തെരഞ്ഞെടുപ്പിൽ ഒറ്റത്തവണ; 33 വർഷം രാജ്യസഭാംഗം : Deepika.com National News |

Click here for detailed news of all items

തെരഞ്ഞെടുപ്പിൽ ഒറ്റത്തവണ; 33 വർഷം രാജ്യസഭാംഗം

Saturday, December 28, 2024 2:55 AM IST

ന്യൂഡൽഹി: രാജ്യസഭാംഗമായിരിക്കെ 1991ലാണ് ഡോ. മൻമോഹൻ സിംഗ് രാഷ്‌ട്രീയത്തിന്‍റെ പടവുകൾ ചവിട്ടുന്നത്. ഒറ്റത്തവണ മാത്രമാണ് അദ്ദേഹം ലോക്സഭയിലേക്ക് മത്സരിച്ചത്.

1999ൽ സൗത്ത് ഡൽഹി മണ്ഡലത്തിൽനിന്നു ജനവിധി തേടിയ അദ്ദേഹം 29,999 വോട്ടുകൾക്ക് പരാജയപ്പെട്ടു. ബിജെപി നേതാവ് വി.കെ. മൽഹോത്രയായിരുന്നു അദ്ദേഹത്തിന്‍റെ എതിരാളി.പിന്നീട് ഒരിക്കലും അദ്ദേഹം ലോക്സഭയിലേക്ക് മത്സരിച്ചിട്ടില്ല. രാജ്യസഭാംഗമായിരിക്കെയാണ് അദ്ദേഹം രണ്ടു തവണയും പ്രധാനമന്ത്രിയായത്.

ഡോ. മൻമോഹൻ സിംഗിന്‍റെ 33 വർഷം നീണ്ട രാജ്യസഭാ ഇന്നിംഗ്സ് അവസാനിച്ചത് കഴിഞ്ഞ ഏപ്രിൽ മൂന്നിനായിരുന്നു. 1991 ൽ പി.വി. നരസിംഹ റാവു മന്ത്രിസഭയിൽ ധനമന്ത്രിയായി നിയമിതനായ അദ്ദേഹം ആസാമിൽനിന്നാണു രാജ്യസഭയിലെത്തിയത്.

1991 മുതൽ 2019 വരെ ആസാമിനെയും 2019 മുതൽ 2024 വരെ രാജസ്ഥാനെയും പ്രതിനിധീകരിച്ച് അദ്ദേഹം രാജ്യസഭാംഗമായി. ബിജെപി അധികാരത്തിലിരുന്ന 1998 മുതൽ 2004 വരെ രാജ്യസഭാ പ്രതിപക്ഷ നേതാവായിരുന്നു അദ്ദേഹം. 2024 ഏപ്രിലിൽ അദ്ദേഹം ഒഴിഞ്ഞ സീറ്റിലാണ് കോണ്‍ഗ്രസ് മുൻ അധ്യക്ഷ സോണിയ ഗാന്ധി രാജ്യസഭാംഗമാകുന്നത്.

രാജ്യസഭയിൽ നടന്ന നിർണായക വോട്ടെടുപ്പിൽ ഡോ.മൻമോഹൻസിംഗ് വീൽ ചെയറിലെത്തിയത് ശ്രദ്ധ നേടിയിരുന്നു. കേന്ദ്രസർക്കാർ കൊണ്ടുവന്ന നാഷണൽ ക്യാപിറ്റൽ ടെറിട്ടറി ഓഫ് ഡൽഹി ഭേദഗതി ബില്ലിനെതിരേ വോട്ട് ചെയ്യാനാണ് 2023 ഓഗസ്റ്റ് ഏഴിന് അന്ന് 91 കാരനായിരുന്ന മൻമോഹൻസിംഗ് പ്രായാധിക്യം മൂലമുള്ള അവശതകൾ അവഗണിച്ച് വീൽ ചെയറിൽ സഭയിലെത്തിയത്. ഡൽഹി സർക്കാരിന്‍റെ ഭരണകാര്യങ്ങളിൽ കേന്ദ്രസർക്കാരിന്‍റെ അധികാരം വർധിപ്പിക്കുന്ന ഈ ബില്ലിനെതിരേ കോണ്‍ഗ്രസ് അടക്കമുള്ള പ്രതിപക്ഷപാർട്ടികൾ രംഗത്തുവന്നിരുന്നു.

പാർട്ടി എല്ലാ അംഗങ്ങൾക്കും വിപ്പ് നൽകിയതിനെത്തുടർന്നാണ് ബില്ലിനെതിരേ വോട്ട് ചെയ്യാൻ ഡോ. മൻമോഹൻ സിംഗ് രാജ്യസഭയിലെത്തിയത്. വോട്ടെടുപ്പിൽ കേന്ദ്രസർക്കാർ വിജയിക്കുമെന്ന് അറിയാമായിരുന്നിട്ടും വീൽ ചെയറിലെത്തി ഡോ. മൻമോഹൻ സിംഗ് വോട്ട് രേഖപ്പെടുത്തി.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.