1,59,999 രൂപ! വിവോയുടെ ആദ്യ ഫോള്‍ഡബിള്‍ ഫോണ്‍ ഇന്ത്യയിലെത്തി
Wednesday, June 12, 2024 1:10 PM IST
വിവോ എക്സ് ഫോള്‍ഡ് 3 പ്രോ ഇന്ത്യയില്‍ അവതരിപ്പിച്ചു. ഇന്ത്യന്‍ വിപണിയില്‍ വിവോയുടെ ആദ്യ ഫോള്‍ഡബിള്‍ ഫോണാണിത്.
കഴിഞ്ഞവര്‍ഷം മാര്‍ച്ചില്‍ ചൈനയില്‍ വിവോ എക്സ് ഫോള്‍ഡ് 3, എക്സ് ഫോള്‍ഡ് 3 പ്രോ എന്നീ മോഡലുകള്‍ വിവോ പുറത്തിറക്കിയിരുന്നു.
പ്രത്യേകതകള്‍
ക്വാല്‍ക്കോം സ്‌നാപ്ഡ്രാഗണ്‍ 8 ജെന്‍ 3 ചിപ്സെറ്റുള്ള ഫോള്‍ഡബിള്‍ സ്മാര്‍ട്ട്ഫോണ്‍ ആണ് വിവോ എക്സ് ഫോള്‍ഡ് 3 പ്രോ. 6.53 ഇഞ്ച് കവര്‍ ഡിസ്‌പ്ലേയും 8.03 ഇഞ്ച് AMOLED LPO ഫോള്‍ഡിംഗ് ഡിസ്‌പ്ലേയുമായാണുള്ളത്.
വിവോ എക്സ് ഫോള്‍ഡ് 3 പ്രോയ്ക്ക് അഞ്ച് ലക്ഷം മടക്കുകളെ നേരിടാന്‍ സാധിക്കുമെന്നാണ് കമ്പനി സാക്ഷ്യപ്പെടുത്തുന്നത്. അതിനാല്‍ ഫോള്‍ഡബിള്‍ ഫോണ്‍ ആയതിനാല്‍ കുറച്ചുനാള്‍ മടക്കുകയും നിവര്‍ത്തുകയും ചെയ്യുമ്പോള്‍ തകരാറിലാകുമെന്ന ആശങ്കയ്ക്ക് അടിസ്ഥാനമില്ല.
14.98 ഗ്രാം മാത്രം ഭാരമുള്ള ഫോണിന് വീഴ്ചകളെ പ്രതിരോധിക്കാനുള്ള ശേഷിയുമുണ്ട്. 16ജിബി/512ജിബി കോണ്‍ഫിഗറേഷനിലാണ് എക്സ് ഫോള്‍ഡ് 3 പ്രോ ഇന്ത്യയില്‍ എത്തിയിരിക്കുന്നത്. ആന്ഡ്രോയിഡ് 14 അടിസ്ഥാനമാക്കിയുള്ള ഫണ്‍ടച്ച് ഒഎസില്‍ ആയിരിക്കും പ്രവര്‍ത്തനം.
ഐഒഎസ് പിന്തുണയുള്ള 50 മെഗാപിക്സല്‍ അള്‍ട്രാ സെന്‍സിംഗ് പ്രൈമറി കാമറ, 64 മെഗാപിക്സല്‍ 3x ടെലിഫോട്ടോ ലെന്‍സ്, 50 മെഗാപിക്സല്‍ അള്‍ട്രാ വൈഡ് ലെന്‍സ് എന്നിവ അടങ്ങുന്ന കാമറ യൂണിറ്റാണ് ഇതിലുള്ളത്.
സെല്‍ഫികള്‍ക്കും വീഡിയോ കോളുകള്‍ക്കുമായി 32 മെഗാപിക്സലിന്‍റെ മുന്‍ കാമറയുമുണ്ട്. 100വാട്ട് വയര്‍ഡ് ചാര്‍ജിംഗും 50വാട്ട് വയര്‍ലെസ് ചാര്‍ജിംഗുമുള്ള 5,700എംഎച്ച് ബാറ്ററിയാണ് വിവോ എക്സ് ഫോള്‍ഡ് 3 പ്രോയിലുള്ളത്.
സെലസ്റ്റിയല്‍ ബ്ലാക്ക് നിറത്തിലാണ് ഫോണ്‍ ലഭ്യമാകുക. ഏറ്റവും കനം കുറഞ്ഞ ഫോള്‍ഡ് ഫോണെന്ന വിശേഷണത്തോടെ എത്തിയ എക്സ് ഫോള്‍ഡ് 3 പ്രോയ്ക്ക് 1,59,999 രൂപയാണ്. എന്നാല്‍, ലോഞ്ചിംഗ് ഓഫറായി പതിനായിരം രൂപയുടെ ഡിസ്‌കൗണ്ട് ആമസോണില്‍ ലഭിക്കും.
ഈ മാസം 12 മുതലാണ് ഫോണ്‍ ലഭ്യമാകുക. പ്രീ ബുക്ക് ചെയ്യുന്നവര്‍ക്ക് വിവോ പ്രത്യേക ഓഫറും നല്‍കും. എച്ച്ഡിഎഫ്‌സി, എസ്ബിഐ കാര്‍ഡ് ഉപയോഗിച്ച് ഫോണ്‍ വാങ്ങുന്നവര്‍ക്ക് 15,000 രൂപ ഡിസ്‌കൗണ്ടും ലഭിക്കും.
6,666 രൂപ വച്ച് അടക്കാവുന്ന 24 മാസത്തെ നോ കോസ്റ്റ് ഇഎംഐ പദ്ധതിയും വിവോ നല്‍കുന്നുണ്ട്.