കസാക്കിസ്ഥാനിൽ വിമാനം തകർന്ന് 38 മരണം : Deepika.com International News |

Click here for detailed news of all items

കസാക്കിസ്ഥാനിൽ വിമാനം തകർന്ന് 38 മരണം

Friday, December 27, 2024 1:47 AM IST

അസ്താന: അസർബൈജാനിൽനിന്ന് തെക്കൻ റഷ്യയിലേക്കു പുറപ്പെട്ട യാത്രാവിമാനം ദുരൂഹസാഹചര്യത്തിൽ കസാക്കിസ്ഥാനിൽ തകർന്ന് 38 പേർ മരിച്ചു. അസർബൈജാൻ എയർലൈൻസ് വിമാനത്തിൽ 67 പേരാണുണ്ടായിരുന്നത്.

ക്രിസ്മസ് ദിനത്തിൽ അസർബൈജാൻ തലസ്ഥാനമായ ബാക്കുവിൽനിന്നു റഷ്യയിലെ ചെചൻ നഗരമായ ഗ്രോസ്നിയിലേക്കാണു വിമാനം യാത്രയാരംഭിച്ചത്. എന്നാൽ നിശ്ചിത പാതയിൽനിന്ന് വ്യതിചലിച്ച വിമാനം നൂറുകണക്കിനു കിലോമീറ്റർ അകലെ കസാക്കിസ്ഥാനിൽ അക്‌താവു നഗരത്തിലെ വിമാനത്താവളത്തിനു മൂന്നു കീലോമീറ്റർ അകലെ അടിയന്തരമായി നിലത്തിറക്കാൻ ശ്രമിക്കവേ തീപിടിച്ചു തകരുകയായിരുന്നു.

കാലാവസ്ഥ മോശമായതിനാലാകാം വിമാനം ദിശ മാറ്റിയതെന്ന് അസൈർബൈജാൻ പ്രസിഡന്‍റ് ഇൽഹാം അലിയേവ് പറഞ്ഞു. പക്ഷിക്കൂട്ടത്തിൽ ഇടിച്ചതുകൊണ്ടാവാം വിമാനം തകർന്നതെന്ന് റഷ്യൻ വൃത്തങ്ങളും പറഞ്ഞു.

അതേസമയം റഷ്യൻ സേന അബദ്ധത്തിൽ വിമാനം വെടിവച്ചിട്ടതാകാമെന്ന് റിപ്പോർട്ടുണ്ട്. റഷ്യൻ വ്യോമപ്രതിരോധ മിസൈൽ മൂലമാകാം വിമാനം തകർന്നതെന്നു വിദഗ്ധർ അഭിപ്രായപ്പെട്ടതായി ബിബിസി റിപ്പോർട്ട് ചെയ്തു. വിമാനം ഇറങ്ങേണ്ടിയിരുന്ന ഗ്രോസ്നി നഗരം അടുത്തിടെ യുക്രെയ്ൻ സേനയുടെ ഡ്രോൺ ആക്രമണത്തിന് ഇരയായിരുന്നു. ‌അസൈർബൈജാൻ, കസാക്കിസ്ഥാൻ, കിർഗിസ്ഥാൻ, റഷ്യൻ പൗരന്മാരാണ് വിമാനത്തിലുണ്ടായിരുന്നത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.