വിജ്ഞാന പത്തനംതിട്ട: മെഗാ തൊഴില്‍മേളയ്ക്കു റാന്നിയില്‍ തുടക്കമായി
1443855
Sunday, August 11, 2024 3:59 AM IST
റാന്നി: വിജ്ഞാന പത്തനംതിട്ട മെഗാ തൊഴില്‍മേളയ്ക്കു റാന്നി സെന്‍റ് തോമസ് കോളജില്‍ തുടക്കമായി. രണ്ടുദിവസമായി നടക്കുന്ന മേളയുടെ ആദ്യദിനം രണ്ടായിരത്തിലധികം ഉദ്യോഗാര്ഥികളാണ് പങ്കെടുത്തത്.
മേളയുടെ ഉദ്ഘാടനം പ്രമോദ് നാരായണ്‍ എംഎല്‍എയും ഫൗണ്ടിറ്റ് ടാലന്‍റ് ആക്‌സിലറേഷന്‍ പോഗ്രാം ലോഞ്ചിംഗ് ഉദ്ഘാടനം കെ.യു. ജനീഷ് കുമാര്‍ എംഎല്‍എയും നിര്‍വഹിച്ചു എംഎല്‍എ രാജു ഏബ്രഹാം അധ്യക്ഷത വഹിച്ചു.
38 സ്വകാര്യ സ്ഥാപനങ്ങളുടെ 89 തരം തസ്തികകളിലേക്കുള്ള 18,203 ഒഴിവുകളിലേക്കാണ് ഇന്‍റര്‍വ്യൂ നടക്കുന്നത്. വിജ്ഞാന പത്തനംതിട്ട, മൈഗ്രേഷന്‍ കോണ്‍ക്ലേവ്, കുടുംബശ്രീ, നോളജ് മിഷന്‍ എന്നിവരുടെ നേതൃത്വത്തില്‍ റാന്നി സെന്‍റ് തോമസ് കോളജിന്‍റെ അറുപതാമത് വാര്‍ഷിക ആഘോഷങ്ങളുടെ ഭാഗമായാണ് തൊഴില്‍മേളയ്ക്കു വേദിയൊരുക്കിയിരിക്കുന്നത്.
എസ്എസ്എല്‍സി, പ്ലസ് ടു, ഐടിഐ, ഡിപ്ലോമ, ബിരുദം , ബിരുദാനന്തര ബിരുദം യോഗ്യതയുള്ളവരാണ് തൊഴില്‍മേളയില്‍ ഇന്‍റര്‍വ്യൂവിന് തയാറായി എത്തിയത്. ഓണ്‍ലൈന്‍ വഴിയും നേരിട്ടുമുള്ള അഭിമുഖങ്ങള്‍ ഉണ്ടായിരുന്നു.
ഇന്‍റര്‍വ്യൂവിന് എത്തുന്ന ഉദ്യോഗാര്ഥികള്ക്ക് പേര് രജിസ്റ്റര്‍ ചെയ്യുന്നതിന് പ്രത്യേകം കൗണ്ടറുകളും ഇന്‍റര്‍വ്യൂവിന് ക്ഷണിക്കുന്നതു വരെ വിശ്രമിക്കുന്നതിനുള്ള മുറികളും സജ്ജീകരിച്ചിരുന്നു.
എല്‍ ആന്‍ഡ് ടി, ടെക്ക് മഹേന്ദ്ര, മണിമുറ്റം, ബിഎസ്എ സൈക്കിള്‍, സിയറ്റ് ടയര്‍, ആക്‌സിസ് ബാങ്ക്, ടിവിഎസ്, എവിജി മോട്ടേഴ്‌സ് ഉള്‍പ്പെടെയുള്ള കമ്പനികളാണ് പങ്കെടുത്തത്. അഭിമുഖങ്ങളെ നേരിടാനും പ്രശ്‌നങ്ങള്‍ പരിഹരിച്ച് കൂടുതല്‍ തയാറെടുപ്പ് നടത്തുന്നതിനും കുട്ടികള്‍ക്ക് മേളയുടെ ഭാഗമായി പരിശീലനവും നല്‍കി. തൊഴില്‍മേള ഇന്നും തുടരും.
മൈഗ്രേഷന്‍ കോണ്‍ക്ലേവ് രക്ഷാധികാരി ഡോ. ടി.എം. തോമസ് ഐസക്, സിപിഎം ജില്ലാ സെക്രട്ടറി കെ.പി. ഉദയഭാനു, മുന്‍ എംഎല്‍എ എ. പത്മകുമാര്‍, ജില്ലാ പഞ്ചായത്ത് പ്രസിഡന്‍റ് രാജി പി. രാജപ്പന്‍, ബ്ലോക്ക് പഞ്ചായത്ത് പ്രസിഡന്‍റ് കെ.എസ്. ഗോപി, കോളജ് മാനേജര്‍ പ്രഫ. സന്തോഷ് കെ. തോമസ്,
പ്രിന്‍സിപ്പല്‍ സ്‌നേഹ എല്‍സി ജേക്കബ്, ആര്‍. സനല്‍ കുമാര്‍, കോണ്‍ക്ലേവ് വൈസ് ചെയര്‍മാന്‍ റോഷന്‍ റോയി മാത്യു, ഗ്രാമപഞ്ചായത്ത് പ്രസിഡന്‍റുമാരായ കെ.ആര്‍. പ്രകാശ്, ബിന്ദു റെജി, ഉഷ സുരേന്ദ്രനാഥ്, ബി. ഹരികുമാര്‍ എന്നിവര്‍ പ്രസംഗിച്ചു.