ADVERTISEMENT

ADVERTISEMENT

കുട്ടിക്കുന്ന് അങ്കണവാടി കെട്ടിടം ഉദ്ഘാടനം ചെയ്തു

കൽപ്പറ്റ: നഗരസഭ 2024-25 വാർഷിക പദ്ധതിയിൽ കുട്ടിക്കുന്ന് അങ്കണവാടിക്കു നിർമിച്ച കെട്ടിടം ടി. സിദ്ദിഖ് എംഎൽഎ ഉദ്ഘാടനം ചെയ്തു. നഗരസഭാ ചെയർമാൻ ടി.ജെ. ഐസക് അധ്യക്ഷത വഹിച്ചു.

വികസനകാര്യ സ്റ്റാൻഡിംഗ് കമ്മിറ്റി ചെയർമാൻ മുജീബ് കെയെംതൊടി, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ ആയിഷ പള്ളിയാലിൽ, ആരോഗ്യ സ്റ്റാൻഡിംഗ് കമ്മിറ്റി ചെയർമാൻ എ.പി. മുസ്തഫ, പൊതുമരാമത്ത് സ്റ്റാൻഡിംഗ് കമ്മിറ്റി ചെയർപേഴ്സണ്‍ രാജാറാണി, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സി.കെ. ശിവരാമൻ, ഐസിഡിഎസ് പ്രോഗ്രാം ഓഫീസർ ഹഫ്സത്ത്,

മുനിസിപ്പൽ സെക്രട്ടറി അലി അസ്കർ, ശിശു വികസന പദ്ധതി ഓഫീസർ സന്ധ്യ, മുനിസിപ്പൽ എൻജിനിയർ മുനവർ, ഐസിഡിഎസ് സൂപ്പർവൈസർ എൻ.പി. ഗീത തുടങ്ങിയവർ പങ്കെടുത്തു.

നഗരസഭയിലെ സൈക്കോ സോഷ്യൽ കൗണ്‍സലർമാരുടെ നേതൃത്വത്തിൽ ലഹരിക്കെതിരേ സ്റ്റിക്കർ, സിഗ്നേച്ചർ കാന്പയിൻ സംഘടിപ്പിച്ചു.

ADVERTISEMENT

ബ്രഹ്മഗിരി സൊസൈറ്റി: പണം നൽകിയവരുടെ പ്രതീക്ഷ മങ്ങുന്നു

കൽപ്പറ്റ: വിവിധ പ്രോജക്ടുകളിൽ മുടക്കുന്നതിന് ബ്രഹ്മഗിരി ഡവലപ്മെന്‍റ് സൊസൈറ്റിക്ക് പണം നൽകിയവരിൽ പ്രതീക്ഷ മങ്ങുന്നു. വിരമിച്ച ഉദ്യോഗസ്ഥർ, കർഷകർ, തൊഴിലാളികൾ എന്നിവരിൽനിന്നും സ്ഥാപനങ്ങളിൽനിന്നും പലിശ വാഗ്ദാനം ചെയ്തു കൈപ്പറ്റിയ തുക ഏപ്പോൾ തിരികെ നൽകുമെന്ന് വ്യക്തതയോടെ പറയാൻ സൊസൈറ്റി മാനേജ്മെന്‍റിനു കഴിയുന്നില്ല. നിലവിൽ അടഞ്ഞുകിടക്കുന്ന മഞ്ഞാടിയിലെ ഫാക്ടറി പ്രവർത്തനം പുനരാരംഭിച്ച് ലാഭത്തിലോടുന്ന മുറയ്ക്ക് മുതലും പലിശയും ഘട്ടങ്ങളായി നൽകുമെന്ന നിലപാടിലാണ് മാനേജ്മെന്‍റ്. അതേസമയം ഫാക്ടറി പ്രവർത്തനക്ഷമമാക്കാനുള്ള നീക്കങ്ങൾ എങ്ങുമെത്തുന്നില്ല. ഫാക്ടറി പ്രവർത്തിപ്പിക്കുന്നതിന് മുന്പ് സ്വകാര്യ സംരംഭകനുമായി ഏർപ്പെട്ട കരാർ റദ്ദാകുകയാണ് ചെയ്തത്. പിന്നീട് ഫാക്ടറി നടത്തിപ്പ് സ്വകാര്യ മേഖലയിലെ ധനകാര്യ സ്ഥാപനത്തെ ഏൽപ്പിക്കുന്നതിന് നീക്കം നടത്തിയെങ്കിലും ലക്ഷ്യത്തിലെത്തിയില്ല. കഴിഞ്ഞ ദിവസം സൊസൈറ്റിയുടെ പാതിരിപ്പാലം ഓഫീസിലെത്തി മുതലും പലിശയും തിരികെ ആവശ്യപ്പെട്ടവർക്ക് നിരാശയോടെ മടങ്ങേണ്ട സ്ഥിതിയാണുണ്ടായത്. ആർക്കും ഒരു വിധത്തിലുള്ള ഉറപ്പും നൽകാൻ ഓഫീസിൽ ഉണ്ടായിരുന്നവർക്ക് കഴിഞ്ഞില്ല. സിപിഎമ്മിന്‍റെ പരോക്ഷ നിയന്ത്രണത്തിൽ പതിറ്റാണ്ടുകൾ മുന്പ് പ്രവർത്തനം തുടങ്ങിയതാണ് ബ്രഹ്മഗിരി ഡവലപ്മെന്‍റ് സൊസൊറ്റി. സിപിഎം നേതാവും ബത്തേരി എംഎൽഎയുമായിരുന്ന അന്തരിച്ച പി.വി. വർഗീസ് വൈദ്യരാണ് സൊസൈറ്റി സ്ഥാപക ചെയർമാൻ. ക്ഷീരകർഷകരുടെ വരുമാനം വർധിപ്പിക്കുന്നതിനുള്ള പരിപാടികളാണ് തുടക്കത്തിൽ സൊസൈറ്റി നടത്തിയത്. പിന്നീട് മലബാർ മീറ്റ്, വയനാട് കോഫി, ഫാർമേഴ്സ് ട്രേഡ് മാർക്കറ്റ് തുടങ്ങിയ പദ്ധതികൾ നടപ്പാക്കി. കേരള ചിക്കൻ പ്രോജക്ടിന്‍റെ നോഡൽ എജൻസിയായും പ്രവർത്തിച്ചു. വിവിധ പ്രോജക്ടുകളുടെ നിർവഹണത്തിനാണ് സൊസൈറ്റി വ്യക്തികളിൽനിന്നും സ്ഥാപനങ്ങളിൽനിന്നുമടക്കം പണം പലിശയ്ക്കു വാങ്ങിയത്. 2016നും 2019നും ഇടയിലായിരുന്നു ഇത്. വായ്പ ഇനത്തിൽ 600ൽപരം വ്യക്തികൾക്കും പത്ത് സഹകരണ ബാങ്കുകളടക്കം ധനകാര്യ സ്ഥാപനങ്ങൾക്കും 70 കോടിയിലധികം രൂപയാണ് സൊസൈറ്റി നൽകാനുള്ളത്. വ്യക്തിഗതമായി സൊസൈറ്റിക്കു പണം നൽകിയവരിൽ ഭൂരിപക്ഷവും വിരമിച്ച സിപിഎം അനുഭാവികളായ സർക്കാർ ഉദ്യോഗസ്ഥരും അധ്യാപകരുമാണ്. മക്കളുടെ വിദ്യാഭ്യാസം, വിവാഹം, വീടുപണി, ചികിത്സ തുടങ്ങിയ ആവശ്യങ്ങൾക്ക് കരുതിവച്ച പണം അപ്പാടെ സൊസൈറ്റിക്കു നൽകിയവർ വെട്ടിലായിരിക്കയാണ്. ഡയറക്ടർ ബോർഡ് അംഗങ്ങളിൽ ഏറെയും സിപിഎം അംഗങ്ങളോ അനുഭാവികളോ ആയിരുന്നിട്ടും സൊസൈറ്റിയെ പ്രതിസന്ധിയിൽനിന്നു കരകയറ്റുന്നതിനും വ്യക്തികളിൽനിന്നും മറ്റും വാങ്ങിയ പണം തിരികെ കൊടുപ്പിക്കുന്നതിനും പാർട്ടിതലത്തിൽ കാര്യമായ ഇടപെടൽ ഉണ്ടാകുന്നില്ല. ബ്രഹ്മഗിരിയിൽ 1.5 കോടി രൂപ നിക്ഷേപിച്ച പ്രവാസി സംഘടനയുടെ ഭാരവാഹികൾ മാസങ്ങൾ മുന്പ് സിപിഎം സംസ്ഥാന സെക്രട്ടറിയെ നേരിൽക്കണ്ട് പ്രശ്നപരിഹാരത്തിനു ഇടപെടണമെന്ന് അഭ്യർഥിച്ചിരുന്നു. പാർട്ടി സെക്രട്ടറി ചുമതലപ്പെടുത്തിയനുസരിച്ച് ധനമന്ത്രി സൊസൈറ്റി ആസ്ഥാനത്ത് എത്തി സാഹചര്യങ്ങൾ വിലയിരുത്തുകയുമുണ്ടായി. എന്നിട്ടും സൊസൈറ്റിക്കു പണം നൽകിയവർക്ക് ആശ്വാസം പകരുന്ന നീക്കങ്ങൾ പാർട്ടിതലത്തിൽ ഉണ്ടായില്ല. സൊസൈറ്റി നേരിടുന്ന പ്രതിസന്ധിയിൽ പാർട്ടിക്ക് ഉത്തരവാദിത്വമില്ലെന്ന നിലപാടാണ് നേതാക്കളിൽ ചിലർ സ്വീകരിച്ചത്. ധനവിനിയോഗത്തിലെ പിടിപ്പുകേടും പ്രോജക്ടുകളിൽ പലതും പരാജയപ്പെട്ടതുമാണ് സൊസൈറ്റിക്കുണ്ടായ ദുര്യോഗത്തിനു പ്രധാന കാരണങ്ങളായി ജില്ലയിൽ പൊതുരംഗത്തുള്ളവരിൽ പലരും വിലയിരുത്തുന്നത്. നിർവഹണത്തിലെ വീഴ്ചയാണ് പ്രോജക്ടുകൾ നഷ്ടത്തിലാക്കിയതെന്നു അവർ പറയുന്നു. മലബാർ മീറ്റ് പ്ലാന്‍റ് യാഥാർഥ്യമാക്കുന്നതിനു മാത്രം 4.21 കോടി രൂപ കുടുംബശ്രീ യൂണിറ്റുകൾ, ക്ഷീര സംഘങ്ങൾ എന്നിവയിൽനിന്നും വ്യക്തികളിൽനിന്നും സൊസൈറ്റി സമാഹരിച്ചിരുന്നു. ഈ ബാധ്യത നിലനിൽക്കെയാണ് വിരമിച്ച ജീവനക്കാരിൽനിന്നടക്കം വൻ തുക വായ്പയായും മറ്റും സ്വീകരിച്ചത്. സൊസൈറ്റിക്കു നൽകിയ പണം തിരിച്ചുപിടിക്കുന്നതിന് ചിലർ ജില്ലാ കളക്ടർക്കും തുടർന്ന് നവകേരള സദസിലും നൽകിയ പരാതികൾ ഫലം ചെയ്തില്ല. വൻതുക ലഭിക്കാനുള്ള ചിലർ കോടതിയിൽനിന്നു ബ്രഹ്മഗിരി സൊസൈറ്റിയുടെ വസ്തുക്കളിൽ അറ്റാച്ച്മെന്‍റ് ബിഫോർ ജഡ്ജ്മെന്‍റ് ഉത്തരവ് നേടിയിട്ടുണ്ട്. സൊസൈറ്റിക്കു പണം നൽകിയവരിൽ ചിലർ ചേർന്ന് കർമ സമിതി രൂപീകരിച്ചിരുന്നു. സമിതി നേതൃത്വം സൊസൈറ്റി മാനേജ്മെന്‍റിൽ ചെലുത്തുന്ന സമ്മർദം വിലപ്പോകുന്നില്ല. സൊസൈറ്റി സമാഹരിച്ച തുകയുടെ വിനിയോഗത്തിൽ സമഗ്രാന്വേഷണം ഉണ്ടാകണമെന്ന് അഭിപ്രായപ്പെടുന്നവർ നിരവധിയാണ്. സിപിഎം നിലപാട് വ്യക്തമാക്കണമെന്ന് ഡിസിസി പ്രസിഡന്‍റ് കൽപ്പറ്റ: ബ്രഹ്മഗിരി ഡെവലപ്മെന്‍റ് സൊസൈറ്റിയിലെ നിക്ഷേപകർ പ്രത്യക്ഷ സമരത്തിലേക്ക് നീങ്ങിയ സാഹചര്യത്തിൽ സിപിഎം നേതാക്കൾ നിലപാട് വ്യക്തമാക്കണമെന്ന് ഡിസിസി പ്രസിഡന്‍റ് എൻ.ഡി. അപ്പച്ചൻ ആവശ്യപ്പെട്ടു. നിക്ഷേപരുടെ സമരത്തിന് കോണ്‍ഗ്രസ് പിന്തുണ നൽകുമെന്ന് അദ്ദേഹം പറഞ്ഞു. വിരമിച്ച ഉദ്യോഗസ്ഥരിൽനിന്നടക്കം കോടിക്കണക്കിന് രൂപയാണ് സൊസൈറ്റി നിക്ഷേപമായി സ്വീകരിച്ചത്. നിക്ഷേപം തിരികെ ലഭ്യമാക്കണമെന്ന് നിക്ഷേപകർ നിരന്തരം ആവശ്യപ്പെട്ടിട്ടും സിപിഎം നിയന്ത്രണത്തിലുള്ള സൊസൈറ്റിയുടെ ഭാഗത്ത് നടപടി ഉണ്ടാകുന്നില്ല. നവകേരളസദസിൽ നൽകിയ പരാതികളും വെറുതെയായി. സർക്കാർ ഓരോ ബജറ്റിലും കോടിക്കണക്കിന് രൂപയാണ് സൊസൈറ്റിക്ക് അനുവദിക്കുന്നത്. ഇതുസംബന്ധിച്ച് വ്യക്തതയില്ലാത്ത സ്ഥിതിയാണുള്ളത്. ചെറുതും വലുതുമായ നിക്ഷേപകരിൽ പലരുടെയും ജീവിതം വഴിമുട്ടിയിരിക്കയാണ്. നിക്ഷേപം എത്രയും വേഗം തിരികെ നൽകി പ്രശ്നം പരിഹരിക്കാൻ ഉത്തരവാദപ്പെട്ടവർ തയാറാകണമെന്നും അപ്പച്ചൻ ആവശ്യപ്പെട്ടു.

എംഡിഎംഎയുമായി യുവാവ് പിടിയിൽ

മാനന്തവാടി: എംഡിഎംഎയും കഞ്ചാവുമായി യുവാവ് പോലീസ് പിടിയിലായി. കുറ്റ്യാടി പാലേരി കോലായിപ്പൊയിൽ അഞ്ചൽ റോഷനെയാണ്(32)തൊണ്ടർനാട് പോലീസ് അറസ്റ്റുചെയ്തത്. ഇയാളിൽനിന്നു 13.86 ഗ്രാം എംഡിഎംഎയും 1.1 ഗ്രാം കഞ്ചാവും പിടിച്ചെടുത്തു. കഴിഞ്ഞദിവസം കുറ്റ്യാടി ഭാഗത്തുനിന്നു മോട്ടോർ സൈക്കിളിൽ വരികയായിരുന്ന ഇയാളെ തൊണ്ടർനാട് ഭാഗത്ത് തടഞ്ഞുനിർത്തി പരിശോധിച്ചപ്പോളാണ് ഷോൾഡർ ബാഗിൽ ലഹരിവസ്തുക്കൾ കണ്ടെത്തിയത്. ഇൻസ്പെക്ടർ എസ്. അഷ്റഫ്, എസ്ഐ മാരായ കെ.പി. അബ്ദുൾ അസീസ്, ഇ. പ്രശാന്ത്, സീനിയർ സിവിൽ പോലീസ് ഓഫീസർ ഇ.എ. യൂനസ്, സിപിഒ മാരായ പി.ആർ. സുധീഷ്, വിമൽജിത്ത് എന്നിവരടങ്ങുന്ന സംഘമാണ് പ്രതിയെ കസ്റ്റഡിയിലെടുത്തത്.

രാസലഹരിയുമായി യുവാവ് അറസ്റ്റിൽ

സുൽത്താൻ ബത്തേരി: 15.1 ഗ്രാം മെത്താംഫിറ്റാമിനുമായി യുവാവ് എക്സൈസ് പിടിയിലായി. പടിഞ്ഞാറത്തറ വൈശാലിമുക്ക് വി. രഹനാസിനെയാണ്(29) എക്സൈസ് സർക്കിൾ ഇൻസ്പെക്ടർ എസ്. സമീർ, ഇന്‍റലിജൻസ് ഇൻസ്പെക്ടർ വി.കെ. മണികണ്ഠൻ എന്നിവരുടെ നേതൃത്വത്തിലുള്ള സംഘം കഴിഞ്ഞ ദിവസം ദേശീയപാതയിലെ മുത്തങ്ങ പൊൻകുഴിയിൽനിന്നു അറസ്റ്റുചെയ്തത്. മൈസൂരുവിൽനിന്നു കോഴിക്കോടിനുള്ള കേരള ആർടിസി ബസിൽ പരിശോധനയിലാണ് യാത്രക്കാരനായ രഹനാസിന്‍റെ കൈവശം മയക്കുമരുന്ന് കണ്ടെത്തിയത്. അസിസ്റ്റന്‍റ് എക്സൈസ് ഇൻസ്പെക്ടർ(ഗ്രേഡ്) ജി. അനിൽകുമാർ, പ്രിവന്‍റീവ് ഓഫീസർ സി.ഡി. സാബു, സിവിൽ എക്സൈസ് ഓഫീസർ എം.എ. രഘു, എം.ജെ. ഷിനോജ്, വനിതാ സിവിൽ എക്സൈസ് ഓഫീസർ ടി.പി. സുദിവ്യ ഭായി, സിവിൽ എക്സൈസ് ഓഫീസർ ഡ്രൈവർമാരായ ടി.പി. സന്തോഷ്, കെ. പ്രസാദ് എന്നിവരും പരിശോധനയിൽ പങ്കെടുത്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

സ്കൂൾ പ്രവേശനോത്സവം: ഒരുക്കം പൂർത്തിയായി

കൽപ്പറ്റ: ഇന്നത്തെ സ്കൂൾ പ്രവേശനോത്സവവുമായി ബന്ധപ്പെട്ട ഒരുക്കം ജില്ലയിൽ പൂർത്തിയായതായി വിദ്യാഭ്യാസ വകുപ്പ് അധികൃതർ അറിയിച്ചു. വിദ്യാർഥികളുടെ സുരക്ഷ മുൻനിർത്തി സ്കൂൾ കെട്ടിടങ്ങളുടെ പരിശോധന നടത്തി. തദ്ദേശസ്വയംഭരണ സ്ഥാപനം അനുവദിച്ച ഫിറ്റ്നസ് സർട്ടിഫിക്കറ്റ് സ്കൂളിൽ സൂക്ഷിക്കും. സ്കൂൾ പരിസരങ്ങൾ വൃത്തിയാക്കി അപകടകരമായ സാഹചര്യങ്ങൾ ഇല്ലെന്നും മെച്ചപ്പെട്ട പഠനാന്തരീക്ഷം, ഭിന്നശേഷി കുട്ടികൾക്ക് പ്രത്യേക അടിസ്ഥാന സൗകര്യം തുടങ്ങിയവ ഒരുക്കിയിട്ടുണ്ടെന്നും ഉറപ്പുവരുത്തിയിട്ടുണ്ട്. സ്കൂൾ പരിസരങ്ങളിലെ കടകളിൽ നിരോധിച്ച വസ്തുക്കൾ, ലഹരി പദാർഥങ്ങൾ എന്നിവ വിൽക്കുന്നില്ലെന്നു ഉറപ്പുവരുത്തുന്നതിന് നടപടി സ്വീകരിച്ചു. സ്കൂൾ ബസുകളുടെ പരിശോധന നേരത്തേ നടത്തി. പട്ടികവർഗ വിദ്യാർഥികളെ സ്കൂളുകളിൽ എത്തിക്കുന്നതിനുള്ള വിദ്യാവാഹിനി പദ്ധതി ഇന്നു മുതൽ സജീവമാകും. സ്കൂൾ പ്രവേശനോത്സവത്തിന്‍റെ സംസ്ഥാനതല ഉദ്ഘാടനം എല്ലാ സ്കൂളുകളിലും തത്സമയം പ്രദർശിപ്പിക്കും. ഇതിനുശേഷമാണ് സ്കൂൾതല, ജില്ലാതല പ്രവേശനോത്സവം. ജില്ലാതല പ്രവേശനോത്സവം ഇന്നു രാവിലെ 9.30ന് മുണ്ടേരി വൊക്കേഷണൽ ഹയർ സെക്കൻഡറി സ്കൂളിൽ പട്ടികജാതി-വർഗ- പിന്നാക്ക ക്ഷേമ മന്ത്രി ഒ.ആർ. കേളു ഉദ്ഘാടനം ചെയ്യും.

വെള്ളാർമല സ്കൂളിലെ വിദ്യാർഥികളുടെ പഠനം ഇന്നുമുതൽ പുതിയ ക്ലാസ് മുറികളിൽ

കൽപ്പറ്റ: പുഞ്ചിരിമട്ടം ഉരുൾപൊട്ടലിൽ തകർന്ന വെള്ളാർമല ഗവ.വൊക്കേഷനൽ ഹയർ സെക്കൻഡറി സ്ക്കൂളിലെ വിദ്യാർഥികളുടെ പഠനം ഇന്നുമുതൽ പുതിയ ക്ലാസ് മുറികളിൽ. ബിൽഡേഴ്സ് അസോസിയേഷൻ ഓഫ് ഇന്ത്യ(ബിഎഐ)മേപ്പാടി ഗവ.ഹയർ സെക്കൻഡറി സ്കൂൾ വളപ്പിൽ നിർമിച്ചുകൈമാറി കെട്ടിടത്തിലെ മുറികളിലാണ് ഇനി ക്ലാസുകൾ നടക്കുക. ഉരുൾ ദുരന്തത്തിനുശേഷം വെള്ളാർമല സ്കൂൾ മേപ്പാടി ഗവ.ഹയർസെക്കൻഡറി സ്കൂളിലാണ് പ്രവർത്തിക്കുന്നത്. ബിഎഐ എട്ട് ക്ലാസ് മുറികളും 10 ശുചിമുറികളുമുള്ള കെട്ടിടമാണ് വിദ്യാലയത്തിന് നിർമിച്ചുനൽകിയത്. സ്കൂളിന് കൈമാറുന്നതിന് നാല് ക്ലാസ് മുറികളുടെയും ആറ് ശുചിമുറികളുടെയും നിർമാണം ബിഎഐ ജൂണ്‍ അവസാനത്തോടെ പൂർത്തിയാക്കും. വെള്ളാർമല ഗവ.വൊക്കേഷനൽ ഹയർ സെക്കൻഡറി സ്കൂളിൽ എൽപി, യുപി, ഹൈസ്കൂൾ വിഭാഗങ്ങളിലായി 460 ഉം ഹയർ സെക്കൻഡറി വിഭാഗത്തിൽ 90 ഉം വിദ്യാർഥികളാണുള്ളത്. ആകെ 21 ഡിവിഷനുകളുണ്ട്. ഇന്നു രാവിലെ 10ന് ബിഎഐ ഭാരവാഹികൾ, അധ്യാപകർ എന്നിവർ ചേർന്ന് ബാൻഡ്മേളത്തിന്‍റെ അകന്പടിയോടെ കുട്ടികളെ സ്വീകരിക്കും. എസ്എസ്എൽസി പരീക്ഷയിൽ നൂറു ശതമാനം വിജയം നേടിയ സ്കൂളിലെ അധ്യാപകരെ ബിഎഐയുടെ നേതൃത്വത്തിൽ ആദരിക്കും. മേപ്പാടി ഗവ.ഹയർ സെക്കൻഡറി സ്ക്കൂളിൽ നടക്കുന്ന ചടങ്ങ് ബിഎഐ ദേശീയ വൈസ് പ്രസിഡന്‍റ് എൻ. രഘുനാഥൻ ഉദ്ഘാടനം ചെയ്യും. ബിഎഐ സംസ്ഥാന ചെയർമാൻ കെ.എ. ജോണ്‍സണ്‍, മുൻ ചെയർമാൻ സുരേഷ് പൊറ്റെക്കാട്ട്, സെക്രട്ടറി സൈജൻ കുര്യാക്കോസ് ഓലിയാപ്പുറം, ട്രഷറർ കെ. സതീഷ് കുമാർ, ജില്ലാ പഞ്ചായത്ത് വൈസ് പ്രസിഡന്‍റ് എസ്. ബിന്ദു, മേപ്പാടി പഞ്ചായത്ത് പ്രസിഡന്‍റ് കെ. ബാബു, സ്കൂൾ പ്രിൻസിപ്പൽ ഭവ്യ ലാൽ, ഹെഡ്മാസ്റ്റർ ഇൻ ചാർജ് വി. ഉണ്ണിക്കൃഷ്ണൻ, പി.എം. ശ്രീജിത്ത്, മേപ്പാടി പഞ്ചായത്ത് അംഗം സി.കെ. നൂറുദ്ദീൻ തുടങ്ങിയവർ പങ്കെടുക്കും. രണ്ട് ലക്ഷം രൂപ ചെലവിൽ സ്കൂളിൽ രണ്ട് വാട്ടർ പ്യൂരിഫയറും പബ്ലിക് അഡ്രസ് സിസ്റ്റവും ബിഎഐയുടെ നേതൃത്വത്തിൽ ഇന്ന് ഒരുക്കും.

പിഎംജിഎസ്‌വൈ: ബ്ലോക്കുകൾക്കു തുല്യ പരിഗണന നൽകണമെന്ന് പ്രിയങ്ക ഗാന്ധി

കൽപ്പറ്റ: ജില്ലയിൽ പിഎംജിഎസ് വൈ-നാലിൽ ഗ്രാമീണ റോഡുകൾ തെരഞ്ഞെടുക്കുന്പോൾ ബ്ലോക്കുകൾക്ക് തുല്യ പരിഗണന നൽകണമെന്ന് പ്രിയങ്ക ഗാന്ധി എംപി കേന്ദ്ര ഗ്രാമ വികസന മന്ത്രി ശിവരാജ് സിംഗ് ചൗഹാന് അയച്ച കത്തിൽ ആവശ്യപ്പെട്ടു. ജില്ലയിൽ ഇതുവരെ 331 റോഡുകൾക്ക് സംസ്ഥാന ഗ്രാമീണ റോഡ് വികസന ഏജൻസി(കഐസ്എസ്ആർഡിഎ) അംഗീകാരം നൽകിയിട്ടുണ്ട്. എന്നാൽ കൽപ്പറ്റ ബ്ലോക്കിലെ 64 റോഡുകൾക്കുമാത്രമാണ് കേന്ദ്ര സർക്കാർ അംഗീകാരം നൽകിയത്. ബത്തേരി, മാനന്തവാടി, പനമരം ബ്ലോക്കുകളിൽപ്പെട്ട 267 റോഡുകൾ എൻആർഐഡിഎയുടെ ഓണ്‍ലൈൻ മാനേജ്മെന്‍റ്, മോണിറ്ററിംഗ്, അക്കൗണ്ടിംഗ് സിസ്റ്റത്തിൽ അംഗീകാരം കാത്തുകിടക്കുകയാണ്. ഈ റോഡുകൾക്ക് എത്രയും വേഗം അംഗീകാരം നൽകണം. ബത്തേരി, മാനന്തവാടി, പനമരം ബ്ലോക്കുകളിൽ ഗണ്യമായ ആദിവാസി ജനസംഖ്യയുണ്ട്. മാർഗ്ഗനിർദ്ദേശങ്ങൾ പ്രകാരം ആസ്പിരേഷണൽ ബ്ലോക്കുകളിലെ ആദിവാസി ഗ്രാമങ്ങൾക്ക് മുൻഗണന നൽകേണ്ടതുണ്ട്. പിഎംജിഎസ്വൈ-നാല് മാർഗനിർദേശങ്ങൾ പ്രകാരം ആസ്പിരേഷണൽ ബ്ലോക്കുകളിലെ ആദിവാസി ഗ്രാമങ്ങൾക്ക് മുൻഗണന നൽകേണ്ടതുണ്ടെന്നും എംപിയുടെ കത്തിൽ പറയുന്നു.

പാടിച്ചിറയിലും പുലി ആക്രമണം: രണ്ട് ആടുകളെ മൃതപ്രായമാക്കി

പുൽപ്പള്ളി: മുള്ളൻകൊല്ലി പഞ്ചായത്തിലെ കബനിഗിരിക്കു പുറമേ പാടിച്ചിറയിലും പുലി ആക്രമണം. കഴിഞ്ഞ രാത്രി പാടിച്ചിറ തറപ്പത്തുകവലയിൽ പുലി രണ്ട് ആടിനെ ആക്രമിച്ചു. വാരിയത്ത് ടോമിയുടെ രണ്ടും നാലും വയസുള്ള ആടുകളെയാണ് പുലി പിടിച്ചത്. കഴുത്തിനു കടിയേറ്റ ആടുകൾ മൃതപ്രയാവസ്ഥയിലാണ്. രാത്രി ഒരു മണിയോടെ കൂട്ടിൽനിന്നു ആടുകൾ കരയുന്ന ശബ്ദം കേട്ട് വീട്ടുകാർ എത്തിയപ്പോഴേക്കും രണ്ട് വയസുള്ള ആടിനെ പുലി പിടിച്ചിരുന്നു. വീട്ടുകാർ ഒച്ചയിട്ടപ്പോൾ പുലി ആടിനെ വിട്ട് കൃഷിയിടത്തിൽ മറഞ്ഞു. ഒരു മണിക്കൂർ കഴിഞ്ഞാണ് രണ്ടാമത്തെ ആടിനെ ആക്രമിച്ചത്. ഇത്തവണയും വീട്ടുകാർ പെട്ടെന്ന് എത്തിയതിനാൽ പുലിക്ക് ആടിനെ കൊണ്ടുപോകാൻ കഴിഞ്ഞില്ല. നാല് ആടാണ് ടോമിക്കുള്ളത്. രാവിലെ എത്തിയ വനപാലകർ ആടുകളെ ആക്രമിച്ചത് പുലിയാണെന്നു സ്ഥിരീകരിച്ചു. പുലിയെ പിടിക്കുന്നതിന് കൂടും നിരീക്ഷണത്തിന് കാമറയും സ്ഥാപിച്ചു. ആടുകൾ രക്ഷപ്പെടാൻ സാധ്യതയില്ലെന്നാണ് ചികിത്സ നൽകിയ വെറ്ററിനറി ഡോക്ടർ അഭിപ്രായപ്പെട്ടത്. കബനിഗിരിയിലും മരക്കടവിലും ഇറങ്ങിയ അതേപുലിയാണ് പാടിച്ചിറയിലും എത്തിയതെന്നാണ് വനപാലകരുടെ അനുമാനം.

കാട്ടാനശല്യം രൂക്ഷം : കാപ്പിക്കുന്ന് നിവാസികൾ വലയുന്നു

പുൽപ്പള്ളി: പഞ്ചായത്തിലെ കാപ്പിക്കുന്ന് നിവാസികൾ കാട്ടാനശല്യംമൂലം വലയുന്നു. ദിവസവും സന്ധ്യയോടെ കൃഷിയിടങ്ങൾ മേച്ചിൽപ്പുറമാക്കുന്ന ആനകൾ പുലർച്ചെയാണ് കാടുകയറുന്നത്. തൊടികളിലൂടെ നടന്ന് ചക്കയും മാങ്ങയും തിന്നുന്ന ആനകൾ തെങ്ങ്, വാഴ, കമുക് എന്നിവയും ചവിട്ടിമറിച്ചും ഓടിച്ചും ആഹരിക്കുന്നുണ്ട്. ആയിരക്കണക്കിനു രൂപയുടെ നഷ്ടമാണ് ഓരോ ദിവസവും കർഷകർക്കുണ്ടാകുന്നത്. രാത്രി പേടികൂടാതെ വീടിനു പുറത്തിറങ്ങാൻ കഴിയാത്ത സ്ഥിതിയാണ്. സൗത്ത് വയനാട് വനം ഡിവിഷനിലെ ചെതലത്ത് റേഞ്ചിൽ നെയ്ക്കുപ്പ സെക്ഷനിലാണ് കാപ്പിക്കുന്ന്. കാടിനോടു ചേർന്നാണ് കാപ്പിക്കുന്നിന്‍റെ കിടപ്പ്. വനാതിർത്തിയിൽ വൈദ്യുത കന്പിവേലിയുണ്ടെങ്കിലും ആനകളുടെ കാടിറക്കം തടയാൻ ഉതകുന്നില്ല. പേരിനുമാത്രമാണ് വേലിയിലൂടെ വൈദ്യുതി പ്രവാഹം. വനാതിർത്തിയിലെ പ്രതിരോധ കിടങ്ങുകൾ അറ്റകുറ്റപ്പണിയുടെ അഭാവത്തിൽ പലേടത്തും നികന്നിരിക്കയാണ്. ഒറ്റയാനാണ് കാപ്പിക്കുന്നിൽ നിത്യവും എത്തുന്നത്. മുറിവാലും അസാധാരണ വലിപ്പത്തിൽ കൊന്പുകളുമുള്ള ഇവന് ഒച്ചയിട്ടാലും പടക്കങ്ങൾ പൊട്ടിച്ചാലും കൂസലില്ലെന്ന് കാപ്പിക്കുന്നുകാർ പറയുന്നു. വെളിച്ചം കാണുന്നിടത്തേക്ക് ഓടിയടുക്കുന്ന സ്വഭാവവും ഉണ്ട്. ഇലഞ്ഞിക്കൽ, തങ്കപ്പൻ, ദിവാകരൻ, വിലങ്ങിൽ അജികുമാർ, മാറാശേരി എൽദോസ്, മേലേക്കാപ്പ് കുഞ്ഞിക്കൃഷ്ണൻ, കുടിലിൽ ഷിജു, വിലങ്ങിൽ മോഹനൻ, വേങ്ങപ്പുറത്ത് സുകുമാരൻ...ഇങ്ങനെ നീളുന്നതാണ് ആന ദിനേന വിഹരിക്കുന്ന കൃഷിയിടങ്ങളുടെ ഉടമകളുടെ പട്ടിക. ഒറ്റയാനെ ഉൾക്കാട്ടിലേക്ക് തുരത്തണമെന്നാണ് പ്രദേശവാസികളുടെ ആവശ്യം.

മാനന്തവാടിയിൽ ഖാദി ഗ്രാമസൗഭാഗ്യ ഷോറൂം പ്രവർത്തനം തുടങ്ങി

മാനന്തവാടി: നഗരത്തിലെ എരുമത്തെരുവ് കാഞ്ചികാമാക്ഷി ക്ഷേത്രത്തിനു സമീപം ഗ്രാമസൗഭാഗ്യ ഷോറൂം പ്രവർത്തനം തുടങ്ങി. ഖാദി ബോർഡ് വൈസ് ചെയർമാൻ പി. ജയരാജൻ ഉദ്ഘാടനം ചെയ്തു. ഖാദി പഴയതല്ലെന്നും ഉപഭോക്താക്കൾക്ക് സ്വീകാര്യത ഉറപ്പാക്കി ഖാദി ഉത്പന്നങ്ങൾ നവീകരിക്കുകയാണ് സർക്കാർ ലക്ഷ്യമെന്നും അദ്ദേഹം പറഞ്ഞു. ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി അധ്യക്ഷത വഹിച്ചു. മുനിസിപ്പൽ ചെയർപേഴ്സണ്‍ സി.കെ. രത്നവല്ലി ആദ്യവിൽപന നടത്തി. ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി, ഖാദി ബോർഡ് അംഗം കെ.കെ. ശിവരാമൻ, മാർക്കറ്റിംഗ് ഡയറക്ടർ സുധാകരൻ, മാർക്കറ്റിംഗ് ഓഫീസർ ടി. ബൈജു, പ്രോജക്ട് ഓഫീസർ എം. ആയിഷ തുടങ്ങിയവർ പങ്കെടുത്തു. ഖാദി റെഡിമെയ്ഡ് വസ്ത്രങ്ങൾക്കും ഗ്രാമവ്യവസായ ഉത്പന്നങ്ങൾക്കും പ്രത്യേകം വിഭാഗം ഒരുക്കിയാണ് ഷോറും ആരംഭിച്ചത്.

അമ്മിണി കെ. വയനാടിന് ഓണററി ഡോക്ടറേറ്റ്

കൽപ്പറ്റ: മനുഷ്യാവകാശ-സാമൂഹിക പ്രവർത്തക അമ്മിണി കെ. വയനാടിന് ഓണററി ഡോക്ടറേറ്റ്. കോണ്‍കോർഡിയ ഇന്‍റർനാഷണൽ യൂണിവേഴ്സിറ്റിയുടെ(വെർച്വൽ) ഓണററി ഡോക്ടറേറ്റാണ് അമ്മിണിക്ക് ലഭിച്ചത്. പാർശ്വവത്കരിക്കപ്പെട്ടവരുടെ ശക്തീകരണത്തിന് മൂന്നു പതിറ്റാണ്ടായി നടത്തുന്ന പ്രവർത്തനങ്ങൾ കണക്കിലെടുത്താണ് യൂണിവേഴ്സിറ്റി സാമൂഹിക നീതി വിഭാഗത്തിൽ അമ്മിണിയെ ഡോക്ടറേറ്റിനു തെരഞ്ഞെടുത്തത്. മൈസൂരുവിലെ ഗോവർധൻ ഹോട്ടൽ ഹാളിൽ ഇന്നലെ നടന്ന ചടങ്ങിൽ യൂണിവേഴ്സിറ്റി രജിസ്ട്രാർ റെജി ഷെർമർ ലൂകാസ് ഡോക്ടറേറ്റ് അമ്മിണിക്ക് സമ്മാനിച്ചു. പട്ടികവർഗത്തിലെ വെട്ടക്കുറുമ സമുദായാംഗമാണ് അമ്മിണി. അന്പലവയൽ വേങ്ങേരി പരേതനായ കാളൻ-മാരി ദന്പതികളുടെ മകളാണ്.

മദ്യവിൽപനശാല: തീരുമാനം പുനഃപരിശോധിക്കണമെന്ന് എകെസിസി

സുൽത്താൻ ബത്തേരി: കെഎസ്ആർടിസി ബസ് സ്റ്റേഷനു സമീപം മദ്യവിൽപനശാല ആരംഭിക്കാനുള്ള തീരുമാനം പുനഃപരിശോധിക്കണമെന്ന് കത്തോലിക്ക കോണ്‍ഗ്രസ് യൂണിറ്റ് നിർവാഹ സമിതി യോഗം സർക്കാരിനോട് ആവശ്യപ്പെട്ടു. രാപകൽ വ്യത്യാസമില്ലാതെ ദിവസവും അനേകം യാത്രക്കാർ വന്നുപോകുന്നതാണ് കെഎസ്ആർടിസി സ്റ്റേഷൻ. മിനി സിവിൽ സ്റ്റേഷൻ, കൃഷി വൻ, ആയുർവേദ ആശുപത്രി, മൃഗാശുപത്രി, ഫയർ ആൻഡ് റസ്ക്യു സ്റ്റേഷൻ, ഡോണ്‍ ബോസ്കോ കോളജ് തുടങ്ങിയ സ്ഥാപനങ്ങൾ ഇതിനടുത്താണ് പ്രവർത്തിക്കുന്നത്. ഇവിടെ മദ്യശാല ആരംഭിക്കുന്നത് പൊതുജനങ്ങൾക്ക് വലിയ ശല്യമാകും. ജനഹിതം മാനിക്കാതെയാണ് മദ്യാശാല തുറക്കാനുള്ള നീക്കം. ഒഴിവാക്കാൻ ആകില്ലെങ്കിൽ അമ്മായിപ്പാലത്ത് സർക്കാർ ഉടമസ്ഥതയിലുള്ളതും വെറുതെ കിടക്കുന്നതുമായ കാർഷിക വിപണന സമുച്ചയത്തിൽ മദ്യശാല ആരംഭിക്കണമെന്നു യോഗം നിർദേശിച്ചു. പ്രസിഡന്‍റ് ജേക്കബ് ബത്തേരി അധ്യക്ഷത വഹിച്ചു. സാജു പുലിക്കോട്ടിൽ, ചാൾസ് വടാശേരി, സാബു ചക്കാലക്കൽ, അലക്സ് കോരമംഗലം, ഒൗസേപ്പച്ചൻ തേക്കാനത്ത്, ജോമോൻ റാത്തപ്പള്ളി, ബിജു കൊല്ലറാത്ത്, റോബിൻ ചിങ്ങംതോട്ടത്തിൽ എന്നിവർ പ്രസംഗിച്ചു.

അക്രമകാരികളായ വന്യമൃഗങ്ങൾ: സർക്കാരിന്‍റേത് ധീരമായ തീരുമാനമെന്ന് ഇ.ജെ. ബാബു

കൽപ്പറ്റ: ജനവാസമേഖലകളിൽ ഇറങ്ങുന്ന അക്രമകാരികളായ വന്യമൃഗങ്ങളെ കൊല്ലാൻ കേന്ദ്രാനുമതി തേടിയ സംസ്ഥാന സർക്കാരിന്‍റേത് ധീരമായ നടപടിയാണെന്ന് സിപിഐ ജില്ലാ സെക്രട്ടറി ഇ.ജെ. ബാബു പ്രസ്താവനയിൽ പറഞ്ഞു. ജില്ലയിൽ നൂറുകണക്കിന് കുടുംബങ്ങളാണ് വന്യജീവി ഭീഷണി നേരിടുന്നത്. 1972ലെ വന്യജീവി സംരക്ഷണ നിയമം കാലോചിതമാക്കണമെന്നത് ജനങ്ങളുടെ ചിരകാല ആവശ്യമാണ്. നിശ്ചയദാർഢ്യത്തോടെ ഇടതു സർക്കാർ നടത്തിയ ഇടപെടലുകളാണ് തുരങ്കപാതയ്ക്ക് കേന്ദ്രാനുമതി ലഭിക്കുന്നതിന് സഹായകമായത്. മക്കിമലയിലെ പട്ടയപ്രശ്നംപരിഹരിക്കുന്നതിന് റവന്യു മന്ത്രിയുടെ നിർദേശപ്രകാരം എടുത്ത തീരുമാനം നൂറുകണക്കിനു കുടുംബങ്ങൾക്ക് ആശ്വാസം പകരുന്നതാണെന്നും ബാബു പറഞ്ഞു.

ജില്ലയിലെ ആദ്യ എബിസി സെന്‍റർ ബത്തേരിയിൽ പ്രവർത്തനം തുടങ്ങി

സുൽത്താൻ ബത്തേരി: ജില്ലയിലെ പ്രഥമ തെരുവുനായ പ്രജനന നിയന്ത്രണ കേന്ദ്രം(എബിസി സെന്‍റർ) വെറ്ററിനറി പോളിക്ലിനിക് കാന്പസിൽ പ്രവർത്തനം തുടങ്ങി. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ ഉദ്ഘാടനം ചെയ്തു. തെരുവുനായ ശല്യം ലഘൂകരിക്കുന്നതിന് നിയമങ്ങൾ പാലിച്ച് സെന്‍റർ പ്രവർത്തിക്കുമെന്ന് അദ്ദേഹം പറഞ്ഞു. മുനിസിപ്പൽ ചെയർമാൻ ടി.കെ. രമേശ് അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ, മീനങ്ങാടി പഞ്ചായത്ത് പ്രസിഡന്‍റ് കെ.ഇ. വിനയൻ, പനമരം ബ്ലോക്ക് പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ മേഴ്സി, ജില്ലാ പഞ്ചായത്ത് സെക്രട്ടറി ബെന്നി ജോസഫ്, ബ്ലോക്ക് പഞ്ചായത്ത് സെക്രട്ടറി എ.എം. ബിജേഷ്, മൃഗസംരക്ഷണ ഡെപ്യൂട്ടി ഡയറക്ടർ ഡോ.സജി ജോസഫ്, ബ്ലോക്ക് പഞ്ചായത്ത് അസിസ്റ്റന്‍റ് എൻജിനിയർ എം.എം. ഇന്ദിര തുടങ്ങിയവര് പങ്കെടുത്തു. ആനിമൽ വെൽഫയർ ബോർഡ് ഓഫ് ഇന്ത്യയുടെ അംഗീകാരത്തോടെ നിർമിച്ചതാണ് സെന്‍റർ. ബത്തേരി നഗരസഭയിലും ബത്തേരി, പനമരം ബ്ലോക്ക് പരിധിയിലെ പഞ്ചായത്തുകളിലുമുള്ള തെരുവുനായകളുടെ പ്രജനന നിയന്ത്രണം ലക്ഷ്യമിട്ടാണ് സെന്‍റർ സജ്ജമാക്കിയത്. തെരുവുനായകളുടെ എണ്ണം നിയന്ത്രിച്ച് പൊതുജനാരോഗ്യം സംരക്ഷിക്കുകയാണ് പദ്ധതി ലക്ഷ്യം. ആദ്യഘട്ടത്തിൽ ഓരോ പഞ്ചായത്തിലെയും സ്കൂൾ പരിസരം, മാർക്കറ്റുകൾ, ടൗണുകൾ, ഉന്നതികൾ, പൊതുജനങ്ങൾ കൂടുതൽ വരുന്ന സ്ഥലങ്ങൾ എന്നിവിടങ്ങൾ കേന്ദ്രീകരിച്ചാണ് വന്ധ്യംകരണത്തിന് തെരുവുനായകളെ പിടികൂടുക. സെന്‍ററിൽ എത്തിക്കുന്ന നായകളെ വന്ധ്യംകരിച്ച് ചികിത്സ നൽകി പൂർണ ആരോഗ്യം ഉറപ്പാക്കും. തിരിച്ചറിയാൻ വലതുചെവിയിൽ ’വി’ ആകൃതിയിൽ അടയാളം ഇടും. ശസ്ത്രക്രിയ കഴിഞ്ഞ നായകൾക്ക് മൂന്ന് മുതൽ അഞ്ച് വരെ ദിവസം ഷെൽട്ടർ സൗകര്യം നൽകും. പിന്നീട് അവയെ പിടിച്ച അതേസ്ഥലത്ത് മോചിപ്പിക്കും.

ജില്ലാതല സ്കൂൾ പ്രവേശനോത്സവം മുണ്ടേരിയിൽ; മന്ത്രി ഒ.ആർ. കേളു ഉദ്ഘാടനം ചെയ്യും

കൽപ്പറ്റ: ജില്ലാതല സ്കൂൾ പ്രവേശനോത്സവം നാളെ രാവിലെ 10ന് മുണ്ടേരി ഗവ.വൊക്കേഷണൽ ഹയർ സെക്കൻഡറി സ്കൂളിൽ നടത്തുമെന്ന് ജില്ലാ വിദ്യാഭ്യാസ ഓഫീസർ സി.വി. മൻമോഹൻ, മുനിസിപ്പൽ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സി.കെ. ശിവരാമൻ, കൗണ്‍സിലർ എം.കെ.ഷിബു, മുണ്ടേരി സ്കൂൾ പ്രിൻസിപ്പൽ പി.ടി. സജീവൻ, ഹെഡ്മിസ്ട്രസ് എം. സൽമ, പിടിഎ പ്രസിഡന്‍റ് കെ. രഞ്ജിത്ത്, എസ്എംസി. ചെയർമാൻ കെ. സതീഷ്കുമാർ എന്നിവർ വാർത്താസമ്മേളനത്തിൽ അറിയിച്ചു. പുതുതായി പ്രവേശനം നേടിയ കുട്ടികളെ വാദ്യമേളങ്ങളോടെ സ്കൂൾ കവാടത്തിൽ സ്വീകരിക്കും. പ്രവേശനോത്സവം പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു ഉദ്ഘാടനം ചെയ്യും. ടി. സിദ്ദിഖ് എംഎൽഎ അധ്യക്ഷത വഹിക്കും. പ്രിയങ്ക ഗാന്ധി എംപി ഓണ്‍ലൈനിൽ സന്ദേശം നൽകും. ഐ.സി. ബാലകൃഷ്ണൻ എംഎൽഎ മുഖ്യപ്രഭാഷണം നടത്തും. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ പാഠപുസ്തകങ്ങളുടെയും മുനിസിപ്പൽ ചെയർമാൻ ടി.ജെ. ഐസക് പഠന കിറ്റുകളുടെയും വിതരണം ഉദ്ഘാടനം ചെയ്യും. വിദ്യാലയത്തിലെ സെക്കൻഡറി, ഹയർ സെക്കൻഡറി, യുഎസ്എസ്, എൽഎസ്എസ് വിജയികളെ ജില്ലാ കളക്ടർ ഡി.ആർ. മേഘശ്രീ അനുമോദിക്കും. ജില്ലാ വിദ്യാഭ്യാസ ഉപഡയറക്ടർ വി.എ. ശശീന്ദ്രവ്യാസ് സ്വാഗതം പറയും.

പുൽപ്പള്ളി, വാളാട്, മേപ്പാടി എക്സൈസ് റേഞ്ച് ഓഫീസുകൾ ആരംഭിക്കണം: എക്സൈസ് സ്റ്റാഫ് അസോസിയേഷൻ ജില്ലാ സമ്മേളനം

കൽപ്പറ്റ: പുൽപ്പള്ളി, വാളാട്, മേപ്പാടി എന്നിവിടങ്ങളിൽ എക്സൈസ് റേഞ്ച് ഓഫീസ് ആരംഭിക്കണമെന്ന് കേരള സ്റ്റേറ്റ് എക്സൈസ് സ്റ്റാഫ് അസോസിയേഷൻ 44-ാമത് ജില്ലാ സമ്മേളനം സർക്കാരിനോട് ആവശ്യപ്പെട്ടു. കൃഷ്ണഗിരി, മാനന്തവാടി എന്നിവിടങ്ങളിൽ അനുവദിച്ച സ്ഥലത്ത് എക്സൈസ് ഓഫീസുകൾക്ക് മതിയായ സൗകര്യങ്ങളോടെ കെട്ടിടം പണിയണമെന്ന ആവശ്യവും ഉന്നയിച്ചു. പൊതുമരാമത്ത് ഗസ്റ്റ് ഹൗസ് ഹാളിൽ അസോസിയേഷൻ സംസ്ഥാന പ്രസിഡന്‍റ് ടി. സജുകുമാർ ഉദ്ഘാടനം ചെയ്തു. ജില്ലാ പ്രസിഡന്‍റ് പി.ആർ. ജിനോഷ് അധ്യക്ഷത വഹിച്ചു. ഉത്തര മേഖലാ ജോയിന്‍റ് എക്സൈസ് കമ്മീഷണർ കെ.എസ്. ഷാജി മുഖ്യപ്രഭാഷണം നടത്തി. സർവീസിൽനിന്നു വിരമിക്കുന്ന എക്സൈസ് ഇൻസ്പെക്ടർ പി.ജി. രാധാകൃഷ്ണൻ, അസിസ്റ്റന്‍റ് എക്സൈസ് ഇൻസ്പെക്ടർ(ഗ്രേഡ്)പി.എ. പ്രകാശ്, ഇ.വി. ഏലിയാസ്, പി.കെ. പ്രഭാകരൻ എന്നിവർക്ക് യാത്രയയപ്പ് നൽകി. ജീവനക്കാരുടെ മക്കളിൽ എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം നേടിയവരെ അനുമോദിച്ചു. ഇവർക്കുള്ള മെമന്‍റോ അസോസിയേഷൻ സംസ്ഥാന ജനറൽ സെക്രട്ടറി സന്തോഷ്കുമാർ, ജോയിന്‍റ് എക്സൈസ് കമ്മീഷണർ കെ.എസ്. ഷാജി എന്നിവർ വിതരണം ചെയ്തു. ഭാരവാഹികളായി പി.ആർ. ജിനോഷ്(പ്രസിഡന്‍റ്), സെൽമ കെ. ജോസ്(വൈസ് പ്രസിഡന്‍റ്), നിക്കോളാസ് ജോസ്(സെക്രട്ടറി), സി.ഡി. സാബു(ജോയിന്‍റ് സെക്രട്ടറി), ടി.പി. സന്തോഷ്(ട്രഷറർ), വി.പി. വജീഷ്, എം.സി. ഷിജു, എ. ദീപു(സംസ്ഥാന കമ്മിറ്റിയംഗങ്ങൾ)എന്നിവരെ തെരഞ്ഞെടുത്തു. നിക്കോളാസ് ജോസ് സ്വാഗതവും വി.പി. വജീഷ്കുമാർ നന്ദിയും പറഞ്ഞു.

മഴ മുന്നൊരുക്കും അടിയന്തരമായി പൂർത്തീകരിക്കണം: മന്ത്രി ഒ.ആർ. കേളു

കൽപ്പറ്റ: കാലവർഷം തീവ്രമാകുന്നതിന് മുന്നോടിയായി ചെയ്യേണ്ട നടപടികൾ അടിയന്തരമായി പൂർത്തിയാക്കണമെന്നും സ്കൂളുകളുടെ ഫിറ്റ്നസ് ഉറപ്പാക്കണമെന്നും പട്ടികജാതി, വർഗ്ഗ, പിന്നാക്കക്ഷേമ മന്ത്രി ഒ.ആർ. കേളു. കളക്ടറേറ്റ് എ.പി.ജെ ഹാളിൽ ജില്ലാ കളക്ടർ ഡി.ആർ. മേഘശ്രീയുടെ അധ്യക്ഷതയിൽ ചേർന്ന ജില്ലാ വികസന സമിതി യോഗത്തിൽ സംസാരിക്കുകയായിരുന്നു മന്ത്രി. ജില്ലയിൽ എല്ലാ തദ്ദേശ സ്ഥാപന പരിധിയിലും ദുരിതാശ്വാസക്യാന്പുകൾ നടത്തുന്നതിന് കേന്ദ്രങ്ങൾ കണ്ടെത്തി ഭൗതിക സാഹചര്യങ്ങൾ ഉറപ്പുവരുത്തിയിട്ടുണ്ടെന്നും നിലവിൽ 251 ഓളം അത്തരം കേന്ദ്രങ്ങൾ കണ്ടെത്തിയിട്ടുണ്ടെന്നും തദേശസ്വയംഭരണ വകുപ്പ് ജോയിന്‍റ് ഡയറക്ടർ അറിയിച്ചു. അപകട ഭീഷണിയുള്ള മരങ്ങൾ മുറിച്ചു മാറ്റാനും റോഡ് ഗതാഗത തടസങ്ങൾ നീക്കാനും വൈദ്യുതി മുടക്കം, വന്യമൃഗ ശല്യം തുടങ്ങിയ പ്രശ്നങ്ങൾക്ക് അടിയന്തര പരിഹാരം കാണാനും മന്ത്രി നിർദേശിച്ചു. തദ്ദേശഭരണ സ്ഥാപനതലത്തിൽ ട്രീ കമ്മിറ്റി ചേർന്ന് അപകട ഭീഷണിയുള്ള മരങ്ങളും ചില്ലകളും മുറിച്ചുമാറ്റാൻ മരങ്ങൾ സ്ഥിതി ചെയ്യുന്ന സ്ഥലത്തിന്‍റെ ഉടമകൾക്ക് നിർദേശം നൽകിയിട്ടുണ്ട്. സ്കൂൾ പ്രവേശനത്തിനു മുന്നോടിയായി വോളണ്ടിയർമാരുടെയും സാമൂഹ്യ സന്നദ്ധ സംഘടനകളുടെയും സഹകരണത്തോടെ അടിസ്ഥാന സൗകര്യങ്ങൾ പരിശോധിച്ച് സ്കൂൾ ഫിറ്റ്നസ് ഉറപ്പാക്കാൻ യോഗം തീരുമാനിച്ചു. സ്കൂൾ പരിസരത്ത് ഭീഷണിയായ മരങ്ങൾ മുറിച്ചു മാറ്റാനും കുടിവെള്ള സ്രോതസ്, ഭക്ഷണം എന്നിവയുടെ ഗുണമേൻമ പരിശോധന ഉറപ്പാക്കാനും തീരുമാനിച്ചു. അക്കാദമിക മികവ് വർധിപ്പിക്കുന്നതിനും വിദ്യാർഥികളുടെ കൊഴിഞ്ഞുപോക്ക് തടയുന്നതിനും ആവശ്യമായ നടപടികൾ സ്വീകരിക്കാനും യോഗത്തിൽ ധാരണയായി. ഗോത്ര മേഖലയുടെ സമഗ്ര പുരോഗതിക്ക് കൂടുതൽ ശ്രദ്ധ കൊടുക്കണമെന്നും എല്ലാ മാസവും പട്ടികവർഗ വികസന സമിതി യോഗം ചേരാനും ധാരണയായി. ജില്ലയിലെ വിവിധ എസ്റ്റേറ്റുകളിലെ അടിക്കാട് വെട്ടിമാറ്റുന്നതിന് നിർദേശം നൽകിയിട്ടും പാലിക്കാത്ത വൈത്തിരി താലൂക്കിലെ എല്ലാ തോട്ടം ഉടമകൾക്കും വില്ലേജ് ഓഫീസർ മുഖേന നോട്ടീസ് നൽകി. കാട് മൂടികിടക്കുന്ന തോട്ടഭൂമി കണ്ടെത്തി സോണൽ ലാന്‍റ് ബോർഡ് ചെയർമാന് റിപ്പോർട്ട് ചെയ്യുന്നതിന് നിർദേശം നൽകിയിട്ടുണ്ടെന്നും യോഗത്തിൽ അറിയിച്ചു. മേപ്പാടി ഗ്രാമപഞ്ചായത്ത് 22-ാം വാർഡിൽ ഉൾപ്പെടുന്നതും തൃക്കൈപ്പറ്റ വില്ലേജിൽ കോടനാട് പ്ലാന്േ‍റഷൻ ഉടമസ്ഥതയിലുള്ളതുമായ സ്ഥലത്ത് സ്വാഭാവിക നീരൊഴുക്ക് തടസപ്പെടുത്തി തടയണ നിർമിച്ച വിഷയത്തിൽ തടയണയിൽ വെള്ളം കെട്ടിനിർത്താതെ ഒഴുക്കി വിടുന്നതിനുള്ള നടപടികൾ സ്വീകരിക്കാൻ കോടനാട് എസ്റ്റേറ്റ് മാനേജർക്ക് നിർദേശം നൽകി. ജില്ലയിൽ നെല്ല് സംഭരണവുമായി ബന്ധപ്പെട്ടുള്ള അനിശ്ചിതത്വം അടിയന്തരമായി പരിഹരിക്കാൻ ജില്ല വികസന സമിതി യോഗത്തിൽ ധാരണയായി. ഈർപ്പം കൂടുതലാണെന്ന് പറഞ്ഞു കർഷകരിൽ നിന്നും നെല്ല് സ്വീകരിക്കാത്ത പ്രവണതയ്ക്ക് പരിഹാരം കാണാനും വരുംവർഷങ്ങളിൽ മഴയ്ക്ക് മുന്നോടിയായി കർഷകരിൽ നിന്നും നെല്ല് സംഭരിക്കാൻ ആവശ്യമായ നടപടി സ്വീകരിക്കാനും ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ നിർദേശിച്ചു. മഴയിൽ 110 ഹെക്ടറോളം നെല്ല് ജില്ലയിൽ നശിച്ചു. നെല്ല് സംഭരിക്കാൻ മില്ല് തയാറായിട്ടുണ്ടെന്നും അടുത്ത ദിവസങ്ങളിൽ തന്നെ നെല്ല് സംഭരിക്കുമെന്നും പ്രിൻസിപ്പൽ അഗ്രി കൾച്ചറൽ ഓഫീസർ അറിയിച്ചു. സംസ്ഥാനവിഹിതം 5.32 രൂപയും കേന്ദ്ര വിഹിതം 23 രൂപയുമായി മൊത്തം 28.32 രൂപ താങ്ങുവില നെൽ കർഷകർക്ക് നേരിട്ട് നൽകുന്നുണ്ട്. ജനപ്രതിനിധികൾ, എഡിഎം കെ. ദേവകി, സബ് കളക്ടർ മിസാൽ സാഗർ ഭരത്, ജില്ലാ പ്ലാനിംഗ് ഓഫീസർ എം. പ്രസാദൻ, വകുപ്പ് ഉദ്യോഗസ്ഥർ എന്നിവർ പങ്കെടുത്തു.

വാഹനാപകടം: വിദ്യാർഥിനി മരിച്ചു

കൽപ്പറ്റ: കന്പളക്കാട് പള്ളിമുക്കിൽ ഇന്നലെ പുലർച്ചെ വാഹനാപകടത്തിൽ വിദ്യാർഥിനി മരിച്ചു. കന്പളക്കാട് പുത്തൻതൊടുക ഹാഷിം-ആയിഷ ദന്പതികളുടെ മകൾ ദിൽഷാനയാണ്(19)മരിച്ചത്. ബത്തേരി സെന്‍റ് മേരീസ് കോളജിൽ രണ്ടാംവർഷ ബിരുദ വിദ്യാർഥിനിയാണ്. പാൽ വാങ്ങുന്നതിന് റോഡരികിൽ കാത്തുനിൽക്കുകയായിരുന്ന ദിൽഷാനയെ ജീപ്പ് ഇടിക്കുകയായിരുന്നു. ഗുരുതരമായി പരിക്കേറ്റ യുവതിയെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ദിൽഷാനയുടെ പിതാവ് വിദേശത്താണ്. സഹോദരങ്ങൾ: മുഹമ്മദ് ഷെഫിൻ, മുഹമ്മദ് അഹഷ്.

കാട്ടാനകൾ പരിഭ്രാന്തി പരത്തുന്നതായി പരാതി

‌ഊട്ടി: മഞ്ചൂർ-കെദ്ദ-കോയന്പത്തൂർ പാതയിൽ കാട്ടാനകൾ പരിഭ്രാന്തി പരത്തുന്നതായി പരാതി. കൂട്ടത്തോടെയാണ് ആനകൾ റോഡിലേക്ക് ഇറങ്ങുന്നത്. ഇത് വാഹന യാത്രക്കാർക്ക് ഭീഷണിയായിരിക്കുകയാണ്. ഇരുചക്രവാഹന യാത്രക്കാർ ഭീതിയിലായിരിക്കുകയാണ്. പെരുന്പള്ളത്തിലും ആനകൾ റോഡിലേക്ക് ഇറങ്ങുന്നുണ്ട്. കുന്നൂർ ബർളിയാറിലും കാട്ടാനക്കൂട്ടം ഭീതി പരത്തുന്നുണ്ട്. ആനകളെ വനത്തിലേക്ക് തുരത്തണമെന്നാണ ജനങ്ങൾ ആവശ്യപ്പെടുന്നത്.

ടി. സിദ്ദിഖ് ദുരിതാശ്വാസ ക്യാന്പ് സന്ദർശിച്ചു

കൽപ്പറ്റ: കരിംകുറ്റി ജിവിഎച്ച്എസ്എസിലെ ദുരിതാശ്വാസ ക്യാന്പ് ടി. സിദ്ദിഖ് എംഎൽഎ സന്ദർശിച്ചു. കാലവർഷം ശക്തമായതിനെത്തുടർന്നു കോട്ടത്തറ പ്രദേശത്തുനിന്നു മാറ്റിപ്പാർപ്പിച്ച കുടുംബങ്ങളാണ് ഈ ക്യാന്പിലുള്ളത്. കോട്ടത്തറ പഞ്ചായത്ത് പ്രസിഡന്‍റ് പി.പി. റെനീഷ്, ബ്ലോക്ക് പഞ്ചായത്ത് അംഗം പി.കെ. അബ്ദുറഹ്മാൻ, പഞ്ചായത്ത് അംഗം വസന്ത, സി.സി. തങ്കച്ചൻ, മാണി ഫ്രാൻസിസ് എന്നിവർ സിദ്ദിഖിനൊപ്പം ഉണ്ടായിരുന്നു. ക്യാന്പിലെ സൗകര്യങ്ങൾ എംഎൽഎ വിലയിരുത്തി.

മുത്തങ്ങ മൻമദമൂല റോഡിലെ വെള്ളമിറങ്ങി: നാല് ദിവസത്തിനുശേഷം പുറംലോകവുമായി ബന്ധം പുനസ്ഥാപിച്ച് കുടുംബങ്ങൾ

സുൽത്താൻ ബത്തേരി: മുത്തങ്ങ മൻമദമൂല റോഡിലെ വെള്ളമിറങ്ങിയതോടെ നാല് ദിവസത്തിന് ശേഷം പുറംലോകവുമായി ബന്ധം പുനസ്ഥാപിച്ച് കുടുംബങ്ങൾ. മുത്തങ്ങ മൻമദമൂല, അത്തികുനി, ചിറമൂല, കല്ലുമുക്ക്, ആലത്തൂർ, മേലെമൂല, രാംപള്ളി ഉന്നതികളിലെ കുടുംബങ്ങളാണ് ഇവിടേക്കുള്ള റോഡിൽ വെള്ളംകയറിയതോടെ ഒറ്റപ്പെട്ടത്. ഇക്കഴിഞ്ഞ 25ന് രാത്രി പെയ്ത് ശക്തമായ മഴയിൽ കല്ലൂർപുഴ കരകവിഞ്ഞാണ് മുത്തങ്ങയ്ക്ക് സമീപം മൻമദമൂല റോഡിൽ വെള്ളംകയറിയത്. പാടശേഖരത്തിൽ നിറഞ്ഞ വെള്ളം ശക്തമായ കുത്തൊഴുക്കോടെയാണ് റോഡിലുടെ ഒഴുകിയത്. ഇതോടെ ഇതുവഴിയുള്ള യാത്ര പൂർണമായും മുടങ്ങുകയായായിരുന്നു. പിന്നീട് മുതിർന്നവർ ജീവൻകയ്യിൽപിടിച്ചാണ് അക്കരെയിക്കരെ കടന്നിരുന്നത്. കഴിഞ്ഞദിവസം മൻമദമൂലയിലെ വിവാഹം നടന്ന വീട്ടിലേക്ക് സാധനങ്ങൾ തലചുമടായാണ് ഇതുവഴി കൊണ്ടുപോയത്. പിന്നീട് മഴകുറഞ്ഞ് വെള്ളമിറങ്ങിയതോടെ കഴിഞ്ഞദിവസം വൈകിട്ടുമുതലാണ് ഇവർക്ക് റോഡ് യാത്രയ്ക്കായി ഉപയോഗിക്കാനായത്. ഈ ഭാഗത്ത് ഒരു പാലം നിർമിച്ചാൽ എല്ലാവർഷകാലത്തും തങ്ങൾ അനുഭവിക്കുന്ന പ്രശ്നത്തിന് പരിഹാരമാകുമെന്നാണ് കുടുംബങ്ങൾ പറയുന്നത്. മുന്പ് ഈ ഭാഗത്ത് പാലം നിർമിക്കുന്നതിനായി എസ്റ്റിമേറ്റ് എടുത്തിരുന്നെങ്കിലും മറ്റ് നടപടികളൊന്നും മുന്നോട്ട് പോയിട്ടില്ലെന്നും ആരോപണമുണ്ട്.

കത്തിനശിച്ച പീടിക പുനസ്ഥാപിച്ച് വ്യാപാരി വ്യവസായി ഏകോപന സമിതി

സുൽത്താൻ ബത്തേരി: തീപിടിത്തത്തിൽ നശിച്ച ചെറുകിട കച്ചവടക്കാരന്‍റെ പീടിക വ്യാപാരി സമൂഹം പുനസ്ഥാപിച്ചു. ബീനാച്ചിയിലെ കുന്നത്ത് ബാഗ്സ് എന്ന പീടികയാണ് വ്യാപാരി വ്യവസായി ഏകോപന സമിതി വയനാട് ജില്ലാ കമ്മിറ്റിയും ബത്തേരി മർച്ചന്‍റ്സ് അസോസിയേഷനും സമിതി ബീനാച്ചി യൂണിറ്റും ചേർന്ന് പുനസ്ഥാപിച്ചത്. ബീനാച്ചിയിലെ ഖാലിദാണ് കടയുടമ. കഴിഞ്ഞ മാർച്ചിലാണ് കട തീപിടിച്ചുനശിച്ചത്. പുനസ്ഥാപിച്ച കടയുടെ ഉദ്ഘാടനം സമിതി ജില്ലാ ജനറൽ സെക്രട്ടറി കെ. ഉസ്മാൻ നിർവഹിച്ചു. ട്രഷറർ നൗഷാദ് കരിന്പനക്കൽ, ബത്തേരി യൂണിറ്റ് പ്രസിഡന്‍റ് പി.വൈ. മത്തായി, ട്രഷറർ ശ്രീജിത്, നൗഷാദ് മിന്നാരം, ബീരാൻ ഹാജി, നിഷാദ്, മുഹമ്മദ് ഷെരീഫ് ഹാജി, സണ്ണി, ടി.പി. റഫീക്ക്, ലത്തീഫ് തുടങ്ങിയർ പങ്കെടുത്തു.

കാട്ടാന തകർത്ത താത്കാലിക വീട് വനസേന പുനർനിർമിച്ചു

കൽപ്പറ്റ: കാട്ടാന തകർത്ത താത്കാലിക വീട് വനസേന പുനർനിർമിച്ചു. വൈത്തിരി സുഗന്ധഗിരിയിലെ ടി.കെ. തന്പിയും കുടുംബവും താമസിച്ചിരുന്ന വീടാണ് പുനർനിർമിച്ചത്. ആസ്ബറ്റോസ് ഷീറ്റ് മേഞ്ഞ വീട് കഴിഞ്ഞ ദിവസം പുലർച്ചെയാണ് ആന തകർത്തത്. 63 കാരനായ തന്പിക്ക് ആനയുടെ ആക്രമണത്തിനിടെ നിസാര പരിക്കേറ്റിരുന്നു. റേഞ്ച് ഫോറസ്റ്റ് ഓഫീസർ കെ. ഹാഷിഫ്, എസ്എഫ്ഒ എൻ.ആർ. കേളു, ബിഎഫ്ഒമാരായ അനില രമണൻ, സി.സി. ശ്യാംകുമാർ, ബി. അഭിനന്ദ്, എം. സുഭാഷ്, പരിസരവാസികളായ ബി. രവി, ടി.പി. ഗോപാലൻ എന്നിവരടങ്ങുന്ന സംഘമാണ് വീട് പുനർനിർമിച്ചത്. പൊഴുതന പഞ്ചായത്ത് പ്രസിഡന്‍റ് അനുവദിച്ച കട്ടിൽ വനപാലകർ തന്പിയുടെ വീട്ടിൽ എത്തിച്ചു.

മഴയിൽ വീട് ഭാഗികമായി തകർന്നു

സുൽത്താൻ ബത്തേരി: ശക്തമായ മഴയിൽ തോട് കരകവിഞ്ഞൊഴുകി വീട് ഭാഗികമായി തകർന്നു. നെൻമേനി നന്പ്യാർകുന്ന് പൊന്നകം കരിപ്പോട് ഷീബയുടെ വീടിന്‍റെ അടുക്കളഭാഗത്തെ ഭിത്തിയാണ് തകർന്നത്. വീടിനോട് ചേർന്നൊഴുകുന്ന പൊന്നകം തോട് ശക്തമായ മഴയിൽ കരകവിഞ്ഞൊഴുകി വെള്ളം കയറിയതോടെയാണ് കഴിഞ്ഞദിവസം വീടിന്‍റെ അടുക്കളഭാഗത്തെ ഭിത്തി തകർന്നത്. നിലവിൽ താങ്ങുകാൽ നൽകിയാണ് വീട് നിർത്തിയിരിക്കുന്നത്. ഇനിയും മഴശക്തമായി കൂടുതൽ വെള്ളം വീട്ടിലേക്ക് അടിച്ചുകയറാനുളള സാധ്യതയുണ്ട്. ഇതോടെ വീട് പൂർണമായും തകരുമോ എന്ന ആശങ്കയിലാണ് കുടംബം. സ്ഥലം സന്ദർശിച്ച റവന്യു, പഞ്ചായത്ത് അധികൃതർ ക്യാന്പിലേക്ക് മാറാൻ കുടുംബത്തോട് ആവശ്യപ്പെട്ടിട്ടുണ്ട്. എന്നാൽ ഇവരുടെ ഉപജീവനമാർഗമായ നാൽക്കാലികളെ എന്തുചെയ്യണമെന്നറിയാത്ത അവസ്ഥയിലാണ് കുടുംബം.

പ്രത്യാശയുടെ മഴക്കുടകൾ ഇനി കളക്ടറേറ്റിലും ലഭിക്കും

കൽപ്പറ്റ: ഉരുൾ പൊട്ടൽ ദുരന്തത്തെ അതിജീവിച്ച് മുണ്ടക്കൈയിലെ ഒരുപ്പറ്റം വനിതകൾ പ്രത്യാശയുടെ കുടവിരിക്കുകയാണ് ബെയ്‌ലി ചെറുകിട സംരംഭത്തിലൂടെ. പുഞ്ചിരിമട്ടം ദുരന്തത്തിൽ ഉറ്റവരെ നഷ്ടപ്പെടുകയും പ്രതീക്ഷകൾ അസ്തമിക്കുകയും ചെയ്തിടത്ത് നിന്നാണ് ഈ ഉയർത്തെഴുന്നേൽപിന്‍റെ വിജയഗാഥ രചിക്കുന്നത്. എല്ലാം നഷ്ടമായി നിസഹായരായി നിന്നവർ ബെയ്‌ലി സംരംഭത്തിലൂടെ അതിജീവനപാതയിലാണ്. മഴക്കുടകളും ബാഗുകളും നിർമിച്ച് വിപണിയിലെത്തിക്കുകയാണ് ഒരു കൂട്ടം വനിതകൾ. രക്ഷാ പ്രവർത്തനത്തിനായി സൈന്യം നിർമിച്ച ബെയ്ലി പാലത്തിന്‍റെ പേര് തന്നെ കടമെടുത്തു. ദുരന്ത സമയത്ത് മുണ്ടക്കൈ, ചൂരൽമല പ്രദേശങ്ങളെ ബന്ധിപ്പിച്ച് രക്ഷാപ്രവർത്തനത്തിന് ഏകമാർഗമായ ബെയ്‌ലി പാലത്തിന്‍റെ പേരിലാണ് സംരംഭത്തിന് തുടക്കമിട്ടത്. ചൂരൽമലയിലെ വനിതകൾക്ക് മുൻപിൽ കുട നിർമാണമെന്ന ആശയം ആദ്യമായി മുന്നോട്ടുവച്ചത് കുടുംബശ്രീ ജില്ലാ മിഷനാണ്. ആശയത്തിന് താത്പര്യം പ്രകടിപ്പിച്ചവർക്കായി കുടുംബശ്രീയുടെ നേതൃത്വത്തിൽ മൂന്ന് ദിവസം കുടനിർമാണത്തിൽ പരിശീലനം നൽകി. പരിശീലന ക്ലാസുകളിലൂടെ ലഭിച്ച അറിവും ചോരാത്ത ആത്മധൈര്യവും സംരംഭമെന്ന ആശയം യാഥാർഥ്യമാക്കാൻ ഇവർക്ക് സഹായമായി. ജില്ലാ കളക്ടർ ഡി.ആർ. മേഘശ്രീ, കുടുംബശ്രീ ജില്ലാമിഷൻ, സ്വാമിനാഥൻ ഫൗണ്ടേഷൻ എന്നിവയുടെ സംയുക്ത ഇടപെടലുകളാലാണ് യൂണിറ്റുകളിലേക്ക് ആവശ്യമായ സഹായങ്ങൾ ഒരുക്കിയത്. കൽപ്പറ്റ എസ്കെഎംജെ സ്കൂൾ ഗ്രൗണ്ടിൽ സംഘടിപ്പിച്ച സംസ്ഥാന സർക്കാരിന്‍റെ നാലാം വാർഷികാഘോഷ പരിപാടിയിലാണ് ബെയ്‌ലി ബാഗ് യൂണിറ്റിന് ആദ്യമായി വിപണന സാധ്യത തുറന്നത്. കുടനിർമിക്കാൻ ആവശ്യമായ 390 ഓളം അസംസ്കൃത വസ്തുക്കൾ നൽകിയതും ജില്ലാ കളക്ടറുടെ നേതൃത്വത്തിലാണെന്ന് സംരംഭക റംലത്ത് വ്യക്തമാക്കി. നിലവിൽ റിപ്പണ്‍, മേപ്പാടി കേന്ദ്രീകരിച്ച് കുടനിർമാണവും ബാഗ് നിർമാണവും വ്യത്യസ്ത യൂണിറ്റുകളായി നടക്കുന്നുണ്ട്. കുട നിർമാണ യൂണിറ്റിൽ എട്ടുപേരും ബാഗ് നിർമാണ യൂണിറ്റിൽ 26 പേരുമാണുള്ളത്. സഹായങ്ങൾ ലഭിക്കാറുണ്ടെങ്കിലും പലപ്പോഴും കെട്ടിട വാടക, മറ്റ് ആവശ്യങ്ങൾക്കായി പണം തികയാതെ വരുന്പോൾ സ്വർണാഭരണങ്ങൾ വിറ്റ് പണം കണ്ടെത്തേണ്ട അവസ്ഥയും ഇവർ നേരിടുന്നുണ്ട്. കുടുംബശ്രീ ജില്ലാ മിഷനിൽ നിന്നും അനുവദിച്ച ലോണ്‍ ആശ്വാസമാണ്. മികച്ച രീതിയിൽ കച്ചവടം നടന്നാൽ മാത്രമേ ഇവരുടെ മുന്നോട്ടുള്ള അതിജീവനത്തിന് കരുത്താവുകയുള്ളു. ഇതുവരെയുള്ള കച്ചവടത്തിൽ നിന്നും വിറ്റുവരവ് ഇനത്തിൽ കൂലിയായി എടുക്കാൻ കഴിഞ്ഞിട്ടില്ലെങ്കിലും പ്രതിസന്ധികളും പ്രതിബന്ധങ്ങളും തരണം ചെയ്ത് ഉയർന്നു വരാൻ സാധിക്കുമെന്ന പ്രതീക്ഷയുണ്ട്. കളക്ടറേറ്റിൽ അന്വേഷണ കൗണ്ടറിന് സമീപം ബെയ്ലി ബാഗുകളും കുടകളും കുറഞ്ഞ വിലയിൽ ലഭിക്കും.

ജലാശയങ്ങളും വയലുകളും വെള്ളം നിറഞ്ഞതോടെ മീൻപിടുത്തം സജീവം

സുൽത്താൻ ബത്തേരി: ശക്തമായ മഴയിൽ വയനാട്ടിലെ പുഴകളിലും വയലുകളിലും വെള്ളം നിറഞ്ഞതോടെ സജീവമായി മീൻപിടുത്ത സംഘങ്ങൾ. ചെറുതും വലുതുമായ മീൻപിടുത്ത സംഘങ്ങളാണ് വയനാട്ടിലെ വിവിധ പുഴയിറുന്പുകളിലും തോട്ടിൻകരയിലും വയലോരങ്ങളിലും സജീവമാകുന്നത്. ജില്ലയ്ക്ക് പുറത്തുനിന്നുവരെ മീൻ പിടുത്ത സംഘങ്ങൾ വയനാട്ടിലെ പുഴകളിലേക്കും മറ്റു ജലാശയങ്ങളിലേക്കും മീൻ പിടിക്കാനായി എത്തുന്നുണ്ട്. ആഫ്രിക്കൻ മുഷി, ചെന്പല്ലി, തോണിയാടി, പരൽ, കല്ലേമുട്ടി, പൊടിമീനുകൾ തുടങ്ങിയ മത്സ്യങ്ങളാണ് ഈ സംഘങ്ങളുടെ വലകളിൽ പ്രധാനമായും ലഭിക്കുന്നത്. മുതിർന്നവർക്ക് പുറമെ കുട്ടികളും ചെറിയ വലകളുമായി മത്സ്യബന്ധനത്തിനായി എത്തുന്നത് കൗതുകത്തിനൊപ്പം ആശങ്കയും വർധിപ്പിക്കുന്നുണ്ട്. പലരും സ്വന്തം ആവശ്യത്തിനുള്ള മത്സ്യം പിടിക്കാനായി വരുന്നവരാണ്. എന്നാൽ കൂടുതൽ മത്സ്യം ലഭിക്കുന്ന ദിവസങ്ങളിൽ ഇവർ വിൽപ്പന നടത്താറുമുണ്ട്. മഴ ശക്തമായതോടുകൂടി പുഴകളിലും തോടുകളിലും ജലനിരപ്പ് ഉയരുന്നതോടെ നാടൻ മത്സ്യങ്ങൾ ധാരാളം എത്തുമെന്ന് മത്സ്യം പിടിക്കാനെത്തിയവർ പറയുന്നു. മുത്തങ്ങ കല്ലൂർ, നന്പിക്കൊല്ലി പ്രദേശങ്ങളിലായി പുഴയിൽ ദിവസവും നൂറ്റിയന്പതിലേറെ പേർ മത്സ്യബന്ധനത്തിന് എത്താറുണ്ട്. കുത്തുവല, തണ്ടാടി, കോരുവല, ചൂണ്ട എന്നിവയാണ് മത്സ്യബന്ധനത്തിനായി പ്രധാനമായും ഉപയോഗിക്കുന്നത്. ഏതാനും ദിവസങ്ങളായി ജില്ലയിൽ മഴ ശക്തമായതോടെ പുഴകളിലെയും വലിയ തോടുകളിലെയും ചെക്ഡാമിന് സമീപത്തെ കുത്തൊഴുക്കുള്ള വെള്ളത്തിൽ മത്സ്യബന്ധനം നടത്തുന്നത് ശ്രദ്ധയോടെയാകണമെന്ന മുന്നറിയിപ്പാണ് പ്രദേശവാസികൾ നൽകുന്നത്.

കബനി ഗിരിയിൽ വീണ്ടും പുലി ആടിനെ കൊന്നു

പുൽപ്പള്ളി: കബനിഗിരിയിൽ വീണ്ടും പുലിയുടെ ആക്രമണം. വീട്ടുമുറ്റത്തെ കൂട്ടിൽ കെട്ടിയിരുന്ന ആടിനെ പുലി കൊന്നു. കബനിഗിരി 60 കവലയ്ക്ക് സമീപം തേവർകാട്ടുകുന്നേൽ ജോയിയുടെ രണ്ട് വയസ് പ്രായമുള്ള ആടിനെയാണ് പുലി കൊന്നത്. വ്യാഴാഴ്ച രാത്രി ഒന്പതോടെയാണ് സംഭവം. ആടിന്‍റെ കരച്ചിൽകേട്ട് വീട്ടുകാർ പുറത്തെ ലൈറ്റിട്ട് ശബ്ദമുണ്ടാക്കിയതോടെ പുലി ആടിനെ ഉപേക്ഷിച്ച് കടന്നുകളയുകയായിരുന്നു. വിവരമറിയിച്ചതിനെ തുടർന്ന് രാത്രിതന്നെ വനപാലകരെത്തി പ്രദേശത്ത് തെരച്ചിൽ നടത്തിയെങ്കിലും പുലിയെ കണ്ടെത്താനായില്ല. ഇന്നലെ രാവിലെയും കൂടുതൽ വനംവകുപ്പ് ഉദ്യോഗസ്ഥരെത്തി പ്രദേശത്ത് തെരച്ചിൽ നടത്തി. വീട്ടുമുറ്റത്തെ ആട്ടിൻ കൂടിന് സമീപം വനംവകുപ്പ് നിരീക്ഷണത്തിനായി കാമറകൾ സ്ഥാപിച്ചിട്ടുണ്ട്. കഴിഞ്ഞ പത്ത് ദിവസത്തിനിടെ നാല് ആടുകളും ഒരു വളർത്തുനായയുമാണ് പുലിയ്ക്കിരയായത്. പുലിയെ പിടികൂടുന്നതിനായി പ്രദേശത്ത് കൂടുൽ കൂടുകൾ സ്ഥാപിക്കണമെന്നാണ് നാട്ടുകാരുടെ ആവശ്യം. വെറ്ററിനറി ഡോക്ടറുടെ റിപ്പോർട്ടിന്‍റെ അടിസ്ഥനത്തിൽ ആടിന്‍റെ ഉടമയ്ക്ക് അർഹമായ നഷ്ടപരിഹാരം നൽകുമെന്ന് വനംവകുപ്പ് റേഞ്ചർ രാജിവ്കുമാർ പറഞ്ഞു. പുലിയെ പിടികൂടാൻ നടപടി വേണമെന്ന് പുൽപ്പള്ളി: കബനിഗിരി, മരക്കടവ് പ്രദേശത്ത് രണ്ടാഴ്ചയോളമായി ഭീതിപരത്തുന്ന പുലിയെ അടിയന്തിരമായി പിടികൂടാൻ വനംവകുപ്പ് ഉണർന്ന് പ്രവർത്തിക്കണമെന്ന് കേരളാ കർഷക യൂണിയൻ-എം ജില്ലാ പ്രസിഡന്‍റ് റെജി ഓലിക്കരോട്ട് ആവശ്യപ്പെട്ടു. വനംവകുപ്പ് പ്രദേശത്ത് കൂടുതൽ കൂടുകൾ സ്ഥാപിച്ചും കൃഷിയിടങ്ങളിൽ തെരച്ചിൽ നടത്തിയും പുലിയെ കണ്ടെത്താനുള്ള നടപടി സ്വീകരിക്കണമെന്നും പുലി ശല്യംമൂലം പ്രദേശത്തെ ക്ഷീരകർഷകർ ഉൾപ്പെടെയുള്ളവർക്ക് പുല്ലരിയാൻ പോലും പുറത്തിറങ്ങാൻ കഴിയാത്ത അവസ്ഥയാണെന്നും ഇതിന് അടിയന്തിര പരിഹാരം കാണണമെന്നും അദ്ദേഹം ആവശ്യപ്പെട്ടു.

സപ്ലൈകോ നെല്ല് സംഭരിക്കാനെത്തിയില്ല കർഷകർ പ്രതിസന്ധിയിൽ

പുൽപ്പള്ളി: കൊയ്തെടുത്ത നെല്ല് സംഭരിക്കാനാളില്ലാതെ കർഷകർ ദുരിതത്തിൽ. സപ്ലൈയ്ക്കോയ്ക്ക് നെല്ല് വിൽക്കാൻ കരാറായ കർഷകരാണ് നെല്ല് സംഭരിക്കാൻ ആളെത്താത്തതിനാൽ പ്രയാസമനുഭവിക്കുന്നത്. പെരിക്കല്ലൂർ വരദൂർ പാടശേഖരത്തിലെ 40 ഓളം കർഷകരാണ് കൊയ്തെടുത്ത നെല്ലുമായി കാത്തിരിക്കുന്നത്. മഴ ശക്തമായതോടെ കളങ്ങളിൽ സൂക്ഷിച്ചിരിക്കുന്ന നെല്ല് നശിച്ചുപോകുമെന്ന ആശങ്കയിലാണ് കർഷകർ. മെതിച്ചെടുത്ത നെല്ല് പ്ലാസ്റ്റിക്ക് ചാക്കുകളിൽ കെട്ടി, കളങ്ങളിൽ പ്ലാസ്റ്റിക് ഷീറ്റുകൊണ്ട് മൂടിയിട്ടിരിക്കുകയാണ്. രണ്ടാഴ്ച മുന്പാണ് കൊയ്ത്ത് നടത്തിയത്. തുടർന്ന് സപ്ലൈയ്ക്കോയ്ക്ക് നെല്ല് വിൽക്കുന്നതിനുള്ള കരാറും തയ്യാറാക്കി. എന്നാൽ സപ്ലൈകോ നൽകിയ നാല് മില്ലുകാരെ ബന്ധപ്പെട്ടെങ്കിലും ഇവരാരും നെല്ല് സംഭരിക്കാൻ വരാൻ തയ്യാറാകുന്നില്ലെന്നാണ് കർഷകർ പറയുന്നത്. മഴ കനത്തതോടെ കർഷകരുടെ ആശങ്കയും കൂടി. സപ്ലൈക്കോ അധികൃതരുമായി ബന്ധപ്പെട്ടെങ്കിലും പ്രയോജനമൊന്നുമില്ലെന്നാണ് കർഷകർ പറയുന്നത്. വരവൂർ പാടശേഖരത്തിൽ 40 ഏക്കറോളം ഇത്തവണ പുഞ്ചകൃഷി ചെയ്തിരുന്നു. രണ്ടാഴ്ച മുന്പ് കൊയ്ത്ത് ഏകദേശം പൂർത്തിയാക്കി. മഴ കനത്തതിനാൽ ഇനി ഏഴ് ഏക്കറിലെ കൊയ്ത്തുകൂടി ബാക്കിയുണ്ട്. ഇതിനിടെ മഴ നനഞ്ഞ് 3500 ഓളം റോൾ വൈക്കോലും മഴ നനഞ്ഞ് നശിച്ചുപോയി. നെല്ല് വിറ്റുകിട്ടുന്ന പണം കൊണ്ടുവേണം അടുത്ത നഞ്ചകൃഷിക്കുള്ള ഒരുക്കങ്ങൾ നടത്താനാണെന്നാണ് കർഷകർ പറയുന്നത്. കർണാടകയോട് ചേർന്നുകിടക്കുന്ന പെരിക്കല്ലൂരിലെ വരവൂർ പാടത്ത് കാട്ടാനയടക്കമുള്ള വന്യമൃഗങ്ങളുടെ ശല്യം രൂക്ഷമാണ്. ഇത്തവണ ദിവസങ്ങളോളം കാവൽകിടന്നാണ് നെല്ല് വിളവെടുപ്പിന് പാകമെത്തിച്ചത്. എന്നാൽ വിളവെടുത്ത നെല്ല് വാങ്ങാൻ ആളെത്താതായതോടെ കർഷകരുടെ പ്രതീക്ഷകളെല്ലാം താളംതെറ്റിയിരിക്കുയാണ്.

ജില്ലയിലെ 14 ദുരിതാശ്വാസ ക്യാന്പുകളിലായി 628 പേർ

കൽപ്പറ്റ: ജില്ലയിൽ ആരംഭിച്ച 14 ദുരിതാശ്വാസ ക്യാന്പുകളിലായി 628 പേരെ മാറ്റിപ്പാർപ്പിച്ചു. 179 കുടുംബങ്ങളിൽ നിന്നായി 628 പേരെയാണ് വിവിധയിടങ്ങളിലെ ക്യാന്പുകളിലേക്ക് മാറ്റിയത്. ഇതിൽ 211 പുരുഷൻമാരും 248 സ്ത്രീകളും (നാല് ഗർഭിണികൾ), 169 കുട്ടികളും 48 വയോജനങ്ങളും ആറ് ഭിന്നശേഷിക്കാരും ഉൾപ്പെടുന്നുണ്ട്. സുൽത്താൻ ബത്തേരി താലൂക്കിലെ നാല് കുടുംബങ്ങൾ, വൈത്തിരി താലൂക്കിലെ 20 കുടുംബങ്ങൾ, മാനന്തവാടി താലൂക്കിലെ അഞ്ച് കുടുംബങ്ങൾ സ്വന്തം വീടുകളിലേക്ക് മടങ്ങി. സുൽത്താൻ ബത്തേരി താലൂക്കിൽ എട്ട് ക്യാന്പും വൈത്തിരി താലൂക്കിൽ അഞ്ച് ക്യാന്പും മാനന്തവാടി താലൂക്കിൽ ഒരുക്യാന്പുമാണ് ഉള്ളത്. ജില്ലയിൽ കൂടുതൽ മഴ ലക്കിടിയിൽ ജില്ലയിൽ കഴിഞ്ഞ ദിവസം കൂടുതൽ മഴ ലഭിച്ചത് ലക്കിടിയിൽ. ഇന്നലെ രാവിലെ എട്ട് വരെ 24 മണിക്കൂറിൽ ലഭിച്ച മഴയുടെ കണക്ക് പ്രകാരമാണ് വൈത്തിരി ഗ്രാമപഞ്ചായത്തിലെ ലക്കിടിയിൽ കൂടുതൽ മഴ ലഭിച്ചത്. 144 മില്ലിമീറ്റർ മഴയാണ് പ്രദേശത്ത് കിട്ടിയത്. നൂൽപ്പുഴ, ഗ്രാമപഞ്ചായത്തിലെ മുത്തങ്ങയിലാണ് കുറവ് മഴ. 18 മില്ലിമീറ്റർ മഴയാണ് പ്രദേശത്ത് ലഭിച്ചത്. ജില്ലയിൽ ഇന്ന് യെല്ലോ അലർട്ട് കേന്ദ്ര കാലാവസ്ഥ നിരീക്ഷണ വകുപ്പ് ജില്ലയിൽ ഇന്ന് യെല്ലോ അലർട്ട് പ്രഖ്യാപിച്ചു.

ആൾക്കൂട്ട ആക്രമണം; മധ്യവയസ്കനു ഗുരുതര പരിക്ക്

കൽപ്പറ്റ: ആൾക്കൂട്ട ആക്രമണത്തിൽ മധ്യവയസ്കനു ഗുരുതര പരിക്കേറ്റു. എടഗുനി കരുമതിയിൽ ബിജുവിനെയാണ്(50)ഒരുകൂട്ടം ആളുകൾ മർദിച്ചത്. ബുധനാഴ്ച രാത്രി എട്ടരയോടെ പിണങ്ങോട് റോഡിൽ ആക്സിസ് ബാങ്ക് പരിസരത്താണ് സംഭവം. ബിജു സ്വകാര്യ ആശുപത്രിയിൽ ചികിത്സയിലാണ്. . മറ്റൊരു കാറിലുണ്ടായിരുന്നയാൾ വിളിച്ചുവരുത്തിയവരാണ് മർദിച്ചതെന്നും ഓട്ടോ ഡ്രൈവറാണ് രക്ഷപ്പെടുത്തി ആശുപത്രിയിൽ എത്തിച്ചതെന്നും ബിജു പറഞ്ഞു.

697 കുടുംബങ്ങൾക്ക് എമർജൻസി ഷെൽട്ടർ കിറ്റ് വിതരണം ചെയ്തു

കൽപ്പറ്റ: മഴ ശക്തമായ സാഹചര്യത്തിൽ ടെക്സസ് ഇൻസ്ട്രുമെന്‍റ്സിന്‍റെ പിന്തുണയോടെ ഹൗസിംഗ് എൻജിഒ ഹാബിറ്റാറ്റ് ഫോർ ഹ്യുമാനിറ്റി ഇന്ത്യ ജില്ലയിൽ 697 കുടുംബങ്ങൾക്ക് എമർജൻസി ഷെൽട്ടർ കിറ്റ് വിതരണം ചെയ്തു. പനമരം, എടവക, കോട്ടത്തറ, മാനന്തവാടി, ബത്തേരി എന്നിവിടങ്ങളിലെ കുടുംബങ്ങൾക്കാണ് കിറ്റ് നൽകിയത്. ടാർപോളിൻ, കയർ, പ്ലയർ, ഹാമർ, ആണികൾ, വാഷറുകൾ, പ്ലാസ്റ്റിക് ഷീറ്റ് തുടങ്ങിയവ അടങ്ങിയതാണ് എമർജൻസി കിറ്റ്. കൊളഗപ്പാറ ശ്രേയസ് ഹാളിൽ നടത്തിയ ചടങ്ങിൽ ഹാബിറ്റാറ്റ് ഫോർ ഹ്യുമാനിറ്റി ഇന്ത്യ സൗത്ത് റീജിയണൽ ഹെഡ് ജോർജ് പി. കുര്യൻ, മീനങ്ങാടി പഞ്ചായത്ത് പ്രസിഡന്‍റ് കെ.ഇ. വിനയൻ, സ്റ്റാൻഡിംഗ് കമ്മിറ്റി ചെയർമാൻ ബേബി വർഗീസ്, ബത്തേരി ശ്രേയസ് എക്സിക്യുട്ടീവ് ഡയറക്ടർ ഫാ.ഡേവിഡ് ആലിങ്കൽ എന്നിവർ ചേർന്ന് കിറ്റുകൾ കൈമാറി.

തരിയോട് നിർമല സ്കൂളിൽ സന്പാദ്യം പദ്ധതി തുടങ്ങി

തരിയോട്: നിർമല ഹൈസ്കൂളിൽ സന്പാദ്യം പദ്ധതി തുടങ്ങി. പുതുതായി എട്ടാം ക്ലാസിൽ പ്രവേശനം നേടിയ മുഴുവൻ വിദ്യാർഥികളെയും സഞ്ചയികയിൽ അംഗങ്ങളാക്കിയാണ് പദ്ധതി ആരംഭിച്ചത്. ഓരോ വിദ്യാർഥിക്കും 50 രൂപ നിക്ഷേപം കാണിക്കുന്ന പാസ്ബുക്ക് നൽകി. മുൻ വർഷങ്ങളിൽ സഞ്ചയിക പദ്ധതിയിൽനിന്ന് ലഭിച്ച പലിശയാണ് വിദ്യാർഥികളുടെ പ്രാഥമിക നിക്ഷേപത്തിന് ഉപയോഗപ്പെടുത്തിയത്. ജില്ലാ സഞ്ചയിക ഓഫീസർ അഖിൽ ജോണ്‍ ഉദ്ഘാടനം ചെയ്തു. ഹെഡ്മാസ്റ്റർ ജോബി മാനുവൽ, പിടിഎ പ്രസിഡന്‍റ് ഡെൻസി ജോണ്‍, എംപിടിഎ പ്രസിഡന്‍റ് ദിവ്യ പ്രതീഷ് തുടങ്ങിയവർ പങ്കെടുത്തു.

വെറ്ററിനറി സർവകലാശാല ബോർഡ് ഓഫ് മാനേജ്മെന്‍റ്: ആറു പേർ എതിരില്ലാതെ വിജയിച്ചു

കൽപ്പറ്റ: കേരള വെറ്ററിനറി ആൻഡ് അനിമൽ സയൻസസ് സർവകലാശാല ബോർഡ് ഓഫ് മാനേജ്മെന്‍റിലേക്ക് നടന്ന തെരഞ്ഞെടുപ്പിൽ ആറു പേർ എതിരില്ലാതെ വിജയിച്ചു. എൽഡിഎഫ് എംഎൽഎമാരായ കെ.എം. സച്ചിൻദേവ്(ബാലുശേരി) ഇ.കെ. വിജയൻ(നാദാപുരം), ഫാക്കൽറ്റി ഡീൻ പ്രതിനിധിയായി ഡോ.എസ്.എൻ. രാജകുമാർ, അധ്യാപക പ്രതിനിധികളായി ഡോ.കെ.സി. ബിപിൻ, ഡോ.എ.ആർ. ശ്രീരഞ്ജിനി, പൊതുമണ്ഡലം പ്രതിനിധിയായി സി.ആർ. സന്തോഷ് എന്നിവരാണ് വിജയിച്ചത്. ഡീൻ, അധ്യാപക, പൊതുമണ്ഡലം പ്രതിനിധികളായി വിജയിച്ചവർ ഇടത് അനുകൂല സംഘടനകളിൽനിന്നുള്ളവരാണ്.

ജില്ലയിൽ യാഥാർഥ്യമാവുക 21 കോടിയുടെ വികസന പദ്ധതികൾ

കൽപ്പറ്റ: ജില്ലയിൽ നിന്ന് മുഖ്യമന്ത്രിക്കും മന്ത്രിമാർക്കും നൽകിയ നിർദേശങ്ങളുടെ ഭാഗമായി 21 കോടി രൂപയുടെ വികസന പദ്ധതികൾ ജില്ലയിൽ നടപ്പാക്കും. നവകേരള സദസിൽ ജില്ലയിൽ നിന്ന് ഉയർന്നുവന്ന പദ്ധതികൾ നടപ്പാക്കാൻ മന്ത്രിസഭായോഗം 21 കോടി രൂപയാണ് അനുവദിച്ചു. വയനാട് മെഡിക്കൽ കോളജിൽ ആധുനിക ഉപകരണങ്ങൾ ലഭ്യമാക്കുന്നതിന് ഏഴ് കോടി രൂപയാണ് അനുവദിച്ചത്. 3.95 കോടി രൂപ ചെലവിൽ സിടി സ്കാനർ, ഡിജിറ്റൽ റേഡിയോഗ്രഫി സിസ്റ്റം (1.61 കോടി), 3ഡി ലാപ്രോസ്കോപിക് സെറ്റ് (1.17 കോടി), സിആം മൊബൈൽ ഇമേജ് ഇന്‍റൻസിഫയർ സിസ്റ്റം (27 ലക്ഷം രൂപ) എന്നിവ സ്ഥാപിക്കാനും നിർദേശമുണ്ട്. സുൽത്താൻ ബത്തേരി നിയമസഭ മണ്ഡലത്തിൽ വനംവന്യജീവി വകുപ്പിന് കീഴിലാകും വികസന പദ്ധതികൾ നടപ്പാക്കുക. വയനാട് വൈൽഡ് ലൈഫ് ഡിവിഷനിലെ സുൽത്താൻ ബത്തേരി നായ്ക്കട്ടി ഫോറസ്റ്റ് സ്റ്റേഷനിലെ 18.75 കിലോമീറ്ററിലും മുത്തങ്ങ, തോട്ടമൂല ഫോറസ്റ്റ് സ്റ്റേഷനിലുമായി ഒന്നര കോടി രൂപ വീതം ചെലവിട്ട് സോളാർ തൂക്ക് വേലി സ്ഥാപിക്കും. മരിയനാട് പ്രോജക്ടുമായി ബന്ധപ്പെട്ട് 2005 മുതൽ 2024 വരെ തൊഴിലാളികൾക്ക് നൽകേണ്ട സർവീസ് ആനുകൂല്യങ്ങളും അധിക സമാശ്വാസ സഹായം ഉൾപ്പെടെ പദ്ധതികൾക്കുമായി നാല് കോടി രൂപ ചെലവഴിക്കും. കൽപ്പറ്റ മണ്ഡലത്തിൽ ബിഎംബിസി നിലവാരത്തിൽ റോഡ് നവീകരണത്തിനായി ഏഴ് കോടി രൂപയുടെ പദ്ധതി നടപ്പാക്കും. കാക്കവയൽ മുതൽ കാരാപ്പുഴ അണക്കെട്ട് വരെയുള്ള കാരാപ്പുഴ പ്രോജക്ട് റോഡാണ് നവീകരിക്കുന്നത്.

കാട്ടാന വീട് തട്ടിമറിച്ചു

കൽപ്പറ്റ: വൈത്തിരി സുഗന്ധഗിരിയിൽ കാട്ടാന വീട് തട്ടിമറിച്ചു. വ്യാഴാഴ്ച പുലർച്ചെയാണ് സംഭവം. സുഗന്ധഗിരിയിലെ തന്പിയും കുടുംബവും താമസിക്കുന്ന ആസ്ബറ്റോസ് ഷീറ്റ് മേഞ്ഞ വീടാണ് ആന തട്ടിയിട്ടത്. വീടിന്‍റെ ഭാഗം ദേഹത്തുവീണ് തന്പിക്ക്(63) നിസാര പരിക്കേറ്റു. ബുധനാഴ്ച രാത്രിയാണ് നാല് ആനകൾ സുഗന്ധഗിരിയിൽ എത്തിയത്. വിവരം അറിഞ്ഞയുടൻ വനം വകുപ്പിന്‍റെ ആർആർ ടീം സ്ഥലത്ത് എത്തിയെങ്കിലും മഴയും വൈദ്യുതി വിതരണം തടസപ്പെട്ടിരുന്നതും ആനകളെ തുരത്തുന്നതിന് വിഘാതമായി. വനം ഉദ്യോഗസ്ഥർ പ്രദേശത്ത് നിരീക്ഷണം തുടരുകയാണ്.

തുരങ്കപാത: വയനാട് പ്രകൃതി സംരക്ഷണ സമിതി ദേശീയ ഹരിത ട്രൈബ്യൂണലിലേക്ക്

കൽപ്പറ്റ: ആനക്കാംപൊയിൽ-കള്ളാടി നാലുവരി തുരങ്കപാത നിർമാണത്തിന് കേന്ദ്ര പരിസ്ഥിതി മന്ത്രാലയത്തിനു കീഴിലെ വിദഗ്ധ സമിതി അനുമതി നൽകിയതിനെതിരേ വയനാട് പ്രകൃതി സംരക്ഷണ സമിതി രംഗത്ത്. വനം-പരിസ്ഥിതി മന്ത്രാലയത്തെ തെറ്റിദ്ധരിപ്പിച്ചും വസ്തുതകൾ മറച്ചുവച്ചും നേടിയതാണ് അനുമതിയെന്ന് സമിതി പ്രസിഡന്‍റ് എൻ. ബാദുഷ ആരോപിച്ചു. തുരങ്കപാത നിർമാണം തടയുന്നതിന് ഇടപെടൽ തേടി ദേശീയ ഹരിത ട്രൈബ്യൂണലിലോ ഹൈക്കോടതിയിലോ ദിവസങ്ങൾക്കുള്ളിൽ ഹർജി നൽകുമെന്ന് അദ്ദേഹം പറഞ്ഞു. വലിയ തോതിലുള്ള വിനാശത്തിന് കാരണമാകുന്നതാണ് തുരങ്കപാത പദ്ധതി. കോട്ടപ്പടി, വെള്ളരിമല, തിരുവന്പാടി, ജീരകപ്പാറ വില്ലേജുകളിലെ പരിസ്ഥിതി ലോല പ്രദേശങ്ങളിലൂടെയാണ് 8.7 കിലോമീറ്റർ ദൈർഘ്യത്തിൽ തുരങ്കം നിർമിക്കേണ്ടത്. ആകെ 51. 370 ഹെക്ടർ ഭൂമിയാണ് പദ്ധതിക്ക് ആവശ്യം. ഇതിൽ 34.304 ഹെക്ടർ വനമാണ്. തുരങ്കപാത പദ്ധതിക്കു ഉപയോഗപ്പെടുത്തേണ്ട സ്ഥലത്തിനു സമീപമാണ് 2024 ജൂലൈ 30ന് ഉരുൾപൊട്ടിയ പുഞ്ചിരിമട്ടം. 1960 മുതൽ ഈ ഭൂപ്രദേശത്ത് നിരവധി തവണ ഉരുൾ പൊട്ടിയിട്ടുണ്ട്. 1984ലെ മുണ്ടക്കൈ ഉരുൾപൊട്ടൽ 17 പേരുടെ ജീവനെടുത്തു. 2019ലും 2020ലും മുണ്ടക്കൈയിൽ ഉരുൾ പൊട്ടി. വിനാശകരമായ ഉരുൾ പൊട്ടൽ ഉണ്ടായ കവളപ്പാറയും പാതാറും നിർദ്ദിഷ്ട പദ്ധതി പ്രദേശത്തിന്‍റെ പടിഞ്ഞാറുഭാഗത്താണ്. നിർദിഷ്ട പാതയിൽനിന്നു ഏകദേശം 0.85 കിലോമീറ്റർ അകലെയാണ് മുന്പ് ഉരുൾപൊട്ടിയ പുത്തുമല. ഇവയൊക്കെ പദ്ധതി പ്രദേശത്തിന്‍റെ ദുർബലതയിലേക്കാണ് വിരൽചൂണ്ടുന്നത്. തുരങ്കപാത കടന്നുപോകേണ്ട പർവതപ്രദേശങ്ങൾ വംശനാശ ഭീഷണി നേരിടുന്നതടക്കം ജൈവജാലങ്ങളുടെ ആവാസ വ്യവസ്ഥയാണ്. പരിസ്ഥിതിയിലും പരിസ്ഥിതി സുസ്ഥിരത ഉറപ്പുനൽകുന്ന സമൂഹത്തിലും പദ്ധതി ദൂരവ്യാപകമായ പ്രത്യാഘാതങ്ങൾ സൃഷ്ടിക്കും. കോഴിക്കോട് ജില്ലയിലെ തിരുവന്പാടി, വയനാട്ടിലെ വെള്ളരിമല വില്ലേജുകൾ പരിസ്ഥിതി ലോല പ്രദേശങ്ങളാണ്. വയനാട്ടിലും കോഴിക്കോട് ജില്ലയിലുമായി 32 പട്ടികവർഗ ഉന്നതികൾ നിർദിഷ്ട തുരങ്കപാതയ്ക്കു സമീപത്തുണ്ട്. തെറ്റായ വിവരങ്ങൾ നൽകിയാണ് കേന്ദ്ര വനംപരിസ്ഥിതി മന്ത്രാലയത്തിൽനിന്നു പദ്ധതിക്കുവേണ്ടി സ്റ്റേജ് വണ്‍ ക്ലിയറൻസ് നേടിയത്. വനം വകുപ്പിന്‍റെ ക്ലിയറൻസ് ലഭിച്ചശേഷം സ്റ്റേറ്റ് ഇക്കോളജി അസസ്മെന്‍റ് കമ്മിറ്റി പ്രസിദ്ധീകരിച്ച രേഖകളിൽ വൈരുധ്യം പ്രകടമാണ്. ഉയർന്ന പാരിസ്ഥിതിക സംവേദനമുള്ള മേഖലയിലൂടെയാണ് തുരങ്കം കടന്നുപോകേണ്ടത്. പാതയുടെ സമീപമുളള പ്രദേശങ്ങൾ അപകടമേഖലയാണ്. തിരുവന്പാടി പഞ്ചായത്തിലെ 35.67 ശതമാനം പ്രദേശം അസ്ഥിരവും 26.5 ശതമാനം ഉയർന്ന അസ്ഥിരവും 0.96 ശതമാനം ഗുരുതര അസ്ഥിരവും ആണ്. ഇക്കാര്യങ്ങൾ അസസ്മെന്‍റ് കമ്മിറ്റി കണ്ടെത്തിയതാണ്. വിദഗ്ധ സമിതി നടത്തിയ വിലയിരുത്തൽ പ്രക്രിയയിൽ സമർപ്പിച്ച നിർണായക രേഖയായ ഫോം ഒന്നിൽ അംഗീകാരം ലഭിക്കുന്നതിന് വനഭൂമിയെക്കുറിച്ചടക്കം തെറ്റായ വിവരമാണ് നൽകിയത്. പ്രോജക്ട് ഏരിയയുടെ ഏതെങ്കിലും ഭാഗം പ്രൊട്ടക്റ്റഡ് ഏരിയയിലോ ഇക്കോ സെൻസിറ്റീവ് സോണിലോ ഉൾപ്പെടുമോ എന്ന ചോദ്യത്തിന് അല്ല എന്ന തെറ്റായ മറുപടിയാണ് കൊടുത്തത്. വനാവകശ നിയമപ്രകാരം അവകാശങ്ങൾ നൽകാനുണ്ടോ, വനവകാശം പ്രോജക്ടിന് വിട്ടുകൊടുക്കുന്ന ഭൂമിയിൽ പൂർത്തികരിക്കാനുണ്ടോ എന്നീ ചോദ്യങ്ങൾക്ക് ഇല്ല എന്നായിരുന്നു ഉത്തരം. പദ്ധതി പ്രദേശത്ത് ആദിവാസി ഇതര സ്വകാര്യ ഭൂമിയിൽ 17.53 ഹെക്ടറിൽ നഷ്ടപരിഹാര വനവത്കരണത്തിന് കണ്ടെത്തിയ സ്ഥലം റീബിൽഡ് കേരള സ്കീമിലെ നവകിരണം പദ്ധതിയിൽ വനം വകുപ്പ് ഏറ്റെടുത്തതാണ്. വനവത്കരണം സ്വകാര്യ ഭൂമിയിലേ ചെയ്യാവൂ എന്ന നിബന്ധന പാലിക്കപ്പെട്ടിട്ടില്ല. സൗത്ത് വയനാട് ഫോറസ്റ്റ് ഡിവിഷനിലെ ചെതലത്ത് റേഞ്ചിൽപ്പെട്ട മണൽവയലിൽ 1.27 ഹെക്ടർ, കൊല്ലിവയലിൽ 1.8 ഹെക്ടർ, മാടപ്പറന്പിൽ 10.03 ഹെക്ടർ, ചുള്ളിക്കലിൽ 4.43 ഹെക്ടർ എന്നിങ്ങനെ വനപ്രദേശമാണ് വനവത്കരണത്തിന് ശിപാർശ ചെയ്തത്. നീലഗിരി ബയോസ്ഫിയർ റിസർവിന്‍റെ ഒരു ഭാഗം പദ്ധതി വിന്യാസത്തിന്‍റെ 10 കിലോമീറ്റർ ചുറ്റളവിൽ ഉൾപ്പെടുന്നതാണെന്നും ബാദുഷ പറഞ്ഞു.

എംഎൽഎമാരുടെ പ്രവൃത്തികൾ മന്ദഗതിയിലാക്കാൻ രാഷ്ട്രീയ സമ്മർദ്ദമെന്ന്

കൽപ്പറ്റ: എംഎൽഎമാരായ ഐ.സി. ബാലകൃഷ്ണന്‍റേയും, ടി. സിദ്ദിഖിന്‍റേയും പ്രാദേശിക വികസന ഫണ്ടുകൾ ഉപയോഗിച്ച് നടക്കുന്ന പ്രവൃത്തികൾക്ക് ഭരണാനുമതി നൽകാതെ നീട്ടികൊണ്ട് പോകുന്നതായി ആരോപണം. ജോയിന്‍റ് ഡയറക്ടറുടെ ഓഫീസിൽ പ്രാവീണ്യമുള്ള ജീവനക്കാരെ നിയമിക്കാത്തതാണ് ഇത്തരത്തിൽ ഭരണാനുമതി വൈകിപ്പിക്കാൻ ഇടയാക്കിയിരിക്കുന്നതെന്നാണ് ആക്ഷേപം. മനപ്പൂർവം ജീവനക്കാരുടെ എണ്ണം വെട്ടിക്കുറച്ച് പദ്ധതികൾ അട്ടിമറിക്കാനുള്ള രാഷ്ട്രീയ ഇടപെടലുകളാണെന്നാണ് ആരോപണമുയർന്നിരിക്കുന്നത്. 2024-2025 സാന്പത്തിക വർഷം നൽകേണ്ട പ്രവൃത്തികൾക്കുള്ള ഭരണാനുമതി ഉദ്യോഗസ്ഥർ വൈകിപ്പിച്ചിരുന്നു. എന്നാൽ ഈ പ്രവൃത്തികൾക്ക് 2025 ഓഗസ്റ്റ് 31 വരെ വരെ ഭരണാനുമതിക്ക് സമയം ദീർഘിപ്പിച്ച് നൽകിയിട്ടുണ്ട്. ഉദ്യോഗസ്ഥരുടെ മെല്ലെപോക്ക് കാരണം ഈ സമയപരിധിക്കുള്ളിലും ഭരണാനുമതി ലഭ്യമായില്ലെങ്കിൽ പ്രവൃത്തികൾക്ക് വീണ്ടും സമയം ദീർഘിപ്പിച്ച് വാങ്ങേണ്ട സ്ഥിതി വരുകയും പദ്ധതികൾ അനന്തമായി നീളുകയും ചെയ്യും. ഇതിന് വേണ്ടിയുള്ള രാഷ്ട്രീയ ഇടപെടലാണ് നടക്കുന്നതെന്നാണ് സംശയിക്കുന്നത്. പ്രതിപക്ഷ എംഎൽഎമാരുടെ ഫണ്ട് ഉപയോഗിച്ച് നടപ്പാക്കുന്ന പദ്ധതികളാണ് ഇത്തരത്തിൽ മനപ്പൂർവം മന്ദഗതിയിലാക്കി തെരഞ്ഞെടുപ്പ് പ്രചരണ വിഷയമാക്കാനുള്ള ശ്രമം നടക്കുന്നതെന്നാണ് ആക്ഷേപം. എന്നാൽ മാനന്തവാടി എംഎൽഎ ഭരണകക്ഷിയുടെ മന്ത്രിയായതിനാൽ പ്രവൃത്തികൾക്ക് വേഗത്തിലാണ് ഭരണാനുമതി നൽകുന്നതെന്നും പറയുന്നു. ഇത് തികച്ചും രാഷ്ട്രീയ ഇടപെടലുണ്ടെന്ന സംശയത്തിന് ആക്കം കൂട്ടുന്നു. പ്രിൻസിപ്പൽ ഡയറക്ടർ നിയമിക്കുന്ന ജീവനക്കാരെ എവിടെയെല്ലാം ജോലിക്ക് നിയമിക്കണമെന്ന് തീരുമാനിക്കുന്നത് ജോയിന്‍റ് ഡയറക്ടറാണ്. എന്നാൽ നിലവിൽ ഭരണകക്ഷിയിലെ പ്രധാനപ്പെട്ടവരുടെ പിന്തുണയോടെ തദ്ദേശ സ്വയംഭരണ വകുപ്പ് ജോയിന്‍റ് ഡയറക്ടറായി അവരോതിതനായ ഉദ്യോഗസ്ഥൻ ജെഡി ഓഫീസിൽ പ്രാവീണ്യമുള്ള ജീവനക്കാരെ നിയമിക്കാൻ തയാറാകുന്നില്ല. ഉന്നതങ്ങളിൽ നിന്നുള്ള ഇടപെടൽ മൂലം ജോയിന്‍റ് ഡയറക്ടർ അവരോടൊപ്പം നിന്ന് രാഷ്ട്രീയം കളിക്കുകയാണെന്നാണ് ആക്ഷേപം. നേരത്തെ ജില്ലയിലെ എംപി, എംഎൽഎ ഫണ്ടുകളുടെ ഫയൽ പ്രവൃത്തികൾക്ക് ജോയിന്‍റ് ഡയറക്ടറുടെ ഓഫീസിൽ പരിചയ സന്പന്നരായ ജീവനക്കാർ ഉണ്ടായിരുന്നു. എന്നാൽ ഈ വകുപ്പുമായി യാതൊരു അറിവുമില്ലാത്ത ഒരാളെയാണ് ഇപ്പോൾ നിയമിച്ചിരിക്കുന്നത്. ഇത് മനപൂർവമാണെന്നാണ് ആക്ഷേപം.

കുളക്കിമൊട്ടം ഉന്നതിക്കാർ കാലവർഷത്തിൽ ഒറ്റപ്പെട്ടു; ഇടപെടുമെന്ന് എംഎൽഎ

കൽപ്പറ്റ: കോട്ടത്തറ ഗ്രാമപഞ്ചായത്തിലെ കുളക്കിമൊട്ടം ഉന്നതിയിലേക്കുള്ള റോഡ്, പാലം എന്നിവ തകർന്നതിനെ തുടർന്ന് ടി. സിദ്ദിഖ് എംഎൽഎ സന്ദർശിച്ചു. കോട്ടത്തറ ഗ്രാമപഞ്ചായത്തിലെ ഇരുപതോളം കുടുംബങ്ങൾ താമസിക്കുന്ന ഉന്നതിയാണ് കുളക്കിമൊട്ടം. ഇവരുടെ ഏക ആശ്രയമായിരുന്ന പാലം ഈ കഴിഞ്ഞ ദിവസം ഉണ്ടായ ശക്തമായ മഴയിൽ തകരുകയും തോട് വഴിമാറി ഒഴുകിയതിനാൽ റോഡ് രണ്ടായി പിളർന്ന് ഗതാഗതയോഗ്യമല്ലാതാവുകയും ചെയ്തു. ഗ്രാമപഞ്ചായത്ത് അടിയന്തരമായി ഇവർക്കായി മരപ്പാലം ഒരുക്കിയിട്ടുണ്ട്. റോഡ് ഇടിഞ്ഞതിനാൽ പുഴ ഗതിമാറി ഒഴുകുന്ന സാഹചര്യമാണ്. അത് റോഡിന്‍റെ കൂടുതൽ ഭാഗം ഇടിഞ്ഞു പോകുന്നതിനും ഇടയാക്കി. ഈ സാഹചര്യം തുടർന്നാൽ ഈ കുടുംബങ്ങളെ മാറ്റി പാർപ്പിക്കേണ്ട അവസ്ഥയാണ്. ഐടിഡിപി ജില്ലാ പ്രോഗ്രാം ഓഫീസർ, ജില്ലാ ഭരണകൂടം ഉൾപ്പെടെ ഉള്ളവർ ഈ വിഷയത്തിൽ അടിയന്തരമായി ഇടപെടാൻ ആവശ്യമായ നടപടികൾ സ്വീകരിക്കുമെന്ന് എംഎൽഎ അറിയിച്ചു. ഗ്രാമപഞ്ചായത്ത് പ്രസിഡന്‍റ് പി.പി. റനീഷ്, ബ്ലോക്ക് പഞ്ചായത്ത് അംഗം പി.കെ. അബ്ദുറഹിമാൻ, സി.സി. തങ്കച്ചൻ, മാണി ഫ്രാൻസീസ് എന്നിവരും ഉണ്ടായിരുന്നു.

ജില്ലയിൽ 6,500ലധികം തെരുവുനായകൾ : ബത്തേരിയിൽ എബിസി സെന്‍റർ ഇന്ന് പ്രവർത്തനം തുടങ്ങും

കൽപ്പറ്റ: ജില്ലയിൽ 6,500ൽപരം തെരുവുനായകൾ. ദേശീയ മൃഗസംഖ്യാ കണക്കെടുപ്പിന്‍റെ ഭാഗമായി ജില്ലയിൽ മാർച്ച്, ഏപ്രിൽ മാസങ്ങളിൽ നടത്തിയ നിരീക്ഷണത്തിലാണ് ഇത്രയും തെരുവുനായകളെ കണ്ടതെന്ന് ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, ബത്തേരി ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ, മൃഗസംരക്ഷണ വകുപ്പ് ഡപ്യൂട്ടി ഡയറക്ടർ ഡോ.സജി ജോസഫ്, ബത്തേരി ബ്ലോക്ക് പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴസ്ണ്‍ ലത ശശി എന്നിവർ വാർത്താസമ്മേളനത്തിൽ അറിയിച്ചു. ബത്തേരിയിൽ തെരുവുനായ പ്രജനന നിയന്ത്രണ കേന്ദ്രം(എബിസി സെന്‍റർ) ഇന്നും പടിഞ്ഞാറത്തറയിൽ നാല് മാസത്തിനകവും പ്രവർത്തനം തുടങ്ങുമെന്ന് അവർ പറഞ്ഞു. ബത്തേരിയിൽ ബ്ലോക്ക് പഞ്ചായത്തിനു കീഴിൽ വെറ്ററിനറി പോളി ക്ലിനിക് വളപ്പിലാണ് എബിസി സെന്‍റർ പ്രവർത്തിക്കുക. ബത്തേരി മുനിസിപ്പാലിറ്റിയിലെയും ബത്തേരി, പനമരം ബ്ലോക്കുകളിലെ ഒന്പത് പഞ്ചായത്തുകളിലെയും തെരുവുനായകളെ ആണ്‍-പെണ്‍ വ്യത്യാസമില്ലാതെ ഘട്ടങ്ങളായി പിടികൂടി സെന്‍ററിലെത്തിച്ച് വന്ധ്യംകരിക്കും. ചികിത്സയും പേ വിഷബാധയ്ക്കെതിരായ കുത്തിവയ്പ്പും നൽകി ഇവയെ പിടിച്ചെടുത്തുതന്നെ മോചിപ്പിക്കും. നായകളെ തിരിച്ചറിയുന്നതിന് ചെവിയിൽ അടയാളമിടും. തെരുവുനായകളുടെ എണ്ണം നിയന്ത്രിക്കുകയും പൊതുജനാരോഗ്യം സംരക്ഷിക്കുകയുമാണ് എബിസി പദ്ധതി ലക്ഷ്യം. മൃഗസംരക്ഷണ വകുപ്പ് ത്രിതല പഞ്ചായത്തുകളുടെ സഹകരണത്തോടെയാണ് പദ്ധതി പ്രാവർത്തികമാക്കുന്നത്. സംസ്ഥാന സർക്കാരിന്‍റെ 2065/2022 നന്പർ ഉത്തരവ്, മിനിസ്ട്രി ഓഫ് ഫിഷറീസ്, അനിമൽ ഹസ്ബൻഡറി ആൻഡ് ഡയറിയിംഗിന്‍റെ 2022 ലെ അനിമൽ ബർത്ത് കണ്‍ട്രോൾ റൂൾസ് എന്നിവ അടിസ്ഥാനമാക്കിയാണ് എബിസി സെന്‍ററുകളുടെ നിർമാണവും പ്രവർത്തനവും. ബത്തേരിയിൽ ഓപ്പറേഷൻ തിയേറ്റർ, ശസ്ത്രക്രിയയ്ക്ക് നായകളെ തയാറാക്കുന്നതിനുള്ള മുറികൾ, സർജറിക്കുശേഷം അവയെ പരിചരിക്കുന്നതിനു എയർ കണ്ടീഷൻ ചെയ്ത ഷെൽട്ടർ എന്നിവ സജ്ജമാക്കിയിട്ടുണ്ട്. സെന്‍ററിന് അനിമൽ വെൽഫെയർ ബോർഡ് ഓഫ് ഇന്ത്യയുടെ അംഗീകാരം ലഭിച്ചിട്ടുണ്ട്. പടിഞ്ഞാറത്തറ എബിസി സെന്‍ററിന്‍റെ നിർമാണം പൂർത്തിയാക്കി ബോർഡ് അംഗീകാരം നേടാനുള്ള നീക്കം നടന്നുവരികയാണ്. മാനന്തവാടി മുനിസിപ്പാലിറ്റിയും മാനന്തവാടി, കൽപ്പറ്റ ബ്ലോക്കുകളിലെ പഞ്ചായത്തുകളുമാണ് പടിഞ്ഞാറത്തറ സെന്‍ററിനു പരിധിയിൽ വരിക. ഒരു വെറ്ററിനറി സർജൻ, നാല് മൃഗപരിപാലകർ, ഒരു ഓപ്പറേഷൻ തിയേറ്റർ സഹായി, നായ പിടിത്തക്കാർ എന്നിവരടങ്ങുന്ന ടീമാണ് എബിസി കേന്ദ്രത്തിൽ ഉണ്ടാകുക. നായകളെ പാർപ്പിക്കുന്നതിന് ബത്തേരി സെന്‍ററിൽ 69 കൂട് സജ്ജമാക്കിയിട്ടുണ്ട്. ഓരോ തദ്ദേശ ഭരണ സ്ഥാപനവും തെരുവുനായകളുടെ എണ്ണത്തിന് അനുസരിച്ചു പദ്ധതി നടത്തിപ്പിനു വാർഷിക പദ്ധതിയിൽ തുക വകയിരുത്തും. ഒരു നായയെ പിടിച്ച് വന്ധ്യംകരിച്ച് പരിചരണം നൽകുന്നതിന് 1,500 രൂപയാണ് ചെലവ് കണക്കാക്കുന്നത്. നായ ഒന്നിന് 300 രൂപയാണ് പിടിത്തക്കാർക്ക് ലഭിക്കുക. ട്രാൻസ്പോർട്ടേഷന് 200 രൂപയാണ് ചെലവ്. മരുന്നിന് 600 ഉം ആഹാരത്തിന് 400 ഉം രൂപയാണ് ചെലവ് കണക്കാക്കുന്നത്. സ്കൂൾ പരിസരം, മാർക്കറ്റുകൾ, ടൗണുകൾ, ഉന്നതികൾ എന്നിവിടങ്ങളിൽ ചുറ്റിത്തിരിയുന്ന നായകളെയാണ് ആദ്യം പിടികൂടി സെന്‍ററിൽ എത്തിക്കുക. നായകളെ പിടിക്കുന്ന സ്ഥലവും സമയവും അതതു പഞ്ചായത്തുകളെ മുൻകൂട്ടി അറിയിക്കും. പിടിക്കുന്ന നായകളുടെ എണ്ണവും സ്ഥലവും വാർഡ് അംഗം സാക്ഷ്യപെടുത്തും.

പുലി കൊന്ന ആടുകളുടെ ഉടമയ്ക്ക് നഷ്ടപരിഹാരം നൽകി

പുൽപ്പള്ളി: മുള്ളൻകൊല്ലി പഞ്ചായത്തിലെ കബനിഗിരിയിൽ പുലി കൊന്ന മൂന്നു ആടുകളുടെ ഉടമ പി.എ. ജോയിക്ക് വനം വകുപ്പ് നഷ്ടപരിഹാരം നൽകി. 75,000 രൂപയുടെ ചെക്ക് മുള്ളൻകൊല്ലി പഞ്ചായത്ത് പ്രസിഡന്‍റ് പി.കെ. വിജയന്‍റെ സാന്നിധ്യത്തിൽ ചെതലത്ത് റേഞ്ച് ഫോറസ്റ്റ് ഓഫീസർ എം.കെ. രാജീവ് കുമാർ കൈമാറി. വാർഡ് അംഗം അമ്മിണി സന്തോഷ്, വനം ഉദ്യോഗസ്ഥരായ പി.യു. സുരേന്ദ്രൻ, താരാനാഥ്, ശ്രീജിത്, രവീന്ദ്രൻ, ശിവൻ എന്നിവർ സന്നിഹിതരായിരുന്നു.

ഒ.എൻ.വി അനുസ്മരണസദസ് സംഘടിപ്പിച്ചു

മീനങ്ങാടി: പഞ്ചായത്തിന്‍റെ നേതൃത്വത്തിൽ രൂപീകരിച്ച സകലകലാ സാംസ്കാരിക വേദിയുടെ നേതൃത്വത്തിൽ ഒ.എൻ.വി അനുസ്മരണസദസ് സംഘടിപ്പിച്ചു. ചലച്ചിത്ര നിരൂപകനും എഴുത്തുകാരനുമായ ഒ.കെ. ജോണി ഉദ്ഘാടനം ചെയ്തു. എഴുത്തുകാരും കലാകാരൻമാരും ദന്തഗോപുരങ്ങളിൽ കഴിയേണ്ടവരല്ലെന്നും സമൂഹത്തിന്‍റെ അടിത്തട്ടിലുള്ള ശബ്ദമില്ലാത്ത മനുഷ്യരുടെ ശബ്ദമായി മാറേണ്ടവരാണെന്നും അദ്ദേഹം പറഞ്ഞു. കുഞ്ചൻനന്പ്യാർക്കും ചങ്ങന്പുഴയ്ക്കും ശേഷം മലയാളത്തിലുണ്ടായ ഏറ്റവും ശക്തനായ ജനകീയ കവിയാണ് ഒ.എൻ.വി കുറുപ്പ്. അദ്ദേഹത്തിന്‍റെ രചനകൾ കാലത്തെ അതിജീവിക്കുന്നത് അത് സാധാരണമനുഷ്യരുടെ വികാരവിചാരങ്ങൾ ഉൾക്കൊണ്ടതുകൊണ്ടാണെന്ന് ജോണി പറഞ്ഞു. പഞ്ചായത്ത് പ്രസിഡന്‍റ് കെ.ഇ. വിനയൻ അധ്യക്ഷത വഹിച്ചു. വൈസ് പ്രസിഡന്‍റ് കെ.പി. നുസ്റത്ത് വേദി ലോഗോ പ്രകാശനം ചെയ്തു. ബേബി വർഗീസ്, ഉഷ രാജേന്ദ്രൻ, ജോയ് പാലക്കമൂല, സുമി മീനങ്ങാടി, ജോയ് ഐക്കരക്കുടി, സാബു സേവ്യർ, കെ.കെ. മോഹൻദാസ്, എൻ.ആർ. പ്രിയ എന്നിവർ പ്രസംഗിച്ചു. ഡോ. ബാവ കെ. പാലുകുന്ന് സ്വാഗതവും റീമ പപ്പൻ നന്ദിയും പറഞ്ഞു. ഒ.എൻ.വിയുടെ ഗാനങ്ങളും കവിതകളും കോർത്തൊരുക്കിയ കാവ്യസായാഹ്നം നടത്തി.

നിയമസഭ സമിതി ലോക്കൽ ഫണ്ട് അക്കൗണ്ട്സ് കമ്മിറ്റി സിറ്റിംഗ് നടത്തി

കൽപ്പറ്റ: നിയമസഭ സമിതി ജില്ലയിൽ ലോക്കൽ ഫണ്ട് അക്കൗണ്ട്സ് കമ്മിറ്റി സിറ്റിംഗ് നടത്തി. ലോക്കൽ ഫണ്ട് അക്കൗണ്ട്സ് കമ്മിറ്റി ചെയർമാനും പേരാന്പ്ര നിയോജക മണ്ഡലം എംഎൽഎയുമായ ടി.പി. രാമകൃഷ്ണന്‍റെ അധ്യക്ഷതയിൽ കളക്ടറേറ്റ് എ.പി.ജെ ഹാളിൽ ചേർന്ന യോഗത്തിൽ ജില്ലയിലെ ഗ്രാമപഞ്ചായത്തുകളുടെയും നഗരസഭകളുടെയും വികസന നിർമാണ പ്രവർത്തനങ്ങളുമായി ബന്ധപ്പെട്ട അപാകതകൾ പരിശോധിക്കുകയും പരിഹാരം നിർദേശിക്കുകയും ചെയ്തു. നടപടികൾ ഉദ്യോഗസ്ഥർ സത്യസന്ധതയോടെയും സഹകരണമനോഭാവത്തോടെയും സ്വീകരിക്കണമെന്ന് ടി.പി. രാമകൃഷ്ണൻ പറഞ്ഞു. മൃഗ സംരക്ഷണ/ക്ഷീര വികസന മേഖലയുടെ പുരോഗതി, അനധികൃത നിർമാണ പ്രവർത്തനങ്ങൾ, നികുതി നിർണയത്തിലെ അപാകതക തുടങ്ങി തദ്ദേശ സ്വയംഭരണ സ്ഥാപനങ്ങളുടെ പദ്ധതി ആസൂത്രണവുമായി ബന്ധപ്പെട്ട വിവിധ വിഷയങ്ങൾ യോഗത്തിൽ ചർച്ച ചെയ്തു. ജില്ലയുടെ പൊതുവികസനത്തിന് സഹായകരമായ നിലപാടുകൾ ശക്തിപ്പെടുത്താൻ ആവശ്യമായ നിർദേശങ്ങൾ സമിതി മുന്നോട്ടുവച്ചു. വിനോദസഞ്ചാരത്തിന്‍റെ മറവിൽ നടത്തുന്ന ഒറ്റപ്പെട്ട നിയമ വിരുദ്ധ പ്രവർത്തനങ്ങൾ തടയുന്നതിന് ആവശ്യമായ നിലപാട് സ്വീകരിക്കുന്നതിനും കമ്മിറ്റിയിൽ ധാരണയായി. ലോക്കൽ ഫണ്ട് അക്കൗണ്ട്സ് കമ്മിറ്റിയിൽ 2014 മുതൽ 2024 വരെയുള്ള സമാഹൃത ഓഡിറ്റ് റിപ്പോർട്ടുകളിൽ ജില്ലയുമായി ബന്ധപ്പെട്ട ഓഡിറ്റ് പരാമർശങ്ങളുടെ തൽസ്ഥിതി വിവരങ്ങൾ പരിശോധിച്ചു. നിയമസഭ സമിതി അംഗങ്ങളായ, കോട്ടക്കൽ എംഎൽഎ പ്രഫ. ആബിദ് ഹുസൈൻ തങ്ങൾ, കുറ്റ്യാടി എംഎൽഎ കെ.പി. കുഞ്ഞമ്മദ് കുട്ടി, എഡിഎം കെ. ദേവകി, സെക്ഷൻ ഓഫീസർ ടി. സിന്ധു, സംസ്ഥാന ലോക്കൽ ഫണ്ട് ഓഡിറ്റ് ഡയറക്ടർ കെ.ജി. മിനിമോൾ, എൽഎസ്ജിഡി ജോയിന്‍റ് ഡയറക്ടർ ത്രേസ്യാമ്മ ആന്‍റണി, അഡീഷണൽ ഡയറക്ടർ എം ജെ ബിജുക്കുട്ടൻ, ഫിനാൻസ് ജോയിന്‍റ് സെക്രട്ടറി മനോജ് കുമാർ, എൽഎസ്ജിഡി ഡെപ്യൂട്ടി ഡയറക്ടർ സജി തോമസ്, അസിസ്റ്റന്‍റ് ഡയറക്ടർ ജോമോൻ ജോർജ്, ജൂണിയർ സൂപ്രണ്ട് സി. പ്രമോദ്, ഓഡിറ്റ് സെക്ഷൻ അസിസ്റ്റന്‍റ് കെ.എസ്. സനുജ എന്നിവർ നേതൃത്വം വഹിച്ചു. ജില്ലയിലെ 31 തദ്ദേശസ്വയംഭരണ സ്ഥാപനങ്ങളുടെ സെക്രട്ടറിമാർ, ക്ഷീര വികസന ഓഫീസർ, ആർആർ ഡെപ്യൂട്ടി കളക്ടർ, ആർആർ തഹസിൽദാർ, പട്ടികജാതി/വകുപ്പ് ഓഫീസർമാർ, ലൈഫ് മിഷൻ കോർഡിനേറ്റർ, ജില്ല മൃഗസംരക്ഷണ വകുപ്പ് ഓഫീസർ എന്നിവരും പങ്കെടുത്തു.

എം.പി. വീരേന്ദ്രകുമാർ അനുസ്മരണം നടത്തി

കൽപ്പറ്റ: സോഷ്യലിസ്റ്റ് സ്റ്റഡി സെന്‍റർ സംസ്ഥാന സമിതി സംഘടിപ്പിച്ച എം.പി. വീരേന്ദ്രകുമാർ അഞ്ചാം ചരമവാർഷിക അനുസ്മരണം സംസ്ഥാന പ്രസിഡന്‍റ് ബി. രാധാകൃഷ്ണപിള്ള ഉദ്ഘാടനം ചെയ്തു. സോഷ്യലിസത്തിൽ ഊന്നിയ രാഷ്ട്രീയ സാമൂഹിക സാംസ്കാരിക ഇടപെടലുകളിലൂടെ മലയാളിയെ സ്വാധീനിച്ച അപൂർവ പ്രതിഭകളിൽ ഒരാളാണ് വീരേന്ദ്രകുമാർ എന്ന് സമ്മേളനം അഭിപ്രായപ്പെട്ടു. ഏച്ചോം ഗോപി അധ്യക്ഷത വഹിച്ചു. റസാക്ക് കൽപ്പറ്റ മുഖ്യപ്രഭാഷണം നടത്തി. എ.പി. വാസുദേവൻ നായർ, ചീക്കല്ലൂർ ഉണ്ണികൃഷ്ണൻ, വി. മഹേഷ്, രണരാജൻ, പി.എം.കെ. നന്പ്യാർ, എൽ.വി. സുരേഷ്, റോബർട്ട് കോട്ടായി, പോൾ ചെറുകാട്ടൂർ, നിസാർ പള്ളിമുക്ക്, കെ. സുബൈർ, സി.പി. അഷ്റഫ് എന്നിവർ പ്രസംഗിച്ചു. കരുണാകരൻ ചെറുകരയുടെ നിര്യാണത്തിൽ യോഗം അനുശോചനം രേഖപ്പെടുത്തി.

ഇടിഞ്ഞ ചുറ്റുമതിൽ ദേഹത്തുവീണ് മൂന്ന് ഇതര സംസ്ഥാന തൊഴിലാളികൾക്ക് പരിക്ക്

സുൽത്താൻ ബത്തേരി: ഇടിഞ്ഞ ചുറ്റുമതിൽ ദേഹത്തുവീണ് മൂന്ന് ഇതര സംസ്ഥാന തൊഴിലാളികൾക്ക് പരിക്കേറ്റു. ബ്ലോക്ക് ഓഫീസിന് സമീപം പട്ടരുപടിയിൽ ഇന്നലെ ഉച്ചയോടെയാണ് സംഭവം. പശ്ചിമ ബംഗാൾ സ്വദേശികളായ രഞ്ജൻ വർമ(35),ധ്വജൻ അധികാരി(35), ഓമിത്ത് വർമ(32)എന്നിവർക്കാണ് പരിക്കേറ്റത്. അഗ്നി-രക്ഷാസേനയും പോലീസും ചേർന്നാണ് ഇവരെ രക്ഷപ്പെടുത്തി താലൂക്ക് ഗവ.ആശുപത്രിയിൽ പ്രവേശിപ്പിച്ചത്. സ്വകാര്യ വ്യക്തിയുടെ കെട്ടിടത്തിന് ചുറ്റുമതിൽ നിർമിക്കാൻ മണ്ണ് നീക്കുന്നതിനിടെ സമീപവാസിയുടെ ചുറ്റുമതിലാണ് ഇടിഞ്ഞത്.

മഴക്കാലപൂർവ രോഗങ്ങൾ: ജാഗ്രതയിൽ ആരോഗ്യ വകുപ്പ്

കൽപ്പറ്റ: മഴക്കാലപൂർവ രോഗങ്ങൾക്കെതിരേ ജാഗ്രതയുമായി ആരോഗ്യ വകുപ്പ്. ഡെങ്കിപ്പനി, എലിപ്പനി, വയറിളക്കം, കോളറ, മഞ്ഞപ്പിത്തം തുടങ്ങിയ ജലജന്യ രോഗങ്ങൾക്കെതിരായ പ്രതിരോധ പ്രവർത്തനങ്ങൾക്ക് കൂട്ടായ പ്രവർത്തനം വേണമെന്ന് ജില്ലാ മെഡിക്കൽ ഓഫീസർ(ആരോഗ്യം)അറിയിച്ചു. ചെള്ളുപനി (സ്ക്രബ് ടൈഫസ്), എച്ച്1 എൻ1 (പന്നിപ്പനി), സാധാരണ പനി, ശ്വാസകോശ രോഗങ്ങൾ തുടങ്ങിയവ മഴക്കാലങ്ങളിൽ വർധിക്കാൻ സാധ്യതയുണ്ട്. ഡെങ്കിപ്പനി പരത്തുന്ന ഈഡിസ് കൊതുകുകൾ മുട്ടയിട്ട് പെരുകുന്നതു തടയാൻ വീട്ടിലും സ്ഥാപനങ്ങളുടെ പരിസരത്തും വലിച്ചെറിയുന്ന പാത്രങ്ങൾ, കുപ്പികൾ, ചിരട്ടകൾ, വീടിന്‍റെ സണ്‍ഷെയ്ഡുകൾ, വെള്ളം കെട്ടിനിൽക്കാൻ സാധ്യതയുള്ള പ്രതലങ്ങൾ, ടയറുകൾ, ചെടിച്ചട്ടികൾ, പ്ലാസ്റ്റിക് വസ്തുക്കൾ, മുട്ടത്തോട്, മറ്റ് പാഴ് വസ്തുക്കൾ എന്നിവയിൽ വെള്ളം കെട്ടിക്കിടക്കുന്നില്ലെന്ന് ഉറപ്പാക്കണം. ഇൻഡോർ ചെടികൾ, ഫ്രിഡ്ജിന്‍റെ ട്രേ, മേൽക്കൂരകൾ, ടാങ്കുകൾ തുടങ്ങിയവ വൃത്തിയാക്കണം. ആഴ്ചയിലൊരിക്കൽ ഡ്രൈ ഡേ ആചരിക്കുന്നത് കൊതുകുനശീകരണത്തിന് ഏറെ സഹായകമാണ്. സ്കൂളുകളിൽ വെള്ളിയാഴ്ചയും സ്ഥാപനങ്ങളിൽ ശനിയാഴ്ചയും വീടുകളിൽ ഞായറാഴ്ചയും ഡ്രൈ ഡേ ആചരിക്കാൻ ആരോഗ്യവകുപ്പ് നിർദേശിച്ചു. വയലുകളിലും തോടുകളിലും മലിനജലത്തിലും ജോലി ചെയ്യുന്നവർക്ക് എലിപ്പനി പകരാൻ സാധ്യതയുള്ളതിനാൽ ഡോക്സിസൈക്ലിൻ പ്രതിരോധ മരുന്ന് മുൻകൂട്ടി കഴിക്കാൻ ശ്രദ്ധിക്കണമെന്നും നിർദേശിച്ചു. ജലസ്രോതസുകൾ മലിനമാകാൻ സാധ്യതയുള്ളതിനാൽ വയറിളക്കം, ടൈഫോയ്ഡ്, കോളറ, മഞ്ഞപ്പിത്തം തുടങ്ങിയ ജലജന്യ രോഗങ്ങൾ തടയാൻ തിളപ്പിച്ചാറിയ വെള്ളം കുടിക്കണം. ജലസ്രോതസുകൾ ക്ലോറിനേറ്റ് ചെയ്യണം. പാകം ചെയ്ത് ഭക്ഷണത്തിൽ ശുചിത്വം പാലിക്കുക. രോഗലക്ഷണങ്ങൾ ശ്രദ്ധയിൽപ്പെട്ടാൽ സ്വയം ചികിത്സിക്കാതെ ആരോഗ്യ കേന്ദ്രത്തിലെത്തി വിദഗ്ധ ചികിത്സ നേടണം.

വയനാട്ടിൽ മഴയുടെ ശക്തിക്കു ശമനം

കൽപ്പറ്റ: ജില്ലയിൽ മഴയുടെ ശക്തിക്കു ശമനം. കഴിഞ്ഞ ദിവസങ്ങളെ അപേക്ഷിച്ച് ഇന്നലെ പകൽ മഴ കോരിച്ചൊരിഞ്ഞില്ല. കേന്ദ്ര കാലാവസ്ഥാ നിരീക്ഷണ വകുപ്പ് ഇന്ന് ജില്ലയിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. ഇന്നലെ രാവിലെ എട്ടിന് അവസാനിച്ച 24 മണിക്കൂറിൽ വൈത്തിരി പഞ്ചായത്തിലെ ലക്കിടിയിലാണ് കൂടുതൽ മഴ ലഭിച്ചത്-183 മില്ലിമീറ്റർ. പടിഞ്ഞാറത്തറ അത്തിക്കലിൽ 156 മില്ലി മീറ്റർ മഴ രേഖപ്പെടുത്തി. മാനന്തവാടി എടവക പാണ്ടിക്കടവിൽ 114.2 മില്ലി മീറ്റർ മഴ പെയ്തു. മുള്ളൻകൊല്ലി പെരിക്കല്ലൂരിൽ 30.6 എംഎം മഴ ലഭിച്ചു. പുൽപ്പള്ളി ചേകാടിയിൽ 94 എംഎം മഴ രേഖപ്പെടുത്തി. വെങ്ങപ്പള്ളി മാടക്കുന്നിൽ 98 എംഎം മഴ ലഭിച്ചു. മുത്തങ്ങ, പഴേരി ഭാഗങ്ങളിലാണ് കുറവ് മഴ ലഭിച്ചത്. 16 മില്ലി മീറ്റർ മഴയാണ് പ്രദേശത്ത് രേഖപ്പെടുത്തിയത്. മേപ്പാടി, വൈത്തിരി, പൊഴുതന, തരിയോട്, പടിഞ്ഞാറത്തറ, വെള്ളമുണ്ട, തൊണ്ടർനാട്, തിരുനെല്ലി പടിഞ്ഞാറുഭാഗം, പൂതാടി, ബത്തേരി, മീനങ്ങാടി തുടങ്ങിയ സ്ഥലങ്ങളിൽ ഇന്നലെ ഭേദപ്പെട്ട അളവിൽ മഴ കിട്ടി. ജില്ലയിൽ നിറഞ്ഞൊഴുകുന്ന പുഴകളും തോടുകളും അങ്ങിങ്ങ് കരകവിഞ്ഞു. ഇത് വലിയ തോതിൽ കൃഷിനാശത്തിനു കാരണമാകുന്നുണ്ട്. വാഴ, നെല്ല് കൃഷികളാണ് നശിച്ചതിൽ അധികവും. തരിയോടിനു സമീപം കരിവേപ്പിൽ ജോണിന്‍റെ 1,200 വാഴ കാറ്റിലും മഴയിലും വീണു. മാനന്തവാടി താലൂക്കിൽ ഒരു വീട് പൂർണമായും 13 വീട് ഭാഗികമായും തകർന്നു. 18 ദുരിതാശ്വാസ ക്യാന്പുകളിൽ 710 പേർ കൽപ്പറ്റ: കാലവർഷം ശക്തമായതിനെത്തുടർന്ന് ജില്ലയിൽ ആരംഭിച്ച 18 ദുരിതാശ്വാസക്യാന്പുകളിലായി 202 കുടുംബങ്ങളിലെ 710 പേരെ മാറ്റിപ്പാർപ്പിച്ചു. 236 പുരുഷൻമാരും 283 സ്ത്രീകളും 191 കുട്ടികളും 40 വയോജനങ്ങളും ആറ് ഭിന്നശേഷിക്കാരുമാണ് ക്യാന്പുകളിലുള്ളത്. വൈത്തിരി, സുൽത്താൻ ബത്തേരി താലൂക്കുകളിൽ എട്ടുവീതവും മാനന്തവാടി താലൂക്കിൽ രണ്ടും ക്യാന്പുകളാണ് ആരംഭിച്ചത്.

കുറിച്യർമലയിലെ വെള്ളക്കെട്ട് തുറന്നുവിട്ടു

കൽപ്പറ്റ: 2018ൽ ഉരുൾപൊട്ടലുണ്ടായ കുറിച്യർമലയിൽ രൂപപ്പെട്ട വെള്ളക്കെട്ട് വനസേനാംഗങ്ങൾ തുറന്നുവിട്ടു. വലിയ കുളത്തിനു സമാനമായ രീതിയിലാണ് മലമുകളിൽ വെള്ളം കെട്ടിനിന്നത്. വെള്ളക്കെട്ട് നിറഞ്ഞൊഴുകി മണ്ണിടിച്ചിൽ ഉണ്ടാകാനുള്ള സാധ്യത കണക്കിലെടുത്താണ് ചാലുകീറി വെള്ളം മറ്റൊരു ഭാഗത്തേക്ക് തുറന്നു വിട്ടത്. മുൻവർഷങ്ങളിലും ഇതേരീതിയിൽ വെള്ളം തുറന്നുവിട്ടിരുന്നു. റേഞ്ച് ഫോറസ്റ്റ് ഓഫീസർ കെ. ഹാഷിഫ്, എസ്എഫ്ഒ എൻ.ആർ. കേളു, ബിഎഫ്ഒ മാരായ ടി.പി. മിനു, കെ. അനിൽകുമാർ, സി.സി. ശ്യാംകുമാർ, എം. സാജൻ, എം. സുഭാഷ്, നാട്ടുകാരായ ആരിഫ് സെറ്റുകുന്ന്, അബൂബക്കർ ആറാംമൈൽ എന്നിവരടങ്ങുന്ന സംഘമാണ് മണിക്കൂറുകൾ നീണ്ട പരിശ്രമത്തിലൂടെ വെള്ളക്കെട്ട് തുറന്നുവിട്ടത്. ജില്ലാ കളക്ടറുടെ നിർദേശപ്രകാരം ജിയോളജിസ്റ്റ് ഷെൽജുവിന്‍റെ നേത്രത്തിലുള്ള സംഘം സ്ഥലം പരിശോധിച്ചു.

മുട്ടിൽ ഈട്ടിമുറി: 31 കേസുകളിൽ കെഎൽസി നടപടികൾ എങ്ങുമെത്തിയില്ല

കൽപ്പറ്റ: മുട്ടിൽ സൗത്ത് വില്ലേജിലെ റവന്യു പട്ടയഭൂമികളിൽ 2020-2021ൽ നടന്ന അനധികൃത ഈട്ടി മുറിയുമായി ബന്ധപ്പെട്ട കേസുകളിൽ 31 എണ്ണത്തിൽ കെഎൽസി(കേരള ലാൻഡ് കണ്‍സർവൻസി) നടപടികൾ എങ്ങുമെത്തിയില്ല. തീർപ്പാക്കിയ 37 കേസുകളിൽ കണക്കാക്കിയ പിഴ കക്ഷികളിൽ ആരും അടച്ചില്ല. ജില്ലാ ഗവ.പ്ലീഡറും പ്രോസിക്യൂട്ടറുമായിരുന്ന അഡ്വ.ജോസഫ് മാത്യുവിന് വിവരാവകാശ നിയമപ്രകാരം വൈത്തിരി തഹസിൽദാരുടെ കാര്യാലയത്തിൽനിന്നു ലഭിച്ച മറുപടിയിലാണ് ഈ വിവരം. നിയമവിരുദ്ധ ഈട്ടിമുറിയുമായി ബന്ധപ്പെട്ട് 68 കേസുകളാണ് കെഎൽസി നടപടിക്കു വിട്ടത്. ഇതിൽ 37 എണ്ണത്തിൽ 8.29 കോടി രൂപയാണ് പിഴ കണക്കാക്കിയത്. ബാക്കി കേസുകൾ എപ്പോൾ തീർപ്പാക്കുമെന്നതിൽ അനിശ്ചിതത്വം തുടരുകയാണ്. 2021 ഫെബ്രുവരിയിൽ ആരംഭിച്ചതാണ് കെഎൽസി നടപടികൾ. മുട്ടിൽ സൗത്ത് വില്ലേജിൽ റവന്യു പട്ടയഭൂമികളിൽനിന്നു മുറിച്ച മരങ്ങൾ 2021 ജൂണിലാണ് വനം വകുപ്പ് കസ്റ്റഡിയിലെടുത്ത് കുപ്പാടി ഡിപ്പോയിലേക്ക് മാറ്റിയത്. 231 ക്യുബിക് മീറ്റർ ഈട്ടിയാണ് ഡിപ്പോയിലുള്ളത്. ഓരോ വർഷം കഴിയുന്പോഴും തടികളുടെ ഗുണനിലവാരം കുറയുകയാണ്. ഇപ്പോഴത്തെ ചീഫ് സെക്രട്ടറി ഡോ.എ. ജയതിലക് റവന്യു സെക്രട്ടറിയായിരിക്കേ 2020 ഒക്ടോബർ 24ന് പുറപ്പെടുവിച്ച ഉത്തരവിന്‍റെ മറവിലാണ് പൊതുഖജനാവിന് കോടിക്കണക്കിനു രൂപ നഷ്ടം വരുത്തിയ ഈട്ടിമുറി നടന്നത്. റവന്യു പട്ടയഭൂമികളിലെ മരങ്ങൾ പൊതുമുതലായി സംരക്ഷിച്ചുവന്നതും 2020 ഓഗസ്റ്റ് 21ലെ ഹൈക്കോടതി ഉത്തരവ് പ്രകാരം മുറിക്കാൻ അനുമതി ഇല്ലാത്തതുമാണ്. റവന്യു വകുപ്പിന്‍റെ 2020 മാർച്ച് 11ലെ പരിപത്രവും 2020 ഒക്ടോബർ 24ലെ ഉത്തരവും നിയമപ്രാബല്യം ഇല്ലാത്തതാണെന്നു 2021 ജൂലൈയിൽ മരംമുറിക്കേസിലെ പ്രതികളിൽ ചിലരുടെ ജാമ്യാപേക്ഷ പരിഗണിക്കുന്നതിനിടെ ഹൈക്കോടതി വ്യക്തമാക്കിയിരുന്നു. കുപ്പാടി വനം ഡിപ്പോയിൽ സൂക്ഷിച്ചിരിക്കുന്ന ഈട്ടിത്തടികൾ ലേലം ചെയ്യുന്നതിനു അനുവാദം തേടി സൗത്ത് വയനാട് ഡിഎഫ്ഒ സമർപ്പിച്ച ഹർജിയും തടികളുടെ സംരക്ഷണച്ചുമതല ലഭിക്കുന്നതിന് മരംമുറിക്കേസിലെ പ്രതികളിൽ ചിലർ സമർപ്പിച്ച ഹർജിയും വീണ്ടും പരിഗണിക്കുന്നതിന് ജൂണ്‍ ഏഴിലേക്ക് ജില്ലാ അഡീഷണൽ സെഷൻസ് കോടതി മാറ്റിയിരിക്കയാണ്. ഹർജികളിൽ കക്ഷികൾ താത്പര്യം കാട്ടാത്ത സ്ഥിതിയാണുള്ളത്. തടികളുടെ സംരക്ഷണച്ചുമതല വിട്ടുകിട്ടുന്നതിനുള്ള ഹർജിക്ക് ഏകദേശം മൂന്നു വർഷമാണ് പഴക്കം. തടികളുടെ സംരക്ഷണം മുൻനിർത്തി 2023 ജനുവരി ആറിന് ജില്ലാ കോടതി നൽകിയ നിർദേശങ്ങൾ വനം വകുപ്പ് പാലിച്ചിട്ടില്ല. തടികൾ മേൽക്കൂരയുള്ള ഷെഡിൽ നിലത്തുനിന്നു മതിയായ ഉയരത്തിൽ വെയിലോ മഴയോ ഈർപ്പമോ തട്ടാതെ കേസ് തീർപ്പാകുന്നതുവരെസൂക്ഷിക്കണമെന്നായിരുന്നു കോടതി നിർദേശം. ഈട്ടിമുറിയുമായി ബന്ധപ്പെട്ട് വനം വകുപ്പ് രജിസ്റ്റർ ചെയ്ത ഒആർ 01/2021 മുതൽ 43/2021 വരെയുള്ള കേസുകളിൽ കുറ്റപത്ര സമർപ്പണം നടന്നിട്ടില്ല. കേസുകളിൽ ഉൾപ്പെടെ മുഴുവൻ തടികളും വനം വകുപ്പ് കസ്റ്റഡിയിൽ എടുത്തിട്ടില്ല. തടികളുടെ കണ്ടുകെട്ടൽ പൂർത്തിയായില്ല. കണ്ടുകെട്ടൽ നടപടികൾക്കെതിരേ കോടതിയിലുള്ള കേസുകൾ അനിശ്ചിതമായി നീളുകയാണ്. പോലീസ് കേസുകളിൽ 25 ഓളം എണ്ണത്തിൽ കുറ്റപത്രം സമർപ്പിക്കാനുണ്ട്. ഇതിനകം 22 കേസുകളിലാണ് കുറ്റപത്ര സമർപ്പണം നടന്നത്. ഈട്ടി മുറിയിൽ തുടരന്വേഷണം സ്പെഷൽ പബ്ലിക് പ്രോസിക്യൂട്ടർ ശിപാർശ ചെയ്തത് ക്രൈംബ്രാഞ്ച് തള്ളുകയാണുണ്ടായത്.

കാലവർഷക്കെടുതി: ജില്ലയിൽ 242.74 ഹെക്ടറിൽ കൃഷിനാശം

കൽപ്പറ്റ: ജില്ലയിൽ ഈ മാസം 24 മുതൽ ആരംഭിച്ച മഴ ശക്തി പ്രാപിച്ചതോടെ വിവിധ സ്ഥലങ്ങളിലായി 242.74 ഹെക്ടറുകളിലെ കൃഷി വിളകൾക്ക് നാശനഷ്ടം. വൈത്തിരി, പനമരം, മാനന്തവാടി, സുൽത്താൻ ബത്തേരി ബ്ലോക്കുകളിലെ 2,259 കർഷകർക്കാണ് കൃഷി നാശം നേരിടേണ്ടിവന്നത്. 2199.35 ലക്ഷം രൂപയുടെ നഷ്ടമാണ് ജില്ലയിൽ ഇതുവരെ സംഭവിച്ചത്. ഏറ്റവും കൂടുതൽ നാശം സംഭവിച്ചത് വാഴ കൃഷിക്കാണ്. 3,53,850 കുലച്ച വാഴകൾ പൂർണമായി നശിച്ചതായാണ് പ്രാഥമിക കണക്കുകൾ. 92 ഹെക്ടർ സ്ഥലത്തെ നെൽകൃഷിയും പൂർണമായി നശിച്ചു. ശക്തമായ മഴയും വെള്ളപ്പൊക്കവും കാറ്റുമാണ് കൃഷി മേഖലയിൽ വ്യപക നാശനഷ്ടം സംഭവിക്കാൻ കാരണമായത്. മഴ തുടരുന്ന സാഹചര്യത്തിൽ കൃഷിനാശം നേരിട്ട കർഷകർ 24 മണിക്കൂറിനകം നാശനഷ്ടത്തിന്‍റെ കണക്ക് ബന്ധപ്പെട്ട കൃഷി ഉദ്യോഗസ്ഥരെ അറിയിക്കണം. ശേഷം 10 ദിവസത്തിനകം ആവശ്യമായ രേഖകളും കൃഷി നഷ്ടത്തിന്‍റെ ഫോട്ടോയും സഹിതം അക്ഷയ കേന്ദ്രങ്ങളിലെത്തി ഓണ്‍ലൈനായി അപേക്ഷ നൽകണം. ഇൻഷ്വർ ചെയ്ത വിളകൾക്ക് കാലവർഷക്കെടുതിയിലെ നഷ്ടപരിഹാരത്തിന് പുറമേ വിള ഇൻഷ്വറൻസ് ആനുകൂല്യം ലഭിക്കും. ഇതിനായി വിളനാശം സംഭവിച്ച് 15 ദിവസത്തിനകം ഓണ്‍ലൈനായി അപേക്ഷ നൽകാം. പ്രകൃതിക്ഷോഭവുമായി ബന്ധപ്പെട്ട് ജില്ലയിൽ പ്രവർത്തിക്കുന്ന കണ്‍ട്രോൾ റൂമുകളിലും കർഷകർക്ക് ബന്ധപ്പെടാം ഫോണ്‍: 9495012353, 9383471912.

മണ്ണിടിച്ചിൽ: പനമരം ചെറിയപാലത്തിൽ ഗതാഗതം നിരോധിച്ചു

പനമരം: കനത്ത മഴയിൽ സംരക്ഷണ മതിലിന്‍റെ ഭാഗം ഉൾപ്പെടെ ഇടിഞ്ഞതിനെത്തുടർന്ന് നടവയൽ റോഡിലെ ചെറിയപാലത്തിൽ ഗതാഗതം നിരോധിച്ചു. തിങ്കളാഴ്ച സന്ധ്യയോടെയാണ് മണ്ണിടിച്ചിൽ പ്രദേശവാസികളുടെ ശ്രദ്ധയിൽപ്പെട്ടത്. വിവരം അറിഞ്ഞ അധികാരികൾ പാലത്തിൽ ഗതാഗതം നിരോധിക്കുകയായിരുന്നു. വർഷങ്ങൾ പഴക്കമുള്ള ചെറിയപാലം ദുർബലമാണ്. പുതിയ പാലത്തിന്‍റെ പണി നടന്നുവരികയാണ്. പാലത്തിൽ ഗതാഗതം തടഞ്ഞതിനെത്തുടർന്നു ബത്തേരി, പുൽപ്പള്ളി, ദാസനക്കര ഭാഗങ്ങളിലിൽനിന്നു പനമരത്തേക്കും തിരിച്ചുമുള്ള ബസുകൾ ഉൾപ്പെടെ വാഹനങ്ങൾ പച്ചിലക്കാട്, കൂടോത്തുമ്മൽ, കാവടം വഴിയാണ് ഓടുന്നത്.

പണ്ഡിറ്റ് ജവാഹർലാൽ നെഹ്രു അനുസ്മരണം നടത്തി

കൽപ്പറ്റ: ഇന്ത്യയുടെ പ്രഥമ പ്രധാനമന്ത്രിയും നവഭാരത ശിൽപിയുമായ പണ്ഡിറ്റ് ജവാഹർലാൽ നെഹ്രുവിന്‍റെ 61-ാം ചരമവാർഷികദിനത്തോടനുബന്ധിച്ച് വയനാട് ഡിസിസിയിൽ അനുസ്മരണം നടത്തി. ഇന്ത്യയുടെ സ്വാതന്ത്ര്യസമരത്തിന്‍റെ മുൻനിര പോരാളിയും ബ്രിട്ടീഷുകാരോട് പടപൊരുതി പലതവണ ജയിൽവാസം അനുഭവിച്ച നേതാവായിരുന്നു നെഹ്റു. ദീർഘകാലം കോണ്‍ഗ്രസ് പ്രസിഡന്‍റും സ്വാതന്ത്രലബ്ധിക്ക് ശേഷമുള്ള 17 വർഷക്കാലം ഇന്ത്യയുടെ പ്രധാനമന്ത്രിയുമായിരുന്ന അദ്ദേഹം ഈ രാജ്യത്തിന് നൽകിയ സംഭാവനകൾ മറക്കാൻ കഴിയില്ലെന്നും ശിശുക്കളെ എന്നും നെഞ്ചോട് ചേർത്ത് നിർത്തി ഒരു തലമുറയെതന്നെ പൂർണ രാജ്യസ്നേഹമുള്ളവരാക്കി വളർത്തിയെടുത്ത രാജ്യം കണ്ട ഏറ്റവും മികച്ച പ്രധാനമന്ത്രിയായിരുന്നു ജവഹർ ലാൽ നെഹ്രു എന്നും ഡിസിസി പ്രസിഡന്‍റ് എൻ.ഡി. അപ്പച്ചൻ അനുസ്മരിച്ചു. യോഗത്തിൽ പി.പി. ആലി, കെ.വി. പോക്കർ ഹാജി, ഒ.വി. അപ്പച്ചൻ, വിജയമ്മ, ശോഭനകുമാരി, പോൾസണ്‍ കൂവക്കൽ, ഷാജി വട്ടത്തറ, അരുണ്‍ രവീന്ദ്രൻ എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]