യുഎസുമായി മിസൈൽ അങ്കത്തിനു തയാർ: പുടിൻ : Deepika.com International News |

Click here for detailed news of all items

യുഎസുമായി മിസൈൽ അങ്കത്തിനു തയാർ: പുടിൻ

Friday, December 20, 2024 1:06 AM IST

മോസ്കോ: റഷ്യ പുതുതായി വികസിപ്പിച്ച ഒറെഷ്നിക് ഹൈപ്പർസോണിക് ബാലിസ്റ്റിക് മിസൈലിനെ വെടിവച്ചിടാൻ ഒരു സംവിധാനത്തിനും കഴിയില്ലെന്നും ഇക്കാര്യം തെളിയിക്കാൻ അമേരിക്കയുമായി മിസൈൽ അങ്കത്തിനു തയാറാണെന്നും പ്രസിഡന്‍റ് വ്ലാദിമിർ പുടിൻ. വാർഷിക ചോദ്യോത്തര പരിപാടിയിൽ സംസാരിക്കുകയായിരുന്നു അദ്ദേഹം.

അമേരിക്കൻ മിസൈൽ പ്രതിരോധ സംവിധാനങ്ങളെ മറികടക്കാൻ ഒറെഷ്നിക്കിനു കഴിയും. അമേരിക്കൻ മിസൈലുകളാൽ സംരക്ഷിതമായ ലക്ഷ്യത്തിലേക്ക് ഒറെഷ്നിക്ക് തൊടുത്ത് ഇക്കാര്യം തെളിയിക്കാമെന്നും അത്തരം പരീക്ഷണത്തിനു റഷ്യ തയാറാണെന്നും പുടിൻ പറഞ്ഞു.

റഷ്യ നവംബർ 21ന് യുക്രെയ്നിലെ നിപ്രോ നഗരത്തിലാണ് ഒറെഷ്നിക് മിസൈൽ ആദ്യം പ്രയോഗിച്ചത്. യുക്രെയ്ൻ സേന അമേരിക്കൻ മിസൈലുകൾ റഷ്യൻ ഭൂമിയിൽ പ്രയോഗിച്ചതിനുള്ള മറുപടിയായിരുന്നു ഇത്.

യുക്രെയ്നിലെ ലക്ഷ്യങ്ങളിലേക്കു റഷ്യ കൂടുതൽ അടുത്തുവെന്നും പുടിൻ അവകാശപ്പെട്ടു. യുദ്ധമുന്നണിയിൽ റഷ്യൻ സേന മികച്ച മുന്നേറ്റം നടത്തുന്നു. കാര്യങ്ങളെല്ലാം നാടകീയമായി മാറിക്കൊണ്ടിരിക്കുന്നു. ദിവസം ഒരു ചതുരശ്ര കിലോമീറ്റർ ഭൂമിയെങ്കിലും റഷ്യൻ സേന പിടിച്ചെടുക്കുന്നുണ്ട്. റഷ്യയിലെ കുർസ്ക് പ്രദേശത്ത് അധിനിവേശം നടത്തുന്ന യുക്രെയ്ൻ സേനയെ തുരത്തും.

അമേരിക്കയിലെ പുതിയ പ്രസിഡന്‍റ് ഡോണൾഡ് ട്രംപുമായി കൂടിക്കാഴ്ച നടത്താൻ ഏതു സമയത്തും തയാറാണ്. നാലുവർഷത്തിനിടെ ട്രംപുമായി സംസാരിച്ചിട്ടില്ല.

യുക്രെയ്നുമായും റഷ്യ ചർച്ചയ്ക്കു തയാറാണ്. റഷ്യയെ ദുർബലമാക്കാമെന്നു പാശ്ചാത്യ ശക്തികൾ ധരിക്കേണ്ട. കഴിഞ്ഞ രണ്ടുമൂന്നു വർഷങ്ങളിൽ റഷ്യ ശക്തിപ്പെടുകയാണുണ്ടായത്.

പ്രതിസന്ധികൾക്കിടയിലും റഷ്യൻ സാന്പത്തികരംഗം വികസിക്കുന്നു. എന്നാൽ പണപ്പെരുപ്പം വർധിക്കുന്നതു പ്രശ്നമാണെന്നു പുടിൻ സമ്മതിച്ചു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.