ജന്മഗൃഹമൊരുങ്ങി : അൽഫോൻസാ തീർഥാടനം ഇന്ന്

കുടമാളൂർ: വിശുദ്ധ അൽഫോൻസാമ്മയുടെ ജന്മംകൊണ്ട് അനുഗൃഹീതമായ പുണ്യഭൂമിയിലേക്ക് ഇന്ന് ആയിരങ്ങൾ തീർഥയാത്ര നടത്തും. ചങ്ങനാശേരി അതിരൂപത ചെറുപുഷ്പ മിഷൻലീഗിന്‍റെ നേതൃത്വത്തിൽ കുടമാളൂർ അൽഫോൻസാ ജന്മഗൃഹത്തിലേക്കു നടത്തുന്ന 36-ാമത് അൽഫോൻസാ തീർഥാടനം ഇന്നു നടക്കും.

തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളിൽനിന്നുള്ള ചങ്ങനാശേരി അതിരൂപതാംഗങ്ങൾ തീർഥാടനത്തിൽ പങ്കെടുക്കും. അൽഫോൻസാമ്മ മാമ്മോദീസ സ്വീകരിച്ച കുടമാളൂർ ഫൊറോനാ പള്ളിയും തീർഥാടകർ സന്ദർശിക്കും. ജന്മഗൃഹവും കുടമാളൂർ പള്ളിയും തീർഥാടകരെ വരവേൽക്കാൻ ഒരുങ്ങി.

കുടമാളൂർ മേഖലാ തീർഥാടനമാണ് ആദ്യം ജന്മഗൃഹത്തിൽ എത്തുന്നത്. രാവിലെ ആറിന് വിവിധ ഇടവകകളിൽനിന്ന് ആരംഭിക്കുന്ന തീർഥാടനം 6.45ന് പനമ്പാലം സെന്‍റ് മൈക്കിൾസ് ചാപ്പലിൽ സംഗമിച്ച് 7.15ന് ജന്മഗൃഹത്തിൽ പ്രവേശിക്കും.

വെളുപ്പിന് 5.30ന് കോട്ടയ്ക്കുപുറം, വെട്ടിമുകൾ, ചെറുവാണ്ടൂർ പള്ളികളിൽ നിന്നും 6.30ന് അതിരമ്പുഴ ഫൊറോനാ പള്ളിയിൽനിന്നും ആരംഭിക്കുന്ന തീർഥാടനം 8.30ന് ആർപ്പൂക്കര അമ്പലക്കവലയിൽ ഒത്തുചേർന്ന് 9.30ന് ജന്മഗൃഹത്തിൽ എത്തിച്ചേരും.

എടത്വാ, ചമ്പക്കുളം, ആലപ്പുഴ, പുളിങ്കുന്ന്, മുഹമ്മ മേഖലകളിലെ തീർഥാടകർ രാവിലെ 9.45ന് മാന്നാനം ആശ്രമ ദേവാലയത്തിൽ സംഗമിക്കും. ആശ്രമം പ്രിയോർ റവ.ഡോ. കുര്യൻ ചാലങ്ങാടി കാർമികത്വം വഹിക്കുന്ന പ്രാർഥനാ ശുശ്രൂഷയ്ക്കു ശേഷം 10.20ന് അവിടെനിന്ന് ആരംഭിക്കുന്ന തീർഥാടനം 12ന് ജന്മഗൃഹത്തിൽ എത്തും.

കോട്ടയം, നെടുങ്കുന്നം, മണിമല, തൃക്കൊടിത്താനം, ചെങ്ങന്നൂർ മേഖലകളിൽ നിന്നുള്ള തീർഥാടകർ രാവിലെ 8.45ന് കോട്ടയം സിഎംഎസ് ഹൈസ്കൂൾ ഗ്രൗണ്ടിൽ സംഗമിച്ച് 10.30ന് കുടമാളൂർ പള്ളിയിൽ എത്തി വിശുദ്ധ കുർബാനയ്ക്കു ശേഷം ജന്മഗൃഹത്തിൽ എത്തിച്ചേരും.

ചങ്ങനാശേരി, തുരുത്തി മേഖലാ തീർഥാടനം വെളുപ്പിന് 5.45ന് പാറേൽ മരിയൻ തീർഥാടന കേന്ദ്രത്തിൽനിന്ന് ആരംഭിക്കും. ഉച്ചയ്ക്ക് 12ന് സിഎംഎസ് ഹൈസ്‌കൂൾ ഗ്രൗണ്ടിൽ കുറുമ്പനാടം മേഖലാ തീർഥാടനവുമായി സംഗമിച്ച് ഉച്ചകഴിഞ്ഞ് 2.30ന് ജന്മഗൃഹത്തിൽ എത്തിച്ചേരും. അമ്പൂരി, തിരുവനന്തപുരം, കൊല്ലം - ആയൂർ മേഖലകളിലെ തീർഥാടകർ വിവിധ സമയങ്ങളിൽ തീർഥാടനം നടത്തും.

വൈകുന്നേരം ചെറുപുഷ്പ മിഷൻ ലീഗ് അതിരൂപതാ ഡയറക്ടർ റവ.ഡോ. ആൻഡ്രൂസ് പാണംപറമ്പിൽ, അസി. ഡയറക്ടർമാരായ ഫാ. മാത്യു പുളിക്കൽ, ഫാ. ജോസഫ് പൊന്നാറ്റിൽ എന്നിവരുടെ കാർമികത്വത്തിൽ അർപ്പിക്കുന്ന വിശുദ്ധ കുർബാനയോടെ തീർഥാടന പരിപാടകൾ സമാപിക്കും.

കുടമാളൂർ പള്ളിയിൽ രാവിലെ 5.15നും 10.30നും ഉച്ചകഴിഞ്ഞ് ഒന്നിനും അൽഫോൻസാ ജന്മഗൃഹത്തിൽ രാവിലെ 7.15നും 9.45നും ഉച്ചയ്ക്ക് 12നും ഉച്ചകഴിഞ്ഞ് 2.30നും 4.30നും വിശുദ്ധ കുർബാന അർപ്പിക്കും. കർദിനാൾ മാർ ജോർജ് ആലഞ്ചേരി, ചങ്ങനാശേരി അതിരൂപത സഹായ മെത്രാൻ മാർ തോമസ് തറയിൽ,

സിഞ്ചെല്ലൂസ് ഫാ. ജോസഫ് വാണിയപ്പുരയ്ക്കൽ, ആർച്ച് പ്രീസ്റ്റ് റവ.ഡോ. മാണി പുതിയിടം, അതിരമ്പുഴ ഫൊറോനാ വികാരി റവ.ഡോ. ജോസഫ് മുണ്ടകത്തിൽ, ചെറുപുഷ്പ മിഷൻലീഗ് അതിരൂപത ഡയറക്ടർ റവ.ഡോ. ആൻഡ്രൂസ് പാണംപറമ്പിൽ എന്നിവർ വിവിധ സമയങ്ങളിൽ വിശുദ്ധ കുർബാനമധ്യേ സന്ദേശം നൽകും.