ടറി തുടങ്ങിയ പ്രസ്ഥാനങ്ങളും വിവിധ ക്ലബുകളും മാസ-വാർഷിക മീറ്റിംഗുകളും പിക്നിക്കും ഇവിടെ സംഘടിപ്പിക്കാറുണ്ട്.
വിവാഹ നിശ്ചയം, മാമ്മോദീസ, പ്രഥമ ദിവ്യകാരുണ്യ സ്വീകരണം, വിവാഹ വാർഷികം, ജന്മദിനാഘോഷം തുടങ്ങിയവയും ജോണ്സ് ഹാവനിൽ നടക്കാറുണ്ട്. കോണ്ഫറൻസ് ഹാൾ, കഫേറ്റേരിയ എന്നിവയെല്ലാം ഇവിടെയുണ്ട്.
കുത്തരിച്ചോറ്, ചെമ്മീൻ - മുരിങ്ങക്കായ് അല്ലെങ്കിൽ മാങ്ങയിട്ട് അരച്ചുവച്ചത്, കരിമീൻ/കാളാഞ്ചി പൊള്ളിച്ചത്, ഞണ്ട് കറി / ഫ്രൈ തുടങ്ങിയവയാണ് ഉച്ചയൂണിന്റെ ഹൈലൈറ്റ്. ന്ധഅടിപൊളി ടേസ്റ്റ് ഫുഡ്. ഞണ്ട് ഫ്രൈ സൂപ്പർ. കാളാഞ്ചി ഒരു രക്ഷയുമില്ല... പൊളിച്ചു.
പിന്നെ ഇവിടത്തെ ഒരാന്പിയൻസ് ... ഒരു പ്രത്യേക വൈബാണിവിടെ.ന്ധ ഇന്റർനെറ്റിലൂടെ ബുക്ക് ചെയ്തുവന്ന കർണാടകക്കാരൻ പറഞ്ഞു. കായൽ മീൻ വിഭവങ്ങൾ, പ്രത്യേകിച്ച് ഞണ്ടാണ് ഇവിടുത്തെ മാസ്റ്റർ പീസ്.
ഞണ്ട് മാംസം മാത്രം എടുത്ത് ഫ്രൈ ചെയ്തു കൊടുക്കും. കരിമീൻ ഫിഷ് മോളി, ചെന്പല്ലി കറി, തിരുത, സിലോപ്പി തുടങ്ങിയവയും ലഭ്യമാണ്. കുടുംബസമേതം വന്ന് ഡേയും നൈറ്റും ചെലവഴിച്ച് പോകുന്നവരുമേറെ.
ജോണേട്ടന്റെ സംരംഭങ്ങൾക്കെല്ലാം മകനെപ്പോലെത്തന്നെ പൂർണപിന്തുണയുമായി ജീവിതപങ്കാളി സെലിനും ഒപ്പമുണ്ട്. മകൾ മേരി സർക്കാർ ജോലിക്കാരിയാണ് (ജിഎസ്ടി ഓഫീസ്, മട്ടാഞ്ചേരി).
ഫോണ്: 9388608498, 6238393066.