വിമാനം തകരാൻ കാരണം റഷ്യൻ മിസൈലെന്ന് : Deepika.com International News |

Click here for detailed news of all items

വിമാനം തകരാൻ കാരണം റഷ്യൻ മിസൈലെന്ന്

Saturday, December 28, 2024 1:08 AM IST

ബാക്കു: അസർബൈജാൻ എയർലൈൻസ് വിമാനം കസാക്കിസ്ഥാനിൽ തകർന്നുവീഴാൻ കാരണം റഷ്യൻ മിസൈൽ ആണെന്നു പ്രാഥമികാന്വേഷണത്തിൽ തെളിഞ്ഞതായി സൂചന. അസർബൈജാൻ നടത്തുന്ന അന്വേഷണത്തിൽ ഇക്കാര്യം വ്യക്തമായെന്ന് അസർബൈജൻ വൃത്തങ്ങൾ വെളിപ്പെടുത്തിയതായി വാർത്താ ഏജൻസി റിപ്പോർട്ട് ചെയ്തു.

ബുധനാഴ്ച അസർബൈജാനിലെ ബാക്കുവിൽനിന്നു റഷ്യയിലെ ചെചൻ നഗരമായ ഗ്രോസ്നിയിലേക്കു പുറപ്പെട്ട വിമാനം തകർന്ന് 38 പേരാണു മരിച്ചത്. നിശ്ചിതപാതയിൽനിന്നു വ്യതിചലിച്ച വിമാനം നൂറുകണക്കിനു കിലോമീറ്ററുകൾ അകലെ കസാക്കിസ്ഥാനിലെ അക്താവു നഗരത്തിനടുത്ത് അടിയന്തരമായി ഇറക്കാൻ ശ്രമിക്കവേ തീപിടിച്ചു തകരുകയായിരുന്നു.

റഷ്യൻ സേനയുടെ പാൻസർ-എസ് വ്യോമപ്രതിരോധ സംവിധാനത്തിലെ മിസൈൽ വിമാനത്തിലേറ്റെന്നാണ് അനുമാനം. യുക്രെയ്ന്‍റെ ഡ്രോൺ ആക്രമണം ചെറുക്കാനായി ഗ്രോസ്നിയയിൽ റഷ്യ വ്യോമപ്രതിരോധം ശക്തിപ്പെടുത്തിയിരുന്നതായും പറയുന്നു.

വിദേശ ശക്തിയുടെ സാങ്കേതികവും ഭൗതികവുമായ ഇടപെടൽ മൂലമാണ് വിമാനം തകർന്നതെന്ന് പ്രാഥമികാന്വേഷണത്തിൽ കണ്ടെത്തിയതായി അസർബൈജാൻ ഏയർലൈൻസ് ഇന്നലെ പറഞ്ഞു. എന്നാൽ ഇതുകൊണ്ട് ഉദ്ദേശിക്കുന്നത് എന്താണെന്ന് വിശദീകരിച്ചില്ല.

വിമാനം തകരാൻ കാരണം റഷ്യൻ മിസൈൽ ആയിരിക്കാമെന്ന് അമേരിക്കൻ വൃത്തങ്ങളും നേരത്തേ സംശയം പ്രകടിപ്പിച്ചിരുന്നു. റഷ്യ മനഃപൂർവം വിമാനം വെടിവച്ചിട്ടതായി അസർബൈജാൻ കരുതുന്നില്ല.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.