കെഎസ്ആർടിസി ഹിതപരിശോധന: വരണാധികാരിയെ നിയമിച്ചു : Deepika.com Kerala News |

Click here for detailed news of all items

കെഎസ്ആർടിസി ഹിതപരിശോധന: വരണാധികാരിയെ നിയമിച്ചു

Thursday, April 3, 2025 3:10 AM IST

പ്രദീപ് ചാത്തന്നൂർ

ചാത്തന്നൂർ: കെഎസ്ആർടിസിയിലെ അംഗീകൃത യൂണിയനുകളെ തെരഞ്ഞെടുക്കുന്നതിനുള്ള വരണാധികാരിയെ നിയോഗിച്ചു.

അഡീഷണൽ ലേബർ കമ്മീഷണർ (ഐആർ) കെ.എം. സുനിലിനെയാണു വരണാധികാരിയായി രജിസ്ട്രാർ ഓഫ് റെക്കഗ്‌നൈസ്ഡ് ട്രേഡ് യൂണിയൻകൂടിയായ ലേബർ കമ്മീഷണർ തിങ്കളാഴ്ച നിയമിച്ചത്.

അഞ്ചു ദിവസത്തിനകം നടപടിക്രമങ്ങൾ പൂർത്തിയാക്കി തെരഞ്ഞെടുപ്പു വിജ്ഞാപനം പുറപ്പെടുവിക്കണം. അന്നുമുതൽ ഏഴ് ദിവസത്തിനകം വോട്ടർ പട്ടിക പരിശോധിച്ച് വോട്ടർമാരെ നിശ്ചയിക്കണം. വരണാധികാരിയെ നിയമിച്ച ദിവസം മുതൽ 40 ദിവസത്തിനകം ഹിതപരിശോധന പൂർത്തിയാക്കി റിപ്പോർട്ട് ലേബർ കമ്മീഷണർക്കു നല്കണമെന്നുമാണു വരണാധികാരിക്കുള്ള ഉത്തരവ്.

കഴിഞ്ഞ തവണ നടന്ന ഹിതപരിശോധനയിൽ മൂന്നു യൂണിയനുകൾക്കാണ് അംഗീകാരം ലഭിച്ചത്. ഒരു ഹിതപരിശോധനയുടെ കാലാവധി മൂന്നുവർഷമാണ്. കഴിഞ്ഞ തവണ നടന്ന ഹിതപരിശോധനയുടെ കാലാവധി കഴിഞ്ഞിട്ട് ഒന്നേകാൽ വർഷത്തിലേറെയായി. ഹിതപരിശോധന നീണ്ടു പോയ കാലയളവിൽ അംഗീകൃത യൂണിയനുകൾ ഇല്ല എന്ന അവസ്ഥയായിരുന്നു.

വരണാധികാരെ നിയമിക്കും മുമ്പുതന്നെ ലേബർ കമ്മീഷണർ ഹിതപരിശോധനയുടെ നടപടിക്രമങ്ങൾ ആരംഭിച്ചിരുന്നു. കെഎസ്ആർടിസിയിലെ രജിസ്റ്റേർഡ് ട്രേഡ് യൂണിയനുകളുടെ പ്രതിനിധികളുടെ യോഗം ചേരുകയും ഹിത പരിശോധനയിൽ പങ്കെടുക്കാൻ താത്പര്യമുള്ള യൂണിയനുകളിൽനിന്ന് 1100 രൂപ ഫീസ് സഹിതം അപേക്ഷ (ഫോം എ) സ്വീകരിക്കുകയും ചെയ്തു.

അടുത്ത ഘട്ടമായി അപേക്ഷകൾ പരിശോധിക്കുകയും മത്സരിക്കാൻ അർഹതയുള്ള യൂണിയനുകളുടെ (ഫോം ഡി) തയാറാക്കുകയും ചെയ്തിരുന്നു. വരണാധികാരി അഞ്ചിനു മുമ്പ് തിെരഞ്ഞെടുപ്പു വിജ്ഞാപനം പുറപ്പെടുവിക്കും. മേയ് 10നു മുമ്പ് ഹിതപരിശോധന നടപടികൾ പൂർത്തിയാകും.

എംപ്ലോയീസ് അസോസിയേഷൻ (സിഐടിയു), ഐഎൻടിയുസി നേതൃത്വത്തിലുള്ള ടിഡിഎഫ്, എംപ്ലോയീസ് സംഘ് (ബിഎംഎസ് ) എന്നീ സംഘടനകൾക്കാണു ജീവനക്കാരുടെ അംഗീകാരം ലഭിച്ചത്. ബിഎംഎസിന് ആദ്യമായാണ് അംഗീകാരം ലഭിച്ചത്.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.