ലൂക്കാ ഡാൻസ് ക്ലാസിന് തുടക്കം : Deepika.com Nri News Europe

ലണ്ടൻ: ലൂട്ടന്‍ കേരള അസോസിയേഷന്‍റെ (ലൂക്കാ) ഡാൻസ് ക്ലാസിന് തുടക്കം. കുട്ടികളും രക്ഷിതാക്കളും ഉൾപ്പെട്ട സദസിനെ സാക്ഷിനിർത്തി മേയ് 12നാണ് ഡാൻസ് ക്ലാസിന് തുടക്കം കുറിച്ചത്.

പ്രശസ്ത നർത്തകിയും അവതാരകയുമായ അനുശ്രീ എസ്.നായരാണ് ഡാൻസ് ടീച്ചർ. ആദ്യ ദിവസം തന്നെ നിരവധി മാതാപിതാക്കൾ കുട്ടികളുമായി നൃത്ത പഠനത്തിന് എത്തിച്ചേർന്നു.

വിവിധ നൃത്തരൂപങ്ങൾ അഭ്യസിക്കേണ്ടതിന്‍റെ പ്രാധാന്യത്തെക്കുറിച്ചും അത് കുട്ടികളിൽ വരുത്തുന്ന വ്യക്തിത്വ വികാസത്തെക്കുറിച്ചും അനുശ്രീ കുട്ടികൾക്കും മാതാപിതാക്കൾക്കും വിശദമാക്കികൊടുത്തു.

കഴിഞ്ഞ ആഴ്ചകളിൽ ആരംഭിച്ച മ്യൂസിക്, മലയാളം ക്ലാസുകളുടെ തുടർച്ചയായി എല്ലാ വെള്ളിയാഴ്ചകളിലും വൈകുന്നേരമാണ് ഡാൻസ് ക്ലാസുകൾ നടത്തുക എന്ന് അസോസിയേഷന്‍ പ്രസിഡന്‍റ് അലോഷ്യസ് ഗബ്രിയേല്‍ അറിയിച്ചു.

ഡിനി തൃപ്രയാർ സുനിൽദത്തിന്‍റെ ശിക്ഷണത്തിൽ നടക്കുന്ന ലൂക്കാ മ്യൂസിക് ക്ലാസും ലൂക്കാ അധ്യാപകരുടെ തന്നെ ശിക്ഷണത്തിൽ നടക്കുന്ന ലൂക്കാ മലയാളം ക്ലാസും കുട്ടികളും മാതാപിതാക്കളും നല്ലരീതിയിൽ പ്രയോജനപ്പെടുത്തണമെന്ന് അദ്ദേഹം ഓർമിപ്പിച്ചു.

ക്ലാസിക്കൽ ഡാൻസിനൊപ്പം ബോളിവുഡ് ഡാൻസും ക്ലാസിന്‍റെ ഭാഗമായി പ്രത്യേകമായി പഠിപ്പിക്കുന്നതാണെന്ന് അലോഷ്യസ് അറിയിച്ചു.

മ്യൂസിക്, മലയാളം ക്ലാസുകൾക്കൊപ്പം ഡാൻസ് ക്ലാസുകളും നല്ല രീതിയിൽ മുന്നോട്ടു പോകുന്നതിന് എല്ലാവരുടെയും സഹകരണം അസോസിയേഷന്‍ സെക്രട്ടറി ജോർജ് കുര്യൻ അഭ്യർഥിച്ചു.

ക്ലാസ് തുടങ്ങിയ ആദ്യ ദിനം തന്നെ ക്ലാസിക്കൽ ഡാൻസും ബോളിവുഡ് ഡാൻസും തങ്ങൾക്കു വഴങ്ങുമെന്ന് ലൂക്കയിലെ കുട്ടികൾ തെളിയിച്ചു.

അംഗ ചലനങ്ങൾക്കൊപ്പം ഭാവ വ്യതാസങ്ങളും പ്രകടമാക്കി ഡാൻസ് ടീച്ചറായ അനുശ്രീക്കൊപ്പം കുട്ടികൾ നൃത്തച്ചുവടുകൾ വച്ചത് കണ്ടുനിന്ന മാതാപിതാക്കൾക്കൊപ്പം ലൂക്കാ ഭാരവാഹികൾക്കും നവ്യാനുഭവമായി.